Na Weku Shihilɛ Mli Ŋɔɔmɔ

Ani wekui baanyɛ ana miishɛɛ diɛŋtsɛ?

Te aaafee tɛŋŋ eba lɛ nakai lɛ?

Ani ole wekui komɛi ni efee ekome ni yɔɔ miishɛɛ tamɔ nɔ ni onaa yɛ dɛhiɛmɔ wolo nɛɛ mli lɛ? Wekui ni yɔɔ he fɛɛ he lɛ miifite. Gbalamlitsemɔ, nitsumɔ ni bɛ shweshweeshwe, fɔlɔ kome ni lɛɔ bii he naagbai, nijiaŋwujee—enɛɛmɛi fɛɛ kɛ nɔ ko bafataa naagba lɛ he. Mɔ ko ni le weku shihilɛ he saji jogbaŋŋ kɛ dɔlɛ wie akɛ: “Amrɔ nɛɛ, mɔ fɛɛ mɔ le nibii ni agbaa ni kɔɔ weku shihilɛ hiɛkpatamɔ he lɛ jogbaŋŋ.”

Mɛni hewɔ naagbai ni hiɛdɔɔ yɔɔ mli nɛkɛ baa wekui anɔ ŋmɛnɛ lɛ? Te wɔɔfee tɛŋŋ wɔna weku shihilɛ mli miishɛɛ?

Bɔ ni Fee ni Weku lɛ Je Shishi

Bɔni afee ni wɔha sanebimɔi nɛɛ ahetoo lɛ, ehe miihia ni wɔle gbalashihilɛ kɛ weku lɛ shishijee. Ejaakɛ kɛji akɛ enɛɛmɛi yɛ Shishijelɔ—Bɔlɔ lɛ—belɛ esa akɛ weku lɛ mli bii atao esɛɛ gbɛ kɛha gbɛtsɔɔmɔ, ejaakɛ lɛ ji mɔ ni baale gbɛ ni hi fe fɛɛ ni wɔɔtsɔ nɔ wɔna weku shihilɛ mli ŋɔɔmɔ kɛmɔ shi.

Nɔ ni yɔɔ miishɛɛ ji akɛ, mɛi pii heɔ yeɔ akɛ weku gbɛjianɔtoo lɛ bɛ Shishijelɔ ko. The Encyclopedia Americana lɛ kɛɔ akɛ: “Woloŋlelɔi komɛi sumɔɔ ni amɛtao gbalashihilɛ shishijee lɛ yɛ kooloi ni baa shi fe gbɔmɔ, ni anaa amɛ nuu kɛ yoo lɛ ateŋ.” Ni kɛlɛ, Yesu Kristo wie nuu kɛ yoo ni abɔ amɛ lɛ he. Etsɛ wiemɔ kɛjɛ mra mli Biblia niŋmaai amli akɛ ehewalɛ jɛɛhe ni ekɛɛ: “Nɔ ni Nyɔŋmɔ eŋɔtsa lɛ, akaha gbɔmɔ miigbala mli.”—Mateo 19:4-6.

No hewɔ lɛ Yesu Kristo sane lɛ ja. Nyɔŋmɔ ko ni yɔɔ nilee bɔ klɛŋklɛŋ gbɔmɛi lɛ ni eto weku shihilɛ ni miishɛɛ yɔɔ mli he gbɛjianɔ eha amɛ. Nyɔŋmɔ fee klɛŋklɛŋ gbɔmɛi enyɔ lɛ ekome yɛ gbalashihilɛ mli, ni ekɛɛ yɛ nuu lɛ he akɛ, “esa akɛ ekpɛtɛ eŋa he ni amɛtsɔ heloo kome.” (1 Mose 2:22-24, New World Translation) Ani eeenyɛ efee akɛ benɛ ŋmɛnɛŋmɛnɛ beaŋ weku mli naagbai lɛ jɛ shihilɛ mli nifeemɔi ni kuɔ tɛi ni Bɔlɔ lɛ kɛmamɔ shi yɛ e-Wiemɔ ni ji Biblia lɛ mli lɛ naa lɛ hewɔ?

Mɛɛ Gbɛ Haa Mɔ Yeɔ Omanye?

Taakɛ ŋwanejee ko bɛ he akɛ ole lɛ, ŋmɛnɛŋmɛnɛ je nɛɛ haa mɔ tsuɔ lɛ ekome ehiɛnɔkamɔi kɛ nibii ni eshweɔ ni ena lɛ ahe nii. Nuu ko ni kɛ shika fiɔ guɔyeli nitsumɔi asɛɛ kɛɛ nikaselɔi akuu ko ni gbeɔ kɔlegi naa yɛ U.S. Amerika lɛ akɛ: “Hiɛjoomɔ hi. Obaanyɛ ofee hiɛjoolɔ ni onu he yɛ nakai beaŋ nɔŋŋ akɛ ofee jogbaŋŋ.” Shi heloo gbɛfaŋ nibii asɛɛdii kɛ omanyeyeli baaa. Yɛ anɔkwale mli lɛ, heloonaa ninamɔ ji nibii wuji ni woɔ weku shihilɛ he gbeyei lɛ ateŋ ekome, ejaakɛ etsiɔ adesai atsakpaa gbɛ ni eheɔ gbɔmɛi abe kɛ amɛshika fɛɛ kɛjɛɔ amɛdɛŋ. Nɔ ni tamɔɔɔ enɛ lɛ, susumɔ bɔ ni Biblia mli abɛbuai enyɔ yeɔ buaa wɔ koni wɔna nɔ ni he hiaa kɛha miishɛɛnamɔ lɛ he okwɛ.

“Ehi akɛ okɛ gbɔmɛi ni osumɔɔ amɛ aaaye baaibaai fe ni oooye niyenii ni hi fe fɛɛ yɛ he ni hetsɛ yɔɔ.”

“Ehi akɛ oooye aboloo gbiŋ kɛ jwɛŋmɔŋ toiŋjɔlɛ fe okpɔlɔ ni aŋmɛ yɛ shia ni naagbai eyi mli obɔ mli.”

Abɛi 15:17; 17:1, “Today’s English Version.”

Wiemɔ ni mli wa nɛ, aloo jeee nakai? Eji weku fɛɛ weku kɛ ehe aaakpɛtɛ nibii ni he hiaa waa nɛɛ ahe kulɛ, susumɔ sɔrɔto ni je lɛ baafee he! Biblia lɛ hu kɛ gbɛtsɔɔmɔ ni sɛɛnamɔ babaoo yɔɔ he haa yɛ gbɛ ni esa akɛ weku lɛ mli bii kɛ amɛhe aye aha nɔ. Susumɔ gbɛtsɔɔmɔi ni ekɛhaa lɛ fioo pɛ he okwɛ.

Wumɛi: ‘Nyɛsumɔa nyɛŋamɛi tamɔ nyɛ diɛŋtsɛ nyɛhe.’—Efesobii 5:28-30.

Eyɛ kuku, shi anyɛɔ atsuɔ he nii jogbaŋŋ! Biblia lɛ hu kɛ famɔ haa wu lɛ akɛ ‘ekɛ woo aha eŋa.’ (1 Petro 3:7) Efeɔ enɛ kɛtsɔɔ ehe ni esusuɔ jogbaŋŋ, kɛ mlijɔlɛ, shishinumɔ, kɛ sane nɔmimaa nɔ. Wu lɛ jwɛŋɔ eŋa lɛ susumɔi ahe hu ni eboɔ lɛ toi. (Okɛto 1 Mose 21:12 he.) Ani okpɛlɛɛɛ nɔ akɛ kɛ wu lɛ susu eŋa lɛ he, taakɛ ebaasumɔ ni afee lɛ diɛŋtsɛ lɛ, ehe baaba sɛɛnamɔ aha weku fɛɛ weku?—Mateo 7:12.

Ŋamɛi: “Nyɛkɛ bulɛ ni mli kwɔ ahaa nyɛwumɛi.”—Efesobii 5:33, NW.

Ŋa lɛ haa weku miishɛɛ yaa hiɛ kɛtsɔɔ ewu lɛ ni eyeɔ ebuaa lɛ koni etsu egbɛnaa nii ni tsii lɛ ahe nii lɛ nɔ. Nɛkɛ ji bɔ ni ato ni eba lɛ, ejaakɛ Nyɔŋmɔ kɛ ŋa lɛ ha koni efee “yelikɛbualɔ kɛha lɛ, akɛ hefatalɔ ni sa lɛ.” (1 Mose 2:18, NW) Ani obaanyɛ osusu jɔɔmɔi ni baa weku shihilɛ nɔ beni ŋa lɛ jieɔ bulɛ kpo etsɔɔ ewu lɛ kɛtsɔɔ eyiŋkpɛi asɛɛfimɔ kɛ ekome ni ekɛ lɛ feɔ koni nine ashɛ otii ni weku lɛ kɛmamɔ amɛhiɛ lɛ nɔ lɛ he okwɛ?

Gbalashihilɛ Mli Hefatalɔi: “Esa akɛ wumɛi kɛ ŋamɛi aye amɛhe anɔkwale.”—Hebribii 13:4, TEV.

Kɛ amɛfee nakai lɛ, eka shi faŋŋ akɛ, ehe baa sɛɛnamɔ kɛhaa weku shihilɛ. Bei pii lɛ, gbalafitemɔ fiteɔ weku lɛ. (Abɛi 6:27-29, 32) No hewɔ lɛ Biblia lɛ woɔ hewalɛ yɛ nilee mli akɛ: “Okɛ oŋa ana miishɛɛ, ni ona miishɛɛ yɛ obalayoo ni okɛ lɛ bote gbalashihilɛ mli lɛ mli . . . Mɛni hewɔ esa akɛ okɛ osuɔmɔ aha yoo kroko?”—Abɛi 5:18-20, TEV.

Fɔlɔi: ‘Nyɛtsɔɔa nyɛbii lɛ gbɛ ni esa akɛ amɛtsɔ nɔ.’—Abɛi 22:6.

Kɛ fɔlɔi kɛ amɛbe kɛ kwɛmɔ ha amɛbii lɛ, eka shi faŋŋ akɛ weku lɛ shihilɛ baaya hiɛ. No hewɔ lɛ, Biblia lɛ woɔ fɔlɔi hewalɛ ni amɛkɛ shishitoo mlai kpakpai atsɔɔ amɛbii anii ‘beni amɛtara shi yɛ shia kɛ beni amɛnyiɛ gbɛ nɔ kɛ beni amɛkamɔ shi kɛ beni amɛte shi.’ (5 Mose 11:19) Biblia lɛ kɛɔ hu akɛ esa akɛ fɔlɔi atsɔɔ akɛ amɛsumɔɔ amɛbii lɛ kɛtsɔ amɛ tsɔsemɔ nɔ.—Efesobii 6:4.

Bii: “Nyɛ bii lɛ, nyɛboa nyɛfɔlɔi lɛ atoi yɛ Nuŋtsɔ lɛ mli.”—Efesobii 6:1.

Eji anɔkwale akɛ, ebɛ mlɛo yɛ be fɛɛ mli akɛ nyɛaabo nyɛfɔlɔi atoi yɛ jeŋ ni yeee mla nɔ nɛɛ mli. Ni kɛlɛ, ani nyɛkpɛlɛɛɛ nɔ akɛ nilee yɛ mli akɛ nyɛaafee nɔ ni weku lɛ Shishijelɔ lɛ kɛɔ wɔ lɛ? Ele nɔ ni hi fe fɛɛ ni aaaha wɔ weku shihilɛ afee nɔ ni miishɛɛ babaoo yɔɔ mli. No hewɔ lɛ bɔɔ mɔdɛŋ waa ni obo ofɔlɔi atoi. Tswaa ofai shi akɛ obaatsi ohe kɛjɛ je lɛŋ kaai sɔrɔtoi babaoo ni baaha ofee nɔ ni ehiii lɛ ahe.—Abɛi 1:10-19.

Bei abɔ ni weku lɛ mli bii lɛ ateŋ mɔ fɛɛ mɔ kɛ Biblia mli ŋaawoo lɛ tsuɔ nii lɛ, nakai nɔŋŋ eeefee sɛɛnamɔ kɛha weku shihilɛ. Jeee akɛ weku lɛ baana shihilɛ kpakpa bianɛ kɛkɛ, shi moŋ ebaana wɔsɛɛ be ni yɔɔ naakpɛɛ yɛ jeŋ hee ni Nyɔŋmɔ ewo shi yɛ he lɛ mli lɛ he gbɛkpamɔ. (2 Petro 3:13; Kpojiemɔ 21:3, 4) No hewɔ lɛ nyɛkɛfea nyɛweku lɛ su akɛ nyɛaakase Biblia lɛ kutuu! Wekui akpekpei abɔ ni yɔɔ shikpɔŋ muu lɛ fɛɛ nɔ lɛ ena akɛ gbɛtsɔɔmɔ ni akɛha yɛ wolo Nɔ Diɛŋtsɛ ni Kɛ Weku Miishɛɛ Baa kɛ emli mfonirii fɛfɛji babaoo lɛ mli lɛ yeɔ ebuaa waa diɛŋtsɛ.

Kɛ okadi ko etsɔɔɔ lɛ, belɛ Biblia mli ŋmalɛi ni atsɛ lɛ fɛɛ jɛ Ga Biblia lɛ mli.