Mɛni Hewɔ Esa akɛ Aje Kpeei Ashishi yɛ Be Naa ni Akpa Hu yɛ Be Naa Lɛ?
1 Esa akɛ aje asafoŋ kpeei fɛɛ, ni kpeei kɛha shiɛmɔyaa fata he lɛ shishi yɛ be naa ni akpa hu yɛ be naa. Mɛni Hewɔ? Be nɔ ni aaaye lɛ jieɔ gbɛjianɔtoo kpakpa kpo ni etsɔɔ mɛi fɛɛ ni eba shishi ni amɛkɛ amɛhe woɔ kpeei lɛ amli lɛ ahe ni asusuɔ. (Jaj. 3:17b; 1 Kor. 14:33) Wɔbaanyɛ wɔjie bɔ ni wɔsusuɔ nii ahe wɔhaa lɛ kpo kɛtsɔ toiboo ni wɔɔfee wɔha gbɛtsɔɔmɔi ni nyiɛ sɛɛ lɛ nɔ koni wɔkwɛ ni aje kpeei ashishi yɛ be naa ni akpa hu yɛ be naa.
2 Maŋ Shiɛmɔi: Maŋ shiɛmɔ hamɔ heɔ minitii 45. Kɛ aho be ni akɛha lɛ he lɛ, ebaasa Buu-Mɔɔ Nikasemɔ ni baanyiɛ no sɛɛ lɛ he. Buu-Mɔɔ Nikasemɔ: Ato ŋmɛlɛtswaa kome kɛha Buu-Mɔɔ Nikasemɔ lɛ, kɛ emli kukuji lɛ fɛɛ kanemɔ kɛ sanebimɔi ni akɛtiɔ mli lɛ hu he susumɔ. Esa akɛ akɛ ŋmɛlɛtswai enyɔ afee kpeei enyɔ lɛ, ni lalai kɛ sɔlemɔi fata he.
3 Teokrase Sɔɔmɔ Skul: Enɛ ji kpee ni heɔ minitii 45. Eyɛ mli akɛ atsiii tsɔsemɔ wiemɔ lɛ kɛ saji otii ni ahalaa kɛjɛɔ Biblia kanemɔ mli lɛ naa kɛ́ be shɛ moŋ, shi esa akɛ nyɛmimɛi ni akɛ nifeemɔi nɛɛ eha amɛ lɛ aye be ni ato lɛ nɔ. Kɛ afeee enɛ lɛ, esa akɛ akɛ ŋaawoo aha yɛ teemɔŋ. Sɔɔmɔ Kpee: Kpee nɛɛ hu heɔ minitii 45. Kɛ akɛ Teokrase Sɔɔmɔ Skul, lalai, kɛ sɔlemɔi fata he lɛ, esaaa akɛ gbɛjianɔtoo muu lɛ fɛɛ yeɔ fe ŋmɛlɛtswaa kome ni eho he minitii nyɔŋmai ejwɛ kɛ enumɔ.
4 Asafo Woloŋ Nikasemɔ: Enɛ ji kpee ni heɔ ŋmɛlɛtswaa kome, ni shishijee kɛ naagbee sɔlemɔ fata he. Esa akɛ akane kukuji lɛ fɛɛ. Kpeei Kɛha Shiɛmɔ: Esa akɛ aje enɛ shishi yɛ be naa ni akaye fe minitii 15, ni shikpɔŋkukuji amli nitsumɔi ajaa kɛ naagbee sɔlemɔ fata he.
5 Te Wɔ Fɛɛ Wɔbaafee Tɛŋŋ Wɔye Wɔbua?: Taakɛ bɔ ni tsɔne kudɔlɔ yɔɔ hewalɛ yɛ tsɔne foi nɔ lɛ, nakai aŋkroaŋkroi ni yɔɔ asafo lɛ mli lɛ yɔɔ gbɛfaŋnɔ ko tsumɔ koni amɛkɛye amɛbua ní akaye be fe nine yɛ kpeei ashishi. Kpeei ashishi ní wɔɔshɛ yɛ be naa lɛ ji klɛŋklɛŋ nɔ. Abaanyɛ abaa be yi kɛ́ skulbii ni akɛ nifeemɔi eha amɛ lɛ tara sɛi ni yɔɔ shiɛmɔ kpoku lɛ masɛi lɛ nɔ, ni kɛ́ mɔ fɛɛ mɔ mu ewiemɔ lɛ naa amrɔ nɔŋŋ beni be ni ato lɛ shɛ lɛ. Esa akɛ nyɛmimɛi ni yɔɔ nɔ ko feemɔ yɛ Sɔɔmɔ Kpee lɛ mli lɛ aye be ni ato lɛ nɔ. Kɛ nyɛmi ni tsɔ ohiɛ lɛ ye obe lɛ eko lɛ, ebaafee nɔ ni tsɔɔ mɛi ahe susumɔ akɛ ooofo onɔ lɛ nɔ koni akaye be fe nine yɛ kpee lɛ shishi. Kɛ wɔsaji ahetooi fee kukuji lɛ, mɛi krokomɛi hu baaná hegbɛ koni amɛwie. Wɔbaafite be ni he hiaa kɛ́ wɔsaa wɔti nɔ ni mɛi krokomɛi ekɛɛ momo lɛ mli ekoŋŋ. Enɛ biɔ ni wɔfee toibolɔi kpakpai. Eba akɛ wɔ fɛɛ wɔɔjie wɔhe kpo akɛ Nyɔŋmɔ sɔɔlɔi kpakpai kɛtsɔ be nɔ ní wɔɔye yɛ kpeei ashishi lɛ nɔ.—2 Kor. 6:3, 4.