Nitsumɔ ni Miishɛɛ yɔɔ mli Fe Fɛɛ
1. Mɛɛ mumɔŋ tsamɔ nitsumɔ yaa nɔ yɛ wɔgbii nɛɛ amli?
1 Mɛi ni na tsamɔ ni atsa mɛi yɛ klɛŋklɛŋ afii oha lɛ mli lɛ ná miishɛɛ waa diɛŋtsɛ. (Luka 5:24-26) Yɛ wɔgbii nɛɛ amli lɛ, wɔ hu wɔnáa miishɛɛ waa yɛ mumɔŋ tsamɔ nitsumɔ ni yaa nɔ lɛ mli. (Kpoj. 22:1, 2, 17) Kɛ́ wɔkane niiashikpamɔi ni tsɔɔ bɔ ni Yehowa Wiemɔ lɛ kɛ emumɔ lɛ etsake mɛi lɛ, ehaa wɔnáa miishɛɛ naakpa! Shi nɔ ni yɔɔ miishɛɛ fe fɛɛ ji, ni wɔ diɛŋtsɛ wɔkɛ wɔhe baawo nitsumɔ nɛɛ mli kɛtsɔ Biblia mli nikasemɔi ni wɔɔfee lɛ yɛ gbɛ ni baaha nikaselɔi lɛ aya amɛhiɛ lɛ nɔ.
2. Beni wɔtsɔɔ mɔ ko anɔkwale lɛ, mɛɛ nibii haa wɔnáa miishɛɛ?
2 Te atsɛɔ Nyɔŋmɔ tɛŋŋ? Mɛni hewɔ eŋmɛɔ piŋmɔ gbɛ? Mɛni Nyɔŋmɔ Maŋtsɛyeli lɛ baafee eha adesai? Jeee bɔ ni wɔhaa saji nɛɛ ahetoo lɛ pɛ ni haa wɔnaa miishɛɛ, shi moŋ, miishɛɛ ni nikaselɔ lɛ naa yɛ anɔkwale lɛ ni ekaseɔ lɛ he lɛ hu haa wɔ miishɛɛ. (Abɛi 15:23; Luka 24:32) Beni nikaselɔ lɛ yaa ehiɛ lɛ, ekolɛ ekɛ gbɛ́i Yehowa lɛ baabɔi nitsumɔ, ebaatsake bɔ ni esaa ehe ehaa, ebaatsi ehe kɛjɛ nifeemɔi ni esaaa lɛ ahe, ni ebaabɔi mɛi odase yeli. Kɛji etee ehiɛ kɛshɛ henɔjɔɔmɔ kɛ baptisimɔ he lɛ, ebaatsɔ wɔnyɛmi kɛ wɔnaanyo nitsulɔ. Enɛɛmɛi ateŋ eko fɛɛ eko ni eshɛɔ he lɛ haa wɔnáa miishɛɛ.—1 Tes. 2:19, 20.
3. Mɛɛ nibii komɛi wɔbaanyɛ wɔfee koni wɔnyɛ wɔkɛ mɔ ko aje Biblia mli nikasemɔ shishi?
3 Ani Obaanyɛ Otsu Eko? Kɛji oosumɔ ni okɛ ohe awo nitsumɔ ni miishɛɛ yɔɔ mli fe fɛɛ nɛɛ mli lɛ, bi Yehowa ni eye ebua bo ni ofee Biblia mli nikasemɔ, ni no sɛɛ lɛ, otsu osɔlemɔ lɛ he nii. (1 Yoh. 5:14) Shiɛmɔ yɛ he ni obaana mɛi yɛ kɛ be ni obaana amɛ. Be fɛɛ be ni shihilɛ lɛ sa lɛ, wiemɔ Biblia mli nikasemɔ he otsɔɔ mɛi. (Jaj. 11:6) Kɛji mɔ ko jie miishɛɛ kpo ni onyɛ odu anɔkwale wu lɛ eko lɛ, kuu osɛɛ ni oyashwie nɔ nu.—1 Kor. 3:6-9.
4. Mɛni hewɔ esa akɛ wɔhe afee oya ni wɔkɛ mɛi awie Biblia mli nikasemɔ he lɛ?
4 Mɛi babaoo yɛ ni jalɛ he hɔmɔ kɛ kumai miiye amɛ. Namɔ baaye abua amɛ ni amɛná amɛmumɔŋ hiamɔ nii kɛtsɔ Biblia mli nikasemɔ ni akɛ amɛ aaafee lɛ nɔ? (Mat. 5:3, 6) Nyɛhaa wɔjɛa wɔtsui mli ni wɔye wɔbua kɛgbe shiɛmɔ kɛ kaselɔfeemɔ nitsumɔ lɛ naa, dani nikpamɔ lɛ aba naagbee.—Yes. 6:8.