OKƐTO
Ní Wɔɔfee Biblia Mli Nikasemɔi ni Yaa Hiɛ
Ajie sane ni aŋma ahɔ mli nɛɛ kɛjɛ saji otii titrii ni ba kɛtsara nɔ, ni je kpo yɛ Wɔ Maŋtsɛyeli Sɔɔmɔ lɛ mli, ní yitso ji ní wɔɔfee Biblia mli nikasemɔi ni yaa hiɛ lɛ mli. Aawo mɛi fɛɛ hewalɛ ní amɛkɛ enɛ ato jogbaŋŋ koni amɛkwɛ mli kɛha Biblia mli nikasemɔi afeemɔ. Kɛfata he lɛ, abaanyɛ asusu saji otii ni aŋma ahɔ mli nɛɛ ahe yɛ kpeei ni afeɔ kɛha shiɛmɔyaa lɛ ashishi, ni shiɛmɔ nitsumɔ nɔkwɛlɔi hu baanyɛ adamɔ nɔ amɛkɛto wiemɔi ni amɛhaa beni amɛsaraa woloŋ nikasemɔ kui lɛ ahe gbɛjianɔ.
Fã 1: Mɛni Ji Biblia Mli Nikasemɔ?
Kɛ́ okɛ mɔ ko gbaa Biblia lɛ mli saji daa ni etsaraa nɔ, ni esɛɛ kɛɛɛ po, shi okɛ Biblia lɛ kɛ woji ni ajie yi lɛ ateŋ eko feɔ nakai lɛ, oofee Biblia mli nikasemɔ. Abaanyɛ abu nikasemɔ lɛ he akɔntaa beni afee lɛ shii enyɔ yɛ bɔ ni afeɔ nikasemɔ lɛ ahaa lɛ he nɔkwɛmɔnɔ lɛ sɛɛ, ni kɛ nɔmimaa yɛ akɛ nikasemɔ lɛ baakã he aya nɔ.—km-GA 7/04 bf. 1.
Woji ni Ajie Yi
◼ Mɛni Nyɔŋmɔ Taoɔ yɛ Wɔdɛŋ?
◼ Nilee ní Kɛ Mɔ Yaa Naanɔ Wala Mli
◼ Já Anɔkwa Nyɔŋmɔ Kome Lɛ
◼ Abaanyɛ akɛ mɛi ni woloŋlee faaa loo amɛleee nikanemɔ jogbaŋŋ lɛ akase Obaanyɛ Otsɔ Nyɔŋmɔ Naanyo! wolo bibioo lɛ.
Fã 2: Hesaamɔ Kɛha Nikasemɔ lɛ Feemɔ
Ehe miihia ni wɔkɛ sane lɛ aha yɛ gbɛ ni baasa nikaselɔ lɛ tsui he lɛ nɔ. Enɛ biɔ ni wɔsusu nikaselɔ lɛ he ní wɔkɛsaa wɔhe jogbaŋŋ.—km-GA 8/04 bf. 1.
Gbɛ nɔ ni Oootsɔ Osaa Ohe
◼ Susumɔ nikasemɔ lɛ saneyitso, emli saneyitsei bibii kɛ mfonirii ni yɔɔ saneyitso lɛ loo nikasemɔ lɛ mli lɛ ahe.
◼ Taomɔ sanebimɔi ni akala lɛ ahetooi, ni ofolɔ wiemɔi loo wiemɔi kukuji ni ji saji otii lɛ pɛ ashishi.
◼ Halamɔ ŋmalɛi ni aŋmalako amɛmli wiemɔi lɛ amli nɔ ni nyɛbaakane lɛ. Ŋmalamɔ saji otii fioo komɛi yɛ wolo ni nyɛkaseɔ lɛ baafai lɛ anaabugbɛ.
◼ Saamɔ ohe kɛha saji otii lɛ amlitĩi kuku.
Ha Nikasemɔ lɛ Akɔ Mɔ lɛ He
◼ Sɔlemɔ yɛ nikaselɔ lɛ kɛ ehiamɔ nii ahe.
◼ Tsɔ̃ hiɛ osusu saji ni amɛshishinumɔ loo amɛnɔkpɛlɛmɔ baawa kɛha nikaselɔ lɛ ahe.
◼ Bi ohe akɛ: Mɛni ehe hiaa ni enu shishi loo etsu he nii koni enyɛ eya ehiɛ yɛ mumɔŋ? Mɛɛ gbɛ nɔ matsɔ mashɛ etsui he?
◼ Kɛ́ ehe baahia lɛ, too nɔkwɛmɔnɔ ko, sane mlitsɔɔmɔ loo sanebimɔi srɔtoi ahe gbɛjianɔ koni okɛye obua nikaselɔ lɛ ní enu sane oti ko loo ŋmalɛ ko shishi.
Fã 3: Ŋmalɛi lɛ ni Akɛaatsu Nii Jogbaŋŋ
Yiŋtoo hewɔ ni wɔfeɔ Biblia mli nikasemɔ lɛ ji ní wɔye wɔbua gbɔmɛi koni amɛnu tsɔɔmɔi ni yɔɔ Nyɔŋmɔ Wiemɔ lɛ mli lɛ ashishi, ní amɛkpɛlɛ nɔ, ní amɛkɛtsu nii yɛ amɛshihilɛ mli, ní wɔtsɔ enɛ feemɔ nɔ ‘wɔfee amɛ kaselɔi.’ (Mat. 28:19, 20; 1 Tes. 2:13) No hewɔ lɛ, esa akɛ nikasemɔ lɛ adamɔ Ŋmalɛi lɛ anɔ.—km-GA 11/04 bf. 8.
Jɛɛ Nyɔŋmɔ Wiemɔ lɛ Mli Otsɔɔ Nii
◼ Tsɔɔmɔ nikaselɔ lɛ bɔ ni eeefee ena ŋmalɛi pɔtɛɛi komɛi yɛ lɛ diɛŋtsɛ e-Biblia lɛ mli.
◼ Okɛ lɛ akwɛ Biblia mli Ŋmalɛi ni wɔhemɔkɛyeli lɛ damɔ nɔ lɛ amli, ní nyɛsusu he.
◼ Okɛ sanebimɔi atsu nii. Yɛ nɔ najiaŋ ni ooogbála Biblia mli ŋmalɛi amli otsɔɔ nikaselɔ lɛ, ha lɛ moŋ egbála mli etsɔɔ bo.
◼ Ha efee mlɛo. Kaabɔ mɔdɛŋ akɛ ooogbála otii fɛɛ ni yɔɔ ŋmalɛ ko mli lɛ mli. Tsɔɔmɔ nɔ ni baaha oti ni asusuɔ he lɛ afee faŋŋ lɛ pɛ mli.
◼ Tsɔɔmɔ bɔ ni abaafee akɛtsu nii. Ye obua nikaselɔ lɛ koni ena bɔ ni Biblia mli ŋmalɛi kɔɔ lɛ diɛŋtsɛ ehe ehaa.
Fã 4: Ní Aaatsɔse Nikaselɔi lɛ Koni Amɛsaa Amɛhe
Bei pii lɛ, nikaselɔ ni kaneɔ nikasemɔ lɛ mli kɛtsɔɔ hiɛ, ní efolɔɔ hetooi lɛ ashishi, ní esusuɔ bɔ ni ebaanyɛ eha hetoo yɛ lɛ diɛŋtsɛ ewiemɔ mli lɛ he lɛ yaa ehiɛ oyayaayai yɛ mumɔŋ. No hewɔ lɛ, kɛ́ oje nikasemɔ ko ni baaya nɔ daa lɛ shishi nɔŋŋ lɛ, okɛ nikaselɔ lɛ afee ekome kɛkase nii lɛ, ní okɛ no atsɔɔ lɛ bɔ ni asaa he ahaa. Yɛ nikaselɔi babaoo agbɛfaŋ lɛ, ebaafee nɔ ni yeɔ ebuaa ákɛ akɛ amɛ aaafee ekome kɛkase saneyitso loo nikasemɔ kome kɛsaa amɛhe.—km-GA 12/04 bf. 1.
Hetooi Ashishi Folɔmɔ kɛ Otii Aŋmalamɔ
◼ Tsɔɔmɔ lɛ bɔ ni afeɔ anaa hetooi ni yɔɔ tɛ̃ɛ kɛha sanebimɔi ni akala lɛ.
◼ Okɛ bo diɛŋtsɛ owolo ni okɛ nikaselɔ lɛ kaseɔ ní ofolɔ wiemɔi otii loo wiemɔi kukuji pɛ ashishi yɛ mli lɛ atsɔɔ lɛ.
◼ Ye obua nikaselɔ lɛ koni ena akɛ ŋmalɛ fɛɛ ŋmalɛ ni atsɛ yisɛɛ shi aŋmalako emli wiemɔi lɛ fĩɔ oti ko sɛɛ yɛ kuku lɛ mli, ni otsɔɔ lɛ bɔ ni aŋmalaa otii fioo komɛi ashwieɔ shi yɛ wolo lɛ mli baafai lɛ anaabugbɛ.
Nikasemɔ lɛ Hiɛkpamɔ kɛ Emlitĩi
◼ Tsɔɔmɔ nikaselɔ lɛ bɔ ni ebaafee epɛi saneyitso lɛ, saneyitsei bibii lɛ, kɛ mfonirii lɛ amli dani eje nikasemɔ muu lɛ fɛɛ shishi.
◼ Wó nikaselɔ lɛ hewalɛ koni etĩ nikasemɔ lɛ mli saji otii lɛ amli kɛmu ehesaamɔ lɛ naa.
Fã 5: Ní Aaale Nii Abɔ ni Esa akɛ Akase
Nikasemɔ falɛ ni abaanyɛ afee lɛ baadamɔ shihilɛ mli ni tsɔɔlɔ lɛ loo nikaselɔ lɛ yɔɔ, kɛ amɛnyɛmɔi anɔ.—km-GA 1/05 bf. 1.
Tswaa Hemɔkɛyeli ni Mli Wa Oma Shi
◼ Ehe miihia ni wɔye wɔbua nikaselɔ lɛ koni enu Nyɔŋmɔ Wiemɔ lɛ shishi jogbaŋŋ moŋ fe nɔ ni wɔkɛ lɛ aaakase nii babaoo yɛ be kukuoo mli.
◼ Ye obua nikaselɔ lɛ koni enu nɔ ni ekaseɔ lɛ shishi ní ekpɛlɛ nɔ, ekɔɔɔ he eko bei abɔ ni enɛ feemɔ baahe.
◼ Okɛ be ni fa bɔ ni sa atsu nii ni okɛ lɛ asusu ŋmalɛi titrii ni nitsɔɔmɔi lɛ damɔ nɔ lɛ ahe.
Okɛ Nibii ni Kɔɔɔ Nikasemɔ lɛ He Akafata He
◼ Kɛ́ nikaselɔ lɛ miitao koni ewie enaagbai ahe babaoo lɛ, ekolɛ ehe baahia ni oto gbɛjianɔ koni okɛ lɛ asusu he beni agbe nikasemɔ lɛ naa.
◼ Kaawie babaoo beni ofeɔ nikasemɔ lɛ. Kaaha niiashikpamɔi kɛ otii komɛi ni akɛfolɔɔ nikasemɔ lɛ mli lɛ miifa tsɔ̃ bɔ ni baaha nikaselɔ lɛ akaná Biblia mli shishijee tsɔɔmɔi ahe anɔkwa nilee.
Fã 6: Beni Nikaselɔ lɛ Ebi Sane
Kɛ́ aná ato Biblia mli nikasemɔ shishi jogbaŋŋ lɛ, bei pii lɛ ehi jogbaŋŋ akɛ aaato Biblia mli tsɔɔmɔi lɛ anaa ni asusu he moŋ fe nɔ ni aaafamɔ mli. Enɛ yeɔ ebuaa nikaselɔ lɛ koni etswa anɔkwa nilee he shishitoo kpakpa ema shi, ní eya ehiɛ yɛ mumɔŋ.—km-GA 2/05 bf. 5.
Okɛ Sɛɛyoomɔ Atsu Nii
◼ Bei pii lɛ, abaanyɛ aha sanebimɔi ni kɔɔ nɔ ni akaseɔ lɛ he lɛ hetoo amrɔ nɔŋŋ.
◼ Abaanyɛ asusu sanebimɔi ni kɔɔɔ nɔ ni akaseɔ lɛ he loo nɔ ni biɔ ni afee niiamlitaomɔ lɛ ahe yɛ be kroko mli. Ekolɛ, ebaahi jogbaŋŋ akɛ aaaŋmala sanebimɔi nɛɛ ashwie shi.
◼ Kɛ́ ewa kɛha nikaselɔ lɛ akɛ eeekpɛlɛ tsɔɔmɔ ko nɔ lɛ, no lɛ okɛ lɛ asusu wolo kroko ni tsɔɔ nakai sane lɛ mli jogbaŋŋ kɛmɔɔ shi lɛ he.
◼ Kɛ́ nikaselɔ lɛ yiŋ tsɔɔɔ lolo lɛ, no lɛ nyɛtsaa nɔ ni nyɛkaseɔ lɛ nɔ, ní nyɛsusu sane lɛ he be kroko.
Ba Ohe Shi
◼ Kɛ́ oleee sanebimɔ ko hetoo lɛ, kaaka akɛ okɛ bo diɛŋtsɛ ojwɛŋmɔ baaha hetoo.
◼ Yaa nɔ otsɔɔ nikaselɔ lɛ bɔ ni ataoɔ nii amli ahaa.
Fã 7: Ní Aaasɔle yɛ Nikasemɔ lɛ Shishi
Kɛ́ Biblia nikaselɔi lɛ baanyɛ aya amɛhiɛ yɛ mumɔŋ lɛ, no lɛ Yehowa jɔɔmɔ he miihia amɛ. No hewɔ lɛ, ehi ákɛ aaaje nikasemɔ ni ato he gbɛjianɔ lɛ shishi kɛ sɔlemɔ, ní akɛ sɔlemɔ agbe naa.—km-GA 3/05 bf. 8.
Be ni Esa akɛ Asɔle Klɛŋklɛŋ Kwraa
◼ Yɛ mɛi ni nyaa jamɔ he lɛ agbɛfaŋ lɛ, bei pii lɛ wɔbaanyɛ wɔsɔle yɛ klɛŋklɛŋ nikasemɔ lɛ mli.
◼ Yɛ mɛi krokomɛi agbɛfaŋ lɛ, ehe baahia ni wɔyoo be ni sa ní wɔkɛaasɔle klɛŋklɛŋ kwraa.
◼ Abaanyɛ akɛ Lala 25:4, 5 kɛ 1 Yohane 5:14 lɛ atsu nii kɛgbála nɔ hewɔ ni esa akɛ asɔle lɛ mli.
◼ Abaanyɛ akɛ Yohane 15:16 lɛ atsu nii kɛtsɔɔ bɔ ni ehe hiaa ni asɔle aha Yehowa kɛtsɔ Yesu Kristo nɔ lɛ mli.
Nɔ ni Abaanyɛ Atsĩ Tã yɛ Sɔlemɔ lɛ Mli
◼ Ehi akɛ aaajie Yehowa yi ákɛ nitsɔɔmɔ lɛ Jɛɛhe.
◼ Wiemɔ saji ni tsɔɔ akɛ oyɛ nikaselɔ lɛ he miishɛɛ diɛŋtsɛ lɛ ahe.
◼ Wiemɔ saji ni tsɔɔ akɛ ohiɛ sɔɔ gbɛjianɔtoo ni Yehowa kɛtsuɔ nii lɛ ahe.
◼ Bi koni Yehowa ajɔɔ mɔdɛŋ ni nikaselɔ lɛ bɔɔ koni ekɛ nɔ ni ekaseɔ lɛ atsu nii lɛ nɔ.
Fã 8: Ní Aaagbala Nikaselɔi Ajwɛŋmɔ Kɛba Asafo lɛ Nɔ
Yiŋtoo hewɔ ni wɔkɛ mɛi feɔ Biblia mli nikasemɔ lɛ jeee ní wɔtsɔɔ amɛ tsɔɔmɔi ahe saji pɛ kɛkɛ, shi moŋ ní wɔye wɔbua nikaselɔi lɛ koni amɛbatsɔmɔ Kristofoi asafo lɛ mli bii. Okɛ minitii fioo ko atsu nii yɛ nikasemɔ lɛ mli daa otsi koni okɛ amɛ agba Yehowa asafo lɛ he sane.—km-GA 4/05 bf. 8.
Asafoŋ Kpeei
◼ Tsɔɔmɔ bɔ ni afeɔ kpeei lɛ eko fɛɛ eko ahaa. Kɛ́ okɛ amɛ je nikasemɔ shishi nɔŋŋ lɛ, fɔ̃ɔ amɛ nine kɛba kpeei.
◼ Okɛ amɛ agba saji otii ni sa kadimɔ ni awie he yɛ kpeei lɛ ashishi lɛ he sane.
◼ Ye obua amɛ koni amɛná hiɛsɔɔ amɛha Kaimɔ lɛ, kpokpaa nɔ kpeei kɛ kpokpaa nɔkwɛlɔ lɛ saramɔ lɛ.
◼ Okɛ wɔkpeei lɛ ahe mfonirii ni yɔɔ wɔwoji lɛ amli lɛ atsu nii kɛye obua amɛ koni amɛna nɔ ni afeɔ yɛ jɛmɛ.
◼ Wó amɛ hewalɛ ní amɛkane wolo bibioo ni ji Yehowa Odasefoi—Namɛi Ni? Mɛni Amɛheɔ Amɛyeɔ? lɛ.
Okɛ Vidioi Aye Abua Amɛ Koni Amɛná Hiɛsɔɔ
◼ Jehovah’s Witnesses—The Organization Behind the Name
◼ Our Whole Association of Brothers
◼ United by Divine Teaching
◼ To the Ends of the Earth
Fã 9: Ní Aaaye Abua Nikaselɔi Koni Amɛye Trukaa Odase
Kɛ́ Biblia mli nikaselɔi bɔi hemɔkɛyeli námɔ yɛ nɔ ni amɛkaseɔ lɛ mli lɛ, ekanyaa amɛ koni amɛwie he.—km-GA 5/05 bf. 1.
Wó Amɛ Hewalɛ Koni Amɛye Odase
◼ Ani amɛyɛ nanemɛi kɛ wekumɛi ni amɛbaanyɛ amɛfɔ̃ amɛ nine kɛbafata he kɛkase nii lɛ?
◼ Ani amɛnanemɛi nitsulɔi, nanemɛi skulbii, loo mɛi krokomɛi ni amɛle amɛ lɛ ená anɔkwale lɛ he miishɛɛ?
Tsɔɔmɔ Amɛ Koni Amɛkɛ Mɛi Agba Amɛhemɔkɛyeli lɛ He Saji
◼ Yɛ nikasemɔ lɛ hei pɔtɛɛi komɛi lɛ, bi nikaselɔ lɛ akɛ, “Mɛɛ gbɛ nɔ obaatsɔ okɛ Biblia lɛ atsu nii kɛgbála anɔkwale nɛɛ mli otsɔɔ owekumɛi?”
◼ Ye obua nikaselɔ lɛ koni enu bɔ ni ehe hiaa ni ejie bulɛ kɛ mlihilɛ kpo beni ekɛ mɛi gbaa Nyɔŋmɔ kɛ eyiŋtoi ahe sane lɛ shishi.
◼ Nikaselɔi lɛ baanyɛ amɛkɛ wolo bibioo ni ji Yehowa Odasefoi—Namɛi Ni? Mɛni Amɛheɔ Amɛyeɔ? lɛ atsu nii kɛye abua amɛnanemɛi kɛ amɛwekumɛi koni amɛnu wɔhemɔkɛyeli lɛ kɛ wɔjamɔŋ nifeemɔi ni damɔ Biblia lɛ nɔ lɛ ashishi.
Fã 10: Ní Aaatsɔse Nikaselɔi lɛ yɛ Shĩa kɛ Shĩa Nitsumɔ lɛ Mli
Kɛ́ onukpai lɛ kpɛlɛ Biblia mli nikaselɔ ko nɔ ákɛ shiɛlɔ ni abaptisiko lɛ lɛ, no lɛ nikaselɔ lɛ baanyɛ efata asafo lɛ he kɛbɔi shiɛmɔyaa.—km-GA 6/05 bf. 1.
Okɛ Lɛ Afee Ekome Kɛsaa Nyɛhe
◼ Tsɔɔmɔ nikaselɔ lɛ he ni ebaanyɛ ená shiɛmɔ wiemɔi ni akɛha lɛ kɛjɛ.
◼ Ye obua lɛ ní etao shiɛmɔ wiemɔ kuku ko ni ebaanyɛ ekɛtsu nii yɛ shikpɔŋkuku lɛ mli.
◼ Wó lɛ hewalɛ koni ekɛ Biblia lɛ atsu nii yɛ eshiɛmɔ nitsumɔ lɛ mli.
◼ Okɛ lɛ afee shiɛmɔ wiemɔ lɛ he nɔkwɛmɔnii. Tsɔɔmɔ lɛ bɔ ni eeefee etsɔ ŋaa gbɛ nɔ etsu saji ni bei pii lɛ mɛi kɛjieɔ amɛnaa lɛ ahe nii.
Okɛ Lɛ Afee Ekome Kɛshiɛ
◼ Ha nikaselɔ lɛ akwɛ bo beni okɛ shiɛmɔ wiemɔ ni okɛ lɛ efee ekome kɛkase lɛ haa lɛ.
◼ Ha nikaselɔ lɛ nifeemɔ kɛ enyɛmɔi ahi ojwɛŋmɔ mli. Bei komɛi lɛ, ebaafee nɔ ni hi jogbaŋŋ akɛ oooha shiɛlɔ hee lɛ kɛ shiɛmɔ wiemɔ lɛ fã ko pɛ aha.
◼ Ye obua shiɛlɔ hee lɛ koni eto ebe he gbɛjianɔ bɔ ni baaha ekɛ ehe awo shiɛmɔ nitsumɔ lɛ mli daa.
Fã 11: Ní Aaaye Abua Shiɛlɔi Heei Koni Amɛfee Sɛɛkuu-Kɛsaramɔi
Nɔ ni tee nɔ yɛ klɛŋklɛŋ gbi ni akɛ mɔ lɛ gba sane lɛ nɔ adamɔɔ asaa he kɛha sɛɛkuu-kɛsaramɔ. Wó shiɛlɔ hee lɛ hewalɛ koni ená mɔ ni ekɛwieɔ lɛ he miishɛɛ diɛŋtsɛ. Yaa nɔ otsɔɔ lɛ bɔ ni ebaafee eha mɛi ni eshiɛɔ ehaa lɛ atsɔɔ amɛjwɛŋmɔ, ebo amɛwiemɔi atoi, ní ekadi nibii ni haoɔ amɛ lɛ.—km-GA 7/05 bf. 1.
Hesaamɔ Kɛha Mɔ lɛ Saramɔ Ekoŋŋ
◼ Okɛ shiɛlɔ hee lɛ atĩ nibii ni tee nɔ yɛ klɛŋklɛŋ saramɔ lɛ mli lɛ amli, ní oye obua lɛ kɛto shiɛmɔ wiemɔ ko ni shiatsɛ lɛ baaná he miishɛɛ lɛ he gbɛjianɔ.
◼ Nyɛtoa shiɛmɔ wiemɔ kuku ko ni damɔ Biblia mli ŋmalɛ kome kɛ woji ni akɛ mɛi kaseɔ lɛ eko mli kuku kome nɔ lɛ he gbɛjianɔ.
◼ Nyɛsusua sane ko ni nyɛbaanyɛ nyɛbi yɛ sanegbaa lɛ naagbee lɛ he.
Okɛ Mɔdɛŋbɔɔ Aku Sɛɛ Kɛyasara Lɛ
◼ Wó shiɛlɔ hee lɛ hewalɛ koni eyasara mɛi fɛɛ ni ná wiemɔ lɛ he miishɛɛ lɛ amrɔ nɔŋŋ.
◼ Ye obua shiɛlɔ hee lɛ ni ena akɛ ehe miihia ni abɔ mɔdɛŋ aku sɛɛ ayasara mɛi ni afɔɔɔ amɛ namɔ lɛ shii abɔ.
◼ Tsɔɔmɔ shiɛlɔ hee lɛ bɔ ni akɛ mɔ toɔ gbɛjianɔ kɛha saramɔ ekoŋŋ, ní oha enu shishi akɛ ehe miihia ni eku sɛɛ eyasara mɔ lɛ taakɛ ewo shi lɛ.
Fã 12: Ní Wɔɔye Wɔbua Nikaselɔi lɛ Koni Amɛje Biblia Mli Nikasemɔ Shishi ni Amɛtsa Nɔ
Yesu ni oookase kɛtsɔ nɔkwɛmɔnɔ kpakpa ni ooofee yɛ oshiɛmɔ nitsumɔ lɛ mli lɛ nɔ lɛ he miihia waa. Kɛ́ onikaselɔ lɛ yɔse nɔkwɛmɔnɔ ni ofeɔ yɛ shiɛmɔ nitsumɔ lɛ mli lɛ, no baaha enu shishi akɛ yiŋtoo hewɔ ni wɔfeɔ sɛɛkuu-kɛsaramɔ ji ní wɔje Biblia mli nikasemɔi ashishi.—km-GA 8/05 bf. 1.
Bɔ ni Akɛ Mɔ Toɔ Biblia Mli Nikasemɔ He Gbɛjianɔ Ahaa
◼ Ha nikaselɔ lɛ ale akɛ bei pii lɛ, ehe ehiaaa ni wɔtsɔɔ mɔ lɛ bɔ ni wɔfeɔ nikasemɔ lɛ wɔhaa lɛ mli fitsofitso.
◼ Bei pii lɛ, nɔ̃ pɛ ni he hiaa ji ní wɔkɛ woji ni wɔkɛ mɛi kaseɔ lɛ eko mli kuku kome loo enyɔ afee nikasemɔ lɛ he nɔkwɛmɔnɔ wɔtsɔɔ.
◼ Nyɛtĩa shiɛmɔ wiemɔi ni akɛjeɔ Biblia mli nikasemɔi ashishi lɛ ekome mli, ní nyɛfee he nɔkwɛmɔnɔ.—km-GA 8/05 bf. 8; km-GA 1/02 bf. 6.
Nikaselɔi ní Aaatsɔse Amɛ Koni Amɛbatsɔmɔ Tsɔɔlɔi
◼ Wó nikaselɔi lɛ hewalɛ koni amɛkɛ amɛhe awo Teokrase Sɔɔmɔ Skul lɛ mli.
◼ Too gbɛjianɔ koni oha shiɛlɔi heei afata ohe kɛyafee Biblia mli nikasemɔi, ní ekolɛ no aha amɛná hegbɛ fioo ni amɛkɛtsɔɔ nii.