Namɔ Ji Yesu Kristo?

1. Te fee tɛŋŋ Yesu wala je shishi?

Yesu tamɔɔɔ adesa ko, ejaakɛ ehi ŋwɛi akɛ bɔfo dani afɔ lɛ yɛ shikpɔŋ lɛ nɔ. (Yohane 8:23) Yesu ji mɔ klɛŋklɛŋ ni Nyɔŋmɔ bɔ, ni eye ebua ni abɔ nibii krokomɛi fɛɛ. Lɛ pɛ Yehowa tsɔɔɔ mɔ ko nɔ ebɔɔɔ lɛ, ni no hewɔ eja gbɛ akɛ atsɛɔ lɛ Nyɔŋmɔ Bi “koome” lɛ. (Yohane 1:14) Yesu sɔmɔ akɛ Nyɔŋmɔ Naawielɔ, ni no hewɔ atsɛɔ lɛ hu akɛ “Wiemɔ lɛ.”​—Kanemɔ Abɛi 8:22, 23, 30; Kolosebii 1:15, 16.

2. Mɛni hewɔ Yesu ba shikpɔŋ lɛ nɔ?

Nyɔŋmɔ tsu e-Bi lɛ kɛba shikpɔŋ lɛ nɔ kɛtsɔ ewala ni ejie kɛje ŋwɛi kɛbawo Yudanyo oblayoo fro ko ni atsɛɔ lɛ Maria lɛ musuŋ lɛ nɔ. No hewɔ lɛ, Yesu bɛ adesa tsɛ ko. (Luka 1:30-35) Yesu ba shikpɔŋ lɛ nɔ (1) koni ebatsɔɔ mɛi Nyɔŋmɔ he anɔkwalei, (2) koni ebafee nɔkwɛmɔnɔ ehã wɔ akɛ wɔbaanyɛ wɔfee Nyɔŋmɔ suɔmɔnaa nii yɛ shihilɛi ni mli wawai po amli, kɛ agbɛnɛ hu (3) koni ekɛ ewala ni eye emuu lɛ ahã akɛ “kpɔmɔnɔ.”​—Kanemɔ Mateo 20:28.

3. Mɛni hewɔ kpɔmɔnɔ he hiaa wɔ lɛ?

Kpɔmɔnɔ ji nyɔmɔ ko ni awoɔ koni akɛhã mɔ ko ni ato akɛ abaagbe lɛ lɛ aye ehe. (2 Mose 21:29, 30) Gbele kɛ gbɔlɛ fataaa yiŋ ni Nyɔŋmɔ to kɛhã adesai lɛ he. Te wɔfeɔ tɛŋŋ wɔleɔ enɛ? Nyɔŋmɔ kɛɛ klɛŋklɛŋ adesa ni ji Adam akɛ, kɛ́ efee nɔ ni Biblia lɛ tsɛɔ lɛ “esha” lɛ, ebaagbo. No hewɔ lɛ, eji Adam efeee esha kulɛ, egboŋ kɔkɔɔkɔ. (1 Mose 2:16, 17; 5:5) Biblia lɛ tsɔɔ akɛ, Adam nɔ gbele “tsɔ” kɛba je lɛ mli. No hewɔ lɛ, Adam kɛ esha kɛ ehe nyɔmɔwoo ni ji gbele lɛ tsɛŋe eshwiei fɛɛ. Esa akɛ awo kpɔmɔnɔ koni akɛjie wɔ kɛje gbele ni Adam kɛtsɛŋe wɔ lɛ mli.​—Kanemɔ Romabii 5:12; 6:23.

Namɔ baanyɛ awo kpɔmɔnɔ lɛ koni ekɛjie wɔ kɛje gbele dɛŋ? Kɛ́ wɔgboi lɛ, wɔwo wɔ pɛ wɔhe eshai lɛ ahe nyɔmɔ. Adesa ko ni yeee emuu nyɛŋ awo mɛi krokomɛi ahe eshai ahe nyɔmɔ.​—Kanemɔ Lala 49:7-9.

4. Mɛni hewɔ Yesu gbo lɛ?

Wɔ lɛ wɔyeee emuu, shi Yesu yeɔ emuu. No hewɔ lɛ, ehe ehiaaa ni egbo yɛ ehe eshai ahewɔ​—efeee esha ko. Moŋ lɛ, Yesu gbo yɛ mɛi krokomɛi ahe eshai ahewɔ. Nyɔŋmɔ jie suɔmɔ ni nɔ bɛ kpo etsɔɔ adesai kɛtsɔ e-Bi lɛ ni etsu kɛba ni ebagbo ehã wɔ lɛ nɔ. Yesu hu jie suɔmɔ kpo etsɔɔ wɔ kɛtsɔ e-Tsɛ lɛ toi ni ebo kɛ ewala ni ekɛhã yɛ wɔhe eshai lɛ ahewɔ lɛ nɔ.​—Kanemɔ Yohane 3:16; Romabii 5:18, 19.

Kwɛmɔ vidio ni ji Mɛni Hewɔ Yesu Gbo?

5. Mɛni Yesu feɔ amrɔ nɛɛ?

Be ni Yesu yɔɔ shikpɔŋ lɛ nɔ lɛ, etsa helatsɛmɛi, etee gbohii ashi, ni ejie mɛi kɛje oshãrai amli. Ekɛ nakai feemɔ hã ana nɔ ni wɔsɛɛ lɛ ebaafee ehã adesai fɛɛ ni boɔ Nyɔŋmɔ toi lɛ. (Mateo 15:30, 31; Yohane 5:28) Be ni Yesu gbo lɛ, Nyɔŋmɔ tee lɛ shi kɛba wala mli kɛ mumɔŋ gbɔmɔtso. (1 Petro 3:18) No sɛɛ lɛ, Yesu mɛ yɛ Nyɔŋmɔ ninejurɔ nɔ kɛyashi Yehowa hã lɛ hegbɛ akɛ eye shikpɔŋ lɛ fɛɛ nɔ akɛ Maŋtsɛ. (Hebribii 10:12, 13) Amrɔ nɛɛ Yesu miiye nɔ akɛ Maŋtsɛ yɛ ŋwɛi, ni esɛɛnyiɛlɔi lɛ miitswa nakai sane kpakpa lɛ he adafi yɛ jeŋ fɛɛ.​—Kanemɔ Daniel 7:13, 14; Mateo 24:14.

Etsɛŋ, Yesu kɛ hegbɛ ni eyɔɔ akɛ Maŋtsɛ lɛ baatsu nii kɛfo piŋmɔi fɛɛ sɛɛ, ni ebaajie mɛi ni hãa mɛi piŋɔ lɛ. Mɛi fɛɛ ni boɔ Yesu toi kɛtsɔɔ akɛ amɛyɛ hemɔkɛyeli yɛ emli lɛ baaná wala yɛ paradeiso mli yɛ shikpɔŋ lɛ nɔ.​—Kanemɔ Lala 37:9-11.