“Nyɛfea Enɛ ni Nyɛŋɔkai Mi”
Abaakai Yesu Gbele lɛ yɛ April 2
1. Mɛni hewɔ April 2, 2007 ji be ni he hiaa waa lɛ?
1 Mɛi akpekpei abɔ baabua amɛhe naa yɛ jeŋ fɛɛ kɛkai Yesu afɔleshaa gbele lɛ yɛ April 2, 2007. Yesu gbo akɛ mɔ ni fiɔ eŋwɛi Tsɛ lɛ nɔyeli lɛ sɛɛ, ni ekɛ enɛ tsɔɔ akɛ Satan Abonsam naafolɔmɔ akɛ adesai sɔmɔɔ Nyɔŋmɔ yɛ pɛsɛmkunya yiŋtoi ahewɔ lɛ ji amale. (Hiob 2:1-5) Nuŋtsɔ lɛ Gbɛkɛnaashi Niyenii lɛ hu haa wɔkaiɔ akɛ Yesu tsɔ egbele akɛ adesa ni eye emuu, ni esha ko bɛ ehe lɛ nɔ ‘eŋɔ esusuma eha yɛ mɛi pii akpɔmɔ hewɔ.’ (Mat. 20:28) Enɛ hewɔ lɛ, Yesu fã ekaselɔi lɛ akɛ: “Nyɛfea enɛ ni nyɛŋɔkai mi.” (Luka 22:19) Ani hiɛsɔɔ ni oyɔɔ kɛha Nyɔŋmɔ nikeenii ni jara wa nɛɛ etsirɛ bo koni obɔi ohesaamɔ kɛha suɔmɔ nifeemɔ ni nɔ bɛ nɛɛ kaimɔ?—Yoh. 3:16.
2. Mɛɛ gbɛ nɔ wɔɔtsɔ wɔsaa wɔtsui kɛha Kaimɔ lɛ?
2 Saamɔ Otsui: Kɛ́ wɔsusu nibii ni tee nɔ yɛ gbii fioo ni tsɔ Yesu gbele akɛ adesa lɛ hiɛ lɛ eko fɛɛ eko he lɛ, ebaaha wɔsaa wɔtsui kɛha Kaimɔ nɛɛ yeli. (Ezra 7:10) Bɔni afee ni wɔnyɛ wɔfee enɛ lɛ, ato Biblia kanemɔ he gbɛjianɔ krɛdɛɛ ko yɛ Ŋmalɛi lɛ Amli ni Wɔɔkwɛ Daa—2007 kɛ 2007 Calendar lɛ amli. Ato Biblia kanemɔ nɛɛ he gbɛjianɔ koni gbii ni tsɔ Yesu gbele lɛ hiɛ lɛ mli nifeemɔi lɛ kɛ kalenda ni wɔkɛtsuɔ nii amrɔ nɛɛ lɛ mli gbii lɛ akpa gbee. Gbii kɛ bei ni atsi tã yɛ Biblia lɛ mli lɛ jɛ Yudafoi akalenda ní hulushinyɔɔ kɛyashi hulushinyɔɔ feɔ gbi kome yɛ mli lɛ mli. Akadi srɔtofeemɔ nɛɛ, ni ato Kaimɔ lɛ he Biblia kanemɔ lɛ he gbɛjianɔ koni ekɛ Yudafoi akalenda lɛ anyiɛ pɛpɛɛpɛ. Kɛ́ wɔkane Ŋmalɛi nɛɛ ni wɔkɛ sɔlemɔ jwɛŋ Nyɔŋmɔ suɔmɔ lɛ mlikwɔlɛ lɛ he lɛ, ebaaye ebua wɔ koni wɔná Kaimɔ lɛ yeli lɛ he sɛɛ kɛmɔ shi.
3. Mɛɛ gbɛ nɔ wɔɔtsɔ wɔye wɔbua mɛi ni yɔɔ wiemɔ lɛ he miishɛɛ kɛ mɛi ni ekpa shiɛmɔ kɛ kpeeiyaa lɛ koni amɛná Kaimɔ lɛ he sɛɛ?
3 Fɔ̃ɔ Mɛi Krokomɛi Anine: Nɔ ni aŋma ahɔ February Wɔ Maŋtsɛyeli Sɔɔmɔ lɛ mli lɛ tswa tafãa krɛdɛɛ ni akɛbaafɔ̃ mɛi anine kɛba nifeemɔ ni he hiaa nɛɛ shishi lɛ he adafi. Ani oto gbɛjianɔ koni okɛ ohe awo tafãa nɛɛ mli kɛmɔ shi? Ani oŋmala mɛi ni ole amɛ ni obaasumɔ akɛ ofɔ̃ amɛ nine lɛ agbɛi, ni ani obɔi amɛnine fɔ̃ɔ momo? Too gbɛjianɔ koni oshɛ jɛmɛ mra yɛ gbi gbɛkɛ ni abaaye Kaimɔi lɛ koni ohere mɛi ni ofɔ̃ amɛ nine lɛ kɛ mɛi krokomɛi ni yɔɔ wiemɔ lɛ he miishɛɛ lɛ atuu. Ekolɛ ebaahi akɛ okɛ amɛ aaata he kome, ní okwɛ ni amɛhiɛ Biblia kɛ lala wolo. Okɛ amɛ aŋa asafo lɛ mli bii krokomɛi. Kɛ́ agbe nifeemɔ lɛ naa lɛ, feemɔ klalo akɛ obaaha sanebimɔi ni amɛyɔɔ lɛ ahetoo. Fɔ̃ɔ amɛ nine koni amɛbabo maŋshiɛmɔ krɛdɛɛ ni abaaha yɛ April 15 lɛ toi. Onukpai lɛ titri baasumɔ ni amɛkwɛ koni afɔ̃ mɛi ni ekpa shiɛmɔ kɛ kpeeiyaa lɛ nine kɛba Kaimɔ lɛ kɛ maŋshiɛmɔ krɛdɛɛ lɛ shishi.
4. Te wɔɔfee tɛŋŋ wɔye wɔbua mɛi koni amɛya hiɛ yɛ Nyɔŋmɔ mli hemɔkɛyeli kɛ ehe nilee mli kɛ́ aye Kaimɔ lɛ agbe naa?
4 Ye Obua Mɛi Heei kɛ Mɛi ni Ekpa Shiɛmɔ kɛ Kpeeiyaa lɛ Koni Amɛya Hiɛ: Mɔ ni baaha Kaimɔ wiemɔ lɛ baatsɔɔ bɔ ni wɔkɛ mɛi kaseɔ Biblia lɛ wɔhaa lɛ mli kuku, ni ebaawo mɛi heei lɛ hewalɛ koni amɛya nɔ amɛkase Yehowa he nii. Obaanyɛ odamɔ ewiemɔ lɛ nɔ oye obua mɛi ni ofɔ̃ amɛ nine lɛ koni amɛkase Yehowa he nii pii. Kɛ́ amrɔ nɛɛ amɛjeee mɛi ni akɛ amɛ miikase Biblia lɛ, no lɛ kɛ́ aye Kaimɔ lɛ agbe naa nɔŋŋ lɛ yaasara amɛ, ni otsɔɔ amɛ bɔ ni wɔkɛ mɛi feɔ Biblia mli nikasemɔ ni aheee shika lɛ. Bɔni afee ni amɛya hiɛ yɛ Nyɔŋmɔ mli hemɔkɛyeli kɛ ehe nilee mli lɛ, esa akɛ amɛya asafoŋ kpeei hu. (Heb. 10:24, 25) Enɛ hewɔ lɛ, wo amɛ hewalɛ koni amɛbɔi kpeeiyaa daa. Onukpai lɛ baaná he miishɛɛ waa akɛ amɛbaayasara Kristofoi ni ekpa shiɛmɔ kɛ kpeeiyaa ni ba Kaimɔ lɛ ni amɛye amɛbua amɛ koni amɛjwɛŋ saji ni awie he yɛ wiemɔ ni aha lɛ mli lɛ nɔ. Ekolɛ enɛ baaye abua amɛ koni amɛkɛ asafo lɛ abɔi bɔɔ ekoŋŋ.
5. Mɛɛ hewalɛ Kaimɔ lɛ yeli baanyɛ aná yɛ wɔnɔ?
5 Kaimɔ lɛ yeli haa wɔnáa hegbɛ koni wɔkɛ hiɛdɔɔ ajwɛŋ nɔ ni Yehowa kɛ Yesu efee eha wɔ lɛ he. Niianɔjwɛŋmɔ ni tamɔ nɛkɛ lɛ haa suɔmɔ ni wɔyɔɔ kɛha amɛ lɛ mli kwɔɔ, ni enáa wɔjeŋba nɔ hewalɛ hu. (2 Kor. 5:14, 15; 1 Yoh. 4:11) Amrɔ nɛɛ ji be ni esa akɛ wɔsaa wɔ diɛŋtsɛ wɔhe kɛ mɛi ni yɔɔ wiemɔ lɛ he miishɛɛ lɛ kɛha nifeemɔ ni he hiaa ni ‘wɔkɛjajeɔ Nuŋtsɔ lɛ gbele lɛ wɔtsɔɔ’ lɛ.—1 Kor. 11:26.