Bɔ ni Ogbee Yɔɔ lɛ ni Okɛaawie

NÍ OKƐ bɔ ni ogbee yɔɔ lɛ aaatsu nii yɛ adebɔɔ su naa lɛ ji shishijee su ko ni yeɔ ebuaa bo koni mɛi krokomɛi aná omli hekɛnɔfɔɔ. Ani okɛ ohiɛ baafɔ̃ nɔ ko ni mɔ ko ni kɛ kakamotobi ebu ehiɛ lɛ kɛɛ lɛ nɔ? Ani obaaná hekɛnɔfɔɔ babaoo kɛji kakamotobi lɛ hiɛ yɛ fɛo fe wielɔ lɛ diɛŋtsɛ hiɛ? Dabida. No hewɔ lɛ, yɛ nɔ najiaŋ ní oootsake ohiɛ lɛ, jiemɔ bɔ ni oji lɛ kpo.

Esaaa akɛ akɛ bɔ ni aaawie yɛ bɔɔsu naa lɛ futuɔ anyagbafeemɔ. Wiemɔ he mla ní ejaaa, wiemɔi atsɛmɔ ní ejaaa, kɛ wiemɔ ni mli tseee lɛ esaaa. Esa akɛ atsi he kɛjɛ yakayaka wiemɔi ahe. Wɔmiisumɔ ni wɔhiɛ bulɛ ni sa mli be fɛɛ be, yɛ wɔwiemɔi kɛ wɔnifeemɔi fɛɛ mli. Mɔ ni jieɔ nakai bɔɔsu ni akɛwieɔ lɛ kpo lɛ efeee fe nine, ni ebɔɔɔ mɔdɛŋ fe nine akɛ eeesa mɛi krokomɛi ahiɛ.

Yɛ Shiɛmɔ Nitsumɔ lɛ Mli. Kɛ́ otee shia ko mli loo otsi obɛŋkɛ mɔ ko yɛ maŋ lɛ mli kɛ yiŋtoo akɛ oyaaye lɛ odase lɛ, ani otsui faa? Wɔteŋ mɛi babaoo feɔ nakai, shi kɛha mɛi komɛi lɛ, henumɔ lɛ nyɛɔ etsɛɔ babaoo fe mɛi komɛi anɔ. Nɔnyɛɛ baanyɛ aha gbee lɛ afee tamɔ nɔ ni eshwã loo nɔ ni kpokpoɔ, loo tsuifaa baanyɛ ajie ehe kpo yɛ bɔ ni obaafɔ̃ oniji kɛ oyitso oha lɛ mli.

Shiɛlɔ ko baanyɛ ekɛ naagba nɛɛ akpe yɛ yiŋtoi babaoo hewɔ. Ekolɛ, eejwɛŋ hewalɛ ni ebaaná yɛ amɛnɔ lɛ he loo eesusu kɛji wiemɔ ni ekɛhaa lɛ baaye omanye. Enɛ jeee nɔ ni efɔɔɔ kaa, shi kɛji agbala jwɛŋmɔ kɛtee nɔ babaoo lɛ, ekɛ naagbai baa. Kɛ́ otsui faa dani okɛ ohe woɔ shiɛmɔ nitsumɔ lɛ mli lɛ, mɛni baanyɛ aye abua? Hesaamɔ jogbaŋŋ kɛ sɔlemɔ ni mli wa kɛha Yehowa. (Bɔfoi lɛ Asaji 4:29) Susumɔ Yehowa mɔbɔnalɛ kpele ní ekɛfɔ̃ɔ gbɔmɛi anine koni amɛbaná gbɔmɔtsoŋ hewalɛ kpakpa kɛ naanɔ shihilɛ mli ŋɔɔmɔ yɛ Paradeiso mli lɛ he. Susumɔ mɛi ni obɔɔ mɔdɛŋ koni oye obua amɛ lɛ kɛ bɔ ni ehe ehia ni amɛnu sanekpakpa lɛ he lɛ he.

Kaimɔ hu akɛ, gbɔmɛi yɛ heyeli ni amɛkɛaafee amɛsuɔmɔnaa nii, ni no hewɔ lɛ, amɛbaanyɛ amɛkpɛlɛ shɛɛ sane lɛ nɔ loo amɛkpoo. Nakai nɔŋŋ eji anɔkwale beni Yesu ye odase yɛ blema lsrael lɛ. Onitsumɔ ji ní oshiɛ kɛkɛ. (Mat. 24:14) Kɛ́ gbɔmɛi eŋmɛɛɛ bo gbɛ ni owie po lɛ, jɛmɛ ni oyɔɔ lɛ kɛ odaseyeli baaha. Obaaye kunim ejaakɛ oha Yehowa kɛ bo miitsu nii koni atsu esuɔmɔnaa nii ahe nii. Yɛ shihilɛi ni obaaná hegbɛ ni okɛwie lɛ mli lɛ, mɛni baakadi owiemɔ lɛ? Kɛ́ osusu mɛi krokomɛi ahiamɔ nii ahe lɛ, no lɛ owiemɔ baafee nɔ ni ŋɔɔ kɛ nɔ ni awie yɛ bɔɔsu naa.

Kɛ́ ooye odase, ni owie ni ofee onii taakɛ ofeɔ daa nɛɛ lɛ, enɛ baaha otoibolɔi lɛ aná he miishɛɛ. Ekolɛ, amɛbaabo Ŋmalɛ mli susumɔi ni otaoɔ ni ogba amɛ lɛ toi jogbaŋŋ. Yɛ nɔ najiaŋ ni oooje gbɛ oha amɛ wiemɔ lɛ, okɛ amɛ agba sane. Jiemɔ naanyobɔɔ su kpo. Ná amɛhe miishɛɛ, ni obo nɔ ni amɛkɛɔ lɛ toi. Eji anɔkwale akɛ, yɛ hei ni wiemɔ loo kusumii biɔ ni ajie subaŋi komɛi akpo ni akɛtsɔɔ bulɛ beni akɛ mɔkpɔŋ wieɔ lɛ, obaanyɛ oye enɛɛmɛi anɔ. Shi be fɛɛ be lɛ, esa akɛ ana bo akɛ mɔ ni hiɛ yɔɔ ŋmɔlɔŋmlɔ.

Yɛ Wiemɔ Kpoku lɛ Nɔ. Kɛ́ owie otsɔɔ kuu ko lɛ, bei pii lɛ bɔɔsu ni akɛaawie, kɛ wiemɔ ni sanegbaa yɔɔ mli hi fe fɛɛ. Eji anɔkwale akɛ, kɛ́ toibolɔi lɛ fa lɛ, no lɛ ehe baahia ni okɛ gbee ni wa awie. Kɛ́ obɔ mɔdɛŋ koni okase owiemɔ lɛ owo oyitsoŋ, loo nɔ ni oŋma lɛ fá lɛ, no lɛ ekolɛ obaasusu bɔ ni oooto owiemɔ lɛ he gbɛjianɔ jogbaŋŋ oha lɛ he babaoo tsɔ. Wiemɔ he gbɛjianɔtoo ni sa he miihia, shi kɛ́ agbala jwɛŋmɔ babaoo kɛtee nɔ lɛ, no lɛ wiemɔ lɛ kɛhamɔ baafee kpɛŋŋ kɛ nɔ ni aje gbɛ. Bɔni aaawie yɛ bɔɔsu naa lɛ baalaaje. Esa akɛ osusu osusumɔi lɛ ahe jogbaŋŋ kɛtsɔ hiɛ, shi susumɔ osusumɔi lɛ ahe babaoo, jeee wiemɔ he gbɛjianɔtoo lɛ.

Nakai nɔŋŋ eji anɔkwale beni abiɔ bo saji yɛ kpee shishi lɛ. Saamɔ ohe jogbaŋŋ, shi kaakane hetooi lɛ, loo kaakase owo oyitsoŋ. Okɛ gbee mli tsakemɔ yɛ bɔɔsu naa awie bɔ ni afee ni owiemɔ lɛ afee nɔ ni ŋɔɔ.

Wiemɔ sui ni asumɔɔ ni afeɔ kɛtekeɔ nɔ lɛ po baanyɛ atsɔɔ toibolɔi lɛ akɛ ejeee bɔɔsu naa. Ákɛ nɔkwɛmɔnɔ lɛ, esa akɛ owie ni emli atse ni okɛ nibii agbɛi tsɛmɔ kpakpa atsu nii, shi jeee bɔ ni ogbee baafee kpɛŋŋ loo jeee adebɔɔ nɔ. Kɛ́ akɛ ninefɔɔ ni akɛmaa sane nɔ mi kɛ ninefɔɔ ni akɛtsɔɔ sane mli lɛ tsu nii jogbaŋŋ lɛ, ebaaha owiemɔ lɛ aŋɔɔ, shi ninefɔɔ ni yɔɔ kpɛŋŋ loo nɔ ni awo he lɛ baagbala jwɛŋmɔ kɛjɛ nɔ ni okɛɔ lɛ nɔ. Okɛ gbeewalɛ ni sa atsu nii, shi bɔɔ mɔdɛŋ ni okɛ gbee ni wa fe nine akɛtsu nii. Bei komɛi lɛ, ehi akɛ okɛ ekãa aaawo owiemɔ mli, shi tsi ohe kɛjɛ bolɔmɔ ni ooobolɔ lɛ he. Esa akɛ okɛ gbee mli tsakemɔ, ekãafeemɔ, kɛ henumɔ atsu nii bɔ ni egbalaŋ jwɛŋmɔ kɛbaŋ onɔ loo ni eeeha toibolɔi lɛ anu he akɛ amɛhe ejɔɔɔ amɛ.

Yɛ adebɔɔ naa lɛ, gbɔmɛi komɛi yɛ gbɛ pɔtɛɛ ni amɛtsɔɔ nɔ amɛwieɔ, kɛji amɛhaaa wiemɔ po. Mɛi krokomɛi sumɔɔ sanegbaa waa yɛ amɛwiemɔ mli. Nɔ ni he hiaa ji ní owie jogbaŋŋ gbi fɛɛ gbi ni okɛ Kristofoi asu aba ojeŋ. Kɛkɛ lɛ, kɛ́ oyɛ wiemɔ kpoku lɛ nɔ lɛ, obaawie ni eŋɔɔ ni ofee nii yɛ adebɔɔ su naa.

Beni Okaneɔ Nii yɛ Mɛi Ahiɛ. Bɔ ni gbee yɔɔ ni akɛkaneɔ nii yɛ mɛi ahiɛ lɛ biɔ mɔdɛŋbɔɔ. Bɔni afee ni onyɛ otsu enɛ hu nii lɛ, kadimɔ saji otii titrii ni yɔɔ sane ni oyaakane lɛ mli lɛ jogbaŋŋ koni oyɔse bɔ ni atsɔɔ enɛɛmɛi amli ahaa lɛ. Ha enɛɛmɛi afee faŋŋ yɛ ojwɛŋmɔ mli; kɛ́ jeee nakai lɛ, no lɛ obaakane wiemɔi kɛkɛ. Kwɛmɔ bɔ ni atsɛɔ wiemɔi ni oleee lɛ. Kasemɔ nikanemɔ lɛ waa bɔni afee ni oná gbee nɔwomɔ kɛ eshibaa ni sa, ni obua wiemɔi lɛ anaa jogbaŋŋ bɔ ni ekɛ susumɔi lɛ baaha yɛ faŋŋ mli. Feemɔ lɛ shii abɔ kɛyashi onaa baatse yɛ onikanemɔ lɛ mli. Le sane lɛ jogbaŋŋ bɔ ni sa, aahu akɛ kɛ́ ookane lɛ waa lɛ, onikanemɔ lɛ baafee tamɔ sanegbaa ní ekãa yɔɔ mli. No ji bɔ ni awieɔ yɛ bɔɔsu naa.

Eji anɔkwale akɛ, wɔmaŋ nikanemɔ lɛ babaoo jɛɔ wɔ Biblia kasemɔ woji lɛ amli. Kɛfata nikanemɔ nifeemɔi ni yɔɔ Teokrase Sɔɔmɔ Skul lɛ mli lɛ he lɛ, wɔkaneɔ ŋmalɛi yɛ shiɛmɔ nitsumɔ lɛ mli kɛ be mli ni wɔhaa wiemɔi yɛ wiemɔ kpoku lɛ nɔ lɛ. Akɛ nifeemɔ haa nyɛmimɛi hii lɛ koni amɛkane saji ni abaasusu he yɛ Buu-Mɔɔ Nikasemɔ kɛ Asafo Woloŋ Nikasemɔ lɛ shishi. Akɛ nifeemɔi haa nyɛmimɛi hii komɛi ni he esa lɛ koni amɛkane wiemɔi ni aŋmala aha lɛ yɛ kpeei wuji ashishi yɛ kpeeiyalɔi ahiɛ. Kɛ́ ookane Biblia lɛ loo woji krokomɛi lɛ, kanemɔ fãi komɛi ni mɛi komɛi anaa wiemɔ yɔɔ jɛmɛ lɛ, ni kanemɔ yɛ gbɛ ni baaha sane lɛ aŋɔɔ nɔ. Kɛ́ atsɛ mɛi babaoo anaa wiemɔi asɛɛ lɛ, no lɛ tsakemɔ ogbee yɛ gbɛ ko nɔ kɛha eko fɛɛ eko. Aawo ŋaa akɛ: Kaafee kɛmiiteke nɔ, shi kɛlɛ, ha nikanemɔ lɛ aŋɔɔ yɛ adebɔɔ su naa.

Sanegbaa yɛ nii ni akaneɔ yɛ adebɔɔ su naa mli lɛ mli. Efeee tamɔ nɔ ko kɛkɛ shi moŋ, nɔmimaa yɛ mli.