Gbɔmɛi ni Yɔɔ Miishɛɛ Fe Fɛɛ yɛ Shikpɔŋ Nɔ
1 “Miishɛɛ ji gbɔmɛi ni amɛ-Nyɔŋmɔ ji Yehowa!” (Lala 144:15, NW) Nakai wiemɔi lɛ tsɔɔ bɔ ni Yehowa Odasefoi ji, ákɛ gbɔmɛi ni yɔɔ miishɛɛ fe fɛɛ yɛ shikpɔŋ nɔ. Miishɛɛ ko bɛ ni da fe nɔ ni baa kɛjɛɔ anɔkwa Nyɔŋmɔ hiɛkalɔ kome pɛ, ni ji Yehowa sɔɔmɔ mli lɛ. Akɛni eji ‘miishɛɛ Nyɔŋmɔ’ hewɔ lɛ, mɛi ni sɔmɔɔ lɛ lɛ jieɔ emiishɛɛ lɛ kpo. (1 Tim. 1:11) Mɛni ji wɔjamɔ lɛ fai komɛi ni haa wɔfeɔ mɛi ni yɔɔ miishɛɛ babaoo nakai lɛ?
2 Yiŋtoi ni Haa Anáa Miishɛɛ: Yesu ma nɔ mi kɛha wɔ akɛ, miishɛɛ baa kɛjɛɔ ‘wɔjwɛŋmɔ ni yɔɔ wɔmumɔŋ hiamɔ nii anɔ’ lɛ mli. (Mat. 5:3) Biblia lɛ kasemɔ kɛ Kristofoi akpeei ni wɔɔya daa lɛ haa wɔnine shɛɔ nakai hiamɔ nii lɛ anɔ. Nyɔŋmɔ Wiemɔ lɛ mli anɔkwale lɛ kasemɔ eha wɔye wɔhe kɛjɛ jamɔ mli amale kɛ tɔmɔi amli. (Yoh. 8:32) Ŋmalɛi lɛ hu etsɔɔ wɔ gbɛ ni hi fe fɛɛ ni wɔɔtsɔ nɔ wɔhi shi. (Yes. 48:17) Yɛ enɛ hewɔ lɛ, wɔnáa Kristofoi anaanyobɔɔ kpakpa mli ŋɔɔmɔ yɛ wɔ nyɛmifeemɔ ni miishɛɛ yɔɔ mli lɛ mli.—1 Tes. 2:19, 20; 1 Pet. 2:17.
3 Wɔtsui nyɔɔ wɔmli babaoo kɛjɛɔ Nyɔŋmɔ jeŋba he tɛi ni nɔ kwɔlɔ lɛ toi ni wɔboɔ hewɔ, ejaakɛ wɔle akɛ enɛ buɔ wɔhe ni ehaa Yehowa náa miishɛɛ. (Abɛi 27:11) Adafitswaa wolo ko mli amaniɛbɔlɔ kɛɛ akɛ: “Yɛ bɔ ni tɛi ni ámɛfolɔ amɛmamɔ shi lɛ yɔɔ keketee ha lɛ fɛɛ sɛɛ lɛ, Yehowa Odasefoi tamɔɔɔ mɛi ni bɛ miishɛɛ. Etamɔɔɔ nakai kwraa. Gbekɛbii kɛ onukpai [ni yɔɔ amɛteŋ lɛ] jieɔ amɛhe kpo akɛ mɛi ni yɔɔ miishɛɛ kɛ mɛi ni ŋmɛɔ pɛpɛɛpɛ yɛ gbɛ ni ekaaa nɔ.” Te wɔɔfee tɛŋŋ wɔye wɔbua mɛi krokomɛi ni amɛná wɔmiishɛɛ lɛ mli gbɛfaŋnɔ?
4 Ye Obua Mɛi Krokomɛi ni Amɛná Miishɛɛ: Miishɛɛ ko kwraa bɛ je lɛ mli, ni etamɔ nɔ ni gbɔmɛi fɛɛ kɛ hiɛnɔkamɔ kpakpa kpaaa wɔsɛɛ be ko gbɛ. Shi kɛlɛ, wɔyɛ hiɛnɔkamɔ kpakpa, ejaakɛ wɔle akɛ gbi ko baaba ni awerɛho fɛɛ bɛ dɔŋŋ. (Kpoj. 21:3, 4) No hewɔ lɛ, wɔkɛ wɔhe woɔ sɔɔmɔ lɛ mli yɛ ekãa naa, ni wɔmiitao mɛi ni yɔɔ tsuijurɔ lɛ ni wɔgba amɛ wɔ hiɛnɔkamɔ kɛ hemɔkɛyelii ni kɔɔ Yehowa he lɛ he sane.—Ezek. 9:4.
5 Nyɛmi yoo gbɛgbalɔ ko kɛɛ akɛ: “Nɔ ko kwraa bɛ ni haa mɔ tsui nyɔɔ emli babaoo fe ni aaaye abua mɛi ni amɛle Yehowa kɛ enɔkwale lɛ.” Nyɛhaa wɔfea bɔ fɛɛ bɔ ni wɔɔnyɛ ni wɔkɛwo mɛi babaoo hewalɛ ni amɛkpɛlɛ shia Biblia mli nikasemɔi anɔ. Sɔɔmɔ ni wɔɔsɔmɔ Yehowa kɛ wɔhe ni wɔkɛaaha koni wɔye wɔbua mɛi krokomɛi ni amɛbasɔmɔ lɛ lɛ haa wɔnáa miishɛɛ fe fɛɛ.—Bɔf. 20:35.