Maŋtsɛyeli Sane ni Ji 37

Shɛɛ Sane Kɛha Jeŋ Muu Lɛ Fɛɛ

Apasa Jamɔ Naagbee Ebɛŋkɛ!

▪ Mɛni ji apasa jamɔ?

▪ Mɛɛ gbɛ nɔ ebaatsɔ eba naagbee?

▪ Te ebaasa ohe eha tɛŋŋ?

Mɛni Ji Apasa Jamɔ?

Ani nibii fɔji ni afeɔ yɛ jamɔ gbɛi amli lɛ gbáa onaa? Ani ta, awuiyeli ni akɛtutuaa mɛi, kɛ juu-kɛ-fɔ̃ nifeemɔi ni mɛi ni tsɛɔ amɛhe Nyɔŋmɔ jálɔi lɛ kɛ amɛhe woɔ mli lɛ haoɔ bo? Mɛni hewɔ etamɔ nɔ ni naagbai babaoo ni yɔɔ lɛ jɛ jamɔi lɛ?

Jeee jamɔi fɛɛ esa akɛ ashwa, esa akɛ ashwa apasa jamɔ pɛ. Yesu Kristo ni ji mɔ ko ni abuɔ lɛ waa yɛ jamɔ mli lɛ tsɔɔ mli akɛ apasa jamɔ woɔ yibii gbohii tamɔ bɔ ni “tso fɔŋ woɔ yibii fɔ̃ji” lɛ. (Mateo 7:15-17) Mɛɛ yibii apasa jamɔ woɔ?

Apasa Jamɔ

◼ EKƐ EHE WOƆ TA KƐ MAŊKWRAMƆŊ SAJI AMLI: Adafitswaa wolo ni ji Asiaweek lɛ kɛɛ akɛ: “Yɛ Asia kɛ je lɛŋ hei krokomɛi lɛ, jamɔŋ hiɛnyiɛlɔi ni miitao nɔyeli hegbɛ babaoo lɛ tsɔɔ gbɛ fɔŋ nɔ amɛkɛ suɔmɔ ni mɛi yɔɔ kɛha Nyɔŋmɔjamɔ lɛ tsuɔ amɛ diɛŋtsɛ amɛhiamɔ nii ahe nii.” Enɛ hewɔ lɛ adafitswaa wolo lɛ bɔ kɔkɔ akɛ: “Je lɛ miihe aye sɛkɛ.” Jamɔŋ hiɛnyiɛlɔ ko ni ehe gbɛi yɛ United States lɛ jaje akɛ: “Kɛ́ nyɛmiitao ni mɔ gbee lɛ sɛɛ afo lɛ, no lɛ esa akɛ nyɛgbe mɛi ni kɛ awuiyeli tutuaa mɛi lɛ.” Mɛɛ ŋaawoo ekɛha yɛ enɛ he? “Nyɛgbea amɛ fɛɛ yɛ Nuŋtsɔ lɛ gbɛi amli.” Nɔ ni tamɔɔɔ nakai lɛ, Biblia lɛ kɛɔ akɛ: “Kɛji mɔ ko kɛɛ akɛ: Miisumɔ Nyɔŋmɔ, ni enyɛɔ lɛ diɛŋtsɛ enyɛmi lɛ, amalelɔ ji lɛ.” (1 Yohane 4:20) Yesu kɛɛ po akɛ: “Nyɛsumɔa nyɛhenyɛlɔi.” (Mateo 5:44) Jamɔi enyiɛ osusuɔ akɛ emlibii lɛ kɛ amɛhe woɔ ta mli?

◼ ETSƆƆ APASA TSƆƆMƆI: Jamɔi babaoo tsɔɔ akɛ susuma loo mumɔ lɛ ji nɔ ko ni anaaa ni yɔɔ gbɔmɔ mli, ní yaa nɔ ehiɔ shi yɛ gbele sɛɛ. Jamɔi nɛɛ babaoo tsɔɔ tsɔɔmɔ nɛɛ nɔ amɛyeɔ amɛjamɔ mli bii lɛ ahe nii, ni amɛheɔ amɛ shika koni amɛsɔle amɛha susumai ni efã yɛ mɛi ni egboi lɛ amli lɛ. Shi nɔ ni Biblia lɛ tsɔɔ lɛ yɛ srɔto. “Susuma ni feɔ esha lɛ, lɛ nɔŋŋ eeegbo!” (Ezekiel 18:4) “Hiɛkalɔi le akɛ amɛbaagboi; shi gbohii lɛ, amɛleee nɔ ko nɔ ko.” (Jajelɔ 9:5) Yesu tsɔɔ akɛ abaatee gbohii ashi—kɛ́ adesai yɛ susuma ni gbooo lɛ, no lɛ ehe ebahiaŋ ni atee gbohii ashi. (Yohane 11:11-25) Ani jamɔ mli ni oyɔɔ lɛ tsɔɔ akɛ susuma lɛ gbooo?

◼ EKPƐLƐƆ BƆLƐNAMƆ MLI JEŊBA SHARA NƆ: Jamɔi ni yɔɔ maji komɛi anɔ lɛ wóɔ hii ni kɛ hii náa bɔlɛ loo yei ni kɛ yei náa bɔlɛ lɛ osɔfoi, ni amɛwoɔ nɔyelii lɛ hewalɛ ní amɛkpɛlɛ nɔ yɛ mla naa koni hii kɛ hii loo yei kɛ yei abote gbalashihilɛ mli. Jamɔi ni ekpɛlɛɛɛ jeŋba shara nɔ po lɛ eŋmɛ gbɛ ni osɔfoi ní kɛ gbekɛbii ená bɔlɛ lɛ miiya nɔ amɛmiiye osɔfoi. Shi mɛni Biblia lɛ tsɔɔ yɛ enɛ he? Egbaa mli kpoo akɛ: “Nyɛkahaa alakaa nyɛ! Ajwamaŋbɔlɔi loo wɔŋjalɔi loo gbala mli kulɔi loo mɛi ni kɛ amɛ diɛŋtsɛ amɛheloo feɔ yakayaka nii loo hii ni kɛ hii feɔ yakayaka nii . . . anine shɛŋ Nyɔŋmɔ maŋtsɛyeli lɛ nɔ kwraa.” (1 Korintobii 6:9, 10) Ani ole jamɔi ni kpɛlɛɔ bɔlɛnamɔ mli jeŋba shaji anɔ?

Mɛni baaba jamɔi ni woɔ yibii fɔji lɛ anɔ? Yesu bɔ kɔkɔ akɛ: “Tso fɛɛ tso ni wooo yibii kpakpai lɛ, aaatoo lɛ, ni aŋɔ lɛ awo la mli.” (Mateo 7:19) Hɛɛ, Abaafo apasa jamɔ afɔ shi ní akpata ehiɛ! Shi mɛɛ be enɛ baaba mli, ni mɛɛ gbɛ nɔ ebaatsɔ eba? Ninaa ko ni ji gbalɛ ni aŋma yɛ Biblia lɛ mli, ni jeɔ kpo yɛ Kpojiemɔ yitso 17 kɛ 18 lɛ haa wɔ hetoo.

Mɛɛ Gbɛ nɔ Apasa Jamɔ Baatsɔ Eba Naagbee?

Feemɔ shihilɛ nɛɛ he mfoniri yɛ ojwɛŋmɔ mli okwɛ. Yoo ajwamaŋ ko ta kooloo ko ni he yɔɔ gbeyei nɔ. Kooloo lɛ yɛ yitsei kpawo kɛ akolontoi nyɔŋma. (Kpojiemɔ 17:1-4) Namɔ yoo ajwamaŋ lɛ damɔ shi kɛha? Eyɛ hewalɛ yɛ “shikpɔŋ lɛ nɔ maŋtsɛmɛi” lɛ anɔ. Ewo afaseo atade, ewo tsofa-kɛ-ŋma, ni eyɛ nii kpɔtɔɔ. Kɛfata he lɛ, ekɛ ekunyaayeli lɛ ‘shishiuɔ jeŋmaji lɛ fɛɛ.’ (Kpojiemɔ 17:18; 18:12, 13, 23) Biblia lɛ haa wɔleɔ akɛ yoo ajwamaŋ nɛɛ ji jeŋ muu fɛɛ jamɔ gbɛjianɔtoo ko. Edamɔɔɔ shi kɛhaaa jamɔ pɔtɛɛ ko, shi moŋ edamɔ shi kɛha jamɔi fɛɛ ni woɔ yibii fɔji lɛ.

Kooloo ni yoo ajwamaŋ lɛ ta enɔ lɛ damɔ shi kɛha je lɛŋ maŋkwramɔŋ nɔyelɔi lɛ.a (Kpojiemɔ 17:10-13) Apasa jamɔ ta maŋkwramɔŋ kooloo nɛɛ nɔ, ni ebɔɔ mɔdɛŋ koni ená eyiŋkpɛi anɔ hewalɛ ní ekudɔ enifeemɔi.

Shi etsɛŋ ni nifeemɔ ko ni yɔɔ naakpɛɛ baaba. “Akolontoi nyɔŋma ni ona lɛ, kɛ kooloo lɛ, amɛaanyɛ ajwamaŋ lɛ, ni amɛaafee lɛ amaŋfɔ, ni amɛaaŋmɛ lɛ yayai, ni amɛaaye eheloo, ni amɛkɛ la aaashã lɛ.” (Kpojiemɔ 17:16) Je lɛŋ maŋkwramɔŋ nɔyelɔi lɛ baatutua apasa jamɔ trukaa yɛ naakpɛɛ gbɛ nɔ, ni amɛbaakpata ehiɛ kwraa! Mɛni baaha amɛfee enɛ? Biblia mli wolo ni ji Kpojiemɔ lɛ haa hetoo akɛ: ‘Nyɔŋmɔ kɛwo amɛtsuiiaŋ koni amɛfee eyiŋtoo nii.’ (Kpojiemɔ 17:17) Hɛɛ, Nyɔŋmɔ baakojo apasa jamɔ yɛ nibii gbohii fɛɛ ni efee yɛ Nyɔŋmɔ gbɛi amli lɛ hewɔ. Ebaatsɔ ejalɛsaneyeli ni tɔmɔ ko kwraa bɛ he lɛ nɔ ekɛ maŋkwramɔŋ nɔyelɔi ni ji apasa jamɔ hemɛi lɛ atsu nii kɛkpata apasa jamɔ hiɛ.

Kɛ́ osumɔɔɔ akɛ oshara ni baaba apasa jamɔ nɔ lɛ eko baa onɔ lɛ, mɛni esa akɛ ofee? Nyɔŋmɔ bɔfo lɛ woɔ hewalɛ akɛ: “Nyɛjea emli, mimaŋ.” (Kpojiemɔ 18:4) Hɛɛ, amrɔ nɛɛ ji be ni esa akɛ aje apasa jamɔ mli! Shi nɛgbɛ obaanyɛ ojo foi kɛya? Kaayafata mɛi ni kɛɔ akɛ Nyɔŋmɔ bɛ lɛ ahe, ejaakɛ amɛhu amɛbɛ hiɛnɔkamɔ. (2 Tesalonikabii 1:6-9) Anɔkwa jamɔ mli pɛ obaanyɛ oyaba abo yɛ. Mɛɛ gbɛ nɔ obaanyɛ otsɔ oyɔse anɔkwale jamɔ lɛ?

Bɔ ni Aaafee Ayɔse Anɔkwa Jamɔ

Mɛɛ yibii kpakpai esa akɛ anɔkwa jamɔ awo?—Mateo 7:17.

Anɔkwa Jamɔ

◼ AMƐYƐ SUƆMƆ: Anɔkwa jálɔi ‘jɛɛɛ je lɛ mli,’ ni amɛmaŋ kusum loo weku mli ni amɛjɛ gbalaaa amɛmli, ni ‘amɛsumɔɔ amɛhe.’ (Yohane 13:35; 17:16; Bɔfoi lɛ Asaji 10:34, 35) Yɛ nɔ najiaŋ ni amɛaagbegbee amɛhe lɛ, amɛkɛ amɛwala fɔ̃ɔ shi haa amɛhe.—1 Yohane 3:16.

◼ AMƐKƐ AMƐHE FƆ̃Ɔ NYƆŊMƆ WIEMƆ LƐ NƆ: Yɛ nɔ najiaŋ ni anɔkwa jamɔ aaatsɔɔ ‘blema saji’ kɛ “tsɔɔmɔi ni ji gbɔmɛi akitãi” lɛ, amɛhaa amɛtsɔɔmɔi lɛ damɔɔ Nyɔŋmɔ Wiemɔ ni ji Biblia lɛ nɔ. (Mateo 15:6-9) Mɛni hewɔ? Ejaakɛ “ŋmalɛ fɛɛ ŋmalɛ ni jɛ Nyɔŋmɔ Mumɔ lɛŋ lɛ ehi ha nitsɔɔmɔ kɛ hiɛkamɔ kɛ mɔsaamɔ.”—2 Timoteo 3:16.

◼ AMƐWAJEƆ WEKUI NI AMƐKƐ JEŊBA HE MLAI NI NƆ KWƆLƆ TSUƆ NII: Anɔkwa jamɔ tsɔseɔ wumɛi koni ‘amɛsumɔ amɛ diɛŋtsɛ amɛŋamɛi tamɔ amɛ diɛŋtsɛ amɛgbɔmɔtsei,’ eyeɔ buaa ŋamɛi koni ‘amɛshe amɛwumɛi,’ ni etsɔɔ gbekɛbii hu koni ‘amɛbo amɛfɔlɔi atoi.’ (Efesobii 5:28, 33; 6:1) Kɛfata he lɛ, mɛi ni akɛ sɔɔmɔ hegbɛi woɔ amɛdɛŋ lɛ ji mɛi ni jieɔ jeŋbai kpakpai akpo.—1 Timoteo 3:1-10.

Ani jamɔ ko shɛɔ taomɔ nii nɛɛ ahe? Wolo ni ji Holocaust Politics ni akala yɛ afi 2001 lɛ kɛɔ akɛ: “Eji mɛi pii kɛ nɔ ni Yehowa Odasefoi lɛ tsɔɔ ní amɛbaa amɛjeŋ yɛ naa lɛ tsu nii kulɛ, Nazibii lɛ kpataŋ Yudafoi babaoo ahiɛ, ni abuleŋ wekui ashishi yɛ je lɛŋ dɔŋŋ.”

Yɛ anɔkwale mli lɛ, Yehowa Odasefoi miishiɛ jeŋba he shishitoo mlai ni yɔɔ Biblia lɛ mli lɛ yɛ shikpɔji 235 nɔ—ni amɛbaa amɛjeŋ hu yɛ nɔ ni amɛshiɛɔ lɛ naa. Wɔmiiwo bo hewalɛ ní obi Yehowa Odasefoi lɛ ni amɛye amɛbua bo ní okase nɔ ni Nyɔŋmɔ taoɔ yɛ odɛŋ, koni onyɛ ojá lɛ yɛ gbɛ ni etaoɔ lɛ nɔ. Ehe miihia ni otsu he nii bianɛ. Kaashashao shi. Apasa jamɔ naagbee ebɛŋkɛ!—Zefania 2:2, 3.

Kɛ́ ootao ole babaoo yɛ Biblia mli shɛɛ sane ni Yehowa Odasefoi lɛ shiɛɔ lɛ he lɛ, no lɛ tsɔ adrɛs ni yɔɔ shishigbɛ lɛ nɔ oŋma amɛ.

□ Nyɛmajea mi wolo bibioo ni ji Nyɛyaa nɔ Nyɛshia Kpe! lɛ eko, ní ekɛmajemɔ he sɔ̃ ko kãaa minɔ.

□ Nyɛfainɛ nyɛkɛ mi abafea shia Biblia mli nikasemɔ ni aheee nɔ ko.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 3]

Apasa jamɔ yɛ hewalɛ yɛ “shikpɔŋ lɛ nɔ maŋtsɛmɛi” lɛ anɔ

[Wiemɔ ni akɔ ni akɛmiitsu nii ni yɔɔ baafa 3]

“Nyɛjea emli, mimaŋ”