Teokrase Sɔɔmɔ Skul Kɛha Afi 2004
1 Yehowa sáa gbɔmɛi foji koni amɛtsu nitsumɔ ko ni he hiaa jeŋ muu lɛ fɛɛ. Gbɛ kome nɔ ni etsɔɔ efeɔ enɛ ji kɛtsɔ tsɔsemɔ ni akɛhaa daa otsi yɛ Teokrase Sɔɔmɔ Skul lɛ mli lɛ nɔ. Ani okɛ ohe miiwo mli kɛmiimɔ shi bɔ ni oshihilɛi ŋmɛɔ bo gbɛ? Kɛjɛ January kɛyaa lɛ, abaafee tsakemɔi fioo komɛi bɔni afee ni eye ebua nikaselɔi lɛ ni amɛná gbɛjianɔtoi lɛ ahe sɛɛ jogbaŋŋ kɛmɔ shi.
2 Yelikɛbualɔ Ŋaawolɔ lɛ Tsakemɔ: Nyɛmimɛi hii ni haa tsɔsemɔ wiemɔi kɛ Biblia mli otii anɔmimaa lɛ hiɛ esɔ ŋaawoi ni yelikɛbualɔ ŋaawolɔ lɛ kɛhaa lɛ waa. Yɛ hei ni ayɛ onukpai ni he esa ni fa bɔ ni sa lɛ, abaanyɛ atsake mɔ ni tsuɔ nii akɛ yelikɛbualɔ ŋaawolɔ lɛ daa afi koni mɔ kroko atsu. Abaanyɛ atsɔ nɛkɛ gbɛ nɔ aja nitsumɔ lɛ ni atsu; shi nɔ ni he hiaa fe fɛɛ lɛ, onukpai kɛ agbɛnɛ asafoŋ sɔɔlɔi ni he esa lɛ baaná wielɔi kɛ nitsɔɔlɔi srɔtoi ni he esa lɛ fɛɛ aniiashikpamɔi srɔtoi lɛ ahe sɛɛ.
3 Saji Amlitĩi Kɛtsɔ Sanebimɔi kɛ Hetooi Anɔ He Gbɛjianɔtoo: Kɛ́ nyɛ asafo lɛ baaya kpokpaa nɔ kpee yɛ otsi ni akɛbaafee saji amlitĩi kɛtsɔ sanebimɔi kɛ hetooi anɔ lɛ nɔ lɛ, no lɛ esa akɛ atsi saji amlitĩi lɛ (kɛ otsi lɛ mli gbɛjianɔtoo ni eshwɛ lɛ) ato enɔ otsi, ní akɛ nakai otsi ni baaba lɛ mli gbɛjianɔtoo lɛ atsu nii yɛ otsi ni nyɛbaaya kpee lɛ mli. Shi kɛlɛ, kɛ́ saji amlitĩi kɛtsɔ sanebimɔi kɛ hetooi anɔ lɛ kɛ kpokpaa nɔkwɛlɔ lɛ saramɔ lɛ yafee ekome lɛ, ehe ehiaaa ni atsake otsii enyɔ amli gbɛjianɔtoo. Yɛ no najiaŋ lɛ, esa ákɛ akɛ lala, wiemɔ su he wiemɔ lɛ, kɛ Biblia mli otii anɔmimaa lɛ atsu nii taakɛ ato he gbɛjianɔ lɛ. Esa akɛ ahala tsɔsemɔ wiemɔ (ni ahaa kɛnyiɛɔ wiemɔ su lɛ sɛɛ lɛ) kɛjɛ otsi ni baanyiɛ sɛɛ lɛ gbɛjianɔtoo lɛ mli. Akɛ Sɔɔmɔ Kpee ni heɔ ŋmɛlɛtswaa fã baanyiɛ Biblia mli otii anɔmimaa lɛ sɛɛ, ni abaanyɛ ato he gbɛjianɔ awo fãi etɛ ni eko fɛɛ eko heɔ minitii 10 mli, loo fãi enyɔ ni eko fɛɛ eko heɔ minitii 15 mli. (Esaaa ákɛ akɛ adafitswai jeɔ shishi.) Akɛ lala kɛ kpokpaa nɔkwɛlɔ lɛ gbɛjianɔtoo ni heɔ ŋmɛlɛtswaa fã lɛ baanyiɛ Sɔɔmɔ Kpee lɛ sɛɛ. Akɛ wiemɔ su he wiemɔ lɛ kɛ Biblia mli otii anɔmimaa baafee otsi ni baanyiɛ sɛɛ lɛ mli Teokrase Sɔɔmɔ Skul lɛ taakɛ ato he gbɛjianɔ lɛ, kɛkɛ lɛ akɛ saji amlitĩi kɛtsɔ sanebimɔi kɛ hetooi anɔ lɛ etsa nɔ.
4 Okɛ hegbɛ fɛɛ hegbɛ ni baaha oda yɛ mumɔŋ lɛ atsu nii. Kɛ́ oná o-Teokrase Sɔɔmɔ Skul tsɔsemɔ lɛ he sɛɛ lɛ, okɛwoɔ osafo lɛ hewalɛ, onáa gbɛfaŋnɔ yɛ Biblia mli gbalɛ mlibaa mli, ni okɛjieɔ Mɔ ni ŋma shɛɛ sane ni ŋɔɔ ni esa akɛ wɔjaje lɛ yi.—Yes. 32:3, 4; Kpoj. 9:19.