Nikasemɔ 3

Namɔ Ji Yesu Kristo?

Mɛni hewɔ atsɛɔ Yesu akɛ Nyɔŋmɔ ‘kromɔ-Bi’ lɛ? (1)

Mɛni hewɔ atsɛɔ lɛ ‘Wiemɔ lɛ’? (1)

Mɛni hewɔ Yesu ba shikpɔŋ nɔ akɛ gbɔmɔ? (2-4)

Mɛni hewɔ efee naakpɛɛ nii? (5)

Mɛni Yesu baafee yɛ wɔsɛɛ be ni ebɛŋkɛ lɛ mli? (6)

1. Yesu hi ŋwɛi akɛ mumɔŋ gbɔmɔ dani eba shikpɔŋ nɔ. Lɛ ji Nyɔŋmɔ klɛŋklɛŋ nibɔɔ, ni no hewɔ lɛ atsɛɔ lɛ Nyɔŋmɔ ‘kromɔ-Bi.’ (Kol. 1:15; Kpoj. 3:14) Yesu ji Bi nuu kome pɛ ni Nyɔŋmɔ diɛŋtsɛ bɔ lɛ tɛɛ. Yehowa kɛ Yesu ni no mli lɛ ebatsɔko adesa lɛ tsu nii akɛ ‘enitsulɔ ŋaalɔ’ yɛ nibii krokomɛi fɛɛ ni ebɔ yɛ ŋwɛi kɛ shikpɔŋ nɔ lɛ mli. (Abɛi 8:22-31; Kol. 1:16, 17) Nyɔŋmɔ kɛ lɛ tsu nii hu akɛ E-naawielɔ ni fe fɛɛ. No hewɔ ni atsɛɔ Yesu akɛ ‘Wiemɔ lɛ.’—Yoh. 1:1-3; Kpoj. 19:13.

2. Nyɔŋmɔ tsu E-Bi lɛ kɛba shikpɔŋ nɔ kɛtsɔ ewala ni ekɛbawo Maria musuŋ lɛ nɔ. No hewɔ lɛ Yesu bɛ adesa tsɛ ko. No hewɔ ni enaaa esha loo emuu ni ayeee akɛ gboshinii lɛ. Nyɔŋmɔ tsu Yesu kɛba shikpɔŋ nɔ yɛ yiŋtoi etɛ ahewɔ: (1) Koni etsɔɔ wɔ Nyɔŋmɔ he anɔkwale lɛ (Yoh. 18:37), (2) koni ehiɛ emuuyeli ni yeɔ emuu mli, ni efee nɔkwɛmɔ nɔ efɔ shi eha wɔ ni wɔnyiɛ sɛɛ (1 Pet. 2:21), kɛ agbɛnɛ (3) koni ekɛ ewala asha afɔle ni ekɛha wɔye wɔhe kɛjɛ esha kɛ gbele mli. Mɛni hewɔ enɛ he hiaa?—Mat. 20:28.

3. Klɛŋklɛŋ gbɔmɔ, Adam, fee nɔ ni Biblia lɛ tsɛɔ no akɛ “esha” kɛtsɔ Nyɔŋmɔ kita nɔ toigbele nɔ. No hewɔ lɛ, Nyɔŋmɔ bu lɛ gbele fɔ. (1 Mose 3:17-19) Eshɛɛɛ Nyɔŋmɔ taomɔ nii ahe dɔŋŋ, no hewɔ lɛ eyeee emuu dɔŋŋ. Ebɔi gbɔɔ fiofio ni egbo. Adam kɛ esha hã ebii fɛɛ. No hewɔ ni wɔ hu wɔgbɔlɔɔ, wɔhe yeɔ, ni wɔgboiɔ lɛ. Te aaafee tɛŋŋ ahere adesai ayiwala?—Rom. 3:23; 5:12.

4. Yesu ji adesa ni eye emuu tamɔ Adam pɛpɛɛpɛ. Shi, akɛ mɔ ni tamɔɔɔ Adam lɛ, Yesu fee toiboo eha Nyɔŋmɔ yɛ gbɛ ni yeɔ emuu nɔ, yɛ kaa ni naa wa fe fɛɛ po mli. No hewɔ lɛ, ebaanyɛ ekɛ adesa wala ni yeɔ emuu ni eyɔɔ lɛ asha afɔle ni ekɛwo Adam esha lɛ he nyɔmɔ. Enɛ ji nɔ ni Biblia lɛ tsɛɔ lɛ “kpɔmɔ nɔ” lɛ. No hewɔ lɛ, abaanyɛ akpɔ̃ Adam bii kɛjɛ gbele fɔbuu mli. Abaanyɛ akɛ mɛi fɛɛ ni naa Yesu mli hemɔkɛyeli lɛ ahe eshai ake amɛ ni amɛna naanɔ wala.—1 Tim. 2:5, 6; Yoh. 3:16; Rom. 5:18, 19.

5. Beni Yesu yɔɔ shikpɔŋ nɔ lɛ etsa helatsɛmɛi, eha mɛi ni hɔmɔ yeɔ amɛ lɛ niyenii, ni eba ahum sɔrɔtoi ashi. Etee gbohii ashi po. Mɛni hewɔ efee naakpɛɛ nii? (1) Emusuŋ tsɔ lɛ yɛ mɛi ni naa nɔ̃ lɛ ahewɔ, ni eesumɔ ni eye ebua amɛ. (2) Enaakpɛɛ nii lɛ tsɔɔ akɛ Nyɔŋmɔ Bi ji lɛ. (3) Nomɛi tsɔɔ nɔ ni ebaafee eha adesai ni feɔ toiboo, beni eyeɔ nɔ akɛ Maŋtsɛ yɛ shikpɔŋ lɛ fɛɛ nɔ lɛ.—Mat. 14:14; Mar. 2:10-12; Yoh. 5:28, 29.

6. Yesu gbo ni Nyɔŋmɔ tee lɛ shi akɛ mumɔŋ bɔɔ nɔ̃, ni eku sɛɛ kɛtee ŋwɛi. (1 Pet. 3:18) Kɛjɛ no nɔ kɛbaa lɛ, Nyɔŋmɔ ewo lɛ Maŋtsɛ. Etsɛŋ ni Yesu baajie efɔŋ feemɔi kɛ nɔnaa fɛɛ kɛjɛ shikpɔŋ nɛɛ nɔ.—Lala 37:9-11; Abɛi 2:21, 22.

[Mfonirii ni yɔɔ baafa 7]

Nitsɔɔmɔ, naakpɛɛ nifeemɔi, kɛ ewala tete po ni ekɛha wɔ lɛ fata Yesu sɔɔmɔ nitsumɔ lɛ he