Dii Miishɛɛ ni Aná yɛ Maŋtsɛyeli Sanekpakpa lɛ He lɛ Sɛɛ
1 Wɔmiiná hegbɛ ni wɔnáa yɛ Maŋtsɛyeli Sanekpakpa No. 35 ni yitso ji “Ani Gbɔmɛi Fɛɛ Baasumɔ Amɛhe Gbi Ko?” lɛ kɛhamɔ mli lɛ mli ŋɔɔmɔ yɛ otsii fioo ni eho nɛɛ lɛ amli. Shiɛlɔi ni yɔɔ he fɛɛ he lɛ miibɔ mɔdɛŋ koni amɛkɛ Maŋtsɛyeli Sanekpakpa nɛɛ ayaha mɛi babaoo ni sa lɛ bɔ ni amɛaanyɛ. (Mat. 10:11) Eyɛ mli akɛ ato be akɛ tafãa lɛ baaba naagbee yɛ Hɔgbaa, November 16 moŋ, shi kɛ shikpɔŋkukuji babaoo yɛ lolo ni esa akɛ atsu fɛɛ mli nii lɛ, onukpai lɛ baanyɛ aha nyɛya nɔ yɛ Maŋtsɛyeli Sanekpakpa No. 35 lɛ kɛhamɔ mli, shii abɔ ni asafo lɛ yɔɔ eko lɛ.
2 Maŋtsɛyeli Sanekpakpa ni je kpo nɛɛ etée mɛi babaoo amiishɛɛ shi. Amɛnaa akɛ hedɔɔ ni adesai yɔɔ lɛ elaaje ni no hewɔ lɛ amɛsusuɔ nɔ ni yɔɔ wɔsɛɛ be mli kɛha amɛ lɛ he. (2 Tim. 3:3) Wɔmiisumɔ ni wɔdi miishɛɛ ni atée lɛ shi lɛ sɛɛ.
3 Maŋtsɛyeli Sanekpakpa lɛ Woɔ Yibii Babaoo: Beni akɛ Maŋtsɛyeli Sanekpakpa lɛ fã ta yɛ 1995 lɛ, yoo ko ni nine shɛ eko nɔ lɛ ba kpee yɛ Maŋtsɛyeli Asa lɛ nɔ ejaakɛ eesumɔ ni ekase nɔ ni Yehowa Odasefoi heɔ yeɔ lɛ he nii babaoo. Yɛ nakai kpee lɛ shishi lɛ, ekpɛlɛ Biblia mli nikasemɔ nɔ amrɔ nɔŋŋ, ni no sɛɛ lɛ ebaa kpee yɛ bei babaoo mli. Etsɛɛɛ ni eŋma wolo kɛyaha etsutsu sɔlemɔ lɛ, ni ekɛtsɔɔ akɛ ejeee sɔlemɔ lɛ mli nyo dɔŋŋ!
4 Kɛbashi amrɔ nɛɛ, gbɔmɛi ohai abɔ ni yɔɔ shikpɔŋkuku lɛ mli lɛ ekane shɛɛ sane ni yɔɔ Maŋtsɛyeli Sanekpakpa No. 35 lɛ mli lɛ. Shi te amɛfee amɛnii yɛ he amɛha tɛŋŋ? Kɛ amɛnya nɔ ni amɛkane lɛ he waa diɛŋtsɛ po lɛ, amɛteŋ mɛi babaoo tsuŋ he nii ja Yehowa Odasefoi lɛ ateŋ mɔ ko eyasara amɛ ekoŋŋ. Ani ooto gbɛjianɔ koni oku osɛɛ oya? Esa akɛ mɔ he susumɔ ni suɔmɔ yɔɔ mli ni wɔyɔɔ kɛha wɔ naanyo gbɔmɔ lɛ atsirɛ wɔ koni wɔfee nakai. Esa akɛ ayasara mɛi fɛɛ ni ejie miishɛɛ kpo yɛ Maŋtsɛyeli Sanekpakpa lɛ he lɛ ekoŋŋ.
5 Mɛni Obaakɛɛ Beni Oku Osɛɛ Otee? Ekolɛ obaawie saji fioo komɛi yɛ bɔ ni shɛɛ sane ni yɔɔ Maŋtsɛyeli Sanekpakpa lɛ mli lɛ yɔɔ ebe naa pɛpɛɛpɛ lɛ he, koni no sɛɛ lɛ obi sane ko ni teeɔ sane hesusumɔ shi. Bo toi jogbaŋŋ yɛ be mli ni shiatsɛ lɛ diɛŋtsɛ tsɔɔ sane mli lɛ bɔni afee ni onyɛ ole nɔ ni yɔɔ ejwɛŋmɔ mli. No sɛɛ lɛ gbalamɔ ejwɛŋmɔ kɛya sane oti ni sa ni yɔɔ Taoɔ wolo bibioo lɛ mli ni awie he yɛ Maŋtsɛyeli Sanekpakpa lɛ mli lɛ nɔ. Kɛ abo bo toi jogbaŋŋ lɛ, bɔɔ mɔdɛŋ ni oje Biblia mli nikasemɔ shishi amrɔ nɔŋŋ.
6 Naa shiɛmɔ wiemɔi komɛi ni akɛha ni obaanyɛ oka okwɛ beni okuɔ osɛɛ kɛyaa mɛi ni jie miishɛɛ kpo amɛtsɔɔ yɛ “Maŋtsɛyeli Sanekpakpa” No. 35 lɛ he lɛ aŋɔɔ lɛ:
◼ “Ekolɛ obaakai saji ni aŋmala ni mishi miha bo nyɛsɛɛ nɛɛ lɛ. Emli shɛɛ sane lɛ wieɔ nɔ ko pɔtɛɛ ni gbálaa adesai ateŋ ŋmɛnɛ lɛ he—suɔmɔ ni abɛ kɛha mɛi krokomɛi.” Gbalamɔ jwɛŋmɔ kɛya odaseyeli ni akɛha yɛ Maŋtsɛyeli Sanekpakpa lɛ baafa 2 lɛ ni yitso ji “Naanyo Suɔmɔ He Ejɔ” lɛ nɔ. No sɛɛ lɛ bi akɛ, “Ani osusuɔ akɛ Nyɔŋmɔ yiŋtoo ji akɛ adesai ahi shi nɛkɛ?” Ŋmɛɛ gbɛ ni ewie. Gbelemɔ nikasemɔ 5 yɛ Taoɔ wolo bibioo lɛ mli, ni obɔ mɔdɛŋ koni oje Biblia mli nikasemɔ shishi.
◼ “Beni wɔkpe klɛŋklɛŋ lɛ, mishi sane ko ni ji ‘Ani Gbɔmɛi Fɛɛ Baasumɔ Amɛhe Gbi Ko?’ lɛ miha bo. Ani osusuɔ akɛ jeŋ ni tamɔ nɛkɛ baanyɛ aba?” Ŋmɛɛ gbɛ ni ewie. Gbelemɔ nikasemɔ 6 yɛ Taoɔ wolo bibioo lɛ mli, ni okane kuku 6 lɛ. No sɛɛ lɛ kanemɔ shiwoo ni Nyɔŋmɔ kɛha ni yɔɔ Mika 4:3, 4 lɛ. No sɛɛ lɛ, okɛ wolo lɛ aha ni oha nyɛfee nikasemɔ.
◼ “Beni mibasara bo nyɛsɛɛ ko lɛ, mishi wolo ko ni yitso ji ‘Ani Gbɔmɛi Fɛɛ Baasumɔ Amɛhe Gbi Ko?’ lɛ miha bo. Sane ko yɛ mli ni miibi ni akɛ mɔ lɛ afee shia Biblia mli nikasemɔ ni aheee nɔ ko. Míku misɛɛ miba koni mikɛ wolo ni wɔkɛfeɔ nikasemɔ lɛ abatsɔɔ bo. [Okɛ Nilee wolo lɛ atsɔɔ.] Nɛkɛ wolo nɛɛ tsɔɔ be mli ni gbɔmɛi fɛɛ baasumɔ amɛhe ekoŋŋ lɛ mli jogbaŋŋ, ni ehaa sanebimɔi krokomɛi ni ekolɛ obaasusu he lɛ ahetoo tamɔ: Mɛni hewɔ ni wɔgbɔlɔɔ ni wɔgboiɔ? Mɛni hewɔ Nyɔŋmɔ ŋmɛɔ piŋmɔ gbɛ? Mɛni baa wɔsuɔlɔi ni egboi lɛ anɔ?” No sɛɛ lɛ bi akɛ, “Ani manyɛ mafee nikasemɔ lɛ he nɔkwɛmɔnɔ matsɔɔ bo?” Kɛ shiatsɛ lɛ ekpɛlɛɛɛ onibimɔ lɛ nɔ lɛ, bi lɛ kɛji ebaasumɔ ni lɛ diɛŋtsɛ ekane wolo lɛ. Kɛ ebaafee nakai lɛ, shi eko oha lɛ yɛ jara ni atsɔɔ lɛ naa. Too gbɛjianɔ koni oya ekoŋŋ.
7 Kɛ akɛ Maŋtsɛyeli Sanekpakpa No. 35 lɛ tsu shikpɔŋkuku lɛ fɛɛ mli nii agbe naa nɔŋŋ lɛ, wɔbaanyɛ wɔkɛ Nilee wolo lɛ aha yɛ nyɔŋ lɛ mli gbii krokomɛi ni eshwɛ lɛ amli. Abaanyɛ aná shiɛmɔ wiemɔi saŋŋ ni ahala kɛha wolo nɛɛ lɛ yɛ March, June, kɛ November 1996; kɛ June 1997 Wɔ Maŋtsɛyeli Sɔɔmɔ sɔrɔtoi lɛ asɛɛgbɛ baafai lɛ mli.
8 Esa akɛ Maŋtsɛyeli Sanekpakpa lɛ kɛhamɔ krɛdɛɛ nɛɛ akanya wɔ fɛɛ koni wɔha mɔdɛŋ ni wɔbɔɔ yɛ shiɛmɔ nitsumɔ lɛ mli lɛ mli awa. Kɛtsɔ Yehowa yelikɛbuamɔ nɔ lɛ wɔbaanyɛ wɔná hekɛnɔfɔɔ akɛ nɛkɛ tafãa nɛɛ baaye omanye kɛ̃, ni ebaaye ebua koni gbɔmɛi ale yiŋtoo ni Nyɔŋmɔ yɔɔ akɛ eeeha adesai fɛɛ asumɔ amɛhe lɛ. Eba akɛ Yehowa aaaya nɔ ajɔɔ mɔdɛŋ ni wɔkɛ ekãa bɔɔ lɛ nɔ, yɛ be mli ni wɔdiɔ miishɛɛ ni ajieɔ lɛ kpo yɛ Maŋtsɛyeli Sanekpakpa lɛ he lɛ sɛɛ lɛ.