Fã 6—Ní Wɔɔfee Biblia Mli Nikasemɔi ni Yaa Hiɛ
Be ni Nikaselɔ lɛ Ebi Sane
1 Kɛ́ aná ato Biblia mli nikasemɔ shishi jogbaŋŋ lɛ, bei pii lɛ ehi jogbaŋŋ akɛ aaato Biblia mli tsɔɔmɔi lɛ anaa ni asusu he moŋ fe nɔ ni aaafamɔ mli. Enɛ yeɔ ebuaa nikaselɔ lɛ ni etswaa anɔkwa nilee he shishitoo kpakpa emaa shi, ni eyaa ehiɛ yɛ mumɔŋ. (Kol. 1:9, 10) Shi kɛlɛ, bei pii lɛ nikaselɔi lɛ biɔ saji yɛ nibii babaoo ahe be ni nikasemɔ lɛ yaa nɔ lɛ. Te esa akɛ atsu enɛɛmɛi ahe nii aha tɛŋŋ?
2 Okɛ Sɛɛyoomɔ Atsu Nii: Bei pii lɛ abaanyɛ aha sanebimɔi ni kɔɔ nɔ ni akaseɔ lɛ he lɛ hetoo amrɔ nɔŋŋ. Kɛ́ abaasusu sanebimɔ lɛ he sɛɛ mli yɛ wolo ni akaseɔ lɛ mli lɛ, ekolɛ ebaahi akɛ okɛɛ lɛ akɛ abaasusu he yɛ wolo lɛ mli yɛ sɛɛ mli. Shi kɛlɛ, kɛ́ sanebimɔ ko kɔɔɔ sane ni akaseɔ lɛ he loo ebaabi ni afee niiamlitaomɔ dani aha hetoo lɛ, ekolɛ ebaahi akɛ asusu sane lɛ he yɛ nikasemɔ lɛ sɛɛ loo yɛ be kroko mli. Mɛi komɛi naa akɛ sanebimɔ lɛ ní amɛaaŋma amɛfɔ̃ shi lɛ haa nikaselɔ lɛ náa nɔmimaa ákɛ akɛ hiɛdɔɔ baasusu esanebimɔ lɛ he, ni ehaaa aje sane oti ni akaseɔ lɛ he.
3 Awieɔ Biblia mli tsɔɔmɔi lɛ ateŋ babaoo ahe nɔ ko fioo pɛ yɛ wɔwoji ni wɔkɛ mɛi kaseɔ titri lɛ amli. Mɛni esa akɛ afee kɛji akɛ ewa kɛha nikaselɔ ko akɛ eeekpɛlɛ tsɔɔmɔ ko nɔ loo ekɛ ehe kpɛtɛɔ apasa hemɔkɛyeli ko he waa lɛ? Ekolɛ ebaahi akɛ asusu wolo kroko ní wieɔ nɔ ni Biblia lɛ kɛɔ yɛ nakai sane lɛ he jogbaŋŋ kɛmɔɔ shi lɛ he. Kɛ́ nikaselɔ lɛ yiŋ tsɔɔɔ lolo lɛ, nyɛtsaa nɔ ni nyɛkaseɔ lɛ nɔ, ní nyɛsusua sane lɛ he be kroko. (Yoh. 16:12) Be mli ni enáa Biblia lɛ mli nilee ni mli lɛɛ ní eyaa ehiɛ yɛ mumɔŋ lɛ, ebaanu nakai Biblia mli tsɔɔmɔ lɛ shishi yɛ sɛɛ mli.
4 Ba Ohe Shi: Kɛ́ obɛ nɔmimaa yɛ sanebimɔ ko hetoo he lɛ, kaaka akɛ okɛ bo diɛŋtsɛ ojwɛŋmɔ baaha hetoo. (2 Tim. 2:15; 1 Pet. 4:11) Kɛɛmɔ akɛ obaatao sane lɛ mli ni oku osɛɛ okɛ hetoo lɛ abaha. Ekolɛ obaanyɛ okɛ hegbɛ lɛ po atsu nii koni otsɔɔ nikaselɔ lɛ bɔ ni ataoɔ nii amli ahaa. Yaa nɔ otsɔɔ lɛ bɔ ni akɛ dɛŋdadei srɔtoi ni akɛtaoɔ nii amli, ní Yehowa gbɛjianɔtoo lɛ kɛha lɛ tsuɔ nii ahaa. Yɛ naagbee lɛ, ebaanyɛ eha lɛ diɛŋtsɛ esanebimɔi lɛ ahetoo kɛtsɔ nɛkɛ gbɛ nɔ.—Bɔf. 17:11.