Yitso 70

Nuu ko ni Afɔ lɛ Shwilafo lɛ Tsamɔ

BENI Yudafoi lɛ bɔ mɔdɛŋ akɛ amɛaatswia Yesu tɛi lɛ, eshiii Yerusalem. Yɛ sɛɛ mli, yɛ Hejɔɔmɔ Gbi lɛ nɔ lɛ, ekɛ ekaselɔi lɛ nyiɛ maŋ lɛ mli ni amɛna nuu ko ni afɔ lɛ shwilafo. Ni kaselɔi lɛ bi Yesu akɛ: “Rabi, namɔ fee esha, mɔ nɛ loo efɔlɔi, hewɔ ni afɔ lɛ shwilafo nɛɛ?”

Ekolɛ kaselɔi lɛ heɔ yeɔ akɛ mɔ ko baanyɛ afee esha yɛ enyɛ musuŋ, taakɛ rabifoi lɛ ekomɛi heɔ yeɔ lɛ. Shi Yesu ha hetoo akɛ: “Jeee mɔ nɛ loo efɔlɔi ni fee esha, shi moŋ bɔni afee ni Nyɔŋmɔ nitsumɔi lɛ ana aje kpo yɛ emli.” Shwilafo ni nuu lɛ ji lɛ jeee nɔ ni ba kɛjɛ tɔmɔ loo esha ni mli wa ni lɛ nuu lɛ loo efɔlɔi fee lɛ mli. Esha ni klɛŋklɛŋ nuu Adam fee lɛ ha adesai fɛɛ fee mɛi ni yeee emuu, ni no hewɔ lɛ amɛbaje kpai tamɔ fɔ ni aaafɔ mɔ ko shwilafo lɛ shishi. Nɛkɛ kpa ni yɔɔ nuu nɛɛ he nɛɛ kɛ hegbɛ ha Yesu koni eha Nyɔŋmɔ nitsumɔi lɛ aje kpo faŋŋ.

Yesu ma bɔ ni ehe hiaa ni atsu nɛkɛ nitsumɔi nɛɛ oya lɛ nɔ mi. Ekɛɛ: “Wɔ lɛ, ni je etsɛre nɛɛ, ja wɔtsu mɔ ni tsu wɔ lɛ nitsumɔi lɛ; je baana, beni mɔ ko nyɛŋ nii atsu. Gbii abɔ ni miyɔɔ je lɛ mli nɛɛ, je lɛŋ la ji mi.” Etsɛŋ ni Yesu gbele lɛ kɛ lɛ baawo gbonyobu mli duŋ kpii ni enyɛŋ efee nɔ ko yɛ mli lɛ mli. Shi dani enɛ aaaba lɛ, eji nilee kɛ niiashishinumɔ jɛɛhe kɛha je lɛ.

Yɛ be mli ni ewie nɛkɛ wiemɔi nɛɛ sɛɛ lɛ, Yesu tsɛ̃ lajɔ eshwie shikpɔŋ, ni ekɛ lajɔ lɛ kpɔtɔ su. Ni ekɛfɔ shwilafo lɛ hiŋmɛi nɔ ni ekɛɛ: “Yaaju yɛ Siloam kpaakpo lɛ mli.” Nuu lɛ fee nakai. Ni beni eyafee nakai lɛ, ena nii! Kwɛ bɔ ni ena miishɛɛ beni eku esɛɛ lɛ, ni eena nii klɛŋklɛŋ kwraa kɛjɛ be mli ni afɔ lɛ!

Ekuuŋbii kɛ mɛi krokomɛi ni le lɛ lɛ naa kpɛ amɛhe. Amɛbi akɛ: “Ani jeee mɔ ni kulɛ etaa shi ni esisɛɔ lɛ nɛ?” Mɛi komɛi ha hetoo akɛ: “Lɛ ni.” Shi mɛi krokomɛi heee amɛyeee: “Dabi, etamɔ lɛ.” Shi nuu lɛ diɛŋtsɛ kɛɛ: “Mi ni.”

Ni gbɔmɛi lɛ bi lɛ akɛ: “Te fee tɛŋŋ ni ohiŋmɛi lɛ gbeleŋ?”

“Nuu ko ni atsɛɔ lɛ Yesu lɛ kpɔtɔ su, ni ekɛkpa mihiŋmɛii lɛ, ni ekɛɛ mi akɛ: Yaa Siloam kpaakpo lɛ mli ni oyaju. Ni beni miyaju lɛ, mina nii.”

Amɛbi lɛ akɛ: “Nɛgbɛ eyɔɔ?”

Eha amɛ hetoo akɛ: “Mileee.”

Kɛkɛ ni gbɔmɛi lɛ nyiɛ nuu ni tsutsu ko lɛ eji shwilafo nɛɛ hiɛ kɛtee amɛjamɔ mli hiɛnyiɛlɔi, Farisifoi lɛ ahiɛ. Kɛkɛ ni amɛ hu amɛbɔi lɛ nibimɔ, bɔ ni fee ni enaa nii lɛ. Ni nuu lɛ tsɔɔ mli akɛ: “Su ni akpɔtɔ ekɛkpa mihiŋmɛii, ni miyaju, ni minaa nii nɛɛ.”

Eka shi faŋŋ akɛ, kulɛ esa akɛ Farisifoi lɛ kɛ nibalɔ ni atsa lɛ nɛɛ anya! Shi yɛ no najiaŋ moŋ lɛ, amɛkpoo Yesu. Amɛkɛɛ: “Nuu nɛɛ jɛɛɛ Nyɔŋmɔ ŋɔɔ.” Mɛni hewɔ amɛkɛɔ nakai lɛ? “Ejaakɛ eyeee hejɔɔmɔ gbi lɛ.” Shi kɛlɛ Farisifoi krokomɛi susu amɛyiŋ akɛ: “Te gbɔmɔ ko ni ji eshafeelɔ aaafee tɛŋŋ ni enyɛ efee okadii ni tamɔ enɛɛmɛi?” No hewɔ lɛ mligbalamɔ ba amɛteŋ.

No hewɔ lɛ, amɛbi nuu lɛ akɛ: “Bo hu te okɛɔ yɛ ehe tɛŋŋ, akɛni egbele ohiŋmɛii lɛ?”

Eha amɛ hetoo akɛ: “Gbalɔ ji lɛ.”

Farisifoi lɛ kpoo akɛ amɛaahe enɛ amɛye. Amɛheɔ amɛyeɔ akɛ teemɔŋ gbeekpamɔ ko yɛ Yesu kɛ nuu nɛɛ teŋ bɔni afee ni ekɛlaka gbɔmɛi lɛ. No hewɔ lɛ bɔni afee ni ana sane lɛ naa lɛ, amɛtsɛ nibalɔ lɛ fɔlɔi koni amɛbibii amɛ saji. Yohane 8:59; 9:1-18.

▪ Mɛni hewɔ jɛ ni nuu lɛ tsɔ shwilafo lɛ, ni mɛni ejɛɛɛ?

▪ Mɛni ji gbɛkɛ ni mɔ ko mɔ ko nyɛŋ atsu nii lɛ?

▪ Beni atsa nuu lɛ, te mɛi ni le lɛ lɛ fee amɛnii amɛha tɛŋŋ?

▪ Mɛɛ gbɛ nɔ Farisifoi lɛ amli gbala yɛ yɛ nuu lɛ ni atsa lɛ hewɔ?