Yohane Baptisi Yesu

KWƐMƆ okpo ni baa ebasɔ̃ nuu lɛ yiteŋ lɛ. Nuu lɛ ji Yesu. Amrɔ nɛɛ eye aaafee afii 30. Ni nuu ni ekɛyɔɔ jɛmɛ lɛ ji Yohane. Wɔkase ehe sane ko momo. Ani okaiɔ beni Maria tee ni eyasara ewekunyo Elisabet, ní gbekɛ ni yɔɔ Elisabet musuŋ lɛ huru kɛ miishɛɛ lɛ? Nakai gbekɛ ni ahiɛ lɛ musu lɛ ji Yohane. Shi mɛni Yohane kɛ Yesu feɔ amrɔ nɛɛ?

Etsɛko tsɔ̃ ni Yohane kɛ Yesu tsɔ̀ Yordan Faa lɛ mli. Nɛkɛ ji bɔ ni abaptisiɔ mɔ ahaa. Klɛŋklɛŋ lɛ, akɛ lɛ woɔ nu lɛ mli, kɛkɛ lɛ awo enɔ kɛjɛ mli ekoŋŋ. Akɛni enɛ ji nɔ ni Yohane feɔ ehaa gbɔmɛi lɛ hewɔ lɛ, atsɛɔ lɛ akɛ Yohane Baptisilɔ. Shi mɛni hewɔ ni Yohane baptisi Yesu lɛ?

Ojogbaŋŋ, Yohane fee nakai ejaakɛ Yesu ba ni ebakɛɛ Yohane ni ebaptisi lɛ. Yohane baptisiɔ mɛi ni taoɔ amɛtsɔɔ akɛ nibii fɔji ni amɛfee lɛ edɔ amɛ waa lɛ. Shi ani Yesu efee nɔ ko fɔŋ ko dã, ni no hewɔ lɛ esa akɛ edɔ lɛ waa? Dabi, Yesu efeee nakai ejaakɛ Nyɔŋmɔ diɛŋtsɛ Bi ni jɛ ŋwɛi ji lɛ. No hewɔ lɛ ekɛɛ Yohane ni ebaptisi lɛ yɛ yiŋtoo kroko hewɔ. Ha wɔkwɛ nɔ ni yiŋtoo nɛɛ ji.

Dani Yesu aaaba Yohane ŋɔɔ yɛ biɛ lɛ, no mli lɛ kapintɛfonyo ji lɛ. Kapintɛfonyo ji mɔ ko ni kɛ tso feɔ nibii, tamɔ okpɔ̃lɔ̃i kɛ sɛii kɛ nibii. Kapintɛfonyo ji Maria wu Yosef, ni etsɔɔ Yesu koni lɛ hu etsɔ nakai nɔŋŋ. Shi Yehowa tsuuu e-Bi lɛ kɛbaaa shikpɔŋ lɛ nɔ koni ebafee kapintɛfonyo. Eyɛ nitsumɔ krɛdɛɛ ko kɛha lɛ ni ebaatsu, ni be eshɛ kɛha Yesu ni ekɛbaaje nitsumɔ lɛ shishi. No hewɔ lɛ Yesu kɛɛ Yohane ni ebaptisi lɛ koni ekɛtsɔɔ akɛ, eba koni ebafee e-Tsɛ suɔmɔnaa nii. Ani Nyɔŋmɔ ná enɛ he miishɛɛ?

Hɛɛ, ena he miishɛɛ, ejaakɛ beni Yesu wo ehe nɔ kɛjɛ nu lɛ mli lɛ, gbee ko ni jɛ ŋwɛi kɛɛ akɛ: ‘Mɔ nɛ ji mi-Bi ni minaa ehe tsui lɛ.’ Agbɛnɛ hu, etamɔ nɔ ni ŋwɛi naa gbele ni okpo nɛɛ kpeleke shi kɛba Yesu nɔ. Shi jeee okpo diɛŋtsɛ ni. Etamɔ eko kɛkɛ. Yɛ anɔkwale mli lɛ Nyɔŋmɔ mumɔ krɔŋkrɔŋ lɛ ni.

Agbɛnɛ Yesu yɛ nibii babaoo ni ebaajwɛŋ he, no hewɔ lɛ etee he ko ni etsi ehe banee ni ehi jɛmɛ gbii 40. Satan ba eŋɔɔ yɛ jɛmɛ. Satan bɔ mɔdɛŋ ni eha Yesu afee nɔ ko ni teɔ shi ewoɔ Nyɔŋmɔ mlai, shii etɛ sɔŋŋ. Shi Yesu efeee.

No sɛɛ lɛ, Yesu ku esɛɛ ni ekɛ hii komɛi ni batsɔmɔ eklɛŋklɛŋ sɛɛnyiɛlɔi, loo kaselɔi lɛ kpe. Amɛteŋ mɛi komɛi agbɛi ji Andrea, Petro (ni atsɛɔ lɛ Simon hu lɛ), Filipo kɛ Natanael (ni atsɛɔ lɛ Bartolomeo hu lɛ). Yesu kɛ kaselɔi heei nɛɛ shi kɛtee Galilea niiaŋ. Ní amɛyashɛ Galilea lɛ, amɛwa yɛ maŋ ni Natanael jɛ mli, ni ji Kana lɛ mli. Yesu tee yookpeemɔ okpɔlɔŋmɛɛ wulu ko shishi yɛ jɛmɛ, ni efee eklɛŋklɛŋ naakpɛɛ nii. Ani ole nɔ ni eji? Eha nu tsɔ̃ wein.