Yitso 31

Ŋmaakũu yɛ Hejɔɔmɔ Gbi lɛ Nɔ

ETSƐƐƐ ni Yesu kɛ ekaselɔi lɛ shi Yerusalem ni amɛmiiku amɛsɛɛ amɛya Galilea. Agbiɛnaa be mli ni, ni ŋmaa yɛ tsei lɛ anɔ lolo yɛ ŋmɔji lɛ amli. Hɔmɔ miiye kaselɔi lɛ. No hewɔ lɛ amɛkumɔ ŋmaa lɛ eko ni amɛbɔi yeli. Shi akɛni Hejɔɔmɔ Gbi ni hewɔ lɛ, ahaaa amɛye amɛhe ni afooo amɛdaaŋ.

Etsɛko tsɔ ni jamɔ mli hiɛnyiɛlɔi ni yɔɔ Yerusalem lɛ miitao ni amɛgbe Yesu yɛ amɛnaafolɔmɔ akɛ eku Hejɔɔmɔ Gbi lɛ mli lɛ hewɔ. Agbɛnɛ Farisifoi lɛ kɛ naafolɔmɔ ko ba. Amɛkɛɛ: “Naa, okaselɔi lɛ miifee nɔ ni ahaaa hegbɛ akɛ afeɔ yɛ hejɔɔmɔ gbi lɛ nɔ lɛ.”

Farisifoi lɛ kɛɔ akɛ ŋmaakũu kɛ ekpalamɔ yɛ dɛŋ koni aye lɛ ji nikpamɔ kɛ ŋmaagbeemɔ. Shi bɔ ni amɛtsɔɔ nɔ ni feɔ nitsumɔ shishi shɛii lɛ eha Hejɔɔmɔ Gbi lɛ ebaafee jatsu ni tsii, yɛ be mli ni ato koni efee miishɛɛ be kɛ nɔ ni tswaa mɔ emaa shi yɛ mumɔŋ lɛ. No hewɔ lɛ Yesu kɛ Ŋmalɛ naa nɔkwɛmɔ nii komɛi ha koni ekɛtsɔɔ akɛ ejeee Yehowa Nyɔŋmɔ yiŋtoo akɛ awo E-Hejɔɔmɔ Gbi lɛ he mla shɛii nɛkɛ.

Yesu kɛɛ amɛ akɛ beni hɔmɔ yeɔ David kɛ mɛi ni fata ehe lɛ, amɛwa yɛ kpeebuu lɛ he ni amɛye aboloo ni akɛbasha afɔle lɛ eko. Ajie aboloi nɛɛ kɛjɛ Yehowa hiɛ momo ni akɛ ehee ebaye nomɛi anajiaŋ, ni ashi no aha osɔfoi lɛ koni amɛye. Shi kɛlɛ, bɔ ni nibii balɛ eha hewɔ lɛ, abuuu David kɛ mɛi ni fata ehe lɛ fɔ yɛ ye ni amɛye lɛ hewɔ.

Ni Yesu kɛ nɔkwɛmɔ nɔ kroko ko hu ha ni ekɛɛ: “Aloo nyɛkaneko yɛ Mla lɛ mli akɛ, hejɔɔmɔ gbii lɛ anɔ lɛ osɔfoi buleɔ hejɔɔmɔ gbi lɛ nɔŋŋ yɛ sɔlemɔ we lɛ ni amɛyeee fɔ?” Hɛɛ, osɔfoi lɛ yaa nɔ amɛgbeɔ kooloi ni amɛsaa yɛ Hejɔɔmɔ Gbi lɛ nɔ ni amɛtsuɔ nitsumɔi krokomɛi hu yɛ sɔlemɔ we lɛ yɛ be mli ni amɛsaa kooloi ni akɛbasha afɔle lɛ! Yesu kɛɛ: “Shi miikɛɛ nyɛ akɛ, mɔ ni fe sɔlemɔ we lɛ yɛ biɛ.”

Ni Yesu tee nɔ ewo Farisifoi lɛ ŋaa ni ekɛɛ: “Shi eji nyɛle nɔ ni ji: ‘Mɔbɔnalɛ mitaoɔ shi jeee afɔleŋ’ lɛ shishi kulɛ, nyɛbuŋ mɛi ni yeee fɔ lɛ afɔ.” Kɛkɛ ni emu naa akɛ: “Ejaakɛ hejɔɔmɔ gbi lɛ Nuŋtsɔ ji gbɔmɔ Bi lɛ.” Mɛni nɔ ni Yesu kɛɛ nɛɛ tsɔɔ? Yesu miiwie e-afii akpe Maŋtsɛyeli nɔyeli ni toiŋjɔlɛ yɔɔ mli lɛ he.

Afii 6,000 sɔŋŋ nɛ, ni adesai kɛmiina nɔ yɛ nyɔŋyeli mli yɛ Satan Abonsam shishi, ni awuiyeli kɛ tai ji nibii ni afeɔ be fɛɛ be. Shi nɔ ni tamɔɔɔ nakai lɛ, Kristo nɔyeli Hejɔɔmɔ Gbi kpeteŋkpele lɛ baafee hejɔɔmɔ be kɛmiijɛ nɛkɛ piŋmɔi kɛ nɔnyɛɛ shihilɛi nɛɛ fɛɛ mli. Mateo 12:1-8; 3 Mose 24:5-9; 1 Samuel 21:1-6; 4 Mose 28:9; Hoshea 6:6.

▪ Mɛɛ naafolɔmɔ akɛfɔ Yesu kaselɔi lɛ anɔ, ni te Yesu ha hetoo eha tɛŋŋ?

▪ Mɛɛ Farisifoi lɛ anine ni nyɛ shi ji nɔ ni Yesu na?

▪ Yesu ji “hejɔɔmɔ gbi lɛ Nuŋtsɔ” yɛ mɛɛ gbɛ nɔ?