“Nyɛfea Enɛ ni Nyɛŋɔkai Mi”
1 Yɛ be mli ni be hoɔ yaa lɛ, adesai haa sɛɛnamɔi ni yɔɔ saji ni he hiaa lɛ ahe lɛ laajeɔ. Yiŋtoo kome nɛɛ hewɔ ni beni Yesu toɔ ‘Nuntsɔ lɛ gbɛkɛnaashi niyenii lɛ’ shishi lɛ efã ekaselɔi lɛ akɛ: “Nyɛfea enɛ ni nyɛŋɔkai mi” lɛ. Enɛ hewɔ lɛ, kɛjɛ be mli ni aje Yesu gbele lɛ gbijurɔyeli lɛ shishi kɛbaa nɛɛ, Kristofoi kɛ bulɛ ‘miijaje Nuntsɔ lɛ gbele lɛ amɛmiitsɔɔ kɛyashi beyinɔ ni eeeba.’—1 Kor. 11:20, 23-26.
2 Etsɛŋ kwraa ni Yesu baahere “asafoku bibioo” ni amɛyifalɛ baa shi lɛ mli naagbee bii lɛ kɛya shihilɛhe ni yɔɔ ŋwɛi lɛ mli. (Luka 12:32; Yoh. 14:2, 3) Afi nɛɛ, shwɛɛnii ni afɔ amɛ mu lɛ kɛ asafo babaoo ni ji “tooi krokomɛi” ni amɛyi faa daa lɛ baaná hegbɛ ekoŋŋ koni amɛkɛye Nuntsɔ lɛ Gbɛkɛnaashi Niyenii lɛ yɛ April 11. (Yoh. 10:16; Kpoj. 7:9, 10) Abaawo hiɛsɔɔ ni wɔyɔɔ kɛha suɔmɔ kpeteŋkpele mli ni Yehowa jɛ etsu e-Bi koome lɛ kɛba yɛ adesai ahewɔ lɛ mli hewalɛ. Abaama Yesu nɔkwɛmɔnɔ, esuɔmɔ, enɔkwayeli kɛtee gbele ní kɛ kpɔmɔnɔ lɛ ha lɛ mli, kɛ enɔyeli bianɛ akɛ Nyɔŋmɔ Maŋtsɛyeli ni ato ama shi lɛ nɔ Maŋtsɛ, kɛ agbɛnɛ hu jɔɔmɔi ni nakai Maŋtsɛyeli lɛ kɛbaaha adesai lɛ anɔ mi. Lɛɛlɛŋ, nifeemɔ ni sa kaimɔ nɛ!
3 Saamɔ Ohe Bianɛ: Nyɛhaa wɔ fɛɛ wɔfea nɔ fɛɛ nɔ ni wɔɔnyɛ koni wɔha Kaimɔ be nɛɛ afee nɔ ni miishɛɛ babaoo yɔɔ mli, kɛ nɔ ni baaha wɔ diɛŋtsɛ kɛ gbɔmɛi fɛɛ ni kɛ wɔ baabɔ lɛ ajie shidaa kpo atsɔɔ. Wɔbaanyɛ wɔtsɔ Biblia mli saji ni kɔɔ Yesu naagbee gbii fioo ni shwɛ yɛ esɔɔmɔ lɛ mli, kɛ nibii ni tee nɔ kɛyashi agbe lɛ lɛ ni wɔɔkane ekoŋŋ lɛ nɔ wɔwo hiɛsɔɔ ni wɔyɔɔ lɛ mli hewalɛ. Wɔbaanyɛ wɔkɛ Gbɔmɔ ni Fe Fɛɛ wolo lɛ yitsei 112-116 lɛ kasemɔ ekoŋŋ afee wɔ weku nikasemɔ yɛ otsii pii ni baatsɔ Kaimɔ lɛ hiɛ lɛ mli lɛ.
4 Gbɔmɛi enyiɛ ole ni baanyɛ aba Kaimɔ lɛ, kɛ́ oootsɔ hiɛ oha amɛná hiɛsɔɔ amɛha nifeemɔ nɛɛ lɛ, ni ooofɔ̃ amɛ nine, ni ohere amɛ atuu? Ŋmalamɔ amɛgbɛi bianɛ, ni ofee bɔ fɛɛ bɔ ni ooonyɛ koni oye obua amɛ ni amɛba. No sɛɛ lɛ, ye obua amɛ koni amɛya nɔ̃ amɛdara yɛ mumɔŋ kɛtsɔ ekãa ni ooowo amɛ koni amɛya kpeei daa lɛ nɔ.
5 Abaato gbɛjianɔi krɛdɛɛi koni mɔ fɛɛ mɔ aya hiɛ yɛ hegbɛ ni ekɛaashiɛ lɛ mli yɛ Kaimɔ be lɛ mli. Ani obaanyɛ oto gbɛjianɔ jogbaŋŋ koni ofee gbɛgbalɔi awalɔ yɛ April? yɛ May? Gbɛ ni hi fe fɛɛ ni wɔɔtsɔ nɔ wɔtsɔɔ akɛ wɔkɛ hiɛsɔɔ kaiɔ nibii fɛɛ ni Yesu afɔleshaa lɛ tsɔɔ kɛhaa wɔ lɛ ateŋ ekome ji ni wɔɔgba wɔ Nyɔŋmɔ, Yehowa he sane, kɛ jɔɔmɔi ni nakai Maŋtsɛyeli ni e-Bi lɛ baaye nɔ lɛ kɛbaaba lɛ wɔtsɔɔ.—Lala 79:13; 147:1.