Sanebimɔhe

◼ Ani esa akɛ nyɛmi yoo ko aha eyi nɔ kɛ́ nyɛmi nuu ko fata ehe kɛmiifee Biblia mli nikasemɔ yɛ shinaa naa?

Kɛ́ nyɛmi yoo lɛ miifee Biblia mli nikasemɔ ni ato he gbɛjianɔ ni yaa nɔ daa lɛ, esa akɛ eha eyi nɔ kɛ́ nyɛmi nuu ko yɛ jɛmɛ. (1 Kor. 11:3-10) Buu-Mɔɔ ni je kpo yɛ July 15, 2002 lɛ baafa 27 lɛ tsɔɔ mli akɛ: “Enɛ ji nitsɔɔmɔ henaabuamɔ ni atsɔ hiɛ ato he gbɛjianɔ, ní yɛ anɔkwale mli lɛ, mɔ ni kwɛɔ nikasemɔ lɛ nɔ lɛ nyiɛɔ hiɛ lɛ. Yɛ nɛkɛ shihilɛi nɛɛ ashishi lɛ, nikasemɔ ko bafeɔ asafo lɛ mli nikasemɔ lɛ fã ko. Kɛ́ Odasefonyo yoo ní abaptisi lɛ ni kwɛɔ nikasemɔ ni tamɔ nɛkɛ nɔ, ní Odasefonyo nuu ni abaptisi lɛ fata he lɛ, ebaafee nɔ ni ja akɛ eha eyi nɔ.” Esa ákɛ akɛ sane nɛɛ atsu nii kɛ́ aafee nikasemɔ lɛ yɛ shĩa mli, shinaa naa, loo he kroko.

Shi, kɛ́ shinaa naa Biblia mli nikasemɔ lɛ jeee nɔ ni ato he gbɛjianɔ ni tsaraa nɔ daa lɛ, ehe ehiaaa ni nyɛmi yoo lɛ aha eyi nɔ kɛ́ ekɛ nuu ni ji shiɛlɔ tee. Kɛ́ yiŋtoo hewɔ ni eyaafee sɛɛkuu-kɛsaramɔ lɛ ji ni efee Biblia mli nikasemɔ he nɔkwɛmɔnɔ loo ni ekɛ mɔ lɛ akase nii kɛjɛ woji ni wɔkɛ mɛi kaseɔ lɛ ateŋ ekome mli po lɛ, ehe ehiaaa ni eha eyi nɔ. Akɛni bei pii lɛ atoɔ shinaa naa nikasemɔ shishi fiofio kɛtsɔ sɛɛkuu-kɛsaramɔi anɔ hewɔ lɛ, esa akɛ shiɛlɔi akwɛ shihilɛ lɛ ni amɛkɛ hiɛshikamɔ atsu nii kɛna be ni esa akɛ amɛha amɛyi nɔ.