Feemɔ Biblia Mli Nikasemɔ ni Yaa Hiɛ yɛ Shinaa Naa
1. Mɛni hewɔ wɔkɛ mɛi kaseɔ Biblia lɛ?
1 Kwɛ bɔ ni eyɔɔ miishɛɛ akɛ aaaje Biblia mli nikasemɔ shishi! Shi kɛlɛ, ebiɔ babaoo fe ni wɔɔná mɔ ko ni yɔɔ he miishɛɛ akɛ eeekase Biblia lɛ. Nɔ̃ hewɔ ni wɔkɛ mɛi kaseɔ nii ji ní wɔye wɔbua amɛ koni amɛbatsɔ Kristo anɔkwa kaselɔi. (Mat. 28:19, 20) Mɛni baanyɛ aye abua wɔ koni wɔnyɛ wɔtsu nakai oti lɛ he nii?
2. Te afeɔ shinaa naa Biblia mli nikasemɔ ahaa tɛŋŋ, ni mɛni hewɔ nakai gbɛ ni atsɔɔ nɔ akɛ mɛi kaseɔ nii lɛ mɔɔ shi jogbaŋŋ lɛ?
2 Mɛi ni Bɛ Dekã: Ŋmɛnɛ lɛ, ewa waa akɛ mɛi aaaná dekã. Yɛ hei komɛi lɛ, mɛi fioo ko pɛ yɛ shishijee lɛ amɛbaaná he miishɛɛ akɛ amɛkɛ ŋmɛlɛtswaa kome baakase Biblia lɛ. Bɔni afee ni wɔnyɛ wɔye wɔbua mɛi ni tamɔ nakai lɛ, aawo wɔ hewalɛ koni kɛ́ ebaahi lɛ, wɔkɛ mɛi aje Biblia mli nikasemɔ shishi yɛ amɛshinaai anaa loo yɛ tɛlifon nɔ. Kɛ́ wɔbaatsɔ gbɛ̀i nɛɛ eko nɔ wɔkɛ mɔ ko akase nii lɛ, shishijee lɛ, wɔbaanyɛ wɔha nikasemɔ lɛ afee kuku, ni ekolɛ enɛ baabi ni wɔkɛ mɔ lɛ asusu Biblia mli ŋmalɛi fioo komɛi ahe kɛtsɔ wɔwoji tamɔ Biblia lɛ Tsɔɔ lɛ kuku kome loo enyɔ ko ní wɔkɛ lɛ aaasusu he lɛ nɔ. Kwɛ miishɛɛ ni eji akɛ amrɔ nɛɛ shiɛlɔi babaoo kɛ mɛi miifee Biblia mli nikasemɔ yɛ mɛi lɛ ashinaai anaa ni amɛteŋ mɛi fioo po miifee nakai yɛ tɛlifon nɔ!
3. Mɛni hewɔ esa akɛ wɔbɔ mɔdɛŋ akɛ wɔɔha be ni wɔkɛfeɔ nikasemɔ yɛ shinaa naa lɛ aya hiɛ lɛ?
3 Shi, ani nii ni wɔkɛ mɛi lɛ aaakase daa yɛ amɛshinaai anaa lɛ kɛkɛ fa? Dabi. Eyɛ mli akɛ, wɔɔfee jogbaŋŋ akɛ wɔwieŋ babaoo kɛ́ wɔkɛ mɔ ko je nikasemɔ shishi yɛ eshinaa naa moŋ, shi Wɔ Maŋtsɛyeli Sɔɔmɔ ni je kpo yɛ June afi 1990 lɛ baafa 4 lɛ tsɔɔ mli akɛ: “Kɛ́ áto nikasemɔ lɛ shishi ní shiatsɛ lɛ nya he lɛ, no lɛ abaanyɛ akɛ be ni fa saŋŋ afee nikasemɔ lɛ.” Enɛ he miihia waa. Ákɛ nɔkwɛmɔnɔ lɛ: Kɛ́ aaha gbekɛ ko ni hɔmɔ eye lɛ waa niyenii lɛ, shishijee lɛ awoɔ enaa bibiibii kɛyashi niyenii lɛ ŋɔɔ enaa. Kɛlɛ, kɛ́ atee nɔ aha lɛ niyenii bibiibii lɛ nyɔji abɔ lɛ, no lɛ wɔkpaŋ gbɛ akɛ ebaaná hewalɛ ni eda taakɛ akpaa gbɛ. Nakai nɔŋŋ dani Biblia nikaselɔ ko baatsɔ Nyɔŋmɔ tsulɔ ni eda yɛ ehe nilee gbɛfaŋ lɛ, ebaabi ni wɔkɛ lɛ ata shi ni wɔje gbɛ wɔkɛ lɛ akase nii jogbaŋŋ ni wɔkafolɔ nikasemɔ lɛ mli.—Heb. 5:13, 14.
4. Biblia mli nikasemɔ ni afeɔ yɛ shĩa mli lɛ he yɛ sɛɛnamɔ yɛ mɛɛ gbɛ nɔ?
4 Biblia Mli Nikasemɔ ni Afeɔ yɛ Shĩa Mli: Ehi akɛ wɔɔfee nikasemɔ lɛ yɛ mɔ lɛ shĩa mli, yɛ tso ko shishi, loo he ko ni hɔ̃ɔŋ yɔɔ ní mɔ ko gbaŋ wɔnaa. Hei ni tamɔ nɛkɛ haa nikasemɔ feɔ mlɛo ni ebaaye ebua nikaselɔ lɛ koni enu Nyɔŋmɔ Wiemɔ lɛ shishi jogbaŋŋ. (Mat. 13:23) No sɛɛ lɛ, ebaaye ebua tsɔɔlɔ lɛ hu koni enyɛ eha nikasemɔ lɛ akɔ nikaselɔ lɛ hiamɔ nii ahe. Kɛfata he lɛ, be ni fa ni akɛaakase nii lɛ baaha aná be saŋŋ kɛsusu Nyɔŋmɔ Wiemɔ lɛ he jogbaŋŋ yɛ gbɛ ni woɔ mɔ hemɔkɛyeli mli hewalɛ nɔ.—Rom. 10:17.
5. Mɛɛ gbɛ nɔ wɔɔtsɔ wɔkɛ nii ni wɔkɛ mɛi kaseɔ yɛ amɛshinaai anaa lɛ aaaya amɛshĩai amli?
5 Mɛɛ gbɛ nɔ oootsɔ okɛ nii ni nyɛkaseɔ yɛ shinaa naa lɛ aya shĩa mli? Kɛ́ okɛ mɔ lɛ kase nii kukuji yɛ eshinaa naa be fioo ko sɛɛ lɛ, kɛɛmɔ lɛ akɛ obaasumɔ koni nyɛkɛ be babaoo akase nii lɛ, ni okɛ be sɛɛkɛlɛ ni obaasumɔ ni nyɛye lɛ afɔ̃ ehiɛ. Kɛ́ oosumɔ hu lɛ, obaanyɛ otsɔ gbɛ ko nɔ obi lɛ akɛ: “Ani ŋmɛnɛ lɛ obaaná be koni wɔta shi wɔsusu saneyitso nɛɛ he?” loo “Ŋmɛnɛ lɛ, ŋmɛlɛtswaa enyiɛ obaasumɔ ni wɔkɛsusu saneyitso nɛɛ he?” Kɛ́ nɔ ko kpakpa eyajɛɛɛ enɛɛmɛi fɛɛ amli kɛbaaa lɛ, no lɛ yaa nɔ okɛ lɛ akase nii lɛ kukuji yɛ shinaa lɛ naa. Yɛ be ni sa mli lɛ, bɔɔ mɔdɛŋ ekoŋŋ akɛ obaanyɛ oha nyɛkɛ nikasemɔ lɛ aya shĩa mli lo.
6. Mɛɛ oti esa akɛ wɔkɛtsu wɔshiɛmɔ nitsumɔ lɛ, ni mɛɛ gbɛ nɔ ŋaawoi ni wɔsusu he yɛ sane nɛɛ mli lɛ baanyɛ aye abua wɔ kɛtsu nakai oti lɛ he nii?
6 Beni wɔyaa nɔ wɔtaoɔ mɛi ni sa lɛ, nyɛkahaa wɔhiɛ miije nɔ̃ hewɔ ni wɔjeɔ Biblia mli nikasemɔ shishi ni wɔtsaa nɔ lɛ nɔ. Oti ni ma wɔhiɛ ji ní wɔye wɔbua mɛi ni hiɛ tsui ni ja lɛ koni amɛbatsɔmɔ Yehowa tsuji ni ejɔɔ amɛhe nɔ ní abaptisi amɛ. Eba akɛ eeejɔɔ mɔdɛŋ ni wɔbɔɔ lɛ nɔ be mli ni wɔkɛ oti nɛɛ tsuɔ wɔshiɛmɔ nitsumɔ lɛ.—2 Tim. 4:5.