Bɔ ni Teokrase Sɔɔmɔ Skul lɛ He Baa Sɛɛnamɔ Kɛhaa Wɔ
1 Teokrase tsɔsemɔ ni Yehowa webii anine shɛɔ nɔ lɛ ji hegbɛ krɛdɛɛ ko ni amɛyɔɔ. (Yes. 54:13; Yoh. 6:45) Shi kɛlɛ, bɔ ni wɔnáa hesɛɛ wɔhaa lɛ damɔ mɔdɛŋbɔɔ ni wɔkɛwoɔ mli lɛ nɔ titri. Ani obaanyɛ oyɔse hewalɛ kpakpa ni Teokrase Sɔɔmɔ Skul lɛ miiná yɛ omumɔŋ shidaamɔ nɔ lɛ?
2 Hiɛsɔɔ Wiemɔi: Skul nɔkwɛlɔi babaoo eyɔse akɛ wiemɔ sui lɛ ni akaseɔ lɛ jogbaŋŋ lɛ miiha amɛ asafoi lɛ ashiɛmɔ nitsumɔ lɛ miimɔ shi jogbaŋŋ fe tsutsu lɛ. Kɛfata he lɛ, skul nɔkwɛlɔ ko eyɔse akɛ gbɛjianɔ ni ato koni toibolɔi kɛ amɛhe awo Biblia mli saji otii anɔmimaa lɛ mli lɛ eha mɛi babaoo kɛ Biblia kanemɔ he gbɛjianɔtoo lɛ miitsu nii. Yɛ Nifeemɔ ni ji 2 lɛ gbɛfaŋ lɛ, nyɛmimɛi hii babaoo ejie yi akɛ hiɛkpamɔ kɛ naamuu wiemɔ ni fataaa he lɛ haa amɛnáa bei babaoo kɛsaa amɛhe kɛha nikanemɔ lɛ, ni ehe eba sɛɛnamɔ kɛha amɛ. Amrɔ nɛɛ mɛi ni ahaa amɛ nifeemɔ nɛɛ kɛ amɛjwɛŋmɔ maa amɛ nikanemɔ mli hesaai ni amɛaaha eya hiɛ lɛ anɔ babaoo.—1 Tim. 4:13.
3 Mɔ Fɛɛ Mɔ Baanyɛ Aná He Sɛɛ: Saji ahetoohamɔ yɛ kpeei ashishi baanyɛ afee nɔ ni yɔɔ miishɛɛ. (Abɛi 15:23) Saji amlitĩi kɛtsɔ sanebimɔi kɛ hetooi anɔ lɛ ni atsɔɔ hiɛ akɛhaa wɔ lɛ haa wɔnyɛɔ wɔsaa wɔhe kɛha saji amlitĩi lɛ, ni wɔkɛ wɔhe woɔ mli kɛ miishɛɛ. Kɛfata he lɛ, akɛ Biblia woji lɛ amli saji otii anɔmimaa ni kɛ nɔ ni akɛha wɔ akɛ wɔkane yɛ Teokrase Sɔɔmɔ Skul lɛ mli lɛ kpãa gbee lɛ ebɔi Buu-Mɔɔ lɛ mli woo, ni eje shishi kɛjɛ January 1, 2004 nɔ̃ lɛ nɔ. Saji nɛɛ eye ebua mɛi babaoo koni amɛha hetooi ni woɔ mɔ hewalɛ be ni afeɔ Biblia mli saji otii anɔmimaa lɛ.
4 Mɔ fɛɛ mɔ ni eŋma egbɛi yɛ skul lɛ mli lɛ yɛ hegbɛ krɛdɛɛ akɛ eeesaa ehe ni ebatsu nifeemɔ ni akɛwo edɛŋ lɛ he nii. Wɔ fɛɛ wɔbaanyɛ wɔná hesaai kpakpai ni je kpo ni skul nɔkwɛlɔ lɛ wieɔ he yɛ kpoku lɛ nɔ lɛ he sɛɛ. Skulbii lɛ ateŋ mɔ fɛɛ mɔ hu náa ŋaawoo ni ekolɛ ekɛbaaha lɛ yɛ teemɔŋ be ni akpa kpee lɛ he sɛɛ. Nifeemɔi ni yɔɔ Ná Teokrase Sɔɔmɔ Tsɔsemɔ lɛ He Sɛɛ lɛ yitso fɛɛ yitso naagbee ní wieɔ wiemɔ sui ahe lɛ hu kɛ yelikɛbuamɔ kroko haa.
5 Kɛ́ agbala ojwɛŋmɔ kɛtee Ŋmalɛ naa susumɔi kɛ susumɔi ni anyɛɔ atsuɔ he nii anɔ yɛ skul lɛ mli, loo be ni agbe naa lɛ, ŋmaa enɛɛmɛi owo o-Sɔɔmɔ Skul wolo lɛ mli. Jwɛŋmɔ nɔ ni okase lɛ nɔ, ni osusu bɔ ni tsɔsemɔ ni jɛ Nyɔŋmɔ ŋɔɔ nɛɛ miiha omumɔŋ shidaamɔ miiya hiɛ lɛ he.