Mɛni Nyɔŋmɔ Baafee?

Kɛ́ ohe fĩ bo lɛ, ekã shi faŋŋ akɛ, obaasumɔ ni onaanyo kpakpa ko aye abua bo. Susumɔ nɛɛ hewɔ lɛ, mɛi komɛi enaaa Nyɔŋmɔ akɛ amɛnaanyo, ejaakɛ amɛnuɔ he akɛ efeee nɔ ko nɔ ko ehãaa amɛ. Shi yɛ anɔkwale mli lɛ, Nyɔŋmɔ efee nibii pii ehã wɔ momo, ni ebaatsu naagbai kɛ nɔnai fɛɛ ni wɔkɛkpeɔ ŋmɛnɛ lɛ hu ahe nii. Mɛni Nyɔŋmɔ baafee?

EBAAFO EFƆŊFEEMƆ FƐƐ SƐƐ

Nyɔŋmɔ baakpãtã mɔ tuuntu ni hãa afeɔ efɔŋ lɛ hiɛ, kɛkɛ lɛ, efɔŋfeemɔ fɛɛ sɛɛ efo. Biblia lɛ wie mɔ nɛɛ he akɛ: “Jeŋ muu lɛ fɛɛ kã mɔ fɔŋ lɛ hewalɛ mli.” (1 Yohane 5:19) Satan Abonsam, mɔ ni Yesu tsɛ lɛ akɛ “je nɛɛ nɔyelɔ lɛ,” ji nakai “mɔ fɔŋ” lɛ. (Yohane 12:31) Hewalɛ ni Satan náa yɛ adesai anɔ lɛ ji nɔ diɛŋtsɛ ni kɛ shihilɛi gbohii nɛɛ eba shikpɔŋ lɛ nɔ lɛ. Mɛni Nyɔŋmɔ baafee?

Etsɛŋ, Yehowa Nyɔŋmɔ baatsɔ e-Bi Yesu Kristo nɔ “ekpãtã mɔ ni baanyɛ agbe mɔ, ni ji Abonsam lɛ hiɛ.” (Hebribii 2:14; 1 Yohane 3:8) Anɔkwa, Biblia lɛ tsɔɔ akɛ, Abonsam diɛŋtsɛ le akɛ “be fioo kɛkɛ eyɔɔ” ni abaakpãtã ehiɛ. (Kpojiemɔ 12:12) Nyɔŋmɔ baakpãtã efɔŋfeelɔi fɛɛ hu ahiɛ.​—Lala 37:9; Abɛi 2:22.

EBAAFEE SHIKPƆŊ LƐ PARADEISO

Kɛ́ wɔ-Bɔlɔ lɛ jie efɔŋfeemɔ fɛɛ kɛje shikpɔŋ lɛ nɔ lɛ, ebaatsu yiŋtoo ni eyɔɔ kɛhã adesai kɛ shikpɔŋ lɛ he nii. Mɛni gbɛ wɔbaanyɛ wɔkpa?

Adesai atoiaŋ baajɔ amɛ ni amɛbaahi shi shweshweeshwe. “Mɛi ni he jɔ lɛ, shikpɔŋ lɛ baatsɔ amɛnɔ, ni amɛmii baashɛ amɛhe waa yɛ toiŋjɔlɛ babaoo mli.”​—Lala 37:11.

Niyenii kpakpa baabu. “Shikpɔŋ lɛ nɔ baayi kɛ ŋmaa; ebaafa babaoo kɛteke nɔ yɛ gɔji lɛ ayiteŋ.”​—Lala 72:16.

Abaaná shĩai kpakpai kɛ nitsumɔi ni hi. “Amɛbaamamɔ tsũi ni amɛbaahi mli, ni amɛbaafee wain ŋmɔji ni amɛbaaye amɛmli yibii lɛ. . . . Mɛi ni mihala lɛ baaye amɛninenaa nitsumɔ lɛ mli nii jogbaŋŋ.”​—Yesaia 65:21, 22.

Ani ooshwe ni nibii kpakpai nɛɛ aba? Etsɛŋ kwraa, nakai mɔ fɛɛ mɔ shihilɛ baaji gbi fɛɛ gbi.

EBAAFO HELA KƐ GBELE SƐƐ

Ŋmɛnɛ lɛ, hela mɔmɔɔ wɔ fɛɛ ni wɔgboiɔ, shi etsɛŋ nibii baatsake. Etsɛŋ Nyɔŋmɔ baatsɔ Yesu kpɔmɔ afɔle lɛ nɔ ehã “mɔ fɛɛ mɔ ni heɔ enɔ eyeɔ lɛ hiɛ akakpãtã shi moŋ ená naanɔ wala.” (Yohane 3:16) Mɛni baajɛ mli kɛba?

Abaafo hela sɛɛ. “Mɛi ni yɔɔ mli lɛ ateŋ mɔ ko ekɛŋ akɛ: ‘Mibɛ hewalɛ.’ Akɛ mɛi ni yɔɔ shikpɔŋ lɛ nɔ lɛ atɔmɔ lɛ baake amɛ.”​—Yesaia 33:24.

Mɔ ko gboŋ dɔŋŋ. “Ebaami gbele kɛbaaya naanɔ, ni Nuŋtsɔ Ofe Yehowa baatsumɔ mɔ fɛɛ mɔ hiɛ yaafonui.”​—Yesaia 25:8.

Abaahi shi kɛya naanɔ. “Nikeenii ni Nyɔŋmɔ kɛhãa ji naanɔ wala kɛtsɔ Kristo Yesu, wɔ-Nuŋtsɔ lɛ nɔ.”​—Romabii 6:23.

Abaatee gbohii ashi. “Abaatee jalɔi kɛ mɛi ni ejaaa fɛɛ shi.” (Bɔfoi 24:15) Amɛbaaná kpɔmɔnɔ lɛ ni Nyɔŋmɔ kɛhã lɛ he sɛɛ.

Mɛɛ gbɛ nɔ Nyɔŋmɔ baatsɔ efee enɛɛmɛi fɛɛ?

EBAATO NƆYELI KO NI NƆ BƐ SHISHI

Nyɔŋmɔ baatsɔ ŋwɛi nɔyeli ko, ni Kristo Yesu ji e-Nɔyelɔ lɛ nɔ etsu yiŋtoo ni eyɔɔ kɛhã adesai kɛ shikpɔŋ lɛ he nii. (Lala 110:1, 2) Yesu tsɔɔ esɛɛnyiɛlɔi lɛ ni amɛsɔle yɛ nɔyeli, loo maŋtsɛyeli nɛɛ he akɛ: “Wɔ-Tsɛ ni yɔɔ ŋwɛi, . . . o-Maŋtsɛyeli lɛ aba.”​—Mateo 6:9, 10.

Nyɔŋmɔ maŋtsɛyeli lɛ baaye shikpɔŋ lɛ nɔ, ni ebaajie naagbai kɛ nɔnai fɛɛ kɛje nɔ. Maŋtsɛyeli nɛɛ baafee nɔyeli ni fe fɛɛ ni adesai ená pɛŋ! No hewɔ ni Yesu kɛ enyɛmɔ fɛɛ shiɛ “Maŋtsɛyeli lɛ he sane kpakpa lɛ” be ni eyɔɔ shikpɔŋ lɛ nɔ lɛ, ni ekɛɛ esɛɛnyiɛlɔi lɛ hu akɛ amɛfee nakai nɔŋŋ lɛ.​—Mateo 4:23; 24:14.

Yehowa Nyɔŋmɔ ewo shi akɛ ebaafee nibii kpakpai nɛɛ fɛɛ ehã adesai, ejaakɛ esumɔɔ amɛ waa. Ani enɛ tsirɛɛɛ bo ni ole lɛ, ni otsi obɛŋkɛ lɛ? Kɛ́ ofee nakai lɛ, mɛɛ sɛɛ obaaná? Obaana yɛ sane ni nyiɛ sɛɛ lɛ mli.