Nitsumɔ ni He Hiaa Fe Fɛɛ
1. Mɛni hiɛsɔɔ ni mli kwɔ ni wɔyɔɔ kɛha shiɛmɔ nitsumɔ lɛ baatsirɛ wɔ ni wɔkɛshã afɔle?
1 Mɛni hewɔ be fɛɛ be lɛ awoɔ wɔ hewalɛ koni wɔkɛ wɔbe, wɔhewalɛ, kɛ nibii ni wɔyɔɔ lɛ atsu shiɛmɔ nitsumɔ lɛ? Ejaakɛ nitsumɔ ko bɛ ni he hiaa fe no! Kɛ́ wɔjwɛŋ sɛɛnamɔi babaoo ni baajɛ mli kɛba lɛ he lɛ, ebaaha shwelɛ ni wɔyɔɔ akɛ wɔkɛ wɔhe awo nitsumɔ ni atsuŋ eko dɔŋŋ nɛɛ mli lɛ aya hiɛ.—Bɔf. 20:24.
2. Mɛɛ gbɛ nɔ wɔshiɛmɔ nitsumɔ lɛ yeɔ ebuaa kɛtseɔ Yehowa gbɛi kpele lɛ he?
2 Etseɔ Yehowa Gbɛi lɛ He: Shiɛmɔ nitsumɔ lɛ maa nɔ mi akɛ, Yehowa Maŋtsɛyeli kɛtsɔ Kristo Yesu nɔ lɛ baajie adesai anɔyelii fɛɛ kɛya, ni ekɛ adesai anaagbai fɛɛ anaa tsabaa baaba. (Mat. 6:9, 10) Akɛ anunyam haa Yehowa ákɛ mɔ pɛ ni baanyɛ ajie wɔ kɛjɛ hela kɛ gbele dɛŋ. (Yes. 25:8; 33:24) Akɛni Yehowa gbɛi kã wɔ nɔ hewɔ lɛ, ekolɛ mɛi ni naa jeŋba kpakpa kɛ ekãa ni wɔyɔɔ lɛ baajie eyi. (1 Pet. 2:12) Kwɛ bɔ ni eyɔɔ miishɛɛ akɛ wɔɔha ale Nuŋtsɔ Maŋtsɛ Yehowa gbɛi lɛ yɛ shikpɔŋ lɛ nɔ fɛɛ!—Lala 83:18.
3. Mɛɛ jɔɔmɔi mɛi ni boɔ Maŋtsɛyeli shɛɛ sane lɛ toi lɛ náa?
3 Ehereɔ Mɛi Ayiwala: Yehowa ‘sumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.’ (2 Pet. 3:9) Shi kɛ́ mɔ ko bɛ ni baatsɔɔ mɛi lɛ anii lɛ, te amɛaafee tɛŋŋ amɛkase sui ni Yehowa buɔ akɛ eja loo ejaaa lɛ? (Yona 4:11; Rom. 10:13-15) Kɛ́ aŋkroaŋkroi kpɛlɛ sanekpakpa lɛ nɔ, ni amɛtsi amɛhe kɛjɛ nifeemɔi gbohii ahe lɛ, amɛnáa shihilɛ kpakpa. (Mika 4:1-4) Kɛfata he lɛ, amɛnáa naanɔ wala he hiɛnɔkamɔ ni yɔɔ miishɛɛ lɛ eko. Ekãa ni wɔkɛshiɛɔ, ni wɔkɛtsɔɔ mɛi anii lɛ hereɔ wɔ, kɛ mɛi ni boɔ wɔ toi lɛ fɛɛ yiwala. (1 Tim. 4:16) Mɛɛ hegbɛ ni yɔɔ nyam po wɔná nɛkɛ yɛ nitsumɔ ni he hiaa fe fɛɛ nɛɛ mli!
4. Mɛni hewɔ esa akɛ wɔkɛ ekãa atsu Maŋtsɛyeli shiɛmɔ kɛ kaselɔfeemɔ nitsumɔ lɛ?
4 Etsɛŋ ni amanehulu kpeteŋkpele lɛ kɛ jeŋ fɔŋ nɛɛ baaba enaagbee trukaa. Abaabaa mɛi ni jáa Yehowa lɛ yi. No hewɔ lɛ, shiɛmɔ kɛ kaselɔi afeemɔ nitsumɔ lɛ ji nitsumɔ ni he hiaa fe fɛɛ, ni he yɔɔ sɛɛnamɔ fe fɛɛ ni atsuɔ ŋmɛnɛ. Eba akɛ wɔkɛ no baaye klɛŋklɛŋ gbɛhe yɛ wɔshihilɛ mli!—Mat. 6:33.