Yitso 71

Farisifoi lɛ Je Gbɛ Amɛheee Enɔ Amɛyeee

NUU ni be ko lɛ eji shwilafo lɛ fɔlɔi miishe gbeyei beni atsɛ amɛ kɛba Farisifoi lɛ ahiɛ lɛ. Amɛle akɛ akpɛ yiŋ akɛ abaashwie mɔ fɛɛ mɔ ni naa hemɔkɛyeli yɛ Yesu mli lɛ kɛjɛ sɔlemɔ we lɛ. Nɛkɛ tsakpaa ni ka amɛkɛ mɛi krokomɛi ni yɔɔ akutso lɛ mli lɛ teŋ ni aaafo mli lɛ baanyɛ ekɛ shihilɛ ni mli wa waa aba, titri lɛ yɛ ohiafoi aweku nɔ. No hewɔ lɛ fɔlɔi lɛ kwɛ amɛhe nɔ jogbaŋŋ.

Farisifoi lɛ bi akɛ: “Ani nyɛbi lɛ ni nyɛkɛɔ akɛ afɔ lɛ shwilafo lɛ nɛ? Te fee tɛŋŋ ni agbɛnɛ enaa nii?”

Efɔlɔi lɛ ma nɔ mi akɛ: “Wɔle akɛ wɔbi lɛ nɛ, ni wɔle akɛ afɔ lɛ shwilafo; shi bɔ ni fee ni enaa nii agbɛnɛ nɛɛ, wɔleee, asaŋ mɔ ni gbele ehiŋmɛii lɛ hu, wɔleee.” Eka shi faŋŋ akɛ amɛbinuu lɛ ekɛɛ amɛ nɔ fɛɛ nɔ ni tee nɔ, shi efɔlɔi lɛ kɛ nilee kɛɛ: “Eda, nyɛbia lɛ, lɛ diɛŋtsɛ eeewie eha ehe.”

No hewɔ lɛ, Farisifoi lɛ saa amɛtsɛ nuu lɛ ekoŋŋ. Agbɛnɛ amɛbɔ mɔdɛŋ akɛ amɛaawo ehe gbeyei kɛtsɔ kɛɛmɔ ni amɛkɛɛ lɛ akɛ amɛna odaseyelii ni teɔ shi woɔ Yesu lɛ nɔ. Amɛkɛɛ lɛ akɛ: “Ŋɔɔ anunyam oha Nyɔŋmɔ; shi wɔ lɛ wɔle akɛ gbɔmɔ nɛɛ eshafeelɔ ji lɛ.”

Nuu nɛɛ ni be ko lɛ eji shwilafo lɛ eteee shi ewooo amɛwiemɔ nɛɛ, shi moŋ ekɛɛ: “Eshafeelɔ ji lɛ jiŋŋ, mileee.” Shi ekɛfata he akɛ: “Nɔ kome mile, akɛ kulɛ shwilafo ji mi, shi agbɛnɛ miina nii.”

Akɛni amɛmiitao amɛna tɔmɔ yɛ edaseyeli lɛ mli hewɔ lɛ, Farisifoi lɛ bi lɛ ekoŋŋ akɛ: “Mɛni efeeo? Te fee tɛŋŋ ni egbele ohiŋmɛii lɛ?”

Kɛkɛ ni nuu lɛ kɛɛ: “Mikɛɛ nyɛ momo ni nyɛnuuu; mɛɛ hewɔ nyɛtaoɔ toi nyɛbo ekoŋŋ?” Ni ekɛ hefɛoyeli bi amɛ akɛ: “Ani nyɛ hu nyɛmiisumɔ akɛ nyɛaatsɔmɔ ekaselɔi?”

Hetoo ni eha amɛ nɛɛ ha Farisifoi lɛ amli fu waa. Ni amɛkɛɛ lɛ akɛ: “Bo ji ekaselɔ, shi wɔ lɛ, Mose kaselɔi ji wɔ. Wɔle akɛ Nyɔŋmɔ kɛ Mose wie; shi mɔ nɛ lɛ wɔleee he ni ejɛ.”

Kɛkɛ ni nibalɔ heshibalɔ nɛɛ here amɛ nɔ akɛ: “Ei, enɛ ji nɔ ni yɔɔ naakpɛɛ, akɛ nyɛleee he ni ejɛ, ni kɛlɛ egbele mihiŋmɛii lɛ.” Te wɔbaamu sane naa yɛ enɛ hewɔ tɛŋŋ? Nibalɔ lɛ gbala jwɛŋmɔ kɛtee sane ni akpɛlɛɔ nɔ lɛ nɔ: “Wɔle akɛ Nyɔŋmɔ booo eshafeelɔi toi; shi moŋ kɛji mɔ ko jaa Nyɔŋmɔ ni efeɔ esuɔmɔnaa nii lɛ, lɛ toi eboɔ. Kɛjɛ beni abɔ ade nɛɛ anuko akɛ mɔ ko egbele mɔ ni afɔ lɛ shwilafo hiŋmɛii da.” No hewɔ lɛ, bɔ ni esa akɛ amu sane lɛ naa aha lɛ yɛ faŋŋ: “Kɛji mɔ nɛ jɛɛɛ Nyɔŋmɔ ŋɔɔ kulɛ, enyɛŋ nɔ ko efee.”

Farisifoi lɛ naaa hetoo ko amɛha gbɛ ni yɔɔ tɛɛ ni etsɔ nɔ ekɛ amɛ susu nii ahe nɛɛ. Amɛnyɛɛɛ anɔkwale lɛ naa amɛdamɔ, hewɔ lɛ amɛjɛ nuu lɛ akɛ: “Bo lɛ afɔo yɛ esha mli kwraa, ni bo moŋ otsɔɔ wɔ nii nɛɛ?” Yɛ enɛ hewɔ lɛ, amɛshwie nuu lɛ kɛje kpo, ekolɛ kɛjɛ sɔlemɔ tsu lɛ mli tete po.

Beni Yesu na ele nɔ ni amɛfee nɛɛ, eyatao nuu lɛ ni ekɛɛ lɛ akɛ: “Oohe Nyɔŋmɔ bi lɛ nɔ ooye lo?”

Yɛ hetoohamɔ mli lɛ, nibalɔ nɛɛ ni be ko lɛ eji shwilafo lɛ bi akɛ: “Namɔ ji lɛ, Nuŋtsɔ, koni mahe enɔ maye?”

Yesu ha lɛ hetoo akɛ: “Mɔ ni kɛo wieɔ lɛ, lɛ nɔŋŋ ni.”

Amrɔ nɔŋŋ pɛ kɛkɛ ni nuu lɛ kula shi yɛ Yesu hiɛ ni ekɛɛ: “Miihe miiye, Nuŋtsɔ.”

Kɛkɛ ni Yesu tsɔɔ mli akɛ: “Kojomɔ hewɔ miba je nɛŋ, koni mɛi ni enaaa nii lɛ ana, ni mɛi ni naa lɛ atsɔmɔ shwilafoi.”

Kɛkɛ ni Farisifoi ni boɔ lɛ toi lɛ bi akɛ: “Ani wɔ hu wɔshwila?” Kɛji amɛbaakpɛlɛ nɔ akɛ amɛshwila yɛ jwɛŋmɔ mli lɛ, amɛbaana nɔ ko amɛkɛjie amɛnaa yɛ shi ni amɛte amɛwo Yesu lɛ he. Taakɛ Yesu kɛɛ amɛ lɛ: “Eji nyɛshwila moŋ kulɛ, nyɛhe bɛ esha.” Shi kɛlɛ, amɛkɛ tsuiwalɛ wie lolo akɛ amɛshwilako ni no hewɔ lɛ mumɔŋ hiŋmɛigbelemɔ ko he ehiaaa amɛ. No hewɔ lɛ Yesu kɛɛ amɛ akɛ: “Shi agbɛnɛ nyɛkɛɔ akɛ: Wɔmiina nii; no hewɔ lɛ nyɛhe esha lɛ eka nyɛhe.” Yohane 9:19-41.

▪ Mɛni hewɔ ni nuu nɛɛ ni be ko lɛ eji shwilafo lɛ fɔlɔi sheɔ gbeyei yɛ be mli ni atsɛ amɛ kɛba Farisifoi lɛ ahiɛ lɛ, no hewɔ lɛ mɛɛ gbɛ nɔ amɛkɛ nilee ha amɛ hetoo yɛ?

▪ Mɛɛ gbɛ nɔ Farisifoi lɛ tsɔ amɛbɔ mɔdɛŋ ni amɛwo nuu nɛɛ ni be ko lɛ eji shwilafo lɛ he gbeyei yɛ?

▪ Mɛɛ sanenaataomɔ ni nuu lɛ kɛha yɛ nilee mli ha Farisifoi lɛ amli fu waa?

▪ Mɛni hewɔ ni Farisifoi lɛ bɛ naajiemɔ ko yɛ shi ni amɛte amɛwo Yesu lɛ he lɛ?