Skul ko ni Sáa Wɔ Kɛha Nitsumɔi ni He Hiaa Fe Fɛɛ

¹ Mɛi yaa skul koni amɛná tsɔsemɔ ni baaye abua amɛ ni amɛnine ashɛ otii ni amɛkɛmamɔ amɛhiɛ yɛ shihilɛ mli lɛ anɔ. Shi kɛlɛ, mɛɛ oti baanyɛ afee nɔ ni he hiaa waa fe wala Halɔ lɛ diɛntsɛ yi ni aaajie kɛ mɛi krokomɛi ni aaaye abua amɛ koni amɛkase eyiŋtoi kɛ egbɛ̀i ahe nii? Eko bɛ. Yiŋtoo ni yɔɔ Teokrase Sɔɔmɔ Skul lɛ sɛɛ ji ni esáa wɔ koni wɔtsɔɔ mɛi krokomɛi wɔhemɔkɛyeli lɛ. No hewɔ lɛ, beni wɔyaa skul lɛ daa otsi lɛ, belɛ wɔmiiná hesaai ni sáa wɔ kɛha shihilɛ mli nitsumɔi ni he hiaa fe fɛɛ lɛ.

² Akɛ “Teokrase Sɔɔmɔ Skul Gbɛjianɔtoo Kɛha 2003” lɛ ewo October Wɔ Maŋtsɛyeli Sɔɔmɔ lɛ mli. Nɔ ni fata gbɛjianɔtoo wolo lɛ he ji mlitsɔɔmɔ ni yɔɔ fitsofitso ni kɔɔ bɔ ni abaafee skul lɛ aha lɛ he. Ekolɛ obaana akɛ sɛɛnamɔ yɛ he akɛ okɛ skul gbɛjianɔtoo wolo lɛ aaato owolo ni ji Benefit From Theocratic Ministry School Education, (Ná Teokrase Sɔɔmɔ Sukul Tsɔsemɔ lɛ He Sɛɛ) ni esa akɛ okɛba Teokrase Sɔɔmɔ Skul lɛ shishi otsi fɛɛ otsi lɛ mli. Susumɔ Teokrase Sɔɔmɔ Skul kɛha afi 2003 lɛ mli nibii lɛ ekomɛi ahe okwɛ.

³ Wiemɔ Su: Kɛjɛ January kɛyaa lɛ, akɛ miniti-enumɔ wiemɔ ni kɔɔ wiemɔ su ko loo nikanemɔ, nikasemɔ, loo nitsɔɔmɔ fã ko he baaje Skul lɛ shishi. Skul nɔkwɛlɔ lɛ baaha shishijee wiemɔ lɛ, loo ekolɛ ebaaha onukpa ko ni he esa aha wiemɔ nɛɛ. Ekolɛ wielɔ lɛ kɛ toibolɔi lɛ baasusu wiemɔ su lɛ shishitsɔɔmɔ kɛ bɔ ni ehe hiaa ha lɛ he. No sɛɛ lɛ, esa akɛ elɛɛ sane lɛ mli kɛtsɔ Ŋmalɛ mli nɔkwɛmɔnii amli ni eeetsɔɔ, kɛ bɔ ni akɛ wiemɔ su lɛ baatsu nii aha lɛ mli ni eeetsɔɔ lɛ nɔ, ni egbala jwɛŋmɔ kɛya bɔ ni no feemɔ baaha wɔsɔɔmɔ nitsumɔ lɛ aya hiɛ lɛ nɔ.

⁴ Nifeemɔ Ni Ji 1: Aawo nyɛmimɛi ni akɛ tsɔsemɔ wiemɔ lɛ woɔ amɛdɛŋ akɛ amɛha lɛ ŋaa ekoŋŋ ‘koni amɛgbala jwɛŋmɔ kɛya bɔ ni saji ni asusuɔ he lɛ he yɔɔ sɛɛnamɔ waa ha lɛ nɔ.’ Enɛ tsɔɔ asafo lɛ ni aaatsɔɔ lɛ bɔ ni abaanyɛ akɛ sane lɛ atsu nii aha. Kɛ akɛ nifeemɔ nɛɛ ha bo lɛ, kwɛmɔ Sɔɔmɔ Skul wolo lɛ baafa 48-49 lɛ mli kɛha ŋaawoi yɛ bɔ ni esa akɛ osaa ohe, ni okase saji ni atsɛ yisɛɛ yɛ saneyitso ni ji “Ekɛ nitsumɔ” ni atsɔɔ yɛ wolo lɛ saji ataomɔhe lɛ mli lɛ.

⁵ Biblia Kanemɔ He Gbɛjianɔtoo: Kɛji onyɛko okɛ ohe awo gbɛjianɔtoo kɛha daa otsi Biblia kanemɔ lɛ mli yɛ be ni eho lɛ mli lɛ, mɛni hewɔ okpɛɛɛ oyiŋ ni okɛ ohe awo gbɛjianɔtoo lɛ mli afi nɛɛ? Mɛi ni baafee nakai lɛ baagbe Kristofoi a-Hela Ŋmalɛi lɛ naa yɛ afi lɛ naagbee mli. Asusu sɛɛnamɔi ni yɔɔ Kristofoi a-Hela Ŋmalɛi lɛ ni akɛaaje Biblia kanemɔ shishi lɛ he yɛ Sɔɔmɔ Skul wolo lɛ baafa 10, kuku 4 lɛ mli.

⁶ Biblia Kanemɔ Mli Otii Anɔmimaa: Akpã fã nɛɛ mli kɛtee minitii nyɔŋma, bɔni afee ni toibolɔi lɛ anyɛ atsɔɔ amɛ jwɛŋmɔ yɛ otsi lɛ ŋmalɛ lɛ he. Esa akɛ mɛi ni akɛhaa lɛ aye be ni ato lɛ nɔ. Abaafee yɛ otsi fɛɛ otsi mli, ni otsi ni abaafee mlitii kɛtsɔ sanebimɔ kɛ hetoo nɔ lɛ fata he. Beni okaneɔ yitsei ni ato naa akɛ akane lɛ, taomɔ otii ni he baaba sɛɛnamɔ kɛha bo yɛ oweku nikasemɔ, sɔɔmɔ nitsumɔ, loo yɛ oshihilɛ mli. Mɛɛ Yehowa sui je kpo yɛ bɔ ni ekɛ adesai kɛ maji ye ha lɛ mli? Mɛni okase ni ewo ohemɔkɛyeli hewalɛ ni eha hiɛsɔɔ ni oyɔɔ kɛha Yehowa etee hiɛ? Jɛɛ heyeli mli ni owie oti fɛɛ oti ni yɔɔ yitsei ni ato naa akɛ akane lɛ mli lɛ ahe, kɛ kukuji ni abaakane yɛ Nifeemɔ ni Ji 2 lɛ mli lɛ po, akɛni nyɛmi nuu ni baakane nii lɛ ewieŋ kukuji lɛ ahe lɛ hewɔ.

⁷ Nifeemɔ ni Ji 2: Klɛŋklɛŋ nifeemɔ kɛha skulbii lɛ yɛ otsi fɛɛ otsi mli lɛ baafee nikanemɔ yɛ mɛi ahiɛ. Abaajie nii ni abaakane lɛ fɛɛ kɛjɛ otsi Biblia kanemɔ lɛ mli, ja naagbee nikanemɔ ni yɔɔ nyɔɔŋ lɛ mli pɛ. Abaajie nyɔɔŋ lɛ mli naagbee nikanemɔ lɛ kɛjɛ Buu-Mɔɔ lɛ mli. Esa akɛ skulnyo lɛ akane nifeemɔ ni akɛwo edɛŋ lɛ ni ekpaaa hiɛ loo ni ebaamu naa. Kɛtsɔ nɛkɛ gbɛ nɔ lɛ, ebaanyɛ eha ejwɛŋmɔ ahi enikanemɔ mli hesaai anɔ titri.—1 Tim. 4:13.

⁸ Nifeemɔi ni Ji 3 kɛ 4: Nifeemɔi nɛɛ ateŋ babaoo hiɛ saji ni abaakwɛ mli kɛtsu nifeemɔ lɛ he nii ni jɛ Reasoning wolo lɛ mli fe ekrokomɛi; ekomɛi yɛ saneyitsei pɛ. Mɛi ni ahaa amɛ nifeemɔi yɛ woji ni akɛbaatsu nii ni nifeemɔ lɛ he saji faaa, loo ní nifeemɔ lɛ hiɛ saneyitso pɛ lɛ baaná hegbɛ kɛto amɛwiemɔ lɛ he gbɛjianɔ kɛtsɔ wɔ Kristofoi awoji lɛ amli ni amɛaapɛi nɔ. Ekolɛ enɛ baaha efee mlɛo kɛha nyɛmimɛi yei lɛ akɛ amɛaaha amɛwiemɔi lɛ akɔ amɛhefatalɔi lɛ ahe.

⁹ Shihilɛ Mli ni Abaafee Yɛ: Taakɛ atsɔɔ yɛ Sɔɔmɔ Skul wolo lɛ baafa 45 lɛ, ekolɛ skul nɔkwɛlɔ lɛ baatsɔɔ shihilɛ mli ni abaafee nifeemɔ lɛ yɛ. Kɛji etsɔɔɔ lɛ, no lɛ nyɛmimɛi yei lɛ baanyɛ ahala shihilɛi ni ato naa yɛ baafa 82 lɛ eko ni amɛkɛtsu amɛnifeemɔ lɛ he nii. Kɛ nyɛmi yoo ko náa nifeemɔ kome yɛ daa nyɔji enyɔ mli lɛ, shihilɛi 30 ni abaanyɛ afee nifeemɔ lɛ yɛ mli lɛ baaha ená shihilɛi srɔtoisrɔtoi ni baahe afii enumɔ. Esa akɛ nyɛmimɛi yei ni halaa Yibɔ ni ji 30, ni ji “Gbɛ kroko ni sa kɛha he ni oyɔɔ lɛ” aŋma shihilɛ mli ni amɛbaafee yɛ lɛ yɛ amɛnifeemɔ wolo (S-89) lɛ shishigbɛ loo esɛɛgbɛ. Skul nɔkwɛlɔ lɛ baaŋma gbi ni skulnyo lɛ kɛfee enifeemɔ lɛ yɛ shihilɛ mli ni efee nii lɛ yɛ lɛ masɛi yɛ skulnyo lɛ wolo lɛ baafa 82. Ebaanyɛ efee enɛ beni eŋmaa skulnyo lɛ ŋaawoo wolo lɛ nɔ nii lɛ.

¹⁰ Ŋaawoo Wolo: Oŋaawoo wolo lɛ yɛ owolo lɛ mli. Ejeɔ kpo yɛ baafa 79-81. No hewɔ lɛ, esa akɛ okɛ owolo lɛ aha skul nɔkwɛlɔ lɛ yɛ nifeemɔ fɛɛ nifeemɔ ni obaafee lɛ sɛɛ. Ehe baahia ni skul nɔkwɛlɔ lɛ atao wolo ko ni eŋmala ŋaawoo mli otii ni skulbii lɛ tsuɔ he nii lɛ ewo mli.

¹¹ Saji Amlitĩi Kɛtsɔ Sanebimɔi kɛ Hetooi Anɔ: Abaafee Teokrase Sɔɔmɔ Skul lɛ mlitii lɛ kɛtsɔ sanebimɔ kɛ hetoo nɔ. Abaafee lɛ shikome yɛ daa nyɔji enyɔ mli, ni ebaahe minitii 30. Sanebimɔi ni abaasusu he lɛ baakã he aje kpo yɛ Wɔ Maŋtsɛyeli Sɔɔmɔ lɛ mli. Kɛ otsi mli ni abaafee saji amlitĩi kɛtsɔ sanebimɔi kɛ hetooi anɔ lɛ yagbee otsi ni abaaya kpokpaa nɔ kpee loo otsi ni kpokpaa nɔkwɛlɔ lɛ baasara lɛ nɔ lɛ, no lɛ esa akɛ asusu otsi ni nyiɛ sɛɛ lɛ mli nibii lɛ ahe otsi kɛtsɔ hiɛ ni atsi saji amlitĩi lɛ ato otsi ni nyiɛ sɛɛ lɛ nɔ.

¹² Nikasemɔhei Krokomɛi: Yɛ asafoi ni skulbii lɛ ayibɔ fa fe 50 lɛ, onukpai lɛ baanyɛ asusu nikasemɔhei krokomɛi ahe. “Abaanyɛ akɛ gbɛjianɔtoo nɛɛ atsu nii kɛha skulbii anifeemɔi lɛ fɛɛ loo emli naagbee nɔ enyɔ lɛ pɛ.” (Sɔɔmɔ Skul, bf. 285) Akɛ sɛɛkpee ŋaawoo lɛ ha yɛ asafoi ni nyɛmimɛi yei babaoo yɔɔ mli, shi nyɛmimɛi hii fioo pɛ yɔɔ ni amɛbaatsu nikanemɔ nifeemɔi lɛ ahe nii lɛ ahewɔ. Esa akɛ onukpai lɛ ahala nyɛmimɛi ni he esa koni amɛkwɛ nikasemɔi nɛɛ anɔ.

¹³ Ŋaawolɔ Kroko: Taakɛ atsɔɔ yɛ Teokrase Sɔɔmɔ Skul gbɛjianɔtoo wolo lɛ mli lɛ, esa akɛ onukpai akuu lɛ ahala ŋaawolɔ kroko ni ekɛ ŋaawoo aha onukpai kɛ sɔɔlɔi ni tsuɔ Biblia mli otii anɔmimaa kɛ tsɔsemɔ wiemɔ lɛ he nii lɛ yɛ teemɔŋ. Esa akɛ nyɛmi nuu ni akɛ enɛ he nitsumɔ ewo edɛŋ lɛ afee mɔ ni yɔɔ niiashikpamɔ, mɔ ni onukpai krokomɛi lɛ baabo eŋaawoo toi. Esa akɛ eŋaawoo lɛ afee nɔ ni mɔɔ shi jogbaŋŋ, ni ejie mɛi ayi yɛ amɛwiemɔ kɛ nitsɔɔmɔ mli hesaai kpakpai ahe, ni ejie nɔ kome loo enyɔ ni ehe baahia ni amɛya amɛhiɛ yɛ mli lɛ yi eha amɛ. Ehe ehiaaa ákɛ akɛ ŋaawoo aaaha nyɛmi nuu ko ni fɔɔ nifeemɔ lɛ yɛ enifeemɔ lɛ eko fɛɛ eko sɛɛ. Kɛlɛ, esa akɛ nyɛmi nuu ni ahala lɛ akɛ ŋaawolɔ kroko lɛ afee mɔ ni yɔɔ sɛɛyoomɔ ni nuɔ shishi akɛ abaanyɛ aye abua nyɛmimɛi ni haa maŋshiɛmɔ amrɔ nɛɛ po koni amɛya amɛhiɛ lolo.—1 Tim. 4:15.

¹⁴ Nɔ ni Esa akɛ Atao: Mɛni baaye abua ŋaawolɔ ko yɛ wiemɔ ni ahaa lɛ mlipɛimɔ mli? Nɔ ni yɔɔ adeka ni ji etɛ ni yɔɔ Sɔɔmɔ Skul wolo lɛ yitsei 53 lɛ mli titri ji nɔ ni esa akɛ atao yɛ wiemɔ ni ahaa lɛ mli lɛ anaamuamɔ kuku ko. Esa akɛ skul nɔkwɛlɔ lɛ akadi kaimɔi loo ŋaawoi krokomɛi ni yɔɔ wolo lɛ mli ni baaye abua lɛ ni ehe afee oya kɛyɔse bɔ ni akɛ sane naatsɔɔmɔ ni ja tsuɔ nii haa yɛ wiemɔ ni ahaa lɛ mli, kɛ bɔ ni ebaamɔ shi jogbaŋŋ lɛ hu. Ákɛ nɔkwɛmɔnɔ lɛ, kadimɔ sanebimɔi srɔtoi ni yɔɔ baafa 55 lɛ yiteŋgbɛ lɛ kɛ susumɔi ni yɔɔ naagbee kuku ni yɔɔ baafa 163 lɛ mli lɛ.

¹⁵ Okɛ Nibii Ahɔlɔ Hei ni Kamɔ Shi Efoji lɛ Amli: Kɛfata gbɛ̀i ni dara ni yɔɔ Sɔɔmɔ Skul wolo lɛ baafai lɛ anaabu gbɛ lɛ he lɛ, ashi gbɛ̀i foji babaoo yɛ mli koni oŋmala nii owo mli beni ofeɔ oteemɔŋ nikasemɔ kɛ beni otee Teokrase Sɔɔmɔ Skul lɛ. (Kwɛmɔ baafai 77, 92, 165, 243, 246, kɛ 250.) Kwɛmɔ ni okɛ owolo lɛ aba nikasemɔ daa otsi. Kwɛmɔ mli beni ahaa shishijee wiemɔ lɛ. Gbelemɔ owolo lɛ mli yɛ skul lɛ fai krokomɛi lɛ amli. Kadimɔ ŋaawoi ni skul nɔkwɛlɔ lɛ kɛhaa lɛ. Bó nitsɔɔmɔ mli gbɛ̀i, sanebimɔi, nɔkwɛmɔnii, mfonirifeemɔŋ wiemɔi ni akɛtoɔ nii ahe, mfonirii, yelikɛbuamɔ nibii ni anaa, kɛ nii ahetooi ni wielɔi lɛ kɛtsuɔ nii lɛ toi jogbaŋŋ. Kɛtsɔ nibii ni he hiaa ni oooŋmala lɛ nɔ lɛ, obaanyɛ okai ni okɛ otii ni nɔ bɛ ni onine shɛ nɔ kɛjɛ skul lɛ mli lɛ atsu nii.

¹⁶ Yesu Kristo le akɛ Nyɔŋmɔ Maŋtsɛyeli lɛ he sanekpakpa lɛ shiɛmɔ lɛ ji hegbɛ ni fe fɛɛ ni abaanyɛ akɛha mɔ ko. Eji enitsumɔ titri. (Mar. 1:38) Ekɛɛ akɛ: “Esa akɛ miyajajeɔ Nyɔŋmɔ maŋtsɛyeli lɛ he sanekpakpa lɛ, . . . ejaakɛ no hewɔ atsu mi.” (Luka 4:43) Ákɛ mɛi ni ekpɛlɛ ninefɔɔ akɛ wɔnyiɛ esɛɛ lɛ nɔ lɛ, wɔ hu wɔkɛ wɔhe miiwo sanekpakpa lɛ shiɛmɔ mli vii, ni wɔmiibɔ mɔdɛŋ be fɛɛ be koni wɔha wɔ “yijiemɔ afɔle” lɛ hilɛ lɛ aya hiɛ. (Heb. 13:15) Enɛ hewɔ lɛ, nyɛhaa wɔtswaa wɔfai shi akɛ wɔkɛ wɔhe baawo Teokrase Sɔɔmɔ Skul lɛ, ni ji skul ko ni baaye abua kɛsáa wɔ kɛha shihilɛ mli nifeemɔ ni he hiaa fe fɛɛ lɛ mli.