Mɛni Makɛɛ?

Kɛ wɔkɛ gbɔmɛi ni kɛ miishɛɛ hereɔ wɔ sane lɛ nɔ yɛ shiɛmɔ nitsumɔ lɛ mli lɛ kpe lɛ, wɔsumɔɔ ni wɔku wɔ sɛɛ wɔya ekoŋŋ ni wɔyaye amɛ odase lolo. Shi kɛlɛ, ekolɛ wɔnáŋ nɔmimaa yɛ nɔ ni wɔɔkɛɛ ni wɔkɛtee sanegbaa ni baanyiɛ sɛɛ lɛ shi lɛ he. Obaanyɛ oka gbɛ ni tamɔ nɛkɛ okwɛ: Teemɔ sanebimɔ ko ni yɔɔ miishɛɛ shi, koni no sɛɛ lɛ ogbele Rea­son­ing wolo lɛ ni otsɔɔ lɛ hetoo ni jɛ Ŋmalɛ lɛ mli. Ebaafee nɔ ni yeɔ ebuaa akɛ oooŋmala sanebimɔi ni obaanyɛ ojɛ mli ohala ekome ni osusuɔ akɛ ebaaha abo bo toi jogbaŋŋ beni otee oyaasara mɔ ko pɔtɛɛ ko lɛ oshwie shi. Saji ni ato naa yɛ shishigbɛ lɛ ni abua naa kɛjɛ Reasoning wolo lɛ mli lɛ tsɔɔ baafa lɛ mli he ni abaana hetoo fɛɛ hetoo yibɔ okadi lɛ yɛ:

◼ Mɛni hewɔ ni wɔgbɔlɔɔ ni wɔgboiɔ? (98)

◼ Ani yiŋtoi kpakpai yɛ ni wɔɔdamɔ nɔ wɔhe Nyɔŋmɔ nɔ wɔye? (145)

◼ Ani Nyɔŋmɔ susuɔ nɔ ni baa wɔ ni ji adesai anɔ lɛ he lɛɛlɛŋ? (147)

◼ Ani esa akɛ mɔ ko aya ŋwɛi koni eyaná wɔsɛɛ be ni yɔɔ miishɛɛ diɛŋtsɛ? (163)

◼ Mɛni hewɔ ehe hiaa ni wɔle Nyɔŋmɔ gbɛi diɛŋtsɛ ni wɔkɛtsu nii? (196)

◼ Mɛni Nyɔŋmɔ Maŋtsɛyeli lɛ baatsu? (227)

◼ Mɛni ji yiŋtoo ni yɔɔ adesa wala sɛɛ? (243)

◼ Mɛni hewɔ jamɔi efa babaoo nɛkɛ? (322)

◼ Mɛɛ gbɛ nɔ mɔ ko baanyɛ atsɔ ale jamɔ ni ja? (328)

◼ Mɛɛ gbɔmɔ ni yɔɔ hewalɛ Satan ji nɛkɛ yɛ je lɛŋ ŋmɛnɛ? (364)

◼ Mɛni hewɔ Nyɔŋmɔ ŋmɛɔ piŋmɔ gbɛ? (393)

◼ Mɛni hewɔ awuiyeli efa babaoo nɛkɛ? (427)

Obaanyɛ oto sanebimɔi ni tamɔ nɛkɛ lɛ anaa owo o-Biblia loo Reasoning wolo lɛ mli koni ona amrɔ nɔŋŋ kɛ́ ootao. Kɛ oyɛ nɔ ko pɔtɛɛ yɛ ojwɛŋmɔ mli ni obaakɛɛ yɛ sɛɛsaramɔi amli lɛ, ebaawo bo hewalɛ koni oye anɔkwa yɛ miishɛɛ fɛɛ ni atee lɛ shi lɛ sɛɛdii mli.