HII SHI AKƐ KRISTOFONYO

Jeŋba Ni He Tse Kɛ Bulɛ Ni Mli Kwɔ Hãa Anáa Anɔkwale Lɛ He Miishɛɛ

Bei pii lɛ, ŋamɛi ni ebatsɔmɔ Kristofoi lɛ ajeŋba kpakpa lɛ hãa amɛwumɛi mɔɔ anɔkwale lɛ mli. Shi ekolɛ enɛ baabi ni amɛfi shi yɛ shihilɛi ni mli wawai amli afii babaoo. (1Pe 2:21-23; 3:1, 2) Kɛ́ aaye bo sane ni ejaaa lɛ, yaa nɔ okɛ ekpakpa aye efɔŋ nɔ kunim. (Ro 12:21) Ekolɛ ohefatalɔ lɛ boŋ nɔ ni owieɔ yɛ Yehowa he lɛ toi, shi kɛ́ ena nibii kpakpai ni ofeɔ lɛ, ebaanyɛ etsake bɔ ni enaa anɔkwale lɛ ehãa lɛ.

Bɔɔ mɔdɛŋ ni okɛ ohe awo ohefatalɔ lɛ shihilɛ mli. (Fip 2:3, 4) Nu he ohã lɛ, jiemɔ musuŋtsɔlɛ kpo otsɔɔ lɛ, ni obɔ mɔdɛŋ otsu osɔ̃i akɛ ŋa lɛ ahe nii yɛ bulɛ mli. Bo sane toi jogbaŋŋ. (Yak 1:19) Too otsui shi ohã ohefatalɔ lɛ, ni ofee nibii ni baahã ena akɛ osumɔɔ lɛ. Kɛ́ ohefatalɔ lɛ ejieee mlihilɛ kɛ bulɛ kpo etsɔɔɔ bo tamɔ bɔ ni ofeɔ lɛ po lɛ, tsɛ otsui oŋmɛ omli, ejaakɛ Yehowa yɛ anɔkwa ni oyeɔ lɛ he miishɛɛ.—1Pe 2:19, 20.

KWƐMƆ VIDIO NI JI, YEHOWA YEƆ EBUAA WƆ KƐTEREƆ WƆJATSUI LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ AHETOO:

Be ni Grace Li bote gbãla mli klɛŋklɛŋ kwraa lɛ, mɛɛ shihilɛi ekɛkpe?
Mɛni hã ená Biblia mli anɔkwale lɛ he miishɛɛ?
Be ni abaptisi Nyɛmiyoo Li sɛɛ lɛ, mɛɛ gbɛ nɔ efi shi yɛ shihilɛi ni mli wawai ni ekɛkpe lɛ amli?
Mɛɛ sɔlemɔ Nyɛmiyoo Li sɔle yɛ ewu lɛ hewɔ?
Mɛɛ jɔɔmɔi Nyɛmiyoo Li ená yɛ ejeŋba ni he tse kɛ bulɛ ni mli kwɔ ni ejieɔ lɛ kpo lɛ hewɔ?

Mfonirii ni ato naa: Vidio ni ji, ‘Yehowa Yeɔ Ebuaa Wɔ Kɛtereɔ Wɔjatsui Lɛ’ mli mfonirii ni miitsɔɔ tsakemɔi ni Grace Li fee. 1. Grace ni miifó yɛ fɔlɔ ko mli. 2. Nyɛmi yoo ko kɛ Grace miikase nii. 3. Grace kɛ ebii lɛ ni miishi he ni amɛhɔ̃ɔ nii lɛ yɛ lɛ kɛmiiya asafoŋ kpee. 4. Grace kɛ eweku lɛ mli bii nɛɛhu yɛ Maŋtsɛyeli Asa ko nɔ — Jeŋba ni he tse kɛ bulɛ ni mli kwɔ woɔ yibii kpakpai!