Taomɔ Mɛi ni Sumɔɔ ni Atsɔɔ Amɛ Nii
1 “Mɔ ko nyɛŋ aba miŋɔɔ, akɛ ja Tsɛ lɛ ni tsu mi lɛ gbala lɛ dã.” (Yoh. 6:44) Yehowa ni taoɔ tsui mli lɛ baawo mɛi ni sumɔɔ ni atsɔɔ amɛ nii ni amɛkɛ nɔ ni amɛkaseɔ lɛ atsu nii lɛ nyɔmɔ. (Yer. 17:10; Yoh. 6:45) Wɔna hegbɛ akɛ wɔɔfee enanemɛi nitsulɔi koni wɔtao heshibalɔi ni miisumɔ ni amɛnine ashɛ jeŋ hee lɛ nɔ lɛ.—Lala 37:11; 1 Kor. 3:9.
2 Yesu wie ekaselɔi lɛ ahe akɛ “gbɔmɛi ahe wolɛi.” (Mat. 4:19) Yɛ be mli ni nakai nitsumɔ lɛ baafee nɔ ni wa yɛ bei komɛi amli lɛ, tsui ni nyɔɔ mɔ mli babaoo jɛɔ yibii kpakpai ni ewoɔ lɛ mli kɛbaa. Yɛ nɔ najiaŋ ni wɔɔtsu nii kɛha wɔ diɛŋtsɛ wɔhe sɛɛnamɔ lɛ, wɔhereɔ “looi” lɛ ayiwala diɛŋtsɛ kɛjɛɔ hiɛkpatamɔ ko mli. Esa akɛ wolɛɛnyo ni yeɔ omanye lɛ ale nɔ ni ebaafee koni ekɛgbala loo lɛ. Yɛ nakai gbɛ nɔ nɔŋŋ lɛ, esa akɛ wɔkɛ Maŋtsɛyeli sane lɛ aha yɛ gbɛ ni ŋɔɔ ni baatee wɔ toibolɔi lɛ amiishɛɛ shi lɛ nɔ. Enɛ ji anɔkwale, titri lɛ, kɛ wɔmiifee sɛɛsaramɔi. Mɛni wɔɔnyɛ wɔkɛɛ?
3 Kɛ ajie miishɛɛ kpo yɛ “Buu-Mɔɔ” lɛ mli saji ni wieɔ jamɔ he lɛ he lɛ, obaanyɛ okɛɛ akɛ:
◼ “Wɔtsɔ hiɛ wɔwie nɔ hewɔ ni mɛi pii sumɔɔɔ ni amɛgbaa jamɔ he sane lɛ he. Ani onuuu he akɛ enɛ yɛ naakpɛɛ waa, akɛni wɔ akutsoŋbii lɛ pii tsɛɔ amɛhe Kristofoi lɛ? Ekolɛ osusuɔ nɔ hewɔ ni jamɔ ji saneyitso ni gbalaa mɛi amli ni teeɔ ŋwanejee shi lɛ he.” Ŋmɛɛ gbɛ ni ewie. Gbelemɔ Reasoning wolo lɛ baafa 322, koni nyɛsusu saji fioo komɛi ahe yɛ saneyitso ni ji “Why Are There So Many Religions?” lɛ shishi.
4 Ekolɛ okɛ gbɛ ni tamɔ nɛkɛ nɔŋŋ baatsu nii koni okɛje jamɔ he sanegbaa shishi:
◼ “Ani gbɛ ko yɛ ni wɔbaanyɛ wɔtsɔ nɔ wɔna nɔmimaa akɛ wɔyɛ anɔkwale jamɔ lɛ? [Ŋmɛɛ gbɛ ni ewie.] Akɛni jamɔi sɔrɔtoi pii yɔɔ hewɔ lɛ, mɛi pii ayiŋ efutu amɛ ni amɛyiŋ efee amɛ kɔshikɔshi.” Gbelemɔ Reasoning wolo lɛ baafa 328-9, yɛ he ni egbaa sanebimɔ ni ji “How can a person know which religion is right?” he sane yɛ lɛ. Wiemɔ sanebimɔ 5 lɛ he sane kuku nɛkɛ, “Do its members truly love one another?” Ani emlibii lɛ sumɔɔ amɛhe lɛlɛŋ?” Tsɔɔmɔ bɔ ni abaanyɛ akase babaoo kɛtsɔ teemɔŋ Biblia nikasemɔ nɔ.
5 Kɛ etamɔ nɔ ni shiatsɛ lɛ miisusu jeŋ shihilɛi ahe waa lɛ, ekolɛ obaasumɔ ni oka enɛ okwɛ:
◼ “Eka shi faŋŋ akɛ osusuɔ shihilɛi gbohii ni esa akɛ wɔdamɔ naa ni wɔɔhi mli kɛ wɔwekui lɛ atsɔsemɔ hu he. Biblia lɛ jieɔ naakpɛɛ shiwoo ni Nyɔŋmɔ baatsu he nii yɛ wɔsɛɛ be ni ebɛŋkɛ lɛ mli lɛ kpo etsɔɔ.” Kanemɔ Abɛi 2:21, 22, ni otsɔɔ bɔ ni Yehowa ewo shi yɛ jeŋ ni naanɔ toiŋjɔlɛ hiɔ mli lɛ he lɛ mli.
6 Kɛ oofee sɛɛsaramɔi beni Maŋtsɛyeli Sane he tafaa krɛdɛɛ lɛ eje shishi sɛɛ lɛ, ofainɛ ni okwɛ ni oshi Maŋtsɛyeli Sane lɛ eko oha shiatsɛmɛi ni bɛ eko lɛ. Abaagba nɔ ni obaakɛɛ yɛ sɛɛsaramɔ mli beni odiɔ Maŋtsɛyeli Sane ni okɛha lɛ sɛɛ lɛ he sane yɛ Wɔ Maŋtsɛyeli Sɔɔmɔ ni baaje kpo yɛ May mli lɛ mli.
7 Akɛni Nyɔŋmɔ Wiemɔ lɛ “yɛ hewalɛ” hewɔ lɛ, esa akɛ wɔbɔ mɔdɛŋ ni wɔkɛtsu nii yɛ wɔ shiɛmɔ wiemɔi amli. (Heb. 4:12) Ha efee oti ni ma ohiɛ akɛ ooowo shiatsɛ lɛ hewalɛ koni ekane Biblia lɛ eha ehe. (Okɛto Bɔfoi lɛ Asaji 17:11 he.) Kɛ wɔkɛ ekãa tsu wɔ gbɛfaŋnɔ lɛ, Yehowa baajɔɔ wɔ mɔdɛŋbɔi lɛ.