Skulnyo Nifeemɔi ni Asaa He yɛ Mli Kɛha Skul Lɛ

NIFEEMƆ fɛɛ nifeemɔ ni yɔɔ skul lɛ mli lɛ haa onáa hegbɛ ni okɛaaya hiɛ. Kasemɔ nii jogbaŋŋ, ni fiofio lɛ, bo diɛŋtsɛ kɛ mɛi krokomɛi hu baana oshweremɔ lɛ faŋŋ. (1 Tim. 4:15) Skul lɛ baaye abua bo koni eha hesaai ni oyɔɔ lɛ aya hiɛ babaoo.

Ani otsui faa kɛji obaawie yɛ asafo lɛ hiɛ? Tɔmɔ ko bɛ enɛ he, kɛji akɛ okɛ ohe ewo skul lɛ mli afii komɛi po. Shi kɛlɛ, nibii komɛi baanyɛ aye abua bo koni oba gbeyeishemɔ lɛ shi. Kɛji oyɛ shia lɛ, ha ni efee oti ni ma ohiɛ akɛ obaakane nii waa. Fɔɔ sane hetoohamɔ yɛ asafoŋ kpeei ashishi, ni kɛ shiɛlɔ ji bo lɛ, okɛ ohe awo shiɛmɔ nitsumɔ lɛ mli daa. Enɛ baaha oná niiashikpamɔ ní akɛwieɔ yɛ mɛi ahiɛ. Kɛfata he lɛ, saamɔ ohe yɛ nifeemɔ lɛ mli jogbaŋŋ kɛtsɔ hiɛ, ni okase ekɛhamɔ jogbaŋŋ. Kaimɔ akɛ obaawie yɛ toibolɔi ni le bo lɛ ahiɛ. Ni dani obaaha wiemɔ ko lɛ, sɔlemɔ oha Yehowa. Ejɛɔ miishɛɛ mli ekɛ mumɔ krɔŋkrɔŋ haa etsuji ni biɔ lɛ lɛ.—Luka 11:13; Fil. 4:6, 7.

Okɛ hiɛshikamɔ atsu nii yɛ ogbɛkpamɔi amli. Ebiɔ be dani obaanyɛ oná niiashikpamɔ ákɛ wielɔ, ní otsɔ tsɔɔlɔ ni he esa. (Mika 6:8) Kɛji aŋma ogbɛi yɛ skul lɛ mli ehee lɛ, kaakpa gbɛ akɛ obaaha wiemɔ jogbaŋŋ amrɔ nɔŋŋ. Yɛ no najiaŋ lɛ, tsu wiemɔ ŋaawoo kome he nii yɛ be kome mli. Kasemɔ wolo nɛɛ mli he ni awie he yɛ lɛ. Kɛ́ eeehi lɛ, tsu ŋaawoi ni akɛha yɛ jɛmɛ lɛ he nii. Enɛ baaha oná niiashikpamɔ yɛ saji ni kɔɔ ŋaawoi ahe dani otsu nifeemɔ ni akɛha bo lɛ he nii yɛ asafo lɛ mli. Hiɛyaa baaba.

Bɔ ni Afeɔ ni Asaa He yɛ Nikanemɔ Nifeemɔ Mli

Ohe ni ooosaa kɛha maŋ nikanemɔ lɛ biɔ babaoo fe nyɛmɔ ni ooonyɛ otsɛ wiemɔi ni yɔɔ sane ni akɛha bo lɛ mli lɛ kɛkɛ. Bɔɔ mɔdɛŋ koni onu nɔ ni sane lɛ tsɔɔ lɛ shishi jogbaŋŋ. Kɛji onine shɛ onifeemɔ lɛ nɔ lɛ, kanemɔ mli kɛ nakai oti lɛ yɛ ojwɛŋmɔ mli. Bɔɔ mɔdɛŋ ni onu oti ni yɔɔ wiemɔ muu fɛɛ wiemɔ muu mli lɛ shishi ni onu susumɔ fɛɛ susumɔ ni akɛha yɛ kuku fɛɛ kuku mli lɛ shishi bɔni afee ni onyɛ okɛ susumɔi ni ja kɛ henumɔi ni sa aha. Kɛ́ eeehi lɛ, kwɛmɔ wiemɔi komekomei ashishitsɔɔmɔ wolo mli kɛha bɔ ni atsɛ́ɔ wiemɔi ní oleee jogbaŋŋ lɛ ahaa. Lé sane lɛ jogbaŋŋ. Ekolɛ, ehe baahia ni fɔlɔi aye abua amɛbii bibii lɛ ni amɛfee enɛ.

Ani akɛ nifeemɔ ewo odɛŋ akɛ okane Biblia lɛ fã ko loo ekolɛ Buu-Mɔɔ nikasemɔ lɛ mli kukuji lɛ? Kɛji nyɛyɛ kasɛt ni amɔmɔ wiemɔi awo nɔ lɛ eko yɛ nyɛwiemɔ mli lɛ, no lɛ ebaanyɛ eye ebua akɛ ooobo nikanemɔ lɛ toi ni okadi nibii komɛi tamɔ wiemɔi atsɛmɔ, bɔ ni awieɔ, saji anɔmimaa, kɛ gbee su tsakemɔ. No sɛɛ lɛ bɔɔ mɔdɛŋ ni okɛ hesaai nɛɛ awo bo diɛŋtsɛ onikanemɔ lɛ mli.

Kɛ́ oje shishi ni obɔi onifeemɔ lɛ he nitsumɔ lɛ, kwɛmɔ ní okase nikasemɔ ni wieɔ wiemɔ su ni akɛha bo lɛ he lɛ ojogbaŋŋ. Kɛ́ eeehi lɛ, tĩi mli yɛ be mli ni okɛ gbeewalɛ ekase nifeemɔ ni akɛha bo lɛ shii abɔ lɛ. Bɔɔ mɔdɛŋ ní okɛ nakai ŋaawoo ni aŋma lɛ atsu nii jogbaŋŋ bɔ ni ooonyɛ.

Tsɔsemɔ nɛɛ baaye abua bo jogbaŋŋ yɛ osɔɔmɔ nitsumɔ lɛ mli. Yɛ be mli ni okɛ ohe woɔ shiɛmɔ nitsumɔ lɛ mli lɛ, onáa hegbɛi babaoo ní okɛaakane nii otsɔɔ mɛi krokomɛi. Akɛni Nyɔŋmɔ Wiemɔ lɛ yɛ hewalɛ ni ekɛaatsake gbɔmɛi ashihilɛi hewɔ lɛ, ehe miihia ní okane lɛ jogbaŋŋ. (Heb. 4:12) Kaakpa gbɛ akɛ obaanyɛ okɛ nifeemɔ kome loo enyɔ ale nikanemɔ gbɛ̀i fɛɛ ni mɔɔ shi lɛ jogbaŋŋ. Bɔfo Paulo ŋma kɛyaha Kristofonyo onukpa ni kɛ afii babaoo ená niiashikpamɔ lɛ akɛ: “Hĩi wolo kanemɔ.”—1 Tim. 4:13.

Ní akɛ Saneyitso kɛ Bɔ ni Abaafee lɛ Aha lɛ Aaatsu Nii

Kɛ́ onine shɛ nifeemɔ nɔ yɛ skul lɛ mli ni biɔ ni okɛ bɔ ni obaafee lɛ oha lɛ atsu nii lɛ, te esa akɛ ofee oha tɛŋŋ?

Ehe miihia ni osusu nibii titrii etɛ he: (1) saneyitso ní akɛha bo lɛ, (2) bɔ ni obaafee lɛ oha kɛ mɔ ni okɛbaawie lɛ, kɛ (3) wiemɔ he ŋaawoo ni akɛha bo ni otsu he nii lɛ.

Ehe miihia ni obua nibii ni kɔɔ sane ni akɛha bo lɛ he lɛ naa. Shi dani oooya shɔŋŋ yɛ no mli lɛ, susumɔ bɔ ni obaafee lɛ oha lɛ kɛ mɔ ni okɛbaawie lɛ he jogbaŋŋ, ejaakɛ nɛkɛ nibii nɛɛ baaná sane ni akɛha bo ni otsu he nii lɛ kɛ bɔ ni obaatsu he nii oha lɛ nɔ hewalɛ. Mɛɛ shihilɛ obaasumɔ ni okɛtsu nii? Ani obaafee bɔ ni akɛ sanekpakpa lɛ haa mɔ ko ni ole lɛ lɛ he nɔkwɛmɔnɔ? Aloo ani obaatsɔɔ nɔ ni baanyɛ aba kɛji akɛ okɛ mɔ aŋkro ko kpe klɛŋklɛŋ kwraa lɛ? Ani mɔ lɛ ye bo onukpa loo oye lɛ onukpa? Mɛɛ su ekolɛ eyɔɔ yɛ saneyitso ni otoɔ gbɛjianɔ ni okɛ lɛ agba he sane lɛ he? Nibii enyiɛ eka shi faŋŋ akɛ ele momo yɛ he? Mɛɛ oti ohiɛ kã nɔ akɛ obaashɛ he yɛ nyɛsanegbaa lɛ mli? Sanebimɔi nɛɛ ahetoo ni oooha lɛ baaha bo gbɛtsɔɔmɔi ni he hiaa ni obaanyɛ okɛtsu nii.

Nɛgbɛ obaanyɛ ona nibii ni kɔɔ sane ni akɛwo odɛŋ lɛ he yɛ? Yɛ wolo nɛɛ baafai 33 kɛyashi 38 lɛ mli lɛ, agba sane ko ni kɔɔ “Bɔ ni Afeɔ Ataoɔ Nibii Amli” lɛ he. Kanemɔ, ni okɛ dɛŋdadei ni akɛtaoɔ nibii amli ni oyɔɔ lɛ atsu nii. Yɛ shihilɛi babaoo mli lɛ, obaaná saji babaoo fe bɔ ni obaanyɛ okɛtsu nii. Kanemɔ babaoo bɔ ni sa koni ole otii ní obaanyɛ oná yɛ mli. Shi kɛlɛ, beni ofeɔ enɛ lɛ, ha bɔ ni obaafee lɛ oha, kɛ mɔ ni okɛbaawie lɛ ahi ojwɛŋmɔ mli. Kadimɔ otii ni baasa kɛ nitsumɔ.

Dani obaato owiemɔ lɛ he gbɛjianɔ koni ohala naagbee nɔ kwraa lɛ, ŋɔɔ be koni okane wiemɔ he ŋaawoo ni akɛwo odɛŋ koni otsu he nii lɛ he saji amlitsɔɔmɔ lɛ. Nakai ŋaawoo lɛ kɛ nitsumɔ ji yiŋtoi titrii ni yɔɔ onifeemɔ lɛ sɛɛ lɛ ekome.

Kɛ otsu nifeemɔ ni akɛha bo lɛ he nii yɛ be ni ato lɛ mli lɛ, no lɛ obaaná miishɛɛ akɛ ooomu owiemɔ lɛ naa ejaakɛ akɛ kadimɔ ko baaha kɛji be ni akɛha bo lɛ shɛ. Shi kɛlɛ, yɛ wɔshiɛmɔ nitsumɔ lɛ mli lɛ, jeee be fɛɛ be ehe hiaa. No hewɔ lɛ, yɛ be mli ni osaa ohe lɛ, susumɔ be ni oyɔɔ lɛ he, shi yaa nɔ oma nitsɔɔmɔ ni mɔɔ shi nɔ mi.

Wiemɔ ni Kɔɔ Bɔ ni Abaafee lɛ Aha lɛ He. Pɛimɔ ŋaawoi ni yɔɔ baafa 82 lɛ mli, ni ohala nɔ ni he baanyɛ aba sɛɛnamɔ kɛha bo yɛ oshiɛmɔ nitsumɔ lɛ mli kɛ nɔ ni baaye abua bo koni okɛ sane ni akɛha bo ni otsu he nii lɛ atsu he nii jogbaŋŋ. Kɛji okɛ be saŋŋ ehi skul lɛ mli lɛ, no lɛ buu enɛ akɛ hegbɛ ni okɛaaha ohe asa ni okɛná hesaai krokomɛi kɛha oshiɛmɔ nitsumɔ lɛ.

Kɛji Teokrase Sɔɔmɔ Skul nɔkwɛlɔ lɛ tsɔɔ bo bɔ ni ofee lɛ oha lɛ, kpɛlɛmɔ nifeemɔ lɛ nɔ. Bei pii lɛ, bɔ ni abaafee lɛ aha lɛ kɔɔ odaseyeli he. Kɛji oyeko odase yɛ shihilɛi ni atsɔɔ mli nɛɛ shishi pɛŋ lɛ, okɛ shiɛlɔi ni efee nakai lɛ agba sane koni oná he nilee babaoo. Kɛ́ eeehi lɛ, bɔɔ mɔdɛŋ akɛ obaagba sane ni akɛha bo lɛ yɛ shihilɛ ni tamɔ nɔ ni okɛbaatsu nii yɛ skul lɛ mli lɛ. Enɛ baaye abua bo koni onine ashɛ oti ni he hiaa ni yɔɔ otsɔsemɔ lɛ mli lɛ nɔ.

Beni Atsuɔ Nifeemɔ lɛ He Nii ákɛ Wiemɔ ní Ahaa

Kɛji oji nuu lɛ, abaanyɛ aha bo nifeemɔ koni obaha wiemɔ kuku otsɔɔ asafo lɛ. Kɛji oosaa ohe kɛha wiemɔi nɛɛ lɛ, nibii titrii ni esa akɛ osusu he lɛ tamɔ nɔ ni ato naa momo aha skulnyo nifeemɔi ní afeɔ lɛ he nɔkwɛmɔnii lɛ nɔŋŋ pɛ. Srɔtofeemɔi titrii ni yɔɔ mli lɛ ji toibolɔi lɛ kɛ gbɛ ni atsɔɔ nɔ akɛ nifeemɔ lɛ haa lɛ.

Bei pii lɛ ehi jogbaŋŋ akɛ aaasaa he yɛ nifeemɔ lɛ mli bɔni afee ni toibolɔi lɛ ateŋ mɔ fɛɛ mɔ aná he sɛɛ. Mɛi ni eba kpee lɛ ateŋ mɛi babaoo le Biblia mli shishijee anɔkwalei lɛ momo. Ekolɛ, amɛle sane ni akɛha bo koni owie he lɛ jogbaŋŋ. Susumɔ nɔ ni amɛle momo yɛ osane lɛ mli lɛ he. Bɔɔ mɔdɛŋ ni oha amɛná he sɛɛ kɛtsɔ owiemɔ lɛ nɔ. Bi ohe akɛ: ‘Te mafee tɛŋŋ mikɛ misane lɛ atsu nii koni mikɛha hiɛsɔɔ ni mi kɛ mitoibolɔi lɛ yɔɔ kɛha Yehowa akɛ mɔ ko ni yɔɔ lɛ mli akwɔ? Mɛni yɔɔ nifeemɔ lɛ mli ni baaye abua wɔ koni wɔyoo Nyɔŋmɔ suɔmɔnaa nii? Mɛɛ gbɛ nɔ nifeemɔ nɛɛ baanyɛ aye abua wɔ koni wɔfee yiŋkpɛi kpakpa yɛ jeŋ ni heloo lɛ sɛɛdii nii lɛ ená nɔ hewalɛ lɛ mli?’ (Efe. 2:3) Sanebimɔi nɛɛ ahetooi ni haa mɔ tsui nyɔɔ emli lɛ biɔ nibii amlitaomɔ. Kɛji okɛ Biblia lɛ miitsu nii lɛ, bɔɔ mɔdɛŋ ni ofee babaoo fe ŋmalɛi lɛ kɛkɛ ni oookane. Susumɔ ŋmalɛi ni okɛtsuɔ nii lɛ ahe, ni otsɔɔ nɔ hewɔ ni odamɔɔ enɛɛmɛi anɔ omuɔ saji anaa nakai lɛ. (Bɔf. 17:2, 3) Kaabɔ mɔdɛŋ akɛ ooowie saji babaoo he. Okɛ owiemɔ lɛ aha bɔ ni ewaŋ akɛ aaakai.

Nɔ ni fata hesaamɔ he hu ji ni osusu owiemɔ lɛ he jogbaŋŋ. Kaaba enɛ shi. Kasemɔ owiemɔ hamɔ lɛ waa. Mɔdɛŋbɔɔ ni okɛwoɔ nikasemɔ lɛ mli kɛ ŋaawoo ni yɔɔ wiemɔ hesaai srɔtoi lɛ ahe lɛ kɛ nitsumɔ baaha oya hiɛ babaoo. Kɛji oji wielɔ hee loo mɔ ni ená niiashikpamɔ lɛ, saamɔ ohe jogbaŋŋ bɔni afee ni onyɛ owie kɛ nɔmimaa kɛ henumɔi ni sa osane lɛ. Yɛ be mli ni otsuɔ nifeemɔ fɛɛ nifeemɔ he nii yɛ skul lɛ mli lɛ, ha ehi ojwɛŋmɔ mli akɛ oti ni yɔɔ wiemɔ mli nikeenii ni Nyɔŋmɔ kɛha lɛ sɛɛ ji koni okɛwo Yehowa hiɛ nyam.—Lala 150:6.