Saamɔ Ohe Jogbaŋŋ Kɛha Nitsɔɔmɔ
1. Kɛ́ wɔmiifee Biblia mli nikasemɔ lɛ, mɛni hewɔ esa akɛ wɔbɔ mɔdɛŋ wɔye wɔbua nikaselɔ lɛ ni ehiɛ asɔ nɔ ni ekaseɔ lɛ?
1 Kɛ́ wɔmiifee Biblia mli nikasemɔ lɛ, esa akɛ wɔsaa wɔhe jogbaŋŋ koni wɔnyɛ wɔtsirɛ wɔnikaselɔ lɛ ni enyɛ esɔmɔ Yehowa. Esa akɛ wɔbɔ mɔdɛŋ wɔye wɔbua lɛ koni ená hiɛsɔɔ eha Biblia mli anɔkwalei ni ekaseɔ lɛ. Enɛ baawo nikaselɔ lɛ hewalɛ. (5 Mose 6:5; Abɛi 4:23; 1 Kor. 9:26) Te wɔɔfee tɛŋŋ wɔfee enɛ?
2. Mɛɛ gbɛ nɔ sɔlemɔ baanyɛ aye abua wɔ kɛji wɔmiisaa wɔhe kɛha Biblia mli nikasemɔ?
2 Kɛ́ Obaasaa Ohe lɛ, Sɔlemɔ: Akɛni Yehowa ji mɔ ni haa anɔkwale lɛ daa yɛ nikaselɔ lɛ tsui mli hewɔ lɛ, ehi jogbaŋŋ akɛ kɛ́ wɔmiisaa wɔhe kɛha nikasemɔ lɛ, wɔsɔle wɔha nikaselɔ lɛ ni wɔtsĩ nibii pɔtɛɛ ni he hiaa lɛ lɛ atã. (1 Kor. 3:6; Yak. 1:5) Sɔlemɔ ni tamɔ nɛkɛ hu baanyɛ aye abua wɔ koni wɔyɔse bɔ ni wɔɔfee wɔya nɔ wɔha etsui ayi obɔ kɛ Yehowa suɔmɔnaa nii lɛ he “anɔkwa nilee.”—Kol. 1:9, 10, NW.
3. Te wɔɔfee tɛŋŋ wɔha nikaselɔ lɛ ahi wɔjwɛŋmɔ mli beni wɔsaa wɔhe lɛ?
3 Susumɔ Nikaselɔ lɛ He: Yesu le akɛ nitsɔɔmɔ ni mɔɔ shi jogbaŋŋ lɛ biɔ ni asusu toibolɔi lɛ ahe. Abi Yesu sane kometoo lɛ nɔŋŋ yɛ shihilɛi enyɔ komɛi amli akɛ: “Mɛni mafee ni maná naanɔ wala?” Esoro gbɛ nɔ ni etsɔ eha sanebimɔ lɛ hetoo yɛ shihilɛi enyɔ lɛ fɛɛ amli. (Luka 10:25-28; 18:18-20) Esa akɛ wɔha nikaselɔ lɛ ahi wɔjwɛŋmɔ mli beni wɔsaa wɔhe lɛ. Te ŋmalɛi ni atsɛ yisɛɛ shi aŋmalako emli wiemɔi lɛ amli nɔ ni wɔkɛ lɛ baakane lɛ? Nii enyiɛ wɔbaabɔ mɔdɛŋ akɛ wɔkase? Mɛɛ otii ni yɔɔ nikasemɔ lɛ mli ebaawa kɛha nikaselɔ lɛ akɛ ebaanu shishi loo ekpɛlɛ nɔ? Kɛ́ wɔsusu saji komɛi ni nikaselɔ lɛ baanyɛ abi lɛ he kɛtsɔ hiɛ lɛ, wɔbaanyɛ wɔsaa wɔhe jogbaŋŋ kɛha hetoo ni emɔ shi.
4. Mɛni wɔhe ni wɔɔsaa jogbaŋŋ lɛ biɔ ni wɔfee?
4 Kwɛmɔ Nɔ ni Nyɛbaakase lɛ Mli: Kɛ́ wɔ diɛŋtsɛ wɔkase sane ni wɔkɛ nikaselɔ lɛ yaasusu he lɛ shii abɔ po lɛ, klɛŋklɛŋ kwraa ni wɔkɛ lɛ yaakase nɛ. Kɛ́ wɔbaanyɛ wɔshɛ etsui he lɛ, esa akɛ wɔsaa wɔhe jogbaŋŋ kɛha nikasemɔ lɛ eko fɛɛ eko. Enɛ tsɔɔ akɛ esa akɛ wɔ hu wɔfee nɔ ni wɔwoɔ wɔnikaselɔ lɛ hewalɛ ni efee lɛ. Beni nikaselɔ lɛ yɔɔ ojwɛŋmɔ mli lɛ, kwɛmɔ nɔ ni nyɛbaakase lɛ mli, ni okane ŋmalɛi ni atsɛ yisɛɛ shi aŋmalako emli wiemɔi lɛ, ní kɛ́ ebaahi lɛ, ofolɔ otii lɛ ashishi.—Rom. 2:21, 22.
5. Te wɔɔfee tɛŋŋ wɔkase Yehowa?
5 Yehowa miisumɔ waa ni Biblia mli nikaselɔ fɛɛ nikaselɔ aya ehiɛ yɛ enikasemɔ lɛ mli. (2 Pet. 3:9) Kɛ́ wɔhé be kɛsaa wɔhe kɛha Biblia mli nikasemɔ fɛɛ nikasemɔ lɛ, etsɔɔ akɛ wɔ hu wɔyɛ suɔmɔ tamɔ Yehowa.