Fã 1—Ní Wɔɔfee Biblia Mli Nikasemɔi ni Yaa Hiɛ—Mɛni Ji Biblia Mli Nikasemɔ?
1 Nyɔŋmɔ webii miifee Biblia mli nikasemɔi ni shɛɔ akpekpei ekpaa daa nyɔŋ nɔ yɛ jeŋ fɛɛ. Kɛji akɛ wɔkɛ nitsɔɔmɔ gbɛ̀i ni mɔɔ shi jogbaŋŋ tsu nii lɛ, wɔbaanyɛ wɔye wɔbua nɛkɛ Biblia kaselɔi nɛɛ koni amɛya amɛhiɛ kɛyashɛ henɔjɔɔmɔ kɛ baptisimɔ he ni amɛtsɔmɔ ‘mɛi ni sa jogbaŋŋ akɛ amɛtsɔɔ mɛi krokomɛi anii.’ (2 Tim. 2:2) Ani obaasumɔ ni oye obua mɔ ni okɛkaseɔ nii lɛ koni ená nɔyaa ni tamɔ nakai? Kɛjɛ sane nɛɛ nɔ kɛyaa lɛ, Wɔ Maŋtsɛyeli Sɔɔmɔ lɛ baawie saji srɔtoi ni tsara nɔ ni baatsɔɔ shishijee nibii ni yɔɔ Biblia mli nikasemɔi ni yaa hiɛ afeemɔ mli lɛ he.
2 Be Mli ni Esa akɛ Abu Biblia Nikasemɔ ko He Akɔntaa: Kɛ́ nyɛgbaa Biblia lɛ mli saji daa ni etsaraa nɔ, ni esɛɛ kɛɛɛ po, shi okɛ Biblia lɛ kɛ woji ni ajie yi lɛ ateŋ eko feɔ nakai lɛ, oofee Biblia mli nikasemɔ. Enɛ ji anɔkwale kɛji akɛ afeɔ nikasemɔ lɛ po yɛ mɔ lɛ shinaa naa loo yɛ tɛlifoŋ nɔ. Abaanyɛ abu nikasemɔ lɛ he akɔntaa beni afee lɛ shii enyɔ yɛ bɔ ni afeɔ nikasemɔ lɛ ahaa he nɔkwɛmɔnɔ lɛ sɛɛ, ni kɛ nɔmimaa yɛ akɛ nikasemɔ lɛ baakã he aya nɔ.
3 Woji ni akɛfeɔ Biblia mli nikasemɔi babaoo ji Taoɔ wolo tɛtrɛɛ lɛ kɛ Nilee wolo lɛ. Kɛ akase woji nɛɛ agbe naa sɛɛ, ni eyɛ faŋŋ akɛ mɔ lɛ miiya ehiɛ, ni eyɛ blɛoo po, shi eená hiɛsɔɔ kɛha nɔ ni ekaseɔ lɛ, no lɛ abaanyɛ atsa nikasemɔ lɛ nɔ yɛ Já Nyɔŋmɔ wolo lɛ mli. Abaanyɛ akɛ mɛi ni woloŋlee faaa loo amɛlé nikanemɔ tsɔ lɛ akase wolo bibioo ni ji Obaanyɛ Otsɔ Nyɔŋmɔ Naanyo! lɛ.
4 Biblia kasemɔ nitsumɔ lɛ efee nɔ ni mɔɔ shi jogbaŋŋ yɛ mɛi akpekpei abɔ ni ayeɔ abuaa amɛ koni amɛbatsɔmɔ Yesu Kristo anɔkwa kaselɔi lɛ mli. (Mat. 28:19, 20) Kɛji akɛ okɛ ŋaawoi ni akɛha yɛ saji ni baatsara nɔ aba yɛ sane nɛɛ he lɛ tsu nii lɛ, obaanyɛ ofee Biblia mli nikasemɔ ni yaa hiɛ.