Bɔ ni Atoɔ Woji Tɛtrɛbii Kɛhamɔ Ahe Shiɛmɔ Wiemɔ He Gbɛjianɔ Ahaa
1. Mɛni hewɔ esa akɛ wɔto wɔdiɛŋtsɛ wɔshiɛmɔ wiemɔ he gbɛjianɔ moŋ fe nɔ ni wɔɔkase nɔkwɛmɔnii ni akɛhaa yɛ Wɔ Maŋtsɛyeli Sɔɔmɔ lɛ mli lɛ wɔwo wɔyitsoŋ ni wɔkɛtsu nii?
1 Ekolɛ obaabi ohe akɛ: ‘Woji tɛtrɛbii lɛ kɛhamɔ ahe shiɛmɔ wiemɔ jeɔ kpo yɛ Wɔ Maŋtsɛyeli Sɔɔmɔ ni baa lɛ eko fɛɛ eko mli, belɛ mɛni hewɔ esa akɛ wɔto eko he gbɛjianɔ?’ Eji anɔkwale akɛ shiɛmɔ wiemɔi ahe nɔkwɛmɔnii ni jeɔ kpo yɛ Wɔ Maŋtsɛyeli Sɔɔmɔ lɛ mli lɛ eye ebua mɛi babaoo, shi kɛlɛ ehe miihia ni mɔ diɛŋtsɛ hu ato eshiɛmɔ wiemɔ he gbɛjianɔ. Nɔ̃ hewɔ ji akɛ, shiɛmɔ wiemɔ ko baanyɛ amɔ shi yɛ shikpɔŋkuku ko mli, shi anyɛŋ akɛtsu nii yɛ shikpɔŋkuku kroko mli. No hewɔ lɛ, esaaa akɛ wɔnuɔ he akɛ doo lɛ, esa akɛ wɔkɛ shiɛmɔ wiemɔi ahe nɔkwɛmɔnii ni akɛha lɛ nɔŋŋ atsu nii kɛ́ wɔkɛ woji tɛtrɛbii lɛ miiha. Kɛ́ wɔmiisumɔ po ni wɔkɛ shiɛmɔ wiemɔi ahe nɔkwɛmɔnii lɛ eko atsu nii lɛ, ebaahi jogbaŋŋ akɛ wɔkɛaawo wɔdiɛŋtsɛ wɔwiemɔ mli.
2. Mɛni ebaabi ni ofee bɔni afee ni ole saneyitso he ni obaawie?
2 Halamɔ Saneyitsei lɛ Ateŋ Eko: Beni okane wolo tɛtrɛɛ lɛ ogbe naa sɛɛ lɛ, halamɔ saneyitso ko ni yɔɔ miishɛɛ waa ní kɛ okwɛ lɛ ehi ha nyɛshikpɔŋkuku lɛ. Bɔ ni okɛ nɔmimaa kɛ miishɛɛ baawie saneyitso lɛ he lɛ baanyɛ akanya shiatsɛ lɛ koni eŋɔ wolo tɛtrɛɛ lɛ ni lɛ hu ekane. Eyɛ mli akɛ ekolɛ okɛ saneyitso ko ni mɛi babaoo baaná he miishɛɛ yɛ nyɛshikpɔŋkuku lɛ mli baatsu nii moŋ, shi bɔɔ mɔdɛŋ akɛ obaale saneyitsei krokomɛi ni yɔɔ wolo tɛtrɛɛ lɛ mli lɛ hu amli saji jogbaŋŋ. Kɛ́ ofee nakai lɛ, no baaha onyɛ otsake oshiɛmɔ wiemɔ lɛ hiɛ kɛ́ okɛ mɔ ko ni yɔɔ sane kroko he miishɛɛ kpe.
3. Mɛɛ gbɛ nɔ otsɔɔ okpaa owiemɔ hiɛ ní emɔɔ shi jogbaŋŋ?
3 Bi Sane: No sɛɛ lɛ, too ohiɛkpamɔ wiemɔ lɛ he gbɛjianɔ jogbaŋŋ. Ohiɛkpamɔ wiemɔ lɛ he hiaa waa. Ekolɛ ebaahi jogbaŋŋ akɛ ooobi shiatsɛ lɛ sane ko ni ehesusumɔ baatée emiishɛɛ shi yɛ saneyitso ni ohala akɛ okɛ lɛ baasusu he lɛ he. Bei babaoo lɛ, sanebimɔi ni haa mɔ tsɔɔ ejwɛŋmɔ lɛ mɔɔ shi jogbaŋŋ. Kaabi saji ni baanyɛ agba shiatsɛ lɛ naa loo eha ekɛ bo ataa sane naa.
4. Ŋmalɛ ni akaneɔ ahaa shiatsɛ lɛ kɛ́ eshihilɛ ŋmɛ gbɛ lɛ he yɛ sɛɛnamɔ yɛ mɛɛ gbɛ nɔ?
4 Kanemɔ Ŋmalɛ Ko: Naagbee lɛ, halamɔ ŋmalɛ ko ni obaakane otsɔɔ shiatsɛ lɛ kɛji eshihilɛ baaŋmɛ gbɛ, obaanyɛ ohala ŋmalɛi ni yɔɔ saneyitso ni obaawie he lɛ mli lɛ ateŋ eko. Ŋmalɛ ni obaakane otsɔɔ shiatsɛ lɛ baaha ena akɛ wɔshɛɛ sane lɛ jɛ Nyɔŋmɔ Wiemɔ lɛ mli. (1 Tes. 2:13) Ŋmalɛ ni obaakane lɛ hu baaye lɛ odase kɛji ekpoo woji tɛtrɛbii lɛ po. Mɛi komɛi teɔ shiatsɛmɛi lɛ amiishɛɛ shi kɛtsɔ ŋmalɛ ko ni amɛkaneɔ amɛtsɔɔ amɛ, kɛkɛ amɛkɛ amɛsanebimɔ lɛ etsa nɔ. Kɛ́ ookpa ŋmalɛ hiɛ lɛ, obaanyɛ owie nɔ ko tamɔ: “Masumɔ male ojwɛŋmɔ yɛ Ŋmalɛ ni makane nɛɛ he.” No sɛɛ lɛ, gbalamɔ mɔ lɛ jwɛŋmɔ kɛya sane oti ko ni yɔɔ wolo tɛtrɛɛ lɛ mli lɛ nɔ koni owie he kuku bɔni afee ni ená he miishɛɛ babaoo, ni no sɛɛ lɛ, okɛ wolo tɛtrɛɛ lɛ aha lɛ.
5. Mɛɛ gbɛtsɔɔmɔi titri esa akɛ oha ehi ojwɛŋmɔ mli kɛ́ ooto woji tɛtrɛbii lɛ kɛhamɔ ahe shiɛmɔ wiemɔ he gbɛjianɔ?
5 Awoko mla kpɛŋŋ yɛ nɔ ni esa akɛ okɛɛ beni okɛ woji tɛtrɛbii lɛ haa lɛ he. Bei pii lɛ, ehi akɛ oooha oshiɛmɔ wiemɔ lɛ mli akã shi ni efee kuku. Feemɔ lɛ bɔ ni obaanyɛ otsu he nii jogbaŋŋ ní eha mɛi aŋɔ woji tɛtrɛbii lɛ. Gbalamɔ jwɛŋmɔ kɛba bɔ ni woji tɛtrɛbii lɛ ahe yɔɔ sɛɛnamɔ jogbaŋŋ ha lɛ nɔ, ni okɛ miishɛɛ awie he. Kɛ́ osaa ohe jogbaŋŋ lɛ, no lɛ obaaye omanye babaoo yɛ Buu-Mɔɔ kɛ Awake! lɛ ni okɛaaha “mɛi abɔ ní ajie ato naanɔ wala lɛ” mli.—Bɔf. 13:48.