‘Yaa Nɔ Onyiɛ Yesu Sɛɛ’ Yɛ Obaptisimɔ Lɛ Sɛɛ

1-2. Kɛ́ abaptisi bo lɛ, mɛɛ gbɛ nɔ onáa he sɛɛ?

KƐ́ ABAPTISI wɔ ni wɔbafata Yehowa weku lɛ he lɛ, wɔnáa miishɛɛ waa. Eji hegbɛ kpele akɛ wekukpaa krɛdɛɛ ni tamɔ nɛkɛ ebakã wɔ kɛ Yehowa teŋ. Wɔnuɔ he tamɔ bɔ ni David nu he lɛ. Ewie yɛ lala ko ni efo lɛ mli akɛ: “Mɔ ni [bo Yehowa ohalaa] ni ohãa ebɛŋkɛɔ bo koni ehi okpoi lɛ anɔ lɛ yɛ miishɛɛ.”—Lala 65:4.

² Jeee mɔ fɛɛ mɔ kɛkɛ Yehowa hãa ebaa ekpoi lɛ anɔ. Tamɔ bɔ ni wɔna yɛ nikasemɔ ni tsɔ hiɛ lɛ mli lɛ, mɛi ni sumɔɔ akɛ amɛbɛŋkɛ lɛ lɛ, amɛ pɛ egbalaa kɛbaa emasɛi. (Yak. 4:8) Kɛ́ ojɔɔ ohe nɔ ohã Yehowa ni abaptisi bo lɛ, wekukpaa krɛdɛɛ ko bakãa okɛ Yehowa teŋ. Ni obaanyɛ oná nɔmimaa akɛ, kɛjɛ nakai be lɛ nɔ kɛyaa lɛ, ‘ebaafɔse jɔɔmɔi eshwie onɔ kɛyashi be ni nɔ ko nɔ ko ehiaŋ bo dɔŋŋ.’—Mal. 3:10; Yer. 17:​7, 8.

3. Mɛni esa akɛ Kristofoi fɛɛ ni ejɔɔ amɛhe nɔ ni abaptisi amɛ lɛ afee? Ni mɛni hewɔ enɛ ji hiɛdɔɔ sane? (Jajelɔ 5:​4, 5)

³ Kɛ́ abaptisi bo lɛ, kpaako kwraa oje Yehowa sɔɔmɔ shishi. Yɛ obaptisimɔ lɛ sɛɛ lɛ, esa akɛ ofee bɔ fɛɛ bɔ ni obaanyɛ ni oye shi ni owo Yehowa lɛ nɔ, ni kɛ́ okɛ kai kpe loo oyaje shihilɛi ni mli wawai amli po lɛ, esa akɛ oya nɔ oye lɛ anɔkwa. (Kanemɔ Jajelɔ 5:​4, 5.) Amrɔ nɛɛ ni obatsɔ Yesu kaselɔ lɛ, esa akɛ onyiɛ enanemaahei lɛ asɛɛ kpaakpa ni oye efamɔi lɛ anɔ. (Mat. 28:​19, 20; 1 Pet. 2:21) Nikasemɔ nɛɛ baaye abua bo ni onyɛ ofee nakai.

‘YAA NƆ ONYIƐ YESU SƐƐ’ KƐ́ OKƐ NAAGBAI KƐ KAI KPE PO

4. Be ni Yesu wie akɛ ekaselɔi lɛ baatere ‘piŋmɔ tso’ lɛ, no mli lɛ, te etsɔɔ tɛŋŋ? (Luka 9:23)

⁴ Kaasusu akɛ yɛ obaptisimɔ lɛ sɛɛ lɛ, okɛ naagba ko ekpeŋ. Yesu hã esɛɛnyiɛlɔi lɛ le faŋŋ akɛ, amɛbaatere ‘piŋmɔ tso gbi fɛɛ gbi.’ (Kanemɔ Luka 9:23.) Ani nɔ ni Yesu wie nɛɛ tsɔɔ akɛ ekaselɔi lɛ baapiŋ daa gbi? Dabi kwraa. Nɔ ni etsɔɔ kɛkɛ ji akɛ, yɛ jɔɔmɔi ni amɛbaaná lɛ sɛɛ lɛ, amɛkɛ naagbai baakpe. Ni naagbai nɛɛ ekomɛi po amli baawa waa.—2 Tim. 3:12.

5. Mɛɛ jɔɔmɔi Yesu wo shi akɛ mɛi ni kɛ nibii shãa afɔle yɛ Yehowa sɔɔmɔ lɛ hewɔ lɛ baaná?

⁵ Ekolɛ owekumɛi ete shi amɛwo bo, loo okɛ heloonaa nibii komɛi eshã afɔle koni onyɛ otao Maŋtsɛyeli lɛ klɛŋklɛŋ yɛ oshihilɛ mli. (Mat. 6:33) Yehowa le nɔ ni otsɔ mli yɛ ehewɔ lɛ. (Heb. 6:10) Ekolɛ nɔ ni Yesu wie nɛɛ eba mli yɛ ogbɛfaŋ, ewie akɛ: “Mɔ ko mɔ ko bɛ ni eshi shĩa loo nyɛmimɛi hii loo nyɛmimɛi yei loo emami loo epapa loo bii loo ŋmɔji yɛ mihewɔ kɛ sane kpakpa lɛ hewɔ ní amrɔ nɛɛ enáŋ shĩai, nyɛmimɛi hii, nyɛmimɛi yei, nyɛmɛi, bii, kɛ ŋmɔji toi 100, kɛ yiwai hu, yɛ be nɛɛ mli, kɛ naanɔ wala hu yɛ jeŋ ni baaba lɛ mli.” (Mar. 10:​29, 30) Jɔɔmɔi ni oná lɛ fa kwraa fe nibii ni okɛshã afɔle lɛ.—Lala 37:4.

6. Yɛ obaptisimɔ lɛ sɛɛ po lɛ, mɛni hewɔ ehe baahia ni owu oshi “nɔ ni heloo lɛ shweɔ lɛ”?

⁶ Yɛ obaptisimɔ lɛ sɛɛ po lɛ, ehe baahia ni oya nɔ owu oshi “nɔ ni heloo lɛ shweɔ lɛ.” (1 Yoh. 2:16) Nɔ hewɔ lɛ ji, okã he oji adesa ni yeee emuu. Bei komɛi lɛ, obaanu he tamɔ bɔ ni bɔfo Paulo nu he lɛ. Ewie akɛ: “Mimligbɛ gbɔmɔ lɛ náa Nyɔŋmɔ mla lɛ he miishɛɛ jogbaŋŋ, shi minaa mla kroko yɛ migbɔmɔtso lɛ mli ni wuɔ eshiɔ mijwɛŋmɔ mla lɛ, ni eŋɔɔ mi nom ehãa esha mla ni yɔɔ migbɔmɔtso lɛ mli lɛ.” (Rom. 7:​22, 23) Ekolɛ obaahao waa akɛ yɛ ohiɛ ni omiaa lɛ fɛɛ sɛɛ lɛ, onuɔ he lolo akɛ ofee nibii komɛi ni Yehowa sumɔɔɔ. Shi kɛ́ ojwɛŋ shi ni owo Yehowa akɛ obaafee esuɔmɔnaa nii lɛ he lɛ, no baaye abua bo ni owu oshi henumɔi nɛɛ. Yɛ anɔkwale mli lɛ, shi ni owo nɛɛ baaye abua bo ni ole nɔ ni obaafee kɛ́ okɛ kai kpe. Mɛni hewɔ wɔkɛɔ nakai?

7. Kɛ́ ojɔɔ ohe nɔ ohã Yehowa lɛ, mɛɛ gbɛ nɔ no baaye abua bo ni oye lɛ anɔkwa?

⁷ Kɛ́ ojɔɔ ohe nɔ ohã Yehowa lɛ, belɛ okwa ohe ji no. Nɔ ni enɛ tsɔɔ ji, kɛ́ oonu he akɛ ofee nɔ ko ni ona akɛ esaŋ Yehowa hiɛ lɛ, ofeŋ, ni kɛ́ okɛ oti ko ema ohiɛ ni ona akɛ esaŋ Yehowa hiɛ lɛ, otiuŋ nakai oti lɛ sɛɛ. (Mat. 16:24) No hewɔ lɛ, kɛ́ okɛ kaa ko loo naagba ko kpe lɛ, jeee kpaako oyaajwɛŋ nɔ ni esa akɛ ofee he, ejaakɛ ole nɔ ni esa akɛ ofee momo; no ji, ni oye Yehowa anɔkwa. No hewɔ lɛ, bɔ fɛɛ bɔ ni fee lɛ, obaabɔ mɔdɛŋ ni ofee nɔ ni sa Yehowa hiɛ. Obaafee onii tamɔ Hiob. Be ni ekɛ shihilɛi ni mli wawai kpe po lɛ, ewie akɛ: “Miŋmɛŋ minɔkwayeli lɛ he.”—Hiob 27:5.

8. Kɛ́ ohã shi ni owo Yehowa lɛ hi ojwɛŋmɔ mli be fɛɛ be lɛ, mɛɛ gbɛ nɔ no baaye abua bo ni okagbee kaa mli?

⁸ Kɛ́ ohã shi ni owo Yehowa lɛ hi ojwɛŋmɔ mli be fɛɛ be lɛ, no baaye abua bo ni okagbee kaa mli. Akɛ nɔkwɛmɔnɔ lɛ, ofeŋ nibii ni baahã mɔ ko hefatalɔ anu he akɛ osumɔɔ lɛ, ejaakɛ owo Yehowa shi momo akɛ ofeŋ nakai. Anɔkwa, kɛ́ ojwɛŋ ohenɔjɔɔmɔ lɛ nɔ be fɛɛ be lɛ, oshweŋ nibii fɔji yɛ otsui mli, aahu ni amɛbaahe shi ni kpaako ebaatɔ bo kɛ amɛjiemɔ. ‘Obaatsi ohe kɛje mɛi fɔji agbɛ lɛ nɔ.’—Abɛi 4:​14, 15.

9. Kɛ́ ohã shi ni owo Yehowa lɛ hi ojwɛŋmɔ mli be fɛɛ be lɛ, mɛɛ gbɛ nɔ no baaye abua bo ni okahã nɔ ko nɔ ko tɔ̃tɔ gbɛjianɔ ni oto ni okɛjáa Yehowa lɛ?

⁹ Ni kɛ́ oyabi nitsumɔ ko ni ona akɛ ebaahã ofɔlɔ asafoŋ kpeei amli bei komɛi hu? Ojwɛŋ he shii enyɔ po, ole nɔ ni obaafee momo. Mɛni hewɔ? Ejaakɛ be ni onuko nitsumɔ nɛɛ he beebe lɛ, okpɛ oyiŋ akɛ otsuŋ nitsumɔ ko ni baahã ofɔlɔ asafoŋ kpeei amli. No hewɔ lɛ, okɛŋ akɛ obaamɔ nitsumɔ lɛ mli dã, koni sɛɛ mli lɛ okwɛ bɔ ni obaato asafoŋ kpeeiyaa lɛ he gbɛjianɔ ohã. Nɔ kome ni baaye abua wɔ ji, ni wɔbaasusu bɔ ni Yesu tswa efai shi akɛ ebaafee e-Tsɛ lɛ suɔmɔnaa nii lɛ he. Enɔkwɛmɔnɔ lɛ baaye abua wɔ koni kɛ́ wɔkɛ kaa ko kpe lɛ, wɔjo naa foi amrɔ nɔŋŋ.—Mat. 4:10; Yoh. 8:29.

10. Mɛɛ gbɛ nɔ Yehowa baaye ebua bo ni ‘oya nɔ onyiɛ Yesu sɛɛ’ yɛ obaptisimɔ lɛ sɛɛ?

¹⁰ Kɛ́ otee nɔ okpee kai kɛ naagbai ni okɛkpeɔ lɛ anaa lɛ, no tsɔɔ akɛ oosumɔ ni ‘oya nɔ onyiɛ Yesu sɛɛ’ lɛɛlɛŋ. Yehowa baaye ebua bo ni oya nɔ onyiɛ Yesu sɛɛ. Biblia lɛ kɛɛ: “Anɔkwafo ji Nyɔŋmɔ, ni ehãŋ aka nyɛ fe bɔ ni nyɛbaanyɛ naa nyɛdamɔ, shi moŋ yɛ kaa lɛ mli lɛ, ebaaje gbɛ ni nyɛkɛaaje mli hu ehã nyɛ koni nyɛnyɛ naa nyɛdamɔ.”—1 Kor. 10:13.

NIBII NI BAAYE ABUA BO NI OYA NƆ ONYIƐ YESU SƐƐ

11. Mɛni ji nɔ kome ni obaanyɛ ofee ni baaye abua bo ni oya nɔ onyiɛ Yesu sɛɛ? (Kwɛmɔ mfoniri lɛ hu.)

¹¹ Yesu jɛ etsui muu fɛɛ mli esɔmɔ Yehowa, ni esɔle ehã Yehowa be fɛɛ be. (Luka 6:12) Enɛ hã wekukpaa ni mli wa bakã ekɛ Yehowa teŋ. Nɔ kome ni baaye abua bo waa ni oya nɔ onyiɛ Yesu sɛɛ yɛ obaptisimɔ lɛ sɛɛ ji, ni obaaya nɔ ofee nibii ni baahã wekukpaa ni yɔɔ okɛ Yehowa teŋ lɛ mli awa. Biblia lɛ kɛɛ: “He ni wɔtee hiɛ kɛshɛ lɛ, nyɛhãa wɔyaa nɔ wɔnyiɛa jogbaŋŋ yɛ nɛkɛ gbɛ nɛɛ nɔŋŋ nɔ.” (Fip. 3:16) Yɛ be kɛ beiaŋ lɛ, obaanu nyɛmimɛi ni elɛɛ amɛsɔɔmɔ lɛ mli lɛ aniiashikpamɔi. Ekolɛ amɛtee Skul Kɛhã Maŋtsɛyeli Sane Kpakpa Jajelɔi eko loo amɛfã kɛtee he ni hiamɔ lɛ da yɛ. Kɛ́ obaanyɛ lɛ, bo hu okɛ nakai oti lɛ ama ohiɛ. Akɛ Yehowa webii lɛ, wɔsumɔɔ waa akɛ wɔtsu babaoo yɛ Yehowa sɔɔmɔ lɛ mli. (Bɔf. 16:9) Shi kɛ́ onyɛŋ ofee nakai bianɛ yɛ bɔ ni oshihilɛ ji lɛ hewɔ hu? Kaanu he akɛ obɔɔɔ mɔdɛŋ. Nɔ ni esa akɛ Kristofonyo fɛɛ Kristofonyo afee ji, ni efi shi. (Mat. 10:22) Hã ehi ojwɛŋmɔŋ akɛ, kɛ́ okɛ onyɛmɔ fɛɛ sɔmɔ Yehowa yɛ bɔ ni oshihilɛ ji lɛ naa lɛ, Yehowa baaná ohe miishɛɛ waa. Kɛ́ ofee enɛ lɛ, no baaye abua bo ni oya nɔ onyiɛ Yesu sɛɛ yɛ obaptisimɔ lɛ sɛɛ.—Lala 26:1.

12-13. Kɛ́ ona akɛ ekãa ni okɛsɔmɔɔ Yehowa lɛ miiba shi lɛ, mɛni obaanyɛ ofee? (1 Korintobii 9:​16, 17) (Kwɛmɔ akrabatsa ni ji, “Yaa Nɔ Oda Foi Lɛ” hu.)

¹² Ekolɛ, yɛ obaptisimɔ lɛ sɛɛ lɛ, bei komɛi lɛ obaanu he akɛ osɔlemɔi lɛ jɛɛɛ otsui mli. Aloo miishɛɛ ni okɛtsuɔ shiɛmɔ nitsumɔ lɛ eba shi. Aloo ookane Biblia lɛ nɔŋŋ shi onaaa otii pii yɛ mli tamɔ tsutsu ko lɛ. Kɛ́ eba lɛ nakai lɛ, kaanu he akɛ Yehowa ejie emumɔ lɛ yɛ onɔ. Yɛ emuu ni wɔ fɛɛ wɔyeee lɛ hewɔ lɛ, wɔbaanyɛ wɔnu he nakai yɛ be kɛ beiaŋ. Kɛ́ onu he akɛ ekãa ni okɛsɔmɔɔ Yehowa lɛ miiba shi lɛ, susumɔ bɔfo Paulo he. Eyɛ mli akɛ emiaa ehiɛ waa akɛ ebaakase Yesu moŋ, shi jeee be fɛɛ be ená he miishɛɛ akɛ ebaafee nibii ni ele akɛ esa akɛ efee lɛ. (Kanemɔ 1 Korintobii 9:​16, 17.) Be ko po lɛ, ewie yɛ esɔɔmɔ lɛ he akɛ: “Kɛ́ mikɛ mligbigbilimɔ fee lɛ, no hu po lɛ, eji nitsumɔ ni atu awo midɛŋ akɛ shĩa nɔkwɛlɔ.” Nɔ ni Paulo wie nɛɛ tsɔɔ akɛ, etswa efai shi akɛ, ekɔɔɔ he eko bɔ ni enuɔ he ehãa lɛ, ebaaya nɔ etsu esɔɔmɔ nitsumɔ lɛ.

¹³ Bɔ ni Paulo hãaa ehenumɔi akudɔ lɛ lɛ, bo hu kaahã ohenumɔi kudɔ bo. Tswaa ofai shi akɛ obaafee nɔ ni ja ekɔɔɔ he eko bɔ ni onuɔ he ohãa. Kɛ́ omia ohiɛ ofee nɔ ni ja be fɛɛ be lɛ, ekolɛ fiofio lɛ, enɛ feemɔ waŋ tsɔ kɛhãŋ bo. Shi kɛyashi nakai be lɛ baashɛ lɛ, yaa nɔ okase nii, osɔle, oya asafoŋ kpeei, ni oshiɛ, ni enɛ baaye abua bo ni oya nɔ onyiɛ Yesu sɛɛ yɛ obaptisimɔ lɛ sɛɛ. Agbɛnɛ hu, kɛ́ onyɛmimɛi Kristofoi lɛ na akɛ oomia ohiɛ oosɔmɔ Yehowa lɛ, ebaawo amɛ hewalɛ.—1 Tes. 5:11.

‘YAA NƆ OPƐI OMLI NI OKA BƆ NI OJI DIƐŊTSƐ LƐ OKWƐ’

14. Mɛni esa akɛ ofee yɛ be kɛ beiaŋ? Ni mɛni hewɔ? (2 Korintobii 13:5)

¹⁴ Yɛ obaptisimɔ lɛ sɛɛ lɛ, ehe miihia ni opɛi omli okwɛ yɛ be kɛ beiaŋ. (Kanemɔ 2 Korintobii 13:5.) No hewɔ lɛ, kɛ́ efee lɛ, susumɔ oshihilɛ he jogbaŋŋ okwɛ akɛ, ani osɔleɔ daa? Ani okaneɔ Biblia lɛ ni okaseɔ? Ani oyaa asafoŋ kpeei daa? Ni ani okɛ ohe woɔ shiɛmɔ nitsumɔ lɛ mli? Kwɛmɔ akɛ mɛni obaafee ni ohã nibii nɛɛ afeemɔ aŋɔɔ onaa waa ni oná he sɛɛ hu. Akɛ nɔkwɛmɔnɔ lɛ, bi ohe akɛ: ‘Ani manyɛ magbala Biblia mli tsɔɔmɔi ni esa akɛ mɔ fɛɛ mɔ ale klɛŋklɛŋ lɛ amli matsɔɔ mɛi? Mɛni kɛ́ mifee lɛ, ebaahã shiɛmɔ nitsumɔ lɛ aŋɔɔ minaa waa? Kɛ́ miisɔle lɛ, ani mibiɔ Yehowa nibii pɔtɛi ni miitao efee ehã mi? Ni ani nibii ni mibiɔ lɛ tsɔɔ akɛ mikɛ mihiɛ fɔ̃ɔ Yehowa nɔ kwraa? Ani miyaa asafoŋ kpeei be fɛɛ be? Kɛ́ mitee asafoŋ kpeei lɛ, mɛni manyɛ mafee ni baahã mijwɛŋmɔ ahi nɔ ni yaa nɔ lɛ nɔ ni mikɛ mihe awo mli waa?’

15-16. Mɛni okaseɔ yɛ nɔ ni nyɛmi nuu ko fee be ni ejo kaa ko naa foi lɛ mli?

¹⁵ Agbɛnɛ hu, esa akɛ opɛi omli koni ole ogbɔjɔmɔi. Niiashikpamɔ ni nyɛmi nuu ko ni atsɛɔ lɛ Robert lɛ ná lɛ baanyɛ aye abua wɔ ni wɔnu sane nɛɛ shishi. Ewie akɛ: “Be ni miye aaafee afii 20 lɛ, miná nitsumɔ ko ni mitsuɔ bei komɛi yɛ otsi lɛ mli. Gbi ko be ni akpa nitsumɔ lɛ, oblayoo ko ni yɔɔ wɔnitsumɔhe lɛ kɛɛ miba ni wɔya shĩa. Ekɛɛ mɔ ko mɔ ko bɛ shĩa, ni wɔbaashwɛ wɔhiɛ waa. Shishijee lɛ, mikɛɛ lɛ nɔ ko kɛkɛ koni eshi mi, shi eyaaa. No hewɔ lɛ agbɛnɛ lɛ, mikɛɛ lɛ faŋŋ akɛ miyaŋ, ni mitsɔɔ lɛ nɔ hewɔ.” Robert nyɛ ejo kaa nɛɛ naa foi, ni enɛ sa yijiemɔ. Shi sɛɛ mli be ni esusu nɔ ni tee nɔ lɛ he lɛ, ena akɛ eshwɛ lɛ fioo. Ewie akɛ: “Kulɛ esa akɛ makɛɛ lɛ oya nɔŋŋ akɛ miyaŋ, tamɔ bɔ ni Yosef fee be ni Potifar ŋa lɛ ka lɛ lɛ. (1 Mo. 39:​7-9) Anɔkwa, minaa kpɛ mihe waa akɛ etɔ mi dani minyɛ mikɛɛ lɛ akɛ miyaŋ. Sane nɛɛ hã mina akɛ, esa akɛ mahã mi kɛ Yehowa teŋ naanyobɔɔ lɛ mli awa waa.”

¹⁶ Kɛ́ bo hu opɛi omli tamɔ Robert fee lɛ, obaaná he sɛɛ. Kɛ́ okɛ kaa ko kpe ni onyɛ ojo naa foi po lɛ, bi ohe akɛ, ‘Be enyiɛ eye dani minyɛ mijo naa foi?’ Kɛ́ ona akɛ kulɛ esa akɛ ojo naa foi amrɔ nɔŋŋ shi oyanyɛɛɛ ofee nakai lɛ, onijiaŋ akaje wui. Moŋ lɛ, omii ashɛ ohe akɛ agbɛnɛ lɛ, ona he ni ogbɔjɔmɔ lɛ yɔɔ. Sɔlemɔ ohã Yehowa yɛ ogbɔjɔmɔ lɛ he, ni ofee nibii ni baahã shwelɛ ni oyɔɔ akɛ obo Yehowa toi lɛ mli awa.—Lala 139:​23, 24.

17. Mɛɛ gbɛ nɔ nɔ Robert fee lɛ tse Yehowa gbɛ́i lɛ he?

¹⁷ Ani ole nɔ ni ba sɛɛ mli yɛ Robert kɛ oblayoo lɛ sane lɛ mli? Robert wie akɛ: “Be ni mikɛɛ oblayoo lɛ akɛ miyaŋ lɛ, ekɛɛ mi akɛ, ‘Ei, obɔ mɔdɛŋ ee!’ Mibi lɛ akɛ mɛni hewɔ ekɛɔ nakai? Ni ekɛɛ mi akɛ, enaanyo ko ni kulɛ Odasefonyo ni lɛ kɛɛ lɛ akɛ, Odasefoi oblahii kɛ oblayei lɛ fɛɛ feɔ nibii gbohii yɛ dujiaŋ kɛ́ amɛná hegbɛ lɛ. No hewɔ lɛ, ekɛɛ enaanyo lɛ akɛ ebaaka mi ekwɛ akɛ nɔ ni ewieɔ lɛ nakai ni lo. Be ni ewie nakai lɛ, mida Yehowa shi waa akɛ mifeee nɔ ko ni baawo egbɛ́i lɛ he muji.”

18. Mɛni otswa ofai shi akɛ obaafee yɛ obaptisimɔ lɛ sɛɛ? (Kwɛmɔ akrabatsa ni ji, “Saji Enyɔ Ni Obaanya He Waa” lɛ hu.)

¹⁸ Kɛ́ ojɔɔ ohe nɔ ohã Yehowa ni abaptisi bo lɛ, no hãa anaa akɛ oosumɔ ni otse egbɛ́i lɛ he ekɔɔɔ he eko nɔ ni baaba. Yehowa le shihilɛi ni mli wawai ni otsɔɔ mli kɛ kai srɔtoi ni okɛkpeɔ ni fɛɛ sɛɛ lɛ oyeɔ lɛ anɔkwa lɛ, ni ebaawa bo. Ná hemɔkɛyeli akɛ, ebaatsɔ emumɔ krɔŋkrɔŋ lɛ nɔ ewaje bo koni oya nɔ oye lɛ anɔkwa. (Luka 11:​11-13) Yehowa yelikɛbuamɔ naa lɛ, obaanyɛ oya nɔ onyiɛ Yesu sɛɛ yɛ obaptisimɔ lɛ sɛɛ.