Sɔɔmɔ Kpee He Gbɛjianɔtoo

Otsi ni Jeɔ Shishi March 13

Lala 41

Min. 10: Asafoŋ adafitswai. Adafitswai ni ahala kɛjɛ Wɔ Maŋtsɛyeli Sɔɔmɔ lɛ mli. Ha akɛ gbɛtsɔɔmɔi ni yɔɔ baafa 8 lɛ loo shiɛmɔ wiemɔi krokomɛi ni baahi aha nyɛsafo lɛ shikpɔŋkuku lɛ atsu nii ni akɛfee nɔkwɛmɔnɔ ni tsɔɔ bɔ ni abaafee akɛ March 1 Buu-Mɔɔ aha, kɛ gbɛ ni abaatsɔ nɔ akɛ March Awake! lɛ he klɛŋklɛŋ shiɛmɔ wiemɔ lɛ atsu nii. Kɛɛmɔ shiɛlɔi lɛ ni amɛkɛ Awake! wolo tɛtrɛɛ lɛ sɛɛgbɛ loo ninefɔ̃ɔ he wolo ni akala lɛ atsu nii kɛfɔ̃ shiatsɛmɛi lɛ anine kɛba Kaimɔ lɛ shishi.

Min. 15: “Ye Obua Mɛi Krokomɛi ni Amɛná Kpɔmɔnɔ lɛ He Sɛɛ.”a Fã ni baanyiɛ nifeemɔ nɛɛ sɛɛ lɛ baaya nɔ ekɛ wɔ asusu bɔ ni wɔɔfee wɔkɛ Biblia lɛ Tsɔɔ wolo lɛ baafa 206-208 lɛ atsu nii yɛ be mli ni wɔfɔ̃ɔ mɛi anine kɛbaa Kaimɔ lɛ he.

Min. 20: Nuŋtsɔ lɛ Gbɛkɛnaashi Niyenii—Gbi Jurɔ ko ni Woɔ Nyɔŋmɔ Hiɛ Nyam. Sanebimɔ kɛ hetoo he sanegbaa ni baadamɔ Biblia lɛ Tsɔɔ wolo lɛ baafa 206-208 lɛ nɔ. Be mli ni okɛ nɔ ni shɛɛɛ miniti kome kpaa wiemɔ lɛ hiɛ lɛ, tsɔɔmɔ bɔ ni aaafee akɛ shiatsɛ lɛ aje sane lɛ he susumɔ shishi kɛtsɔ klɛŋklɛŋ kuku lɛ kanemɔ nɔ. No sɛɛ lɛ ha toibolɔi lɛ aha sanebimɔi ni nyiɛ sɛɛ nɛɛ ahetoo yɛ be mli ni ohaaa akane kukuji lɛ amli: (kk. 2) Mɛɛ be Yesu to egbele lɛ Kaimɔ lɛ shishi? (kk. 3) Shii enyiɛ esa akɛ aye Nuŋtsɔ lɛ Gbɛkɛnaashi Niyenii lɛ? (kk. 4) Te Biblia lɛ tsɔɔ Kaimɔ lɛ yeli lɛ mli ehaa tɛŋŋ? (kk. 5) Te wɔfeɔ tɛŋŋ wɔleɔ akɛ Yesu haaa aboloo lɛ atsake kɛtsɔ̃ egbɔmɔtso diɛŋtsɛ ni ehaaa wein lɛ hu atsake kɛtsɔ̃ elá diɛŋtsɛ lɛ? (kk. 6) Mɛni aboloo ni masha bɛ mli lɛ damɔ shi kɛha? (kk. 7) Mɛni wein tsuru lɛ damɔ shi kɛha? (kk. 8) Namɛi pɛ esa akɛ amɛye aboloo lɛ ní amɛnu wein lɛ eko? (kk. 9) Mɛɛ be ayeɔ Kaimɔ lɛ daa afi, ni mɛni hewɔ esa akɛ wɔya eko lɛ? Maa ŋmalɛi otii lɛ anɔ mi bɔ ni be baaŋmɛ gbɛ. Wo mɛi fɛɛ hewalɛ ni amɛkɛ sanebimɔi ni yɔɔ mlɛo ni tamɔ nɔ ni akɛha yɛ fã nɛɛ mli lɛ atsu nii, ní amɛkɛ Biblia mli nikaselɔi kɛ mɛi krokomɛi ní amɛbaafɔ̃ amɛ nine kɛba Kaimɔ lɛ asusu saji nɛɛ ahe kɛtsɔ kukuji lɛ amli ní amɛkɛ amɛ aaakane, ni amɛkɛ amɛ asusu saji otii lɛ ahe lɛ nɔ.

Lala 134 kɛ naagbee sɔlemɔ.

Otsi ni Jeɔ Shishi March 20

Lala 18

Min. 8: Asafoŋ adafitswai. Tĩi saji otii ni yɔɔ akrabatsa ni ji “Kaimɔ lɛ Yeli He Kaimɔi” lɛ mli lɛ amli.

Min. 17: Gbɛfaŋnɔ ni Kristo Tsuɔ He Nii yɛ Nyɔŋmɔ Gbɛjianɔtoo lɛ Mli. Wiemɔ ni abaajɛ Ato Wɔhe Gbɛjianɔ wolo lɛ baafa 10-13 lɛ mli aha. Kɛ́ oowie klɛŋklɛŋ kukuji enyɔ ni yɔɔ saneyitso bibioo ni ji “Gbɛfaŋnɔ ni Kristo Tsuɔ He Nii” lɛ shishi lɛ he lɛ, okɛ minitii etɛ atsɔɔ gbɛ̀i ní aaatsɔ nɔ akɛ Kaimɔ he ninefɔ̃ɔ he wolo lɛ atsu nii. Tĩi gbɛtsɔɔmɔi ni yɔɔ February 2006 Wɔ Maŋtsɛyeli Sɔɔmɔ lɛ baafa 3, kuku 3 lɛ mli.

Min. 20: “Bɔ ni Aaafee Aje Nikasemɔi Ashishi yɛ Biblia lɛ Tsɔɔ Wolo lɛ Mli.” Toibolɔi kɛ sanegbaa kɛ nɔkwɛmɔnii ni damɔ nɔ ni aŋma ahɔ mli lɛ baafa 3 lɛ nɔ. Wɔbaanyɛ wɔkɛ Biblia lɛ Tsɔɔ wolo lɛ atsu nii amrɔ nɔŋŋ ni wɔkɛ mɛi ni jieɔ miishɛɛ kpo lɛ aje Biblia mli nikasemɔ shishi ni wɔkɛfee hu. Too gbɛjianɔ ni afee nɔkwɛmɔnii etɛ ni asaa he jogbaŋŋ ni tsɔɔ bɔ ni abaafee akɛ (1) baafa 4-5, (2) baafa 6, kɛ (3) klɛŋklɛŋ kuku ni yɔɔ baafa 7 lɛ atsu nii ni akɛje Biblia mli nikasemɔ shishi beni afeɔ sɛɛkuu-kɛsaramɔ lɛ. Wiemɔ nɔkwɛmɔnii lɛ eko fɛɛ eko he kɛtsɔ hiɛ, ní otĩ mli beni agbe efeemɔ naa lɛ. Kɛ́ ehe baahia lɛ, abaanyɛ afolɔ kukuji ni yɔɔ Biblia lɛ Tsɔɔ wolo lɛ mli lɛ hesusumɔ lɛ anɔ yɛ nɔkwɛmɔnii lɛ amli. Yɛ nɔkwɛmɔnɔ lɛ eko fɛɛ eko mli lɛ, ha shiɛlɔ lɛ ato gbɛjianɔ kɛha sɛɛkuu-kɛsaramɔ ni ekɛmu naa.

Lala 125 kɛ naagbee sɔlemɔ.

Otsi ni Jeɔ Shishi March 27

Lala 44

Min. 13: Asafoŋ adafitswai. Kaimɔ shiɛlɔi koni amɛkɛ shiɛmɔyaa he akɔntaabui kɛha March lɛ aha. Kanemɔ shika he akɔntaabuu lɛ ni otsĩ shika ni akɛke ni nitsumɔhe nine lɛ etsɔɔ akɛ enine eshɛ nɔ lɛ tã otsɔɔ. Ha akɛ gbɛtsɔɔmɔi ni yɔɔ baafa 8 lɛ atsu nii ni akɛfee nɔkwɛmɔnɔ ni tsɔɔ bɔ ni abaafee akɛ March 15 Buu-Mɔɔ loo gbɛ ni abaatsɔ nɔ akɛ March Awake! lɛ he shiɛmɔ wiemɔ ni ji enyɔ ní akɛha lɛ atsu nii. Agbɛnɛ hu tsɔɔmɔ gbɛ ni aaatsɔ nɔ akɛ ninefɔ̃ɔ he wolo ni akala lɛ atsu nii kɛfɔ̃ mɛi ni yɔɔ wiemɔ lɛ he miishɛɛ lɛ anine kɛba Kaimɔ lɛ.

Min. 12: Ŋmalɛi lɛ Amli ni Wɔɔkwɛ Daa lɛ Woɔ Wɔ Hewalɛ. Wiemɔ kɛ toibolɔi ni akɛaagba sane ni damɔ hiɛkpamɔ wiemɔ ni yɔɔ Ŋmalɛi lɛ Amli ni Wɔɔkwɛ Daa—2006 wolo lɛ mli lɛ nɔ. Ha afee weku ko ní efee ekome kɛmiisusu gbi lɛ ŋmalɛ lɛ kɛ emlitsɔɔmɔi lɛ ahe lɛ he nɔkwɛmɔnɔ.

Min. 20: Ní Wɔɔle Wɔnitsɔɔmɔ Wolo Hee Lɛ. Wiemɔ kɛ toibolɔi ni akɛaagba sane. Ha toibolɔi lɛ awie Biblia lɛ Tsɔɔ wolo lɛ he nibii komɛi ni amɛhiɛ esɔ he waa lɛ ahe, tamɔ sanebimɔi ni kpaa hiɛ kɛ sane mlitĩi ni maa saji otii ni yɔɔ yitso fɛɛ yitso mli lɛ nɔ mi (bf. 106, 114), mfonirii (bf. 122-123, 147, 198), kɛ saji krokomɛi ni fata he lɛ (bf. 197, kk. 1-2). Wolo lɛ mli wiemɔi lɛ yɛ miishɛɛ, ni etaa mɔ tsui mli (bf. 12, kk. 12). Ekɛ niiamlitsɔɔmɔi ni shishinumɔ waaa ní yɔɔ faŋŋ haa (bf. 58, kk. 5), ni ekɛ nii ni akɛtoɔ nii ahe ni mɔɔ shi tsuɔ nii (bf. 159, kk. 12). Ato ehiɛkpamɔ wiemɔ lɛ he gbɛjianɔ ni eye ebua wɔ ni wɔje Biblia mli nikasemɔi ashishi (bf. 3-7). Ha afee nɔkwɛmɔnɔ ni tsɔɔ bɔ ni aaafee akɛ akrabatsa ni yɔɔ baafa 7 lɛ aye abua Biblia mli nikaselɔ hee ko. Ha agba niiashikpamɔi ni aná beni akɛ wolo hee lɛ tsuɔ nii lɛ atsɔɔ.

Lala 16 kɛ naagbee sɔlemɔ.

Otsi ni Jeɔ Shishi April 3

Lala 199

Min. 15: Asafoŋ adafitswai. Tĩi sane ni ji “Ná Mɛni Biblia lɛ Tsɔɔ Diɛŋtsɛ? Wolo lɛ ni Wɔbaakase lɛ He Miishɛɛ” ni je kpo yɛ February 2006 Wɔ Maŋtsɛyeli Sɔɔmɔ lɛ baafa 6 lɛ mli lɛ mli kuku. Gbalamɔ jwɛŋmɔ kɛya nikasemɔ he gbɛjianɔtoo ni akɛbaakase Biblia lɛ Tsɔɔ wolo lɛ nɔ. Agbɛnɛ hu tsɔɔmɔ gbɛ ni aaatsɔ nɔ akɛ ninefɔ̃ɔ he wolo ni akala lɛ atsu nii kɛfɔ̃ mɛi ni yɔɔ wiemɔ lɛ he miishɛɛ lɛ anine kɛba Kaimɔ lɛ.

Min. 10: Ani Nyɔŋmɔ Kã He Eeye Nɔ? Wiemɔ kɛ nɔkwɛmɔnɔ ni damɔ April 1, 2006 Buu-Mɔɔ lɛ baafa 32 lɛ nɔ. Nyɛkɛ hegbɛ fɛɛ hegbɛ ni nyɛaaná lɛ atsua nii kɛfɔ̃ mɛi anine koni amɛbabo maŋshiɛmɔ krɛdɛɛ lɛ toi. Nyɛkwɛa koni nyɛfɔ̃a Biblia mli nikaselɔi fɛɛ kɛ amɛweku lɛ mli bii ní ekolɛ akɛ amɛ ekaseee nii lɛ fɛɛ anine. Esa akɛ wɔfɔ̃ mɛi fɛɛ ni wɔle akɛ amɛyɛ wiemɔ lɛ he miishɛɛ lɛ kɛ mɛi krokomɛi ni wɔkɛ amɛ kpeɔ yɛ shiɛmɔ nitsumɔ lɛ mli lɛ anine koni amɛbabo maŋshiɛmɔ krɛdɛɛ nɛɛ toi. Ha afee nɔkwɛmɔnɔ ni tsɔɔ bɔ ni akɛ April 1 Buu-Mɔɔ lɛ baatsu nii kɛfɔ̃ mɔ ni ekpa shiɛmɔ yaa loo ekpa kpeei baa lɛ nine.

Min. 20: “Tsɔɔmɔ Heshibalɔi Anii Koni Amɛnyiɛ Nyɔŋmɔ Gbɛ lɛ Nɔ.”b Okɛ saji ni yɔɔ July 1, 2004 Buu-Mɔɔ lɛ baafa 16, kuku 9 lɛ mli lɛ afata he.

Lala 170 kɛ naagbee sɔlemɔ.

[Shishigbɛ niŋmai]