Nyɛhaa Wɔtsɔa akɛ Wɔhiɛ Sɔɔ Nii Abaaye Kaimɔ lɛ April 17
1. Mɛni lalatsɛ lɛ wie ni sa jogbaŋŋ, titri lɛ yɛ Kaimɔ be lɛ mli?
1 Akɛni lalatsɛ lɛ hiɛ sɔ bɔ ni Yehowa jie emɔbɔnalɛ lɛ kpo etsɔɔ lɛ shii abɔ kɛ bɔ ni ejie lɛ yɛ shihilɛi srɔtoi amli hewɔ lɛ, ekɛɛ akɛ: “Mɛni maŋɔ-to Yehowa najiaŋ yɛ ejurɔ fɛɛ ni efee mi lɛ hewɔ?” (Lala 116:12) Ŋmɛnɛ lɛ, Nyɔŋmɔ tsuji yɛ yiŋtoi ni fe lalatsɛ lɛ nɔ lɛ ni amɛaadamɔ nɔ amɛda Yehowa shi. Beni ajɛ mumɔŋ aŋma wiemɔi nɛɛ sɛɛ afii ohai abɔ lɛ, Yehowa kɛ nikeenii ni fe fɛɛ, ni ji kpɔmɔnɔ lɛ, duro adesai. Wɔyɛ yiŋtoo kpakpa hewɔ ni esa akɛ wɔda Yehowa shi beni wɔsaa wɔhe koni wɔkai Kristo gbele lɛ yɛ April 17 lɛ.—Kol. 3:15.
2. Mɛɛ yiŋtoi komɛi ahewɔ esa akɛ wɔhiɛ asɔ kpɔmɔnɔ lɛ?
2 Jɔɔmɔi ni Kpɔmɔnɔ lɛ Kɛbaa: Kɛtsɔ kpɔmɔnɔ lɛ nɔ lɛ, wɔnáa “wɔhe eshaifaa.” (Kol. 1:13, 14) Enɛ haa wɔkɛ henilee kpakpa jáa Yehowa. (Heb. 9:13, 14) Ehaa wɔnyɛɔ wɔkɛ ekãa yaa Yehowa hiɛ yɛ sɔlemɔ mli. (Heb. 4:14-16) Mɛi ni náa hemɔkɛyeli yɛ kpɔmɔnɔ lɛ mli lɛ yɛ gbɛkpamɔ ni nɔ bɛ akɛ amɛbaaná naanɔ wala!—Yoh. 3:16.
3. Te wɔɔfee tɛŋŋ wɔtsɔɔ akɛ wɔhiɛ sɔɔ kpɔmɔnɔ ni Yehowa kɛha wɔ lɛ?
3 Bɔ ni Wɔɔfee Wɔtsɔɔ akɛ Wɔhiɛ Sɔɔ Kpɔmɔnɔ Lɛ: Gbɛ kome ni wɔɔtsɔ nɔ wɔtsɔɔ akɛ wɔhiɛ sɔɔ nii ji, ni wɔkane Kaimɔ lɛ he Biblia kanemɔ lɛ daa gbi ni wɔjwɛŋ nɔ. Ato February 1, 2011, Blɔfo Buu-Mɔɔ lɛ mli sane ni yitso ji “Are You Prepared for the Most Important Day of the Year?” (Ani Osaa Ohe Kɛha Gbi ni He Hiaa Fe Fɛɛ yɛ Afi lɛ Mli Lɛ?) lɛ he gbɛjianɔ koni eye ebua wɔ kɛfee enɛ. Agbɛnɛ hu, wɔbaanyɛ wɔjɛ wɔtsuiŋ wɔkɛɛ Yehowa bɔ ni wɔhiɛ sɔɔ kpɔmɔnɔ lɛ haa yɛ sɔlemɔ mli. (1 Tes. 5:17, 18) Kɛ́ wɔbo Yesu famɔ lɛ toi ni wɔtee Kaimɔ lɛ, wɔkɛ no tsɔɔ akɛ wɔhiɛ sɔɔ nii. (1 Kor. 11:24, 25) Kɛfata he lɛ, wɔbaanyɛ wɔfɔ̃ mɛi babaoo nine kɛba Kaimɔ lɛ ni wɔkɛ nakai feemɔ akase bɔ ni Yehowa suɔmɔ lɛ mli lɛɛ lɛ.—Yes. 55:1-3.
4. Mɛni esa akɛ efee wɔfaishitswaa?
4 Yehowa tsuji ni hiɛ sɔɔ nii lɛ ebuuu Kaimɔ lɛ akɛ kpee ko kɛkɛ. Amɛbuɔ lɛ akɛ no ji kpee ni he hiaa fe fɛɛ yɛ afi lɛ mli! Beni Kaimɔ lɛ bɛŋkɛɔ lɛ, nyɛhaa wɔtswaa wɔfai shi taakɛ lalatsɛ lɛ fee lɛ, mɔ ni ŋma akɛ: “Jiemɔ Yehowa yi, misusuma, ni ohiɛ akakpa enijujifeemɔi lɛ fiaa nɔ!”—Lala 103:2.