Gbi Kome Kpee Krɛdɛɛ He Gbɛjianɔtoo Kɛha Afi 2010
1. (a) Mɛɛ Ŋmalɛ naa saneyitsei asusu he yɛ gbi kome kpee krɛdɛɛ srɔtoi ni afee nyɛsɛɛ nɛɛ ashishi? (b) Ani otii pɔtɛɛ komɛi eje kpo yɛ gbi kome kpee krɛdɛɛ srɔtoi ní afee kɛho lɛ mli ni eye ebua bo yɛ oshiɛmɔ nitsumɔ lɛ mli?
1 “Nyɛyoa Nii ni Hi Titri Lɛ,” “Nyɛdamɔa Shi Shiŋŋ Akɛ Tooku Kome,” “Nyɛyaa nɔ Nyɛyea Anɔkwale lɛ He Odase,” kɛ “Wɔ lɛ, Sũ Ji Wɔ—Yehowa Ji Wɔshɔ̃lɔ.” (Fil. 1:9, 10, 27; Yoh. 18:37; Yes. 64:8) Enɛɛmɛi ji saneyitsei fioo komɛi ní asusu he yɛ gbi kome kpee krɛdɛɛ srɔtoi ni afee kɛho lɛ ashishi. Ani ooshwe akɛ oya gbi kome kpee krɛdɛɛ kɛha afi 2010 sɔɔmɔ afi lɛ? Abaasusu saneyitso ni ji: “Be lɛ Faaa Dɔŋŋ,” ní ajie kɛjɛ 1 Korintobii 7:29 lɛ he.
2. Te wɔɔfee tɛŋŋ wɔsusu kpee lɛ he kɛ miishɛɛ lɛ?
2 Kɛ́ atswa gbi ni nyɛsafo lɛ kɛbaaya gbi kome kpee krɛdɛɛ lɛ he adafi nɔŋŋ lɛ, nyɛkɛ miishɛɛ asusua he. Nɔ ni fɔlɔi komɛi feɔ kɛyeɔ buaa amɛbii koni amɛkpá kpee lɛ gbɛ ji akɛ, amɛŋmalaa gbi ni akɛbaaya kpee lɛ kɛ nibii ni he baahia ni weku lɛ kɛya lɛ yɛ amɛweku kalanda lɛ nɔ, ni amɛbuɔ be lɛ kɛyashi kpee be lɛ baashɛ. Nyɛbaanyɛ nyɛsusu saji ni nyɛŋmala yɛ gbi kome kpee krɛdɛɛ srɔtoi ni afee kɛho lɛ he beni nyɛfeɔ nyɛ gbɛkɛ Weku Jamɔ lɛ. Obaanyɛ osaa otsui kɛha nifeemɔ nɛɛ kɛji okwɛ Ná Teokrase Sɔɔmɔ Skul Tsɔsemɔ lɛ He Sɛɛ wolo lɛ baafa 13-16 lɛ, koni eye ebua bo kɛ oweku lɛ ní ‘nyɛkwɛ bɔ ni nyɛboɔ sane toi nyɛhaa lɛ jogbaŋŋ.’—Luka 8:18.
3. Te wɔɔfee tɛŋŋ wɔná nɔ ni wɔbaanu lɛ he sɛɛ lɛ?
3 Okɛ Nɔ ni Okaseɔ lɛ Atsu Nii: Wiemɔ ko ni afɔɔ numɔ beni agbe kpee ko naa lɛ ji akɛ, “Kpee lɛ ŋɔɔ ei!” Enɛ feɔ anɔkwale akɛni eji nikeenii kpakpai ni jɛɔ Yehowa dɛŋ lɛ ateŋ eko lɛ hewɔ. (Abɛi 10:22) Kɛ́ saji ni oyanu lɛ he baaba sɛɛnamɔ lɛ, esa akɛ ojwɛŋ nɔ, ní okɛto. (Luka 8:15) Kɛ́ akpá kpee lɛ, hémɔ be ni okɛ oweku lɛ loo mɛi ni okɛta tsɔne mli lɛ asusu kpee lɛ shishi nifeemɔ lɛ he beni nyɛyaa shĩa lɛ. Nyɛsusua otii ni nyɛkɛ mamɔ nyɛhiɛ kɛ saji ni baaye abua nyɛ yɛ nyɛshiɛmɔ nitsumɔ lɛ mli lɛ ahe. Nakai ni nyɛaafee lɛ baaha nyɛná saji ni nyɛnu yɛ kpee lɛ shishi lɛ ahe sɛɛ babaoo.—Yak. 1:25.
4. Mɛni hewɔ kpee nɛɛ baafee kpee krɛdɛɛ lɛ?
4 Eŋɔɔ wɔnaa babaoo diɛŋtsɛ kɛ́ wɔnine shɛ nikeenii ko ni he hiaa wɔ lɛ nɔ. Wɔmiikpa nɔ ni Yehowa esaa eto wɔ yɛ gbi kome kpee krɛdɛɛ ni kã wɔhiɛ lɛ mli lɛ gbɛ, aloo jeee nakai? Wɔbaanyɛ wɔná nɔmimaa akɛ ehe baaba sɛɛnamɔ kɛha wɔ yɛ wɔshihilɛ gbɛ̀i fɛɛ amli. Wɔbaanyɛ wɔkpa gbɛ akɛ wɔnine baashɛ nikeenii ni sa, ni ji hewalɛwoo kɛ tsɔsemɔ ni wɔbaanyɛ wɔkɛgbe nitsumɔ ni Yehowa, wɔŋwɛi Tsɛ lɛ etuu ewo wɔdɛŋ lɛ naa lɛ nɔ.—2 Tim. 4:2; Yak. 1:17.