Ye Obua Mɛi Krokomɛi ni Amɛná Kpɔmɔnɔ lɛ He Sɛɛ
Abaaye Kristo Gbele lɛ Kaimɔ lɛ yɛ April 12
1. Mɛni ji gbɛ kome ni Nyɔŋmɔ webii tsɔɔ nɔ amɛjieɔ hiɛsɔɔ kpo amɛtsɔɔ kpɔmɔnɔ lɛ?
1 “Shidaa aha Nyɔŋmɔ yɛ enikeenii ni anyɛŋ agba lɛ hewɔ!” (2 Kor. 9:15) Nɛkɛ wiemɔi nɛɛ tsɔɔ bɔ ni wɔhiɛ sɔɔ ekpakpa kɛ mlihilɛ ni Nyɔŋmɔ jieɔ lɛ kpo etsɔɔ ewebii lɛ kɛtsɔ e-Bi Yesu Kristo nɔ lɛ jogbaŋŋ. Hiɛsɔɔ ni tamɔ nɛkɛ ni wɔyɔɔ lɛ baaje kpo faŋŋ, titri lɛ, yɛ be mli ni wɔbuaa wɔhe naa kutuu kɛyeɔ Kristo Kaimɔ lɛ yɛ April 12 lɛ.
2. Namɛi fataa Yehowa tsuji ahe kɛyeɔ Kaimɔ lɛ, ni mɛni esa akɛ amɛfee bɔni afee ni amɛná kpɔmɔnɔ lɛ he sɛɛ?
2 Daa afi lɛ, mɛi krokomɛi aaafee akpekpei nyɔŋma fataa Yehowa tsuji ahe kɛyeɔ Kaimɔ lɛ. Kɛtsɔ nakai feemɔ nɔ lɛ, amɛjieɔ hiɛsɔɔ ni sa kpo amɛtsɔɔ Kristo afɔleshãa lɛ. Shi kɛlɛ, ehe miihia ni amɛná kpɔmɔnɔ lɛ mli hemɔkɛyeli bɔni afee ni amɛná he sɛɛ. (Yoh. 3:16, 36) Te wɔɔfee tɛŋŋ wɔye wɔbua amɛ ni amɛná hemɔkɛyeli ni tamɔ nɛkɛ? Yɛ Kaimɔ be nɛɛ mli lɛ, wɔbaanyɛ wɔwo amɛ hewalɛ koni amɛkase Biblia lɛ, ni amɛya asafoŋ kpeei ni afeɔ daa otsi lɛ hu. Susumɔ ŋaawoi ni nyiɛ sɛɛ nɛɛ ahe okwɛ.
3. Kɛ wɔmiifɔ̃ mɛi anine kɛmiiba Kaimɔ lɛ, mɛɛ gbɛ nɔ wɔbaanyɛ wɔtsɔ wɔje Biblia mli nikasemɔ shishi?
3 Biblia Mli Nikasemɔi: Kɛ ofɔ̃ mɛi ni yɔɔ wiemɔ lɛ he miishɛɛ lɛ anine kɛba Kaimɔ lɛ, mɛni hewɔ obɔɔɔ mɔdɛŋ akɛ okɛ amɛ aaaje Biblia mli nikasemɔ shishi yɛ Biblia lɛ Tsɔɔ wolo lɛ mli? Bɔɔ mɔdɛŋ ni ogbála Kaimɔ lɛ yeli lɛ mli otsɔɔ mɔ lɛ kɛtsɔ saneyitso ni ji “Nuŋtsɔ lɛ Gbɛkɛnaashi Niyenii—Gbi Jurɔ ko ni Woɔ Nyɔŋmɔ Hiɛ Nyam” ni yɔɔ baafa 206-208 lɛ ní ooogbele koni nyɛsusu he lɛ nɔ. Nyɛbaanyɛ nyɛsusu nakai sane lɛ he nyɛgbe naa yɛ klɛŋklɛŋ saramɔ lɛ mli loo yɛ saramɔ ni ji enyɔ lɛ mli, ekolɛ ákɛ Biblia mli nikasemɔ ni afeɔ yɛ shinaa lɛ naa. Kɛ nyɛgbe nakai sane lɛ he susumɔ naa lɛ, ekolɛ mɔ lɛ baasumɔ ni okɛ lɛ asusu yitso 5 ni ji, “Kpɔmɔnɔ Lɛ—Nyɔŋmɔ Nikeenii ni Fe Fɛɛ” lɛ he. Kɛ nyɛná nyɛje Biblia mli nikasemɔ ni afeɔ daa lɛ shishi nɔŋŋ lɛ, kuu osɛɛ ni okɛ lɛ ayasusu wolo lɛ klɛŋklɛŋ yitsei ejwɛ lɛ mli nikasemɔi lɛ ahe.
4. Namɛi wɔbaanyɛ wɔkɛ amɛ aje Biblia mli nikasemɔ shishi yɛ Kaimɔ be nɛɛ mli?
4 Namɛi wɔbaanyɛ wɔtsɔ gbɛtsɔɔmɔ nɛɛ nɔ wɔkɛ amɛ aje Biblia mli nikasemɔ shishi? Ekolɛ onanemɛi nitsulɔi, onanemɛi skulbii, loo okutsoŋbii lɛ ateŋ mɛi komɛi baakpɛlɛ ni okɛ amɛ asusu saji nɛɛ ahe. Nyɛmimɛi hii baanyɛ amɛkɛ nyɛmimɛi yei ni yɔɔ asafo lɛ mli lɛ awumɛi ni jeee heyelilɔi lɛ akase nii. Ni kaaha ohiɛ miikpá bo diɛŋtsɛ owekumɛi ni jeee Odasefoi lɛ anɔ. Kɛfata he lɛ, wɔbaasumɔ ni wɔbɔ mɔdɛŋ fɛɛ ni wɔɔnyɛ ni wɔkɛfɔ̃ nine wɔtsɛ mɛi ni be ko ni eho lɛ amɛkɛ asafo lɛ bɔɔ yɛ ekãa mli lɛ kɛba Kaimɔ lɛ. (Luka 15:3-7) Eba akɛ wɔɔye wɔbua mɛi fɛɛ ni tamɔ nɛkɛ lɛ koni amɛná kpɔmɔnɔ lɛ he sɛɛ.
5. Te wɔɔfee tɛŋŋ wɔwo Biblia mli nikaselɔi kɛ mɛi krokomɛi ni yɔɔ wiemɔ lɛ he miishɛɛ lɛ hewalɛ koni amɛba asafoŋ kpeei srɔtoi ni afeɔ daa otsi lɛ?
5 Asafoŋ Kpeei: Kaimɔ lɛ ji klɛŋklɛŋ kpee ni Biblia mli nikaselɔi lɛ ateŋ mɛi babaoo kɛ mɛi krokomɛi ni yɔɔ wiemɔ lɛ he miishɛɛ lɛ yaa. Shi kɛlɛ, te wɔɔfee tɛŋŋ wɔwo amɛ hewalɛ koni amɛba wɔkpeei krokomɛi ni eshwɛ lɛ? April 2005 Wɔ Maŋtsɛyeli Sɔɔmɔ lɛ baafa 8 lɛ kɛ ŋaawoi ni nyiɛ sɛɛ nɛɛ haa: “Tsɔɔmɔ amɛ maŋshiɛmɔ ni abaaha lɛ saneyitso. Okɛ saji ni abaakase yɛ Buu-Mɔɔ Nikasemɔ lɛ kɛ Asafo Woloŋ Nikasemɔ lɛ shishi lɛ atsɔɔ amɛ. Tsɔɔmɔ amɛ bɔ ni afeɔ Teokrase Sɔɔmɔ Skul kɛ Sɔɔmɔ Kpee lɛ ahaa. Kɛ́ oyɛ nifeemɔ yɛ skul lɛ mli lɛ, obaanyɛ ofee otsɔɔ amɛ. Okɛ amɛ agba saji otii ni sa kadimɔ ni awie he yɛ kpeei lɛ ashishi lɛ he sane. Okɛ wɔkpeei lɛ ahe mfonirii ni yɔɔ wɔwoji lɛ amli lɛ aye abua amɛ koni amɛna nɔ ni afeɔ yɛ jɛmɛ lɛ. Kɛ́ okɛ amɛ je nikasemɔ shishi nɔŋŋ lɛ, fɔ̃ɔ amɛ nine koni amɛba kpeei lɛ.”
6. Mɛɛ gbɛ̀i enyɔ wɔbaanyɛ wɔtsɔ nɔ wɔye wɔbua mɛi ni hiɛ tsui ni ja lɛ koni amɛná kpɔmɔnɔ lɛ he sɛɛ?
6 Kɛ wɔkɛ mɛi ni hiɛ tsui ni ja lɛ fee Biblia mli nikasemɔ daa ní wɔha amɛba asafoŋ kpeei daa lɛ, bei pii lɛ amɛyaa amɛhiɛ oyayaayai yɛ mumɔŋ. No hewɔ lɛ, eba akɛ wɔbaawo mɛi krokomɛi hewalɛ koni amɛkɛ mumɔŋ nibii nɛɛ atsu nii jogbaŋŋ bɔni afee ni amɛná Nyɔŋmɔ nikeenii ni da fe fɛɛ—ni ji kpɔmɔnɔ—lɛ he sɛɛ.