Yitso 39

Henɔwolɔi lɛ kɛ Heshibalɔi Lɛ

BENI Yesu etsi Yohane Baptisilɔ lɛ sui kpakpai lɛ ata sɛɛ lɛ, egbala jwɛŋmɔ kɛtee gbɔmɛi henɔwolɔi ni ebɔle ehe, ni tsakeɔ amɛhe tamɔ gbɔmɛi sɔrɔtoi lɛ anɔ. Ekɛɛ: “Nɛkɛ yinɔbii nɛɛ tamɔ gbekɛbii ni tara jaji anɔ ni amɛtsɛtsɛɔ amɛnanemɛi akɛ: ‘Wɔkpa blɛ wɔha nyɛ, ni nyɛjoko; wɔwo yara wɔha nyɛ, ni nyɛfoko.’ ”

Mɛni ji nɔ ni Yesu tsɔɔ lɛ? Etsɔɔ mli akɛ: “Ejaakɛ Yohane ba, ní eyeee nii ni enuuu nɔ ko lɛ, amɛkɛɛ akɛ: ‘Daimonio yɛ emli’. Gbɔmɔ Bi lɛ ba, ni eyeɔ nii ni esaa enuɔ nɔ ko lɛ, amɛkɛɛ akɛ: ‘Naa, nuu fulɔ kɛ daanulɔ, toohelɔi kɛ eshafeelɔi ashieŋtsɛ nɛ!’ ”

Anyɛɛɛ asa gbɔmɛi lɛ ahiɛ kɔkɔɔkɔ. Nɔ ko nɔ ko bɛ ni saa amɛhiɛ. Yohane hi shihilɛ ko ni mli wa mli, akɛ Nazirnyo ni ekwa ehe, ni ekɛye bɔfo lɛ wiemɔi akɛ “enuŋ wein loo daa ni wa ko” lɛ nɔ. Ni kɛlɛ gbɔmɛi lɛ kɛɛ daimonio yɛ emli. Yɛ gbɛ kroko nɔ lɛ, Yesu hiɔ shi tamɔ gbɔmɛi krokomɛi feɔ lɛ, ni ehiii shihilɛ ko ni mli wa mli, ni lɛ lɛ afolɔɔ enaa akɛ efeɔ nii kɛtekeɔ nɔ.

Kwɛ bɔ ni ewa akɛ aaasa gbɔmɛi lɛ ahiɛ! Amɛtamɔ nanemɛi ni miishwɛ, ni amɛteŋ mɛi komɛi sumɔɔɔ ni amɛjoɔ yɛ be mli ni mɛi krokomɛi lɛ kpaa blɛ lɛ aloo amɛwoɔ yara beni mɛi krokomɛi lɛ foɔ lɛ. Shi kɛlɛ, Yesu kɛɛ akɛ: “Ni abu nilee lɛ bem yɛ ebii lɛ fɛɛ naa.” Hɛɛ, odaseyeli lɛ—nitsumɔi lɛ—haa efeɔ faŋŋ akɛ naafolɔmɔi ni akɛshiɔ Yohane kɛ Yesu fɛɛ lɛ ji amale.

Kɛkɛ ni Yesu tee nɔ ni ejie maji etɛ, ni ji Korazin, Betsaida, kɛ Kapernaum, hei ni etsu ehewalɛ nitsumɔi lɛ babaoo yɛ lɛ kɛha heguɔgbee. Yesu kɛɛ akɛ, eji eyatsu nakai nitsumɔi lɛ yɛ Foenikabii amaji ni ji Tiro kɛ Zidon mli kulɛ, nakai maji lɛ baatsake amɛtsuii yɛ kpekpe kɛ lamulu mli. Beni ebuɔ Kapernaum, ni eka shi faŋŋ akɛ jɛmɛ ji eshihilɛ he yɛ esɔɔmɔ nitsumɔ be lɛ mli lɛ fɔ lɛ, Yesu jaje akɛ: “Ejaraŋ haŋ Sodom shikpɔŋ lɛ yɛ Kojomɔ Gbi lɛ nɔ, tamɔ bo.”

Agbɛnɛ Yesu tee nɔ ni ejie eŋwɛi Tsɛ lɛ yi yɛ faŋŋ mli. Nɔ ko kanya lɛ ni efee nakai ejaakɛ Nyɔŋmɔ kɛ mumɔŋ anɔkwalei ni sɛɛnamɔ yɔɔ he waa lɛ etee nilelɔi kɛ woloŋlelɔi lɛ shi ejieɔ naakpɛɛ nibii nɛɛ kpo etsɔɔ heshibalɔi lɛ, yɛ gbɛ kroko nɔ lɛ, abifabii lɛ.

Yɛ naagbee lɛ, Yesu kɛ ninefɔɔ ni ŋɔɔ nɛɛ ha akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipa lɛ nyɛfɔa nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaana hejɔɔmɔ nyɛaaha nyɛsusumai lɛ. Ejaakɛ mipa lɛ teremɔ waaa, ni mijatsu lɛ etsiii.”

Mɛɛ gbɛ nɔ Yesu tsɔɔ ehaa hejɔɔmɔ? Efeɔ nakai kɛtsɔ heyeli ni ekɛhaa kɛjɛɔ blema saji ni feɔ mɛi nyɔji ni jamɔ mli hiɛnyiɛlɔi lɛ kɛshwie gbɔmɛi lɛ anɔ tamɔ jatsui, ni, akɛ nɔkwɛmɔ nɔ lɛ, Hejɔɔmɔ Gbi-yeli he mlai lɛ fata he lɛ amli lɛ nɔ. Agbɛnɛ etsɔɔ mɛi ni nuɔ maŋkwramɔŋ nɔyelii lɛ ajatsui lɛ atsiimɔ he lɛ hu gbɛ kɛyaa heyeli mli kɛ mɛi hu ni nuɔ amɛhe eshai lɛ atsiimɔ he kɛtsɔ henilee ni piŋɔ amɛ hewɔ lɛ hu. Ejieɔ bɔ ni abaanyɛ akɛ mɛi ni naa amanehulu nɛɛ ahe eshai ake amɛ lɛ hu kpo etsɔɔ kɛ bɔ ni amɛaafee amɛna amɛkɛ Nyɔŋmɔ teŋ wekukpaa kpakpa mli ŋɔɔmɔ.

Pã ni teremɔ waaa ni Yesu kɛhaa lɛ ji henɔjɔɔmɔ kwraa kɛha Nyɔŋmɔ, bɔni afee ni mɔ ko anyɛ asɔmɔ wɔŋwɛi Tsɛ mɔbɔnalɔ kɛ mlihilɔ lɛ. Ni jatsu ni etsiii ni Yesu kɛhaa mɛi ni baa eŋɔɔ lɛ ji nibii ni Nyɔŋmɔ biɔ kɛha wala lɛ ni amɛaaye nɔ, ni ji E-kitai ni aŋmala yɛ Biblia lɛ mli lɛ. Ni enɛɛmɛi anɔ ni aaaye lɛ jeee jatsu ko kwraa. Mateo 11:16-30; Luka 1:15; 7:31-35; 1 Yohane 5:3.

▪ Mɛɛ gbɛ nɔ gbɔmɛi henɔwolɔi ni tsakeɔ amɛhe tamɔ gbɔmɛi sɔrɔto ko lɛ tamɔ gbekɛbii yɛ?

▪ Mɛni hewɔ ni nɔ ko kanya Yesu koni ejie eŋwɛi Tsɛ lɛ yi lɛ?

▪ Mɛɛ gbɛi anɔ akɛ jatsui eshwie gbɔmɛi lɛ anɔ yɛ, ni mɛɛ heyeli Yesu kɛhaa?