Ani Oogbe Osɔɔmɔ lɛ Naa Kwraa?

¹ Akɛɛ wɔ yɛ Bɔfoi lɛ Asaji awolo lɛ mli akɛ Yesu kaselɔi lɛ gbe amɛsɔɔmɔ lɛ naa kɛtsɔ ‘odase ni amɛye’ gbɔmɛi lɛ ‘kɛmɔ shi’ lɛ nɔ. (Bɔf. 2:40; 8:25; 28:23) Eyɛ faŋŋ akɛ enɛ ji yiŋtoo ni ma bɔfo Paulo hiɛ. (Bɔf. 20:24) Ani jeee no ji oti ni ma ohiɛ ákɛ sanekpakpa lɛ he sɔɔlɔ? Mɛɛ gbɛ nɔ oootsɔ otsu enɛ ogbe naa?

² Saamɔ Oshiɛmɔ Wiemɔ Lɛ: Bɔni afee ni oná nɔmimaa akɛ obaaye odase ni mɔɔ shi yɛ sɔɔmɔ nitsumɔ lɛ mli lɛ, hesaamɔ he miihia. Enɛ ji anɔkwale, titri lɛ kɛ okɛ woji tɛtrɛbii lɛ miiha, akɛni sane ni ewieɔ he lɛ tsakeɔ yɛ be kɛ bei amli lɛ hewɔ. Bɔni afee ni Wɔ Maŋtsɛyeli Sɔɔmɔ lɛ awula wɔ jogbaŋŋ lɛ, enɛ kɛ gbɛjianɔtoo hee ko miiha—gbɛ ni kã abɛkugbɛ lɛ eto shiɛmɔ wiemɔi srɔtoi ni abaatsɔ nɔ akɛ Buu-Mɔɔ lɛ kɛ Awake! woji tɛtrɛbii heei lɛ aha lɛ ahe gbɛjianɔ. Abaama sane ni eba yɛ ebe naa pɛpɛɛpɛ ni baagbala gbɔmɛi pii ajwɛŋmɔ lɛ nɔ mi yɛ eko fɛɛ eko ni baaje kpo lɛ mli. Mɛɛ gbɛ nɔ oootsɔ otsu shiɛmɔ wiemɔi kukuji nɛɛ ahe nii?

³ Halamɔ wiemɔ loo susumɔ ko ni onuɔ he akɛ ebaamɔ shi jogbaŋŋ yɛ oshikpɔŋkuku lɛ mli. Kanemɔ sane ni eje kpo yɛ wolo lɛ mli lɛ jogbaŋŋ, koni okadi saji otii pɔtɛɛ ni baanyɛ atee miishɛɛ shi lɛ. Taomɔ ŋmalɛ ko ni atsɛ yɛ wolo tɛtrɛɛ lɛ mli ni kɔɔ sanegbaa lɛ he ni obaanyɛ okane otsɔɔ shiatsɛ lɛ. Okɛ naamuamɔ kuku afata he ni okɛwo otoibolɔ lɛ hewalɛ koni ekane wolo tɛtrɛɛ lɛ, kɛ wiemɔ kuku, kɛ́ esa, ní tsɔɔ akɛ shiatsɛ lɛ baanyɛ atsu onia fioo ni ekɛfi Yehowa Odasefoi ajeŋ muu fɛɛ nitsumɔ lɛ sɛɛ. Agbɛnɛ feemɔ oshiɛmɔ wiemɔ lɛ he nɔkwɛmɔnɔ okwɛ.

⁴ Too Gbɛjianɔ ni Okɛ Biblia lɛ Atsu Nii: Kɛ oto gbɛjianɔ kpakpa lɛ, bei pii lɛ obaanyɛ ni okɛ ŋmalɛ afata owiemɔ lɛ he. Ákɛ nɔkwɛmɔnɔ lɛ, shiɛlɔi ni he esa yɛ hei pii lɛ miiye omanye kɛtsɔ shinaa naa ni ayaa ni ahiɛ Biblia lɛ nɔ, kɛ shiatsɛ lɛ ŋamɔ, kɛ wiemɔ akɛ:

◼ “Wɔmiibi gbɔmɛi akɛ ani amɛheɔ enɛ amɛyeɔ lo . . .” Kanemɔ 1 Mose 1:1, ni obi akɛ: “Ani okɛ wiemɔ nɛɛ kpãa gbee?” Kɛji akɛ gbɔmɔ lɛ kɛ enɛ kpãa gbee lɛ, no lɛ kɛɛmɔ akɛ: “Mi hu miheɔ miyeɔ. Shi ani osusuɔ akɛ kɛji akɛ Nyɔŋmɔ bɔ nibii fɛɛ lɛ, belɛ lɛ nɔŋŋ ji mɔ ni haa efɔŋfeemɔ ni yaa nɔ lɛ baa?” Yɛ be mli ni okpɛlɛ gbɔmɔ lɛ hetoo lɛ nɔ lɛ, kanemɔ Jajelɔ 7:29. Gbelemɔ Nilee wolo lɛ baafa 71, ni okane kuku 2. Wó mɔ lɛ hewalɛ koni ekane wolo lɛ. Kɛji akɛ shiatsɛ lɛ ekpɛlɛɛɛ wiemɔ ni yɔɔ 1 Mose 1:1 lɛ nɔ lɛ, wó lɛ hewalɛ koni epɛi Creation wolo lɛ mli.

⁵ Saramɔ Mɛi Fɛɛ ni Jieɔ Miishɛɛ Kpo Lɛ: Onyɛŋ otsu osɔɔmɔ nitsumɔ lɛ he nii ogbe naa kwraa kɛji akɛ osaraaa mɛi ni jieɔ miishɛɛ kpo lɛ. Kɛji akɛ nyɛgba sane kɛ miishɛɛ, ni okɛ woji tɛtrɛbii loo woji krokomɛi ha lɛ, ŋmaa mɔ lɛ gbɛi kɛ edrɛs ofɔ̃ shi. Bɔɔ mɔdɛŋ waa ni otée mɔ lɛ miishɛɛ shi kɛtsɔ sɛɛkuu kɛ jɛmɛ yaa amrɔ nɔŋŋ nɔ. Bɔ fɛɛ bɔ ni ji lɛ, too gbɛjianɔ kɛha Biblia lɛ kasemɔ.

⁶ Klɛŋklɛŋ afii oha lɛ mli kaselɔi lɛ le akɛ Yesu efã amɛ akɛ ‘amɛye odase kɛmɔ shi.’ (Bɔf. 10:42) Nakai famɔ lɛ nɔŋŋ kɔɔ wɔ hu wɔhe, ejaakɛ no pɛ ji gbɛ ni wɔbaanyɛ wɔtsɔ nɔ wɔfee kaselɔi. (Mat. 28:19, 20) Nyɛhaa wɔfea bɔ fɛɛ bɔ ni wɔɔnyɛ ni wɔkɛgbe wɔsɔɔmɔ lɛ naa kwraa.—2 Tim. 4:5.