Gbɛtsɔɔmɔi Kɛha Skul Nɔkwɛlɔi

YƐ ASAFO fɛɛ asafo mli lɛ, ahalaa onukpa ko akɛ efee Teokrase Sɔɔmɔ Skul lɛ nɔkwɛlɔ. Kɛ́ atuu nɛkɛ gbɛnaanii nɛɛ awo odɛŋ lɛ, no lɛ miishɛɛ ni oyɔɔ yɛ skul lɛ he kɛ miishɛɛ ni bo diɛŋtsɛ oyɔɔ kɛha skulnyo fɛɛ skulnyo nɔyaa lɛ baanyɛ afee nibii titrii ni he hiaa yɛ nɔ ni skul lɛ baanyɛ atsu yɛ nyɛ asafo lɛ mli lɛ gbɛfaŋ.

Onitsumɔ lɛ fã ko ni he hiaa ji ní okwɛ nyɛ asafo lɛ daa otsi Teokrase Sɔɔmɔ Skul lɛ nɔ. Ha ni ehi ojwɛŋmɔ mli akɛ kɛfata skulbii ni yɔɔ nifeemɔi yɛ be fɛɛ be ni ato lɛ mli lɛ he lɛ, mɛi krokomɛi hu eba skul lɛ ni amɛmiibo toi. Kwɛmɔ skul lɛ nɔ yɛ gbɛ ni baakanya asafo muu lɛ fɛɛ nɔ, koni amɛnine ashɛ kaimɔi ni anyɛɔ atsuɔ he nii, ni kɛ hoo lɛ ekɔɔ otii titrii ni yɔɔ skul lɛ mli yɛ wolo nɛɛ baafai 5 kɛyashi 8 lɛ anɔ.

Ná skulbii lɛ fɛɛ ahe miishɛɛ, kɛji ato gbɛjianɔ ni amɛtsu nikasemɔ nifeemɔi ahe nii, loo amɛtsu nifeemɔi ni ji nɔkwɛmɔnii ahe nii, loo amɛha wiemɔi lɛ. Ye obua amɛ ni amɛbu nɔ ni amɛfeɔ lɛ, jeee akɛ nifeemɔ ko kɛkɛ, shi moŋ akɛ hegbɛ ni amɛná ni amɛkɛaaya hiɛ yɛ sɔɔmɔ ni amɛkɛhaa Yehowa lɛ mli. Eji anɔkwale akɛ mɔdɛŋ ni amɛ diɛŋtsɛ amɛbɔɔ lɛ ji nɔ titri ni haa amɛyaa hiɛ lɛ. Shi ehe miihia hu ni ojɛ mlihilɛ mli ni ojie miishɛɛ kpo, ní oye obua amɛ ni amɛna sɛɛnamɔ ni yɔɔ ŋaawoo lɛ mli, ni otsɔɔ amɛ bɔ ni amɛaafee ni amɛkɛ nakai ŋaawoo lɛ atsu nii. Bɔni afee ni onyɛ ofee enɛ lɛ, bó wiemɔ fɛɛ wiemɔ toi jogbaŋŋ bɔni afee ni onyɛ okadi nibii jogbaŋŋ.

Kwɛmɔ ni aje skul lɛ shishi ni agbe naa yɛ be naa. Feemɔ nɔkwɛmɔnɔ kpakpa kɛtsɔ wiemɔ ni owieŋ babaoo fe be ni ato kɛha no lɛ nɔ. Kɛ́ nikaselɔ ko ye be lɛ, esa akɛ bo loo osɛɛkwɛlɔ lɛ kɛ okadi ko atsɔɔ akɛ ebe eshɛ. Esa akɛ skulnyo lɛ amu ewiemɔ lɛ naa ni eshi wiemɔ kpoku lɛ nɔ. Kɛ́ nifeemɔ lɛ fã ko ye be lɛ, foo bo diɛŋtsɛ owiemɔi lɛ anɔ, ni no sɛɛ lɛ okɛ nyɛmi lɛ agba he sane yɛ kpee lɛ sɛɛ.

Kɛ́ oba kpee lɛ, esa akɛ okwɛ skul lɛ nɔ. Kɛ́ onyɛɛɛ oba yɛ be ko mli lɛ, no lɛ esa akɛ onukpa kroko ni onukpai akuu lɛ etsɔ hiɛ ehala lɛ lɛ akwɛ skul lɛ nɔ. Kɛ́ ootao ni aye abua bo koni okɛto nifeemɔi ahe gbɛjianɔ, óŋmala nifeemɔ woji lɛ anɔ nii ni oja, loo oto mɛi ni baaye mɛi anajiaŋ lɛ ahe gbɛjianɔ lɛ, no lɛ asafoŋ sɔɔlɔ ko ni onukpai akuu lɛ ehala lɛ lɛ baanyɛ aye abua kɛ enɛɛmɛi afeemɔ.

Skulbii ni kɛ Amɛhe Baawo Mli. Wó shiɛlɔi fɛɛ hewalɛ ni amɛkɛ amɛhe awo skul lɛ mli. Kɛ́ mɛi krokomɛi ni kɛ asafo lɛ bɔɔ gbagbalii lɛ kpɛlɛɔ Biblia mli tsɔɔmɔi lɛ anɔ ni amɛshihilɛ gbɛ̀i kɛ Kristofoi ashishitoo mlai kpãa gbee lɛ, no lɛ amɛbaanyɛ amɛkɛ amɛhe awo mli. Kɛ́ mɔ ko tsɔɔ akɛ eesumɔ ni ekɛ ehe awo mli lɛ, okɛ miishɛɛ ajie eyi. Kɛ́ mɔ lɛ nako atsɔ shiɛlɔ lɛ, no lɛ esa akɛ bo ákɛ skul nɔkwɛlɔ lɛ kɛ lɛ asusu taomɔ nii kɛha mɛi ni kɛ amɛhe woɔ skul lɛ mli lɛ ahe, ni ebaahi akɛ ooofee enɛ beni mɔ ni kɛ lɛ feɔ Biblia mli nikasemɔ lɛ (loo fɔlɔ ni heɔ eyeɔ lɛ) fata he. Nakai taomɔ nii lɛ nɔŋŋ ataoɔ yɛ mɔ ni baatsɔ shiɛlɔ ni abaptisiko lɛ lɛ he lɛ. Anaa enɛ yɛ Organized to Accomplish Our Ministry wolo lɛ baafa 97 kɛyashi 99. Feemɔ tsakemɔ yɛ skulbii lɛ agbɛi amli be fɛɛ be ni mɔ ko kɛ ehe aaawo skul lɛ mli kɛ beni mɔ ko aaaje mli.

Ŋaawoo Wolo lɛ kɛ Nitsumɔ. Skulnyo fɛɛ skulnyo ŋaawoo wolo lɛ yɛ lɛ diɛŋtsɛ enikasemɔ wolo lɛ mli, yɛ baafa 79 kɛyashi 81. Taakɛ akɛ kɔla eto naa lɛ, abaanyɛ akɛ ŋaawoo fɛɛ ŋaawoo ni jɛ 1 kɛyashi 17 lɛ atsu nii beni akɛ nikanemɔ nifeemɔ eha skulnyo lɛ. Kɛha nifeemɔi ni ji nɔkwɛmɔnɔ lɛ, abaanyɛ akɛ ŋaawoo fɛɛ ŋaawoo atsu nii, ja 7, 52, kɛ 53 pɛ. Abaanyɛ akɛ ŋaawoo ni kɔɔ wiemɔi ahe lɛ fɛɛ atsu nii, ja 7, 18, kɛ 30 pɛ.

Kɛ́ skul nɔkwɛlɔ lɛ kɛ ŋaawoo ko ha akɛ atsu he nii lɛ, esa akɛ ekwɛ akɛ ekɛ pɛnsil eŋma nii yɛ gbɛ ni akɛha yɛ “Gbi ni Akɛha” lɛ shishi, yɛ gbɛhe ni bɛŋkɛ ŋaawoo oti ni yɔɔ nikaselɔ lɛ wolo lɛ mli lɛ. Beni skulnyo lɛ etsu enifeemɔ lɛ he nii egbe naa lɛ, bi lɛ yɛ teemɔŋ kɛji etsu nifeemɔ(i) ni atsɔɔ yɛ ŋaawoo he sanegbaa lɛ naagbee gbɛ lɛ he nii. Kɛ́ efee nakai lɛ, no lɛ esa akɛ okadi yɛ adeka ni yɔɔ wolo lɛ nɔ lɛ mli. Kɛ́ oojie yi akɛ eya nɔ ni etsu nakai ŋaawoo lɛ nɔŋŋ he nii lɛ, no lɛ kaaŋma nɔ ko ofata he yɛ ŋaawoo wolo lɛ nɔ; kaaŋma nɔ ko yɛ “Gbi ni Agbe Naa” ni ashi lɛ efolo lɛ nɔ. Esa akɛ akadi enɛ yɛ be mli pɛ ni efee klalo akɛ ebaashi kɛya oti kroko nɔ lɛ. Kɛfata he lɛ, yɛ skulnyo lɛ wolo baafa 82 lɛ, kɛmiiya bɔ ni abaafee lɛ aha ni akɛaatsu nii lɛ abɛkugbɛ lɛ, esa akɛ aŋma gbi fɛɛ gbi ni nikaselɔ ko baaha wiemɔ lɛ yɛ jɛmɛ. Ashi gbɛ yɛ ŋaawoo wolo lɛ nɔ, kɛ bɔ ni abaafee lɛ aha lɛ hu mli, koni mɔ fɛɛ mɔ anyɛ ekɛtsu nii shii enyɔ. Esa akɛ nikaselɔi lɛ ahiɛ amɛwolo lɛ yɛ be mli ni gbɛjianɔtoo lɛ yaa nɔ lɛ.

Okɛ wiemɔ he ŋaawoo oti kome pɛ aha ní atsu he nii yɛ be kome mli. Bei pii lɛ, ehi jogbaŋŋ akɛ aaatsu ŋaawoo otii lɛ ahe nii yɛ bɔ ni ato naa aha lɛ naa. Shi kɛlɛ, kɛ́ skulbii komɛi jie hesaai komɛi ní sa kadimɔ waa akpo lɛ, no lɛ obaanyɛ owo amɛ hewalɛ koni amɛkase nikasemɔi komɛi amɛ diɛŋtsɛ ni amɛkɛtsu nii. Kɛkɛ lɛ, obaanyɛ oye obua amɛ yɛ nɔ ni osusuɔ akɛ ebaaye ebua amɛ ni amɛya hiɛ akɛ wielɔi kɛ tsɔɔlɔi ni he esa lɛ mli.

Kɛ́ skulnyo lɛ kɛ ehe ewo skul lɛ mli afii babaoo po lɛ, ebaanyɛ ená he sɛɛ babaoo kɛ́ ekase nikasemɔ fɛɛ nikasemɔ ni ekɛtsu nii lɛ. Bɔni afee ni onyɛ oye obua skulbii ni yɔɔ hiamɔ nii pɔtɛɛ komɛi lɛ, yɛ nɔ najiaŋ ni obaanyiɛ bɔ ni ato ŋaawoo wolo lɛ naa aha lɛ sɛɛ lɛ, obaanyɛ ohala wiemɔ mli hesaai komɛi ní amɛtsu he nii.

Ŋaawoo Kɛhamɔ. Kɛ́ okɛ ŋaawoo miiha lɛ, okɛ Biblia mli nɔkwɛmɔnii kɛ shishitoo mlai atsu nii jogbaŋŋ. Esa akɛ skulbii lɛ anu he akɛ Nyɔŋmɔ Wiemɔ lɛ mli shishitoo mlai ni nɔ kwɔlɔ lɛ ji nɔ ni kudɔɔ ŋaawoo ni akɛhaa kɛ gbɛ ní atsɔɔ nɔ akɛhaa lɛ.

Ha ehi ojwɛŋmɔ mli akɛ oji onyɛmimɛi hii kɛ yei lɛ ‘ahefatalɔ nitsulɔ.’ (2 Kor. 1:24) Taakɛ bɔ ni amɛji lɛ, ehe miihia ni bo hu oya ohiɛ ákɛ wielɔ kɛ tsɔɔlɔ. Bo diɛŋtsɛ kasemɔ Ná Teokrase Sɔɔmɔ Skul Tsɔsemɔ lɛ He Sɛɛ wolo lɛ, okɛ emli ŋaawoo lɛ atsu nii, ni ofee nɔkwɛmɔnɔ kpakpa kɛha mɛi krokomɛi ni amɛfee nakai nɔŋŋ.

Yɛ be mli ni ofeɔ nakai lɛ, ha efee oti ni ma ohiɛ akɛ obaaye obua skulbii lɛ koni amɛbatsɔmɔ nikanelɔi kpakpai, wielɔi ni he esa, kɛ tsɔɔlɔi ni amɛnitsɔɔmɔ mɔɔ shi jogbaŋŋ. Enɛ hewɔ lɛ, bɔɔ mɔdɛŋ ni okɛ yelikɛbuamɔ ni he hiaa aha bɔni afee ni skulbii lɛ ale nɔ ni wiemɔ sui srɔtoi lɛ ji, nɔ hewɔ ni sui nɛɛ ahe hiaa lɛ, kɛ bɔ ni aaafee ni aná. Ato nikasemɔ wolo nɛɛ he gbɛjianɔ yɛ gbɛ ni baaye abua bo koni ofee nakai nɔ. Shi kɛlɛ, bei pii lɛ, babaoo he miihia yɛ ogbɛfaŋ fe wolo lɛ mli wiemɔi ni oookane kɛkɛ. Okɛ amɛ asusu jwɛŋmɔ ni yɔɔ nɔ ni amɛkɛɔ lɛ sɛɛ, kɛ bɔ ni amɛkɛaatsu nii amɛha lɛ he.

Kɛ́ skulnyo ko bɔ mɔdɛŋ yɛ oti ko mli lɛ, jiemɔ eyi. Wiemɔ nɔ hewɔ ni emɔɔ shi lɛ loo nɔ hewɔ ni nɔ ni efee lɛ he hiaa lɛ he kuku. Kɛ́ ebaanyɛ etsu sane ko he nii ekoŋŋ ni ehe aba sɛɛnamɔ lɛ, no lɛ kwɛmɔ akɛ enuɔ nɔ hewɔ ni ebaafee nakai lɛ shishi. Okɛ lɛ asusu nɔ ni eeefee koni enyɛ eshɛ nakai oti lɛ he lɛ he. Ha emli aka shi faŋŋ, ni yɛ nakai beaŋ nɔŋŋ lɛ, okɛ mlihilɛ atsu nii.

Kaimɔ akɛ yɛ mɛi babaoo agbɛfaŋ lɛ, ewa waa kɛha amɛ akɛ amɛaate shi amɛyadamɔ mɛi ahiɛ ni amɛha wiemɔ. Kɛ́ mɔ ko nu he akɛ ebɔɔɔ mɔdɛŋ lɛ, ekolɛ ebaasusu kɛji esa akɛ eya nɔ eka ekwɛ lolo. Kasemɔ Yesu, mɔ ni mĩaaa “gãlã” loo egbeee “odonti hu ni tsoɔ sulii lɛ.” (Mat. 12:20) Susumɔ skulnyo lɛ henumɔi ahe. Kɛ́ okɛ ŋaawoo miiha lɛ, ha ehi ojwɛŋmɔ mli kɛji nikaselɔ lɛ ji mɔ hee loo shiɛlɔ ni he esa. Yijiemɔ ni hedɔɔ kɛ miishɛɛ yɔɔ mli baanyɛ akanya mɛi ni amɛya nɔ amɛfee bɔ ni amɛaanyɛ.

Okɛ skulnyo fɛɛ skulnyo aye yɛ bulɛ mli. Romabii 12:10 kɛɔ wɔ akɛ: “Mɔ fɛɛ mɔ kɛ woo aha enaanyo tsutsu.” Mɛɛ ŋaawoo ni sa kɛha Teokrase Sɔɔmɔ Skul ŋaawolɔ lɛ nɛ! Kɛ́ skulnyo lɛ ye bo onukpa lɛ, no lɛ kwɛmɔ jogbaŋŋ ni okɛ gbɛtsɔɔmɔ ni akɛha yɛ 1 Timoteo 5:1, 2 lɛ atsu nii. Ni kɛlɛ, ekɔɔɔ he eko afii abɔ ni mɔ lɛ eye, kɛ́ okɛ ŋaawoo ni kɔɔ tsakemɔ ni esa akɛ efee yɛ gbɛ ni etsɔɔ nɔ efeɔ enii lɛ gbɛfaŋ lɛ ha yɛ mlihilɛ mli lɛ, bei pii lɛ, abaabo toi oya.—Abɛi 25:11.

Kɛ́ oowo ŋaa lɛ, maa oti ni yɔɔ ŋaawoo lɛ mli lɛ nɔ mi oha skulnyo lɛ. Oti lɛ jeee ni mɔ lɛ abɔ mɔdɛŋ bɔ ni sa koni ajie eyi ni akɛɛ lɛ ni eya ŋaawoo mli oti kroko nɔ kɛkɛ. Oti lɛ jeee ni etsɔ wielɔ kɛ tsɔɔlɔ ni mɛi krokomɛi baaná ehe miishɛɛ. (Abɛi 25:27) Wɔ shwelɛ ji ni wɔkɛ wɔnikeenii ni ji wiemɔ ajie Yehowa yi ni wɔye wɔbua mɛi krokomɛi ni amɛle lɛ ni amɛsumɔ lɛ. Esa akɛ tsɔsemɔ ni wɔnáa lɛ asaa wɔ koni wɔtsu nitsumɔ ni akɛha wɔ yɛ Mateo 24:14 kɛ 28:19, 20 lɛ jogbaŋŋ. Yɛ be ni sa mli lɛ, abaanyɛ afɔ̃ nine atsɛ nyɛmimɛi hii ni abaptisi amɛ ni he esa lɛ koni amɛbaye amɛbua ní akwɛ “Nyɔŋmɔ asafoku” lɛ nɔ ákɛ maŋ wielɔi kɛ tsɔɔlɔi.—1 Pet. 5:2, 3.

Wó skulbii lɛ ŋaa koni amɛkane nikasemɔ wolo lɛ yɛ fã ni amɛshɛ nɔ yɛ ŋaawoo lɛ mli yɛ gbii fioo ko sɛɛ be mli ni akɛ nifeemɔ lɛ eha amɛ lɛ. Wó amɛ hewalɛ koni amɛkɛ nɔ ni amɛkaseɔ lɛ atsu nii yɛ be mli ni amɛsaa amɛhe kɛha nifeemɔ yɛ skul lɛ mli, amɛ daa gbi wiemɔ mli, yɛ amɛhetooi ahamɔ mli, kɛ shiɛmɔ nitsumɔ lɛ mli.

Nifeemɔi ni Akɛwoɔ Mɛi Adɛŋ. Esa akɛ afee enɛ kɛ hoo kwraa lɛ otsii etɛ dani nifeemɔ lɛ ashɛ. Esa akɛ aŋmala nakai nifeemɔi lɛ fɛɛ yɛ wolo nɔ kɛ́ eeehi.

Esa akɛ akɛ fãi ni kɔɔ asafo mli nitsɔɔmɔ he lɛ aha onukpai lɛ, kɛ́ eeehi lɛ, mɛi ni baanyɛ atsu nakai fãi lɛ ahe nii jogbaŋŋ, kɛ asafoŋ sɔɔlɔi ni he esa ákɛ tsɔɔlɔi.

Bɔni afee ni ona skulnyo nifeemɔi ni akɛhaa nyɛmimɛi hii kɛ nɔ ni akɛhaa nyɛmimɛi yei lɛ, nyiɛmɔ gbɛtsɔɔmɔi ni akɛha yɛ skul gbɛjianɔtoo lɛ mli lɛ sɛɛ. Kɛ́ nyɛmimɛi hii ni feɔ skulnyo nifeemɔi lɛ faaa shi nyɛmimɛi yei fá lɛ, no lɛ kwɛmɔ jogbaŋŋ koni oha nyɛmimɛi hii lɛ hegbɛ bɔ ni sa koni amɛha wiemɔi ni fe Biblia ni amɛaakane kɛkɛ.

Susumɔ shihilɛi amli ni aŋkroaŋkroi yɔɔ lɛ he beni ojaraa nifeemɔi lɛ. Ani ehe miihia ni okɛ nifeemɔ aha onukpa ko loo asafoŋ sɔɔlɔ ko ni eyawie yɛ gbi gbɛkɛ kome too lɛ nɔŋŋ ni eyɔɔ Sɔɔmɔ Kpee lɛ mli nifeemɔ lɛ loo nakai otsi kome too lɛ nɔŋŋ ni eyɔɔ maŋshiɛmɔ ni ebaaha yɛ asafo lɛ mli lɛ? Ani ehe miihia ni oha nyɛmi yoo ko nifeemɔ yɛ gbi gbɛkɛ kome too lɛ nɔŋŋ ni aha ebii bibii lɛ ateŋ mɔ kome nifeemɔ, ní ehe baahia ni eye ebua lɛ lɛ? Titri lɛ, yɛ oblanyo loo nikaselɔ ni abaptisiko lɛ lɛ gbɛfaŋ lɛ, ani saneyitso lɛ sa? Kwɛmɔ akɛ nifeemɔ lɛ sa ŋaawoo ni skulnyo lɛ baatsu he nii lɛ lo.

Yɛ nɔ ni kɔɔ nifeemɔi ni akɛhaa nyɛmimɛi yei lɛ ahe lɛ, bei pii lɛ skulnyo lɛ diɛŋtsɛ halaa bɔ ni ebaasumɔ ni efee lɛ koni ekɛ gbɛtsɔɔmɔi ni yɔɔ baafa 78 kɛ 82 lɛ akpã gbee. Esa akɛ ahala mɔ ko ni baaye abua, shi abaanyɛ akɛ yelikɛbualɔ kroko hu afata he. Kɛ́ skulnyo ko bi ni aha lɛ mɔ ko ní baaye abua lɛ koni etsu fã pɔtɛɛ ko he nii jogbaŋŋ lɛ, esa akɛ asusu nɔ ni ebiɔ lɛ he.

Nikasemɔhei Krokomɛi ni Fata He. Kɛ́ skulbii ní kɛ amɛhe eha lɛ fa fe 50 lɛ, no lɛ ekolɛ obaasumɔ ni otao he kroko ni skulbii lɛ baaya jɛmɛ ni amɛyafee amɛnii lɛ. Taakɛ hiamɔ ni yɔɔ he ni nyɛyɔɔ lɛ ji lɛ, abaanyɛ akɛ gbɛjianɔtoo nɛɛ atsu nii kɛha skulbii anifeemɔi lɛ fɛɛ loo emli naagbee nɔ enyɔ lɛ pɛ.

Esa akɛ nikasemɔhe fɛɛ nikasemɔhe aná ŋaawolɔ ni he esa, kɛ́ eeehi lɛ onukpa ko. Yɛ hei ni ehe baahia lɛ, asafoŋ sɔɔlɔ ni he esa baanyɛ aye najiaŋ. Esa akɛ onukpai akuu lɛ akpɛlɛ ŋaawolɔi nɛɛ anɔ. Okɛ ŋaawolɔi ni baaye abua nɛɛ atsu nii gbagbalii bɔni afee ni anyɛ akwɛ skulbii lɛ anɔ jogbaŋŋ, ekɔɔɔ he eko he ni amɛbaafee amɛnifeemɔ ni nyiɛ sɛɛ lɛ yɛ.

Nikanemɔ Skul Krɛdɛɛ. Kɛ́ onukpai akuu lɛ na akɛ wiemɔ ni awieɔ yɛ asafo lɛ mli lɛ kanemɔ he tsɔsemɔ he miihia aŋkroaŋkroi komɛi ni yɔɔ asafo lɛ mli lɛ, no lɛ obaanyɛ oto enɛ he gbɛjianɔ ofata Teokrase Sɔɔmɔ Skul lɛ he. Obaanyɛ okɛ nikanemɔ kɛ niŋmaa he ŋaa kasemɔ afata tsɔsemɔ nɛɛ he, loo oti lɛ baanyɛ afee hiɛyaa ni abaaná yɛ nikanemɔ mli.

Ehe ehiaaa ni afee skul nɛɛ yɛ be kome too lɛ nɔŋŋ mli ni afeɔ skulnyo nifeemɔi lɛ yɛ Teokrase Sɔɔmɔ Skul lɛ mli lɛ. Bɔni afee ni onyɛ okɛ yelikɛbuamɔ ni fa bɔ ni sa aha lɛ, ekolɛ be babaoo he baahia fe be ni nyɛkɛfeɔ skul lɛ. Nyɛ asafo lɛ mli onukpai lɛ baanyɛ akwɛ nɔ ni he hiaa lɛ, kɛ be ni esa akɛ akɛ nakai tsɔsemɔ lɛ aha. Abaanyɛ oto gbɛjianɔ koni atsɔɔ kuu lɛ nii loo atsɔɔ amɛ nii lɛ mɔ kome mɔ kome, yɛ bɔ ni hiamɔ lɛ ji lɛ naa.

Tsɔɔlɔ ni he esa he miihia. Kɛ́ eeehi lɛ, abaanyɛ akɛ nitsumɔ lɛ awo nyɛmi nuu ni le nikanemɔ kɛ wiemɔ jogbaŋŋ lɛ dɛŋ. Kɛ́ anaaa nyɛmi nuu ko nakai lɛ, no lɛ onukpai lɛ baanyɛ aha nyɛmi yoo ko ni he esa, ni feɔ nɔkwɛmɔnɔ kpakpa aye abua. Esa akɛ ekɛ nɔ ko ahà eyiteŋ yɛ be mli ni etsɔɔ klasbii lɛ nii lɛ.—1 Kor. 11:3-10; 1 Tim. 2:11, 12.

Atsɔɔ wolo bibioo ni ji Apply Yourself to Reading and Writing (Kasemɔ Nikanemɔ kɛ Niŋmaa) shishi kɛtee wiemɔi babaoo mli. Ato he gbɛjianɔ koni anyɛ akɛtsɔɔ nikanemɔ kɛ niŋmaa. Abaanyɛ akɛ nitsɔɔmɔ he woji krokomɛi hu atsu nii, ni fɛɛ damɔ he ni mɛi ni kɛ amɛhe ewo skul lɛ mli lɛ anikanemɔ etee hiɛ kɛyashɛ lɛ nɔ. Kɛ́ nikaselɔi lɛ tee hiɛ bɔ ni sa lɛ, esa akɛ awo amɛ hewalɛ koni amɛkɛ amɛhe awo Teokrase Sɔɔmɔ Skul gbɛjianɔtoo lɛ mli.

Ákɛ Teokrase Sɔɔmɔ Skul nɔkwɛlɔ lɛ, obaanyɛ ofee babaoo ní asafo lɛ aná he sɛɛ. Saamɔ ohe jogbaŋŋ, ni okɛ ŋaawoo ni yɔɔ Romabii 12:6-8 akpã gbee, ni obu onifeemɔ lɛ akɛ eji nii ni jara wa ni jɛ Nyɔŋmɔ ŋɔɔ ni atuu awo odɛŋ.