Yitso 14

Yesu Klɛŋklɛŋ Kaselɔi

BENI Yesu ye gbii 40 yɛ ŋa lɛ nɔ sɛɛ lɛ, eku esɛɛ eba Yohane, mɔ ni baptisi lɛ lɛ ŋɔɔ. Beni ebɛŋkɛ lɛ lɛ, Yohane kɛ enine tsɔɔ lɛ, ni ekɛɛ mɛi ni yɔɔ jɛmɛ lɛ akɛ: “Naa, Nyɔŋmɔ Toobi lɛ ni woɔ je lɛ he eshai lɛ kɛyaa lɛ! Mɔ nɛ ji mɔ ni mikɛɛ yɛ ehe akɛ: Nuu ko miiba yɛ misɛɛ ni etsɔ mihiɛ, ejaakɛ eyɛ dani miyɔɔ lɛ.” Eyɛ mli akɛ Yohane ye enyɛkwɛ bi Yesu onukpa moŋ, shi Yohane le akɛ Yesu ehi wala mli akɛ mumɔŋ gbɔmɔ yɛ ŋwɛi dani afɔ lɛ.

Ni kɛlɛ, otsii fioo ni tsɔ hiɛ lɛ mli, beni Yesu ba koni abaptisi lɛ lɛ, eka shi faŋŋ Yohane leee kɛ nɔmimaa akɛ Yesu ji mɔ ni baafee Mesia lɛ. Yohane kpɛlɛ nɔ akɛ: “Ni mi lɛ mileee lɛ, shi moŋ bɔni afee ni ajie lɛ kpo atsɔɔ Israel hewɔ ni miba mibaptisiɔ yɛ nu mli nɛɛ.”

Yohane tee nɔ egbala nɔ ni tee nɔ beni ebaptisi Yesu lɛ mli etsɔɔ etoibolɔi lɛ akɛ: “Mina mumɔ lɛ yi shi kɛjɛ ŋwɛi tamɔ okpo, ni ebahi enɔ. Ni mi lɛ mileee lɛ, shi Mɔ ni tsu mi akɛ mibaptisi yɛ nu mli lɛ, lɛ nɔŋŋ ekɛɛ mi akɛ: ‘Mɔ nɔ ni ooona akɛ mumɔ lɛ yiɔ ni ehiɔ enɔ lɛ, lɛ ji mɔ ni baptisiɔ yɛ mumɔ krɔŋkrɔŋ mli lɛ.’ Ni mina, ni miye he odase akɛ Nyɔŋmɔ Bi lɛ nɛ.”

Enɔ jetsɛremɔ lɛ, Yohane kɛ ekaselɔi lɛ ateŋ mɛi enyɔ damɔ shi. Kɛkɛ ni beni Yesu bɛŋkɛ amɛ lɛ, ekɛɛ ekoŋŋ akɛ: “Naa, Nyɔŋmɔ Toobi lɛ!” Enɛ hewɔ lɛ, Yohane Baptisilɔ lɛ kaselɔi enyɔ nɛɛ nyiɛ Yesu sɛɛ. Amɛteŋ mɔ kome ji Andrea, ni eka shi faŋŋ akɛ mɔ kroko lɛ ji mɔ ni ŋmala saji nɛɛ lɛ, mɔ hu ni atsɛɔ lɛ Yohane lɛ. Nɛkɛ Yohane nɛɛ hu ji Yesu nyɛkwɛ binuu, taakɛ saji tsɔɔ faŋŋ lɛ, ni eka shi faŋŋ akɛ eji Maria nyɛmiyoo Salome binuu.

Ni Yesu tsɔ ehe ni ena akɛ Andrea kɛ Yohane nyiɛ esɛɛ lɛ, ebi amɛ akɛ: “Mɛni nyɛtaoɔ?”

Ni amɛbi lɛ akɛ: “Rabi, nɛgbɛ ohiɔ?”

Yesu ha amɛ hetoo akɛ: “Nyɛbaa ni nyɛbakwɛa.”

No mli lɛ atswa aaafee shwane ŋmɛji ejwɛ, ni Andrea kɛ Yohane kɛ Yesu hi shi nakai gbi lɛ fɛɛ. No sɛɛ lɛ, Andrea mii shɛ ehe aahu akɛ ekɛ oyaiyeli yatao enyɛminuu, mɔ ni atsɛɔ lɛ Petro lɛ. Ni ekɛɛ lɛ akɛ: “Wɔna Mesia lɛ.” Ni ekɛ Petro ba Yesu ŋɔɔ. Ekolɛ Yohane hu yatao enyɛminuu Yakobo yɛ nakai beaŋ nɔŋŋ ni ekɛ lɛ hu ba Yesu ŋɔɔ; ni kɛlɛ, Yohane shi nɛkɛ saji ni kɔɔ amɛhe nɛɛ yɛ e-Sanekpakpa lɛ mli, tamɔ bɔ ni efɔɔ feemɔ lɛ.

Enɔ jetsɛremɔ lɛ, Yesu na Filipo, ni jɛ Betsaida, maŋtiase ni Andrea kɛ Petro hu jɛ mli kɛjɛ shishijee lɛ. Ni etsɛ lɛ akɛ: “Nyiɛmɔ misɛɛ.”

Kɛkɛ ni Filipo na Natanael, mɔ ni atsɛɔ lɛ hu akɛ Bartolomeo lɛ, ni ekɛɛ lɛ akɛ: “Wɔna mɔ ni Mose ŋma ehe sane yɛ Mla lɛ mli, kɛ Gbalɔi lɛ hu lɛ, Yesu, Yosef bi ni jɛ Nazaret lɛ.” Natanael je enɛ he ŋwane. Ebi akɛ: “Ani nɔ ko kpakpa ko aaanyɛ ajɛ Nazaret?”

Ni Filipo wo lɛ hewalɛ akɛ: “Ba ni obakwɛ.” Beni amɛbaa he ni Yesu yɔɔ lɛ, Yesu wie yɛ Natanael he akɛ: “Naa, anɔkwa Israelnyo, mɔ mli ni apasa bɛ.”

Natanael bi akɛ: “Nɛgbɛ ole mi yɛ?”

Ni Yesu ha lɛ hetoo akɛ: “Minao fɛɛ da ni Filipo tsɛo, be mli ni oyɔɔ agbami tso lɛ shishi lɛ.”

Natanael naa kpɛ ehe. Ekɛɛ: “Rabi, [eshishi ji Tsɔɔlɔ] bo ji Nyɔŋmɔ Bi lɛ, bo ji Israel Maŋtsɛ lɛ.”

Yesu bi lɛ akɛ: “Ni mikɛɛo akɛ minao yɛ agbami tso lɛ shishi lɛ hewɔ oheɔ oyeɔ nɛɛ? Ooona nii wuji ni fe enɛ.” Kɛkɛ ni ewo lɛ shi akɛ: “Lɛlɛŋ, lɛlɛŋ, miikɛɛ nyɛ akɛ: Kɛjɛ be nɛɛ nɔ lɛ nyɛaana akɛ ŋwɛi naa ka ni Nyɔŋmɔ bɔfoi lɛ miikwɔ miikpeleke yɛ gbɔmɔ Bi lɛ nɔ.”

Yɛ enɛ sɛɛ nɔŋŋ lɛ, Yesu kɛ ekaselɔi heei ni ena lɛ shi Yordan Jɔɔ lɛ mli ni amɛfa gbɛ kɛtee Galilea. Yohane 1:29-51.

▪ Namɛi ji Yesu klɛŋklɛŋ kaselɔi lɛ?

▪ Mɛɛ gbɛ nɔ atsɔ akɛ Petro, kɛ agbɛnɛ ekolɛ Yakobo hu ba Yesu ŋɔɔ?

▪ Mɛni tsɔ Natanael yiŋ akɛ Yesu ji Nyɔŋmɔ Bi lɛ?