Biblia lɛ Tsɔɔ Wolo Lɛ—Wɔwolo Titri Kɛha Biblia Mli Nikasemɔ Feemɔ
1 Kwɛ bɔ ni wɔmli fili wɔ babaoo beni ajie wolo ni ji Mɛni Biblia lɛ Tsɔɔ Diɛŋtsɛ? lɛ kpo yɛ “Nyɔŋmɔ Toi ni Aaabo” Kpokpaa Wulu nɔ Kpee lɛ shishi lɛ! Mɛi ni tee kpee lɛ ná miishɛɛ waa akɛ amɛnine shɛ wolo lɛ eko nɔ Hɔɔ beni akpa kpee lɛ. Mɛɛ gbɛ nɔ abaatsɔ akɛ nitsɔɔmɔ wolo hee nɛɛ atsu nii? Ato he gbɛjianɔ koni efee wɔwolo titri kɛha Biblia mli nikasemɔ feemɔ. Eyɛ mli ákɛ akɛ wolo hee lɛ baaha klɛŋklɛŋ kwraa yɛ shiɛmɔ nitsumɔ lɛ mli yɛ April mli moŋ, shi aawo shiɛlɔi hewalɛ ni amɛkɛbɔi nitsumɔ amrɔ nɔŋŋ kɛje Biblia mli nikasemɔi afeemɔ shishi.
2 Biblia Mli Nikasemɔi ni Afeɔ Amrɔ Nɛɛ: Esa akɛ shiɛlɔi ni kɛ Nilee wolo lɛ loo Taoɔ wolo bibioo lɛ feɔ Biblia mli nikasemɔi lɛ kɛ nilee atsu nii yɛ be mli ni amɛkpɛɔ amɛyiŋ yɛ gbɛ ni amɛaatsɔ nɔ amɛkɛ wolo hee lɛ aje nikasemɔ feemɔ shishi lɛ he, kɛ be ni esa akɛ amɛkɛfee nakai. Kɛji nyɛsɛɛ nɛɛ nɔŋŋ okɛ mɔ lɛ je nikasemɔ lɛ shishi lɛ, no lɛ obaanyɛ okɛ lɛ aje wolo hee lɛ kasemɔ shishi kɛjɛ shishijee kwraa. Kɛ nyɛ́kase Nilee wolo lɛ kɛshɛ shɔŋŋ lɛ, no lɛ, nyɛbaanyɛ nyɛkɛ Biblia lɛ Tsɔɔ wolo lɛ mli saneyitso ni kɛ Nilee wolo lɛ mli saneyitso ni nyɛshɛ nɔ lɛ yeɔ egbɔ lɛ atsá nikasemɔ lɛ nɔ. Kɛ eshwɛ fioo ni nyɛbaagbe Nilee wolo lɛ naa lɛ, no lɛ obaanyɛ okpɛ oyiŋ akɛ okɛ mɔ lɛ baakase Nilee wolo lɛ kɛgbe naa.
3 Ŋwanejee ko kwraa bɛ he akɛ wɔ fɛɛ wɔle mɛi babaoo ni baaná Biblia lɛ Tsɔɔ wolo lɛ kasemɔ he sɛɛ. Mɛni hewɔ okɛ nɛkɛ mɛi nɛɛ ateŋ mɔ fɛɛ mɔ efeee Biblia mli nikasemɔ kɛtsɔ wolo ni haa nikasemɔ yaa hiɛ nɛɛ nɔ? Ákɛ nɔkwɛmɔnɔ lɛ, mɛi ni ekase Taoɔ wolo bibioo lɛ loo Nilee wolo lɛ, shi amɛyaaa amɛhiɛ kɛyashɛɛɛ henɔjɔɔmɔ kɛ baptisimɔ he lɛ baanyɛ amɛkɛ wolo hee lɛ atsá amɛnikasemɔ lɛ nɔ ekoŋŋ. Fɔlɔi baanyɛ amɛkɛ wolo lɛ atsu nii kɛtsɔɔ amɛbii lɛ Nyɔŋmɔ suɔmɔnaa nifeemɔ he anɔkwa nilee.—Kol. 1:9, 10.
4 Wolo ni Ji Enyɔ Kasemɔ: Ani abaanyɛ ato gbɛjianɔ ni akɛ Biblia mli nikaselɔ ko ni akɛ lɛ ekase Mɛni Biblia lɛ Tsɔɔ Diɛŋtsɛ? wolo lɛ agbe naa lɛ akase wolo ni ji enyɔ? Hɛɛ. Kɛ nikaselɔ lɛ yɛ shɔ̃ɔ shi eyɛ faŋŋ akɛ eeya ehiɛ ni eená hiɛsɔɔ kɛmiiha nɔ ni ekaseɔ lɛ, no lɛ abaanyɛ akɛ lɛ atsa Biblia mli nikasemɔ lɛ nɔ yɛ Já Anɔkwa Nyɔŋmɔ Kome Lɛ wolo lɛ mli. Wɔyɛ nɔmimaa akɛ Biblia lɛ Tsɔɔ wolo lɛ baafee wolo ni wɔkɛbaatsu nii waa be mli ni wɔtsuɔ fãmɔ akɛ wɔfee mɛi kaselɔi lɛ he nii lɛ.—Mat. 28:19, 20.