Kpoomɔ Apasa Jamɔ!

Satan kɛ edaimonioi lɛ sumɔɔɔ ni osɔmɔɔ Nyɔŋmɔ. Amɛmiisumɔ ni amɛgbala mɔ fɛɛ mɔ kɛjɛ Nyɔŋmɔ he kɛ́ amɛaanyɛ. Mɛɛ gbɛ nɔ amɛbɔɔ nakai feemɔ he mɔdɛŋ yɛ? Gbɛ kome ji kɛtsɔ apasa jamɔ nɔ. (2 Korintobii 11:13-15) Jamɔ ko bafeɔ apasa kɛji akɛ etsɔɔɔ anɔkwale ni jɛ Biblia lɛ mli lɛ. Apasa jamɔ tamɔ shika ní ayeee​—ebaanyɛ etamɔ shika diɛŋtsɛ, shi ehiii haaa nɔ ko nɔ ko. Ebaanyɛ ekɛ haomɔi babaoo aba onɔ.

Nyɔŋmɔ jamɔ mli apasa nyɛŋ asa Yehowa, Nyɔŋmɔ anɔkwafo lɛ hiɛ kɔkɔɔkɔ. Beni Yesu yɔɔ shikpɔŋ nɔ lɛ, no mli lɛ jamɔ kuu ko yɛ ni miisumɔ ni amɛgbe lɛ. Amɛsusu akɛ amɛjamɔ gbɛ lɛ ji nɔ ni ja. Amɛkɛɛ akɛ: “Tsɛ kome wɔyɔɔ, lɛ ji Nyɔŋmɔ.” Ani Yesu kpɛlɛ nɔ? Dabi! Ekɛɛ amɛ akɛ: “Nyɛ lɛ nyɛtsɛ ni nyɛjɛ emli ji abonsam.” (Yohane 8:41, 44) Ŋmɛnɛ, mɛi pii susuɔ akɛ amɛmiijá Nyɔŋmɔ, shi amɛmiisɔmɔ Satan kɛ edaimonioi lɛ diɛŋtsɛ!—1 Korintobii 10:20.

Taakɛ bɔ ni tso gbonyo woɔ yibii fɔji lɛ, nakai apasa jamɔ woɔ gbɔmɛi ni feɔ nibii fɔji. Haomɔ eyi je lɛ mli obɔ yɛ nibii fɔji ni gbɔmɛi feɔ lɛ hewɔ. Jeŋba shara, nɔmɔ, juu, nɔnyɛɛ, awuiyeli, kɛ kabonaatoo yɛ. Mɛi ni feɔ nibii fɔji nɛɛ ateŋ mɛi babaoo yɛ jamɔ mli, shi amɛjamɔ lɛ kãnyaaa amɛ koni amɛfee nɔ ni hi. Amɛnyɛŋ amɛtsɔmɔ Nyɔŋmɔ nanemɛi ja amɛkpa nibii fɔji lɛ afeemɔ.—Mateo 7:17, 18.

Apasa jamɔ tsɔɔ gbɔmɛi ni amɛsɔle amɛha amagai. Nyɔŋmɔ kɛɔ akɛ wɔkasɔle wɔha amagai. Shishinumɔ yɛ enɛ mli. Ani obaasumɔ, kɛ́ mɔ ko kɛ bo ewieee shi mfoniri ni asha bo lɛ pɛ ekɛwieɔ? Ani nakai mɔ lɛ baanyɛ afee onaanyo diɛŋtsɛ? Dabi, enyɛŋ efee nakai. Yehowa miisumɔ ni gbɔmɛi kɛ lɛ awie, shi jeee amaga loo mfoniri, ni wala ko bɛ mli.—2 Mose 20:4, 5.

Apasa jamɔ tsɔɔ akɛ ehi akɛ aaagbe gbɔmɛi krokomɛi yɛ tawuu be mli. Yesu kɛɛ akɛ Nyɔŋmɔ nanemɛi lɛ baasumɔ amɛhe. Wɔgbeee gbɔmɛi ni wɔsumɔɔ amɛ lɛ. (Yohane 13:35) Ejaaa po akɛ wɔɔgbe gbɔmɛi fɔji. Beni Yesu henyɛlɔi lɛ ba koni amɛbamɔ lɛ lɛ, eŋmɛɛɛ ekaselɔi lɛ agbɛ ni amɛkɛ amɛ awuu koni amɛkɛbu ehe.​—Mateo 26:51, 52.

Apasa jamɔ tsɔɔ akɛ efɔŋfeelɔi lɛ baana amanehulu yɛ hɛl la mli. Ni kɛlɛ, Biblia lɛ tsɔɔ akɛ esha kɛ mɔ yaa gbele mli. (Romabii 6:23) Yehowa ji Nyɔŋmɔ ni yɔɔ suɔmɔ. Ani Nyɔŋmɔ ni yɔɔ suɔmɔ lɛ baapiŋ gbɔmɛi kɛya naanɔ? Dabi kwraa! Jamɔ kome pɛ baahi Paradeiso, nɔ ni Yehowa kpɛlɛɔ nɔ lɛ. (Kpojiemɔ 15:4) No mli lɛ jamɔi fɛɛ ni damɔ Satan amalei anɔ lɛ ehiŋ shi dɔŋŋ.