Nɔ Ni Baaba Wɔsɛɛ Lɛ He Anɔkwale Lɛ

Yesu tsɔɔ bɔ ni wɔbaafee wɔle akɛ, “Nyɔŋmɔ Maŋtsɛyeli lɛ ebɛŋkɛ.” (Luka 21:31) Egba akɛ, nibii komɛi baaya nɔ, ni ekomɛi ji tai wuji, shikpɔŋhosomɔi wuji, hɔmɔ, kɛ tsɛŋemɔ helai ni gbeɔ mɔ​—ni ŋmɛnɛ lɛ, wɔmiina nibii nɛɛ fɛɛ.​—Luka 21:10-17.

Kɛfata he lɛ, Biblia lɛ tsɔɔ akɛ, yɛ adesai anɔyeli lɛ “naagbee gbii lɛ amli lɛ,” mɛi baajie sui gbohii komɛi kpo. Obaanyɛ okane enɛ he sane yɛ 2 Timoteo 3:1-5 lɛ. Kɛ́ ona mɛi miijie sui nɛɛ kpo ŋmɛnɛ lɛ, obaana faŋŋ akɛ, Biblia mli gbalɛ nɛɛ nɔŋŋ ni baa mli lɛ.

Mɛni enɛ tsɔɔ? Akɛ etsɛŋ, Nyɔŋmɔ Maŋtsɛyeli lɛ baafee tsakemɔi wuji yɛ shikpɔŋ lɛ nɔ, ni no baahã enɔ bii lɛ ashihilɛ ahi fe tsutsu lɛ. (Luka 21:36) Nyɔŋmɔ ewo shi yɛ Biblia lɛ mli akɛ, ebaafee nibii kpakpai ehã shikpɔŋ lɛ kɛ mɛi ni baahi nɔ lɛ. Naa fioo komɛi.

NƆYELI KPAKPA

“Ni akɛ nɔyeli, kɛ woo, kɛ maŋtsɛyeli ko hã [Yesu], koni majimaji lɛ, kɛ jeŋmaji lɛ, kɛ wiemɔ kui lɛ fɛɛ asɔmɔ lɛ. Enɔyeli lɛ, naanɔ nɔyeli ni hoŋ eyaŋ ni, ni akpãtãŋ emaŋtsɛyeli lɛ hiɛ.”​—DANIEL 7:14.

Nɔ ni enɛ tsɔɔ: Obaanyɛ oná shihilɛ kpakpa yɛ nɔyeli ko ni baaye shikpɔŋ muu lɛ fɛɛ nɔ lɛ shishi; Nyɔŋmɔ ewó e-Bi lɛ enɔ Maŋtsɛ.

GBƆMƆTSOŊ HEWALƐ KPAKPA

“Mɛi ni yɔɔ mli lɛ ateŋ mɔ ko ekɛŋ akɛ: ‘Mibɛ hewalɛ.’”​—YESAIA 33:24.

Nɔ ni enɛ tsɔɔ: Hela mɔŋ bo, ni ojeŋ kpa hu kɔkɔɔkɔ; obaanyɛ ohi shi ni ogbooo.

TOIŊJƆLƐ BAAKPELE JEŊ FƐƐ

“Ebaafo tai asɛɛ yɛ shikpɔŋ lɛ nɔ fɛɛ.”—LALA 46:9.

Nɔ ni enɛ tsɔɔ: Tai kɛ nɔnai ni ekɛbaa lɛ fɛɛ sɛɛ baafo.

GBƆMƐI KPAKPAI BAAYI SHIKPƆŊ LƐ NƆ OBƆ

“Onaŋ mɛi fɔji lɛ dɔŋŋ . . . Mɛi ni he jɔ lɛ, shikpɔŋ lɛ baatsɔ amɛnɔ.”​—LALA 37:10, 11.

Nɔ ni enɛ tsɔɔ: Mɛi fɔji ehiŋ shi dɔŋŋ, mɛi ni miisumɔ ni amɛbo Nyɔŋmɔ toi lɛ pɛ baahi shi.

SHIKPƆŊ MUU LƐ FƐƐ BAATSƆ PARADEISO

“Amɛbaamamɔ tsũi ni amɛbaahi mli, ni amɛbaafee wain ŋmɔji ni amɛbaaye amɛmli yibii lɛ.”​—YESAIA 65:21, 22.

Nɔ ni enɛ tsɔɔ: Abaasaa shikpɔŋ muu lɛ fɛɛ nɔ fɛfɛo. Nyɔŋmɔ baahã afee nɔ ni esumɔɔ “yɛ shikpɔŋ lɛ nɔ,” tamɔ wɔsɔleɔ lɛ.​—Mateo 6:10.