Fó Mɛi Krokomɛi Anɔ̃ Mli—Kɛtsɔ Ohe ni Ooosaa lɛ Nɔ

¹ Kɛ wɔsaa wɔhe jogbaŋŋ kɛha shiɛmɔ nitsumɔ lɛ, eyeɔ ebuaa wɔ ni wɔfóɔ mɛi krokomɛi anɔ̃ mli. Yɛ mɛɛ gbɛ nɔ? Kɛji wɔsaa wɔhe jogbaŋŋ lɛ, ehaaa wɔshiɛmɔ wiemɔ lɛ ahé wɔjwɛŋmɔ babaoo tsɔ̃, ni yɛ no hewɔ lɛ, wɔbaanyɛ wɔgbala wɔjwɛŋmɔ kɛba shiatsɛ lɛ nɔ babaoo. Kɛfata he lɛ, eyeɔ ebuaa wɔ ni wɔyeɔ gbeyeishemɔ nɔ, ni ehaa wɔwieɔ kɛjɛɔ wɔtsuiŋ. Belɛ, te wɔɔfee tɛŋŋ wɔsaa wɔhe kɛ shiɛmɔ wiemɔ ni mɔɔ shi jogbaŋŋ lɛ?

² Okɛ Shiɛmɔ Wiemɔ ni Sa Atsu Nii: Halamɔ shiɛmɔ wiemɔi ni akɛha yɛ January 2005 Wɔ Maŋtsɛyeli Sɔɔmɔ lɛ mli lɛ ateŋ ekome ni baahi kɛha he ni oyɔɔ lɛ, ni okwɛ bɔ ni bo diɛŋtsɛ obaanyɛ owie lɛ oha. Tsakemɔ mli koni ekɔ mɛi ni yɔɔ oshikpɔŋkuku lɛ mli lɛ ahe. Ákɛ nɔkwɛmɔnɔ lɛ, kɛ́ okɛ jamɔ kuu pɔtɛɛ ko mli bii loo mɛi ni jɛ wiemɔ kuu ko mli lɛ fɔɔ kpee lɛ, susumɔ bɔ ni oshiɛmɔ wiemɔ lɛ baanyɛ atée amɛmiishɛɛ shi aha lɛ he. Oshiɛmɔ wiemɔ lɛ ni oooha ekɔ aŋkroaŋkroi ni okɛwieɔ lɛ ahe lɛ tsɔɔ akɛ ofóɔ amɛnɔ̃ mli waa.—1 Kor. 9:22.

³ Be mli ni okɛ shiɛmɔ wiemɔ lɛ tsuɔ nii lɛ, yaa nɔ ofee tsakemɔi yɛ mli. Akɛni hiɛkpamɔ wiemɔ lɛ he hiaa waa titri hewɔ lɛ, kadimɔ bɔ ni mɛi feɔ amɛnii amɛhaa yɛ ohiɛkpamɔ wiemɔ lɛ he lɛ. Ani amɛnyaa sane ni owieɔ he lɛ he? Ani amɛhaa saji ni obiɔ amɛ lɛ ahetoo? Kɛ jeee nakai lɛ, yaa nɔ ofee tsakemɔi kɛyashi beni obaaná shiɛmɔ wiemɔ ni mɔɔ shi jogbaŋŋ.

⁴ Nibii ni Haa Akaiɔ Nii: Ewaa kɛhaa mɛi babaoo akɛ amɛaakai shiɛmɔ wiemɔ lɛ be mli ni amɛshɛ shiatsɛ lɛ hiɛ lɛ. Kɛ nakai eji yɛ ogbɛfaŋ lɛ, ani óka akɛ okɛ gbee ni wa aaafee shiɛmɔ wiemɔ lɛ he nɔkwɛmɔnɔ otsɔɔ mɔ kroko? Enɛ baanyɛ aha saji otii lɛ ahi ojwɛŋmɔ mli jogbaŋŋ, ní okɛ owiemɔ lɛ aha yɛ gbɛ ni yɔɔ mlɛo ni shishinumɔ yɔɔ mli lɛ nɔ. Ebaanyɛ eha ole gbɛ nɔ ni oootsɔ otsu bɔ ni ekolɛ shiatsɛmɛi lɛ baafee amɛnii amɛha lɛ hu he nii.

⁵ Nɔ kroko hu ni baaha okai shiɛmɔ wiemɔ lɛ ji ní oŋma shiɛmɔ wiemɔ lɛ kuku yɛ wolo bibioo ko nɔ, ní okwɛ mli shwiaa kɛ́ eshwɛ fioo pɛ ni obaashɛ shiatsɛ lɛ ŋɔɔ lɛ. Mɛi komɛi naa akɛ enɛ yeɔ ebuaa amɛ, ni ehaa amɛnyɛɔ amɛkɛ mɛi gbaa sane jogbaŋŋ ní amɛsheee gbeyei. Wɔhe ni wɔsaa jogbaŋŋ kɛtsɔ nɛkɛ gbɛ̀i anɔ lɛ baanyɛ aye abua wɔ ni wɔfó mɛi krokomɛi anɔ̃ mli, ni enɛ baaha gbɛ ni wɔtsɔɔ nɔ wɔkɛ sanekpakpa lɛ haa lɛ aya hiɛ.