Shiɛmɔ Haa Wɔfeɔ Mɛi ni Yɔɔ Srɔto
1 Mɛi babaoo biɔ akɛ, “Mɛni haa esoroɔ Yehowa Odasefoi yɛ jamɔi krokomɛi ahe?” Te obaaha hetoo oha tɛŋŋ? Obaanyɛ ogbála wɔ hemɔkɛyelii ni damɔ Biblia nɔ lɛ ekomɛi amli otsɔɔ. Shi ani osusu he pɛŋ hu akɛ oootsɔɔ bɔ ni wɔ maŋ shiɛmɔ nitsumɔ lɛ feɔ wɔ mɛi ni yɔɔ srɔto yɛ jamɔi krokomɛi ahe lɛ mli?—Mat. 24:14; 28:19, 20.
2 Ŋmɛnɛ, mɛi ni sumɔɔ jamɔ lɛ ateŋ mɛi fioo komɛi nuɔ he akɛ esa akɛ amɛkɛ mɛi krokomɛi agba amɛhemɔkɛyelii lɛ ahe sane. Ekolɛ amɛbaasusu akɛ efá kɛkɛ akɛ aaafee toiboo aha Kaisare mlai, ní ahiɛ jeŋba kpakpa mli, aloo afee mɛi krokomɛi ejurɔ. Shi kɛlɛ, amɛnuuu he akɛ gbɛnaa nii kã amɛnɔ akɛ amɛye amɛbua mɛi krokomɛi koni amɛkase nɔ ni Biblia lɛ kɛɔ yɛ yiwalaheremɔ ni aaaná lɛ he. Yɛ mɛɛ gbɛ nɔ esoro wɔ?
3 Wɔ sɔɔmɔ nitsumɔ ni wɔkɛ ekãa tsuɔ lɛ yɛ srɔto kwraa yɛ jamɔi krokomɛi anitsumɔi ahe. Ŋmɛnɛŋmɛnɛ beaŋ Odasefoi kɛ nɔ ni fá fe afii 100 eshiɛ sanekpakpa lɛ kɛyashɛ shikpɔŋ lɛ naagbeehei yɛ mra be mli Kristofoi lɛ akasemɔ mli. Yiŋtoo ni wɔkɛfeɔ enɛ ji koni wɔkɛye wɔbua gbɔmɛi babaoo bɔ ni wɔɔnyɛ koni amɛha amɛshihilɛi kɛ Nyɔŋmɔ suɔmɔnaa nifeemɔ akpã gbee.—1 Tim. 2:4; 2 Pet. 3:9.
4 Te Ale Bo Aha Tɛŋŋ? Ani ale bo akɛ Nyɔŋmɔ Wiemɔ lɛ shiɛlɔ ni yɔɔ ekãa? (Bɔf. 17:2, 3; 18:25) Yɛ oshiɛmɔ nitsumɔ lɛ hewɔ lɛ, ani okutsoŋbii naa srɔtofeemɔ ni yɔɔ amɛjamɔ lɛ kɛ onɔ̃ lɛ teŋ amrɔ nɔŋŋ? Ani ale bo akɛ mɔ ni shweɔ akɛ ekɛ mɛi krokomɛi aaagba ehiɛnɔkamɔ lɛ he sane? Ani oyɛ gbɛjianɔ ni oto daa ni haa okɛ ohe woɔ shiɛmɔ nitsumɔ lɛ mli? Kaimɔ akɛ jeee gbɛi ni wɔyɔɔ lɛ pɛ nɔ wɔtsɔɔ wɔhaa esoroɔ wɔ, shi kɛtsɔ nɔ ni wɔgbɛi lɛ tsɔɔ lɛ feemɔ hu—Yehowa he odase ni wɔyeɔ lɛ nɔ.—Yes. 43:10.
5 Suɔmɔ ni wɔyɔɔ kɛha Nyɔŋmɔ kɛ naanyo gbɔmɔ ji nɔ ni tsirɛɔ wɔ koni wɔkɛ wɔhe awo shiɛmɔ nitsumɔ lɛ mli. (Mat. 22:37-39) No hewɔ ni wɔsumɔɔ ni wɔkɛ hegbɛ fɛɛ hegbɛ ni wɔɔná koni wɔgba mɛi krokomɛi Maŋtsɛyeli lɛ he shɛɛ sane lɛ atsu nii tamɔ Yesu kɛ bɔfoi lɛ fee lɛ. Eba akɛ wɔɔya nɔ wɔkɛ ekãa ashiɛ sanekpakpa lɛ wɔtsɔɔ mɛi ni sumɔɔ koni amɛbo toi lɛ. Nakai feemɔ baaye abua mɛi ni hiɛ tsui kpakpa lɛ koni ‘amɛna srɔto ni yɔɔ mɔ ni sɔmɔɔ Nyɔŋmɔ kɛ mɔ ni sɔmɔɔɔ lɛ lɛ teŋ.’—Mal. 3:18.