Okɛ Yehowa Teŋ Naanyobɔɔ ni Yɔɔ Gbagbalii ni Oooná
1. Mɛni nyɛmi yoo ko yɔse yɛ edaa gbi mumɔŋ nifeemɔi ahe?
1 Nyɛmi yoo Kristofonyo ko jaje akɛ: “Mikɛ aaafee afii 20 ni eho lɛ ehi anɔkwale lɛ mli kɛtsɔ kpeei ni miyaa kɛ shiɛmɔ nitsumɔ lɛ ni mikɛ mihe woɔ mli jabejabe lɛ nɔ.” Kɛlɛ, ekɛɛ kɛtsa nɔ akɛ: “Mibayɔse akɛ, eyɛ mli akɛ nibii nɛɛ ahe yɛ sɛɛnamɔ moŋ, shi nomɛi kɛkɛ nyɛŋ aye abua mi kɛji nibii amli bawa. . . . Amrɔ nɛɛ miyɔse akɛ esa akɛ matsake mijwɛŋmɔ ni maje nikasemɔ he gbɛjianɔtoo hee kpakpa shishi bɔni afee ni manyɛ male Yehowa jogbaŋŋ, ni maná suɔmɔ maha lɛ, kɛ hiɛsɔɔ kɛha nɔ ni e-Bi lɛ efee eha wɔ lɛ.”
2. Mɛni hewɔ ehe hiaa ni wɔná wɔkɛ Yehowa teŋ naanyobɔɔ ni yɔɔ gbagbalii lɛ?
2 Mɔ kɛ Yehowa teŋ wekukpaa ni yɔɔ gbagbalii ni aaatswa ama shi lɛ biɔ mɔdɛŋbɔɔ. Ebiɔ babaoo fe he ni akɛaawo Kristofoi anifeemɔ mli daa lɛ kɛkɛ. Kɛji akɛ wɔkɛ Yehowa egbaaa sane daa lɛ, be baashɛ ni ebaatsɔ tamɔ naanyo ko ni bɛŋkɛ wɔ kpaakpa yɛ be ko ni eho lɛ mli ní amrɔ nɛɛ wɔnuuu ehe dɔŋŋ. (Kpoj. 2:4) Nyɛhaa wɔpɛia bɔ ni teemɔŋ Biblia nikasemɔ kɛ sɔlemɔ baanyɛ aye abua wɔ ni wɔná wɔkɛ Yehowa teŋ naanyobɔɔ ni yɔɔ gbagbalii lɛ mli wɔkwɛa.—Lala 25:14.
3. Te esa akɛ wɔfee wɔteemɔŋ nikasemɔ wɔha tɛŋŋ bɔni afee ni wɔnyɛ wɔtsi wɔbɛŋkɛ Nyɔŋmɔ?
3 Sɔlemɔ kɛ Sane Nɔjwɛŋmɔ He Miihia: Teemɔŋ nikasemɔ ni haa mɔ tsui nyɔɔ emli lɛ biɔ babaoo fe saji otii ni yɔɔ wolo ni akaseɔ lɛ mli lɛ shishi ni aaafolɔ kɛ ŋmalɛi ni aŋmalako emli wiemɔi lɛ ni aaakane lɛ kɛkɛ. Ebiɔ ni wɔjwɛŋ nibii ni nikasemɔ lɛ jieɔ lɛ kpo yɛ Yehowa gbɛ̀i lɛ, eshishitoo tɛi lɛ, kɛ esui lɛ ahe lɛ nɔ. (2 Mose 33:13) Mumɔŋ nibii ashishi ni wɔnuɔ lɛ saa wɔhenumɔi ahe ni etsirɛɔ wɔ ni wɔsusuɔ wɔ diɛŋtsɛ wɔshihilɛi ahe. (Lala 119:35, 111) Esa akɛ Yehowa ni aaatsi abɛŋkɛ lɛ lɛ afee oti yɛ teemɔŋ nikasemɔ ni afeɔ lɛ mli. (Yak. 4:8) Nikasemɔ kɛ hiɛdɔɔ biɔ ni aná be kɛ he ko hu ni sa jogbaŋŋ, ni ebiɔ he tsɔsemɔ dani anyɛ afee nikasemɔ lɛ daa. (Dan. 6:10) Kɛji akɛ oji mɔ ko ni bɛ dekã kwraa diɛŋtsɛ po lɛ, ani otoɔ be gbi fɛɛ gbi koni okɛjwɛŋ Yehowa sui ni yɔɔ naakpɛɛ lɛ anɔ?—Lala 119:147, 148; 143:5.
4. Yɛ mɛɛ gbɛ nɔ sɔlemɔ ni wɔsɔleɔ dani wɔjeɔ teemɔŋ nikasemɔ shishi lɛ yeɔ ebuaa wɔ ni wɔnáa wɔkɛ Yehowa teŋ naanyobɔɔ ni yɔɔ gbagbalii?
4 Sɔlemɔ ni jɛ tsui mli lɛ ji teemɔŋ nikasemɔ ni woɔ yibii lɛ fã ko ni he hiaa waa. Bɔni afee ni Biblia mli anɔkwalei lɛ akanya wɔtsuii ni etsirɛ wɔ “ní wɔkɛsɔmɔ Nyɔŋmɔ bɔ ni sa ehiɛ kɛ woo kɛ gbeyeishemɔ!” lɛ, Nyɔŋmɔ mumɔ krɔŋkrɔŋ lɛ he miihia wɔ. (Heb. 12:28) No hewɔ lɛ, esa akɛ wɔkɛ sɔlemɔ aje nikasemɔ fɛɛ nikasemɔ shishi kɛtsɔ fai ni wɔɔkpa Yehowa kɛha emumɔ lɛ nɔ. (Mat. 5:3) Yɛ be mli ni wɔjwɛŋɔ Ŋmalɛi lɛ anɔ ni wɔkɛ nikasemɔ woji ni Yehowa gbɛjianɔtoo lɛ kɛha lɛ tsuɔ nii lɛ, wɔgbeleɔ wɔtsuii amli wɔhaa Yehowa. (Lala 62:8) Nii ni wɔɔkase yɛ nɛkɛ gbɛ nɔ lɛ ji jamɔ nifeemɔ ko ni wɔtsɔɔ nɔ wɔjieɔ wɔ hetuu-kɛhamɔ kɛha Yehowa lɛ kpo, ni ehaa wekukpaa ni kã wɔkɛ lɛ teŋ lɛ mli waa.—Yuda 20, 21.
5. Mɛni hewɔ ehe hiaa ni wɔjwɛŋ Nyɔŋmɔ Wiemɔ lɛ nɔ daa gbi lɛ?
5 Taakɛ wekukpaai srɔtoi fɛɛ ji lɛ, esa akɛ wɔya nɔ wɔkanya wekukpaa ni kã wɔkɛ Yehowa teŋ lɛ be fɛɛ be bɔni afee ni eya nɔ eda yɛ wɔshihilɛ bei fɛɛ mli. No hewɔ lɛ, eba akɛ wɔɔhe be daa gbi koni wɔtsi wɔbɛŋkɛ Nyɔŋmɔ, akɛni wɔle akɛ, lɛ hu ebaatsi ebɛŋkɛ wɔ lɛ hewɔ.—Lala 1:2, 3; Efe. 5:15, 16.