Nyɔŋmɔ Wiemɔ lɛ Yɛ Hewalɛ
1. Mɛni ji afi 2014 sɔɔmɔ afi lɛ gbi kome kpee krɛdɛɛ lɛ saneyitso?
1 Akɛni Biblia lɛ tamɔɔɔ nibii ni adesai ni yeee emuu lɛ efee lɛ hewɔ lɛ, eyɛ hewalɛ ni ekɛaatsake wɔsusumɔi kɛ wɔnifeemɔi ni eha ekɛ Yehowa suɔmɔnaa nii akpã gbee. Mɛɛ hewalɛ Nyɔŋmɔ Wiemɔ lɛ yɔɔ? Mɛɛ gbɛ nɔ wɔbaanyɛ wɔkɛ ehewalɛ lɛ atsu nii kɛmɔ shi yɛ wɔshihilɛ mli? Mɛɛ gbɛ nɔ wɔbaanyɛ wɔkɛtsu nii jogbaŋŋ kɛye wɔbua mɛi krokomɛi? Wɔheɔ wɔyeɔ akɛ saji nɛɛ ni abaasusu he yɛ wɔ afi 2014 sɔɔmɔ afi lɛ gbi kome kpee krɛdɛɛ lɛ shishi lɛ baatswa wɔ ama shi yɛ mumɔŋ. Kpee lɛ saneyitso ji, “Nyɔŋmɔ Wiemɔ lɛ Yɛ Hewalɛ,” ni edamɔ Hebribii 4:12 lɛ nɔ.
2. Mɛɛ sanebimɔi esa akɛ wɔbo amɛhetoi lɛ atoi?
2 Taomɔ Sanebimɔi Nɛɛ Ahetoi: Beni oboɔ kpee lɛ shishi wiemɔi lɛ atoi lɛ, ŋmalamɔ sanebimɔi ni nyiɛ sɛɛ nɛɛ ahetoi oshwie shi.
• Mɛni hewɔ esa akɛ wɔkɛ wɔhe afɔ̃ Yehowa Wiemɔ lɛ nɔ? (Lala 29:4)
• Mɛɛ gbɛ nɔ hewalɛ ni Nyɔŋmɔ Wiemɔ lɛ yɔɔ lɛ baanyɛ atsake wɔ diɛŋtsɛ wɔshihilɛ? (Lala 34:9)
• Mɛɛ gbɛ nɔ wɔbaanyɛ wɔkɛ hewalɛ ni Nyɔŋmɔ Wiemɔ lɛ yɔɔ lɛ atsu nii yɛ wɔshiɛmɔ nitsumɔ lɛ mli? (2 Tim. 3:16, 17)
• Mɛni wɔbaanyɛ wɔfee koni hewalɛ ni Satan je lɛ yɔɔ ni ekɛlakaa mɛi lɛ akaná wɔnɔ hewalɛ? (1 Yoh. 5:19)
• Akɛ oblanuu loo oblayoo lɛ, mɛɛ gbɛ nɔ obaanyɛ oye omanye yɛ mumɔŋ? (Yer. 17:7)
• Mɛɛ gbɛ nɔ wɔbaanyɛ wɔná hewalɛ beni wɔfee gbedee po? (2 Kor. 12:10)
• Kɛ́ sui fɔji eka wɔhe be kplaŋŋ po lɛ, mɛni baaye abua wɔ ni wɔya nɔ wɔfee tsakemɔi yɛ wɔshihilɛ mli? (Efe. 4:23)
3. Yɛ gbi kome kpee krɛdɛɛ lɛ shishi wiemɔi lɛ ni wɔɔbo toi lɛ sɛɛ lɛ, mɛɛ gbɛi krokomɛi anɔ wɔbaanyɛ wɔná kpee lɛ he sɛɛ?
3 Ŋwanejee ko bɛ he akɛ, kɛ́ wɔbo saji ni he hiaa nɛɛ atoi lɛ, ehe baaba sɛɛnamɔ aha wɔ waa! Kɛfata he lɛ, taakɛ eji yɛ kpokpaa nɔ kpee lɛ, kɛ kpokpaa wulu nɔ kpee lɛ he lɛ, gbi kome kpee krɛdɛɛ lɛ baaha wɔná hegbɛ kɛlɛɛ wɔmli ni wɔkɛ nyɛmimɛi ni jɛ asafoi krokomɛi amli lɛ abɔ. (Lala 133:1-3; 2 Kor. 6:11-13) No hewɔ lɛ, hemɔ be ni okɛ onanemɛi ni ona amɛ etsɛ lɛ abɔ, ni otao nanemɛi hee. Kɛ́ atsu wielɔ ko, ekolɛ kpokpaa wulu nɔkwɛlɔ loo nyɛmi ko ni jɛ Betel kɛba nyɛ gbi kome kpee krɛdɛɛ lɛ shishi lɛ, ofainɛ, ŋɔɔ hegbɛ lɛ ni okɛ lɛ kɛ ehefatalɔ lɛ agba sane. Lɛɛlɛŋ, wɔyɛ yiŋtoi babaoo ni wɔɔdamɔ nɔ wɔkpa gbi kome kpee krɛdɛɛ ni kã wɔhiɛ lɛ gbɛ!