‘Nyɛkwɛa Bɔ ni Nyɛboɔ Sane Toi lɛ Jogbaŋŋ’

SANE toiboo ji nikasemɔ mli oti ko ni he hiaa. Ebaanyɛ ená mɔ ko gbɛkpamɔi kɛha yibaamɔ lɛ nɔ hewalɛ hu. Beni Yehowa toɔ gbɛjianɔ koni ejie ewebii lɛ kɛjɛ Mizraim nyɔŋyeli mli lɛ, ekɛ famɔi ha Mose koni ekɛɛ Israel hii onukpai lɛ nɔ ni esa akɛ amɛfee bɔni afee ni amɛ́baa amɛ kromɔ bii lɛ ayi kɛjɛ bɔfo ni kpataa nii ahiɛ lɛ dɛŋ. (2 Mose 12:21-23) No sɛɛ lɛ, hii onukpai lɛ ŋɔ sane nɛɛ kɛtee shia fɛɛ shia mli. Akɛ naabu fee enɛ. Esa akɛ gbɔmɛi lɛ abo toi jogbaŋŋ. Te amɛfee amɛnii yɛ he amɛha tɛŋŋ? Biblia lɛ bɔɔ amaniɛ akɛ: “Israelbii lɛ fɛɛ fee nakai, bɔ ni Yehowa wo Mose kɛ Aaron kita lɛ, nakai amɛfee.” (2 Mose 12:28, 50, 51) Nɔ ni jɛ mli ba ji akɛ, Israelbii lɛ ná kpɔmɔ ni yɔɔ naakpɛɛ mli niiashikpamɔ.

Ŋmɛnɛ, Yehowa miisaa wɔ kɛmiiha kpɔmɔ wulu ko. Eka shi faŋŋ akɛ, ebiɔ ni wɔbo gbɛtsɔɔmɔ ni ekɛhaa lɛ toi jogbaŋŋ. Akɛ nakai gbɛtsɔɔmɔi lɛ haa yɛ asafoŋ kpeei ashishi. Ani ooná nakai henaabuamɔi lɛ ahe sɛɛ kɛmiimɔ shi? Babaoo damɔ bɔ ni oboɔ sane toi jogbaŋŋ lɛ nɔ.

Ani okaiɔ tsɔsemɔ mli otii ni akɛha yɛ kpeei lɛ ashishi? Ani okɛfeɔ osu akɛ obaatao gbɛ̀i ni okɛ tsɔsemɔ ni onine shɛɔ nɔ lɛ aaatsu nii otsi fɛɛ otsi yɛ bo diɛŋtsɛ oshihilɛ mli loo obaagba mɛi krokomɛi?

Saamɔ Otsui

Ehe miihia ni wɔsaa wɔtsui bɔni afee ni wɔná tsɔsemɔ ni akɛhaa yɛ Kristofoi akpeei lɛ ashishi lɛ he sɛɛ. Ama bɔ ni ehe hiaa ni wɔfee enɛ lɛ nɔ mi yɛ nɔ ni ba yɛ Yuda Maŋtsɛ Yehoshafat nɔyeli beaŋ lɛ mli. Yehoshafat kɛ ekãa mɔ anɔkwa jamɔ mli. “Ejie hei grɔŋŋi lɛ ni egbà wɔŋ kooi lɛ yɛ Yuda,” ni ekɛ nitsumɔ wo lumɛi, Levibii, kɛ osɔfoi komɛi adɛŋ koni amɛtsɔɔ gbɔmɛi ni yɔɔ Yuda maji lɛ fɛɛ mli lɛ Yehowa Mla lɛ. Shi kɛlɛ, “hei grɔŋŋi lɛ ajieee.” (2 Kron. 17:6-9; 20:33) Apasa nyɔŋmɔi ajamɔ kɛ Yehowa jamɔ nifeemɔ ni aŋmɛɛɛ gbɛ ní afeɔ yɛ wɔŋjalɔi ahei grɔŋŋi lɛ hé shi aahu akɛ ajieee fɛɛ kɛmɔɔɔ shi.

Mɛni hewɔ tsɔsemɔ he gbɛjianɔ ni Yehoshafat to lɛ náaa mɛi lɛ anɔ hewalɛ daa lɛ? Nɔ ni aŋma afɔ̃ shi lɛ tsaa nɔ akɛ: “Maŋ lɛ eŋɔko amɛtsui amɛhako amɛtsɛmɛi a-Nyɔŋmɔ lɛ.” Amɛnu shi amɛkɛtsuuu nii. Ekolɛ amɛnu he akɛ gbɛ ni amɛaafã kɛya sɔlemɔwe ni yɔɔ Yerusalem lɛ ní amɛyashã afɔlei lɛ ehiii haaa amɛ. Bɔ fɛɛ bɔ ni fee lɛ, hemɔkɛyeli tsirɛɛɛ amɛtsuii.

Esa akɛ wɔsaa wɔtsuii kɛbo tsɔsemɔi ni Yehowa kɛhaa ŋmɛnɛ lɛ toi bɔni afee ni wɔkakpalaŋ kɛmiiya Satan je lɛŋ gbɛ̀i lɛ anɔ. Mɛɛ gbɛ nɔ? Gbɛ kome ni he hiaa ji kɛtsɔ sɔlemɔ nɔ. Esa akɛ wɔsɔle ni wɔkɛ shidaa mumɔ akpɛlɛ ŋwɛi tsɔsemɔ nɔ. (Lala 27:4; 95:2) Enɛ baaye abua wɔ koni wɔhiɛ asɔ wɔnyɛmimɛi ní eyɛ mli akɛ amɛyeee emuu moŋ, shi amɛkɛ amɛhe haa koni Yehowa kɛ amɛ atsu nii kɛtsɔɔ ewebii anii lɛ amɔdɛŋbɔi lɛ. Enɛ baatsirɛ wɔ koni wɔda Yehowa shi, jeee kɛha nibii heei ni wɔkaseɔ lɛ pɛ kɛkɛ, shi moŋ kɛha hegbɛ ní wɔná akɛ wɔɔha hiɛsɔɔ ni wɔyɔɔ yɛ saji ni wɔkase momo lɛ ahe lɛ mli akwɔ lɛ hewɔ. Akɛni wɔmiisumɔ ni wɔfee Nyɔŋmɔ suɔmɔnaa nii kɛmɔ shi hewɔ lɛ, wɔsɔleɔ akɛ: “Yehowa, tsɔɔmɔ mi ogbɛ lɛ, . . . feemɔ mitsui ekome, ní mashe ogbɛi lɛ gbeyei!”—Lala 86:11.

Ha Ohiɛ Ahi Ohe Nɔ

Gbɛtsii nibii babaoo yɛ sane toi ní wɔɔbo jogbaŋŋ lɛ mli. Wɔjwɛŋmɔi lɛ baanyɛ ayi obɔ kɛ yeyeeyefeemɔi. Hoofeemɔ kɛ mɛi ni yaa kɛ baa yɛ toibolɔi lɛ ateŋ loo yɛ kpeehe lɛ baanyɛ agbala wɔjwɛŋmɔ. Gbɔmɔtsoŋ piŋmɔ baanyɛ aha ewa kɛha wɔ akɛ wɔkɛ wɔjwɛŋmɔ aaama nii anɔ. Bei pii lɛ, mɛi ni hiɛ bii bibii lɛ naa akɛ amɛjwɛŋmɔ nyɛɛɛ ahi nɔ ni afeɔ lɛ nɔ. Mɛni baanyɛ aye ebua wɔ koni wɔha wɔjwɛŋmɔ anyiɛ nifeemɔ ni yaa nɔ lɛ sɛɛ?

Hiŋmɛii lɛ náa nɔ ni wɔgbalaa wɔjwɛŋmɔ kɛyaa nɔ lɛ nɔ hewalɛ waa. Okɛ ohiŋmɛii atsu nii ni okɛgbala ojwɛŋmɔ oma nii anɔ kɛtsɔ wielɔ lɛ ni oooya nɔ okwɛ lɛ lɛ nɔ. Kɛ etsĩ Biblia ŋmalɛ ko tã—nɔ ni ole jogbaŋŋ po—lɛ, gbelemɔ ní onyiɛ sɛɛ beni ekaneɔ lɛ. Kwa ohiɛ ni ooofɔ̃ kɛya gbɛɛmɔ fɛɛ gbɛɛmɔ loo nɔ fɛɛ nɔ ni tsiɔ ehe ni oookwɛ lɛ he. Kɛ́ ohiŋmɛii kɛ nibii babaoo ni gbalaa mɔ jwɛŋmɔ lɛ miiwo ojwɛŋmɔ mli lɛ, no lɛ nibii ní awieɔ yɛ wiemɔ kpoku lɛ nɔ lɛ amli babaoo baaŋmɛɛ bo.

Kɛ́ “ŋkɔmɔyeli” ko ha ewa kɛha bo akɛ okɛ ojwɛŋmɔ aaanyiɛ nifeemɔ lɛ sɛɛ lɛ, sɔlemɔ ni Yehowa aha bo jwɛŋmɔŋ kɛ tsui mli toiŋjɔlɛ ni he hiaa lɛ koni okɛbo sane lɛ toi. (Lala 94:19; Fil. 4:6, 7) Kɛ eeehi lɛ, feemɔ enɛ shii abɔ. (Mat. 7:7, 8) Asafoŋ kpeei lɛ ji gbɛjianɔ ni Yehowa eto. Obaanyɛ oná nɔmimaa akɛ eesumɔ ni oná amɛhe sɛɛ.—1 Yoh. 5:14, 15.

Wiemɔi Atoiboo

Eka shi faŋŋ akɛ obaanyɛ okai otii komɛi ni onyaa he waa ni onu yɛ wiemɔi komɛi amli lɛ. Shi kɛlɛ, wiemɔ toiboo biɔ babaoo fe otii ni sa kadimɔ ni aaakai kɛkɛ. Wiemɔ hamɔ tamɔ gbɛfaa. Eyɛ mli akɛ nibii ni yɔɔ miishɛɛ yɛ ni obaana yɛ gbɛ lɛ nɔ moŋ, shi oti titri lɛ ji he ni oyaa lɛ. Ekolɛ wielɔ lɛ miibɔ mɔdɛŋ koni eha toibolɔi lɛ amu saji komɛi anaa loo ebaatsirɛ amɛ ni amɛfee nɔ ko.

Susumɔ wiemɔ ni Yoshua kɛ Israel maŋ lɛ wie ni aŋma yɛ Yoshua 24:1-15 lɛ he okwɛ. Oti ni ma ehiɛ ji ni etsirɛ gbɔmɛi lɛ koni amɛfi shi shiŋŋ kɛha anɔkwa jamɔ kɛtsɔ amɛhe ni amɛaatsi kwraa kɛjɛ maji ni ebɔle amɛhe lɛ amaga jamɔ lɛ he lɛ nɔ. Mɛni hewɔ enɛ he hiaa waa nakai lɛ? Apasa jamɔ ni egbɛ eshwã lɛ miiwo maŋ lɛ shidaamɔ kpakpa yɛ Yehowa hiɛ lɛ he gbeyei waa. Gbɔmɛi lɛ here Yoshua faikpamɔ lɛ nɔ ni amɛkɛɛ: “Enɛ akagbale wɔ fɔ̃ɔŋfɔ̃ akɛ wɔɔshi Yehowa, ní wɔyasɔmɔ nyɔŋmɔi krokomɛi! . . . Wɔɔsɔmɔ Yehowa!” Ni amɛfee nakai!—Yosh. 24:16, 18, 31.

Yɛ be mli ni oboɔ wiemɔ ko toi lɛ, bɔɔ mɔdɛŋ ni oyɔse oti ni yɔɔ sɛɛ lɛ. Susumɔ bɔ ni otii ni wielɔ lɛ kɛtsuɔ nii lɛ yeɔ ebuaa ni wɔshɛ nakai oti lɛ he lɛ he. Bi ohe nɔ ni saji lɛ biɔ ni ofee.

Sane Toiboo Beni Sanegbaai Yaa Nɔ

Atsuɔ Buu-Mɔɔ Nikasemɔ, Asafo Woloŋ Nikasemɔ, kɛ Sɔɔmɔ Kpee lɛ fãi komɛi ahe nii ákɛ sanebimɔ kɛ hetoo sanegbaa ni damɔ saji ní aŋmala, ni jɛ Biblia lɛ mli lɛ nɔ.

Yɛ gbɛ̀i komɛi anɔ lɛ, sane toi ni aboɔ beni agbaa sane lɛ tamɔ he ni akɛwoɔ sanegbaa ko mli. Bó toi jogbaŋŋ bɔni afee ni oná he sɛɛ jogbaŋŋ kɛmɔ shi. Yɔsemɔ bɔ ni sanegbaa lɛ yaa nɔ ehaa. Kadimɔ bɔ ni nɔkwɛlɔ lɛ maa saneyitso lɛ kɛ saji otii lɛ anɔ mi lɛ. Ha esanebimɔi lɛ ahetoo yɛ ojwɛŋmɔ mli. Bó toi beni mɛi krokomɛi gbálaa mli lɛ, ní amɛkɛ sane lɛ toɔ nii ahe lɛ. Bɔ ni obaakwɛ sane lɛ oha yɛ bɔ ni mɛi krokomɛi susuɔ he amɛhaa lɛ baanyɛ aha oná nilee hee yɛ saneyitso ko ni ole momo lɛ he. Okɛ ohe awo nifeemɔ lɛ mli kɛtsɔ ohemɔkɛyeli lɛ ni ooojaje otsɔɔ lɛ nɔ.—Rom. 1:12.

Saji ni akɛha ni oookase kɛaatsɔ hiɛ lɛ baaye abua bo koni okɛ ohe awo sanegbaa lɛ mli vii, ni ebaaha onyiɛ hetoo ni mɛi krokomɛi kɛhaa lɛ sɛɛ. Kɛ́ oshihilɛi haa ewaa kɛhaa bo akɛ oookase nifeemɔ lɛ jogbaŋŋ lɛ, no lɛ kɛ́ hoo lɛ, ŋɔɔ minitii fioo pɛ ní okɛle sane muu lɛ fɛɛ dani kpee be lɛ ashɛ. Nakai ni ooofee lɛ baaha onyɛ oná sanegbaa lɛ he sɛɛ kɛmɔ shi.

Toiboo ni Aaafee yɛ Kpeei Bibii kɛ Kpeei Wuji Ashishi

Nibii babaoo yɛ ni gbalaa wɔjwɛŋmɔ yɛ kpeei bibii kɛ kpeei wuji ashishi fe asafoŋ kpeei ashishi. Enɛ baanyɛ aha sane toiboo afee nɔ ni wa waa. Mɛni baanyɛ aye abua wɔ?

Nɔ ni he hiaa waa ji ni wɔnyɛ wɔwɔ̀ jogbaŋŋ gbɛkɛ. Dani gbɛjianɔtoo lɛ baaje shishi lɛ, ha gbi fɛɛ gbi saneyitso lɛ ahi ojwɛŋmɔ mli. Kwɛmɔ wiemɔ fɛɛ wiemɔ yitso, ni obɔ mɔdɛŋ akɛ obaanyɛ oná susumɔ ko yɛ wiemɔ ni abaaha lɛ he lo. Okɛ o-Biblia lɛ atsu nii jogbaŋŋ. Mɛi babaoo ena akɛ kɛ amɛŋmala saji otii fioo lɛ, eyeɔ ebuaa amɛ ni amɛjwɛŋmɔ hiɔ gbɛjianɔtoo lɛ nɔ. Ŋmalamɔ saji komɛi ni okpɛ oyiŋ akɛ okɛbaatsu nii yɛ oshihilɛ kɛ sɔɔmɔ lɛ mli lɛ oshwie shi. Okɛ mɛi agba otii fioo ahe sane beni nyɛshiɔ kpee lɛ shishi loo nyɛyaa jɛmɛ lɛ. Enɛ baaha saji lɛ aka ojwɛŋmɔŋ.

Gbekɛbii ni Atsɔɔ Amɛ Koni Amɛbo Toi

Fɔlɔi ni ji Kristofoi baanyɛ aye abua amɛbii lɛ—abifabii po—koni amɛha ‘amɛle nii kɛya yiwalaheremɔ mli’ kɛtsɔ asafoŋ kpeei, kpeei bibii, kɛ kpeei wuji ni amɛkɛ amɛ baaya lɛ nɔ. (2 Tim. 3:15) Akɛni esoro gbekɛ fɛɛ gbekɛ nifeemɔ kɛ be ni ekɛboɔ wiemɔi atoi lɛ sɛɛkɛlɛ hewɔ lɛ, sɛɛyoomɔ he miihia koni akɛye abua amɛ ni amɛle bɔ ni aboɔ sane toi jogbaŋŋ. Ekolɛ, obaana akɛ ŋaawoi ni nyiɛ sɛɛ lɛ yeɔ ebuaa.

Kɛ́ nyɛyɛ shia lɛ, too gbɛjianɔ koni obii bibii lɛ atara shi diŋŋ ní amɛtsɔɔ wɔ Kristofoi awoji lɛ amli mfonirii lɛ amli loo amɛkwɛ. Kɛ́ nyɛtee kpeei ashishi lɛ, okɛ shwɛmɔnii akaha gbekɛbii lɛ akɛ amɛkɛshwɛ koni amɛkagba mɔ naa. Taakɛ eji yɛ blema Israel lɛ, nakai nɔŋŋ ŋmɛnɛ, gbekɛbii yaa kpeei lɛ “koni amɛnu, ni amɛkase.” (5 Mose 31:12) Yɛ he ni eeehi lɛ, fɔlɔi komɛi kɛ woji ni akaseɔ lɛ eko haa gbekɛbii ni darako kwraa lɛ po. Yɛ be mli ni gbekɛbii lɛ daraa lɛ, ye obua amɛ ni amɛkɛ amɛhe awo gbɛjianɔtoi ni biɔ ni toibolɔi kɛ amɛhe awo mli lɛ mli.

Ŋmalɛi lɛ jieɔ tsakpaa ní bɛŋkɛ kpaakpa ni yɔɔ Yehowa wiemɔ toi ní wɔɔbo kɛ toiboo ni wɔɔfee wɔha lɛ lɛ mli lɛ kpo. Abaanyɛ ana enɛ yɛ Mose wiemɔi ni ekɛ Israel maŋ lɛ wie lɛ mli: “Mikɛ wala kɛ gbele, jɔɔmɔ kɛ loomɔ eshwie nyɛhiɛ; no hewɔ lɛ kɔ wala, . . . ní osumɔ Yehowa, o-Nyɔŋmɔ lɛ, ni obo egbee toi, ni okɛ ohe akpɛtɛ ehe.” (5 Mose 30:19, 20, wɔma efã ko nɔ mi.) Ŋmɛnɛ, toiboo ni wɔɔfee wɔha tsɔsemɔ ni Yehowa kɛhaa kɛ toiboo mli ni wɔɔjɛ ni wɔkɛtsu nii yɛ wɔshihilɛi amli lɛ he miihia koni wɔkɛná Nyɔŋmɔ nɔkpɛlɛmɔ kɛ naanɔ wala he jɔɔmɔi. Belɛ, kwɛmɔ bɔ ni ehe hiaa akɛ wɔbo Yesu ŋaawoo nɛɛ toi akɛ: ‘Nyɛkwɛa bɔ ni nyɛboɔ sane toi lɛ jogbaŋŋ’!—Luka 8:18.