Teokrase Sɔɔmɔ Skul lɛ ni Wɔɔna He Sɛɛ Kɛmɔ Shi
1 Teokrase Sɔɔmɔ Skul lɛ efee dɛŋdade ko yɛ tsɔsemɔ ni akɛhaa wɔ yɛ “nitsɔɔmɔ he ŋaa” mli lɛ mli, bɔni afee ni wɔnyɛ wɔkɛ Biblia mli anɔkwalei lɛ aha mɛi yɛ gbɛ ni mɔɔ shi nɔ. (2 Tim. 4:2, NW) Wɔnine shɛɔ Biblia mli saji sɔrɔtoi ahe shishinumɔ ni sɛɛnamɔ yɔɔ he waa nɔ daa otsi. Mɛɛ gbɛ nɔ wɔɔtsɔ wɔna nɔmimaa akɛ wɔmiina tsɔsemɔ ni he hiaa ni skul nɛɛ kɛhaa lɛ he sɛɛ kɛmiimɔ shi?
2 Bo skul nɔkwɛlɔ lɛ wiemɔi ni ekɛjeɔ shishi yɛ be mli ni emaa saji otii ni ŋɔɔ ni obaanyɛ ole yɛ kpee lɛ shishi lɛ nɔ mi loo ejieɔ amɛ kpo lɛ toi jogbaŋŋ. Susumɔ sanebimɔi ni ebaatee amɛ shi lɛ kɛ bɔ ni obaanyɛ okɛ hetooi lɛ atsu osɔɔmɔ lɛ he nii lɛ hu he jogbaŋŋ.
3 Tsɔsemɔ wiemɔ lɛ jeee sane ko ni akala lɛ mlitii kɛkɛ. Egbalaa jwɛŋmɔ kɛyaa bɔ ni sane lɛ kɛ nitsumɔ he yɔɔ sɛɛnamɔ kɛ bɔ ni ehe aaaba sɛɛnamɔ aha bo diɛŋtsɛ lɛ nɔ. Hesaamɔ ni afeɔ kɛtsɔɔ hiɛ lɛ baaye abua bo ni ojwɛŋ saji otii lɛ anɔ jogbaŋŋ koni onyɛ okɛ ohe awo saji ni abiɔ ni ahaa hetoo ni nyiɛɔ sɛɛ lɛ mli.
4 Daa otsi Biblia kanemɔ lɛ ni ooofee lɛ baaha hiɛsɔɔ ni oyɔɔ kɛha Nyɔŋmɔ Wiemɔ lɛ mli akwɔ. Nii amlipɛimɔ lolo baanyɛ ajie saji amlitsɔɔmɔi heei babaoo ni ŋɔɔ ni baaha anɔkwale lɛ he shishinumɔ ni oyɔɔ lɛ mli alɛɛ lɛ kpo. Biblia mli saji otii ni akɛhaa lɛ fe Biblia mli sane lɛ mlitii kɛkɛ. Yɛ be mli ni wielɔ lɛ eti fɛɛ mli sɛɛ lɛ, ebaama saji otii titrii ni yɔɔ nɔ ni akane lɛ mli lɛ anɔ mi, ni ebaatsɔɔ bɔ ni amɛkɔɔ wɔshihilɛ kɛ wɔjamɔ he ehaa. Bo toi koni onyɛ okase bɔ ni akɛ Biblia mli tsɔɔmɔ tsuɔ nii jogbaŋŋ ahaa.—Lala 119:105.
5 Kɛ akɛ nikaselɔ wiemɔ wo odɛŋ lɛ, susumɔ nɔ ni abaadamɔ nɔ awo bo ŋaa ni otsu he nii lɛ he. Kanemɔ ŋaawoi ni akɛha yɛ School Guidebook lɛ mli ni kɔɔ wiemɔ su lɛ he lɛ, ni obɔ mɔdɛŋ ni okɛtsu nii. Kɛ oohala saji kɛha owiemɔ lɛ, bɔɔ mɔdɛŋ ni oma saji ni abaanyɛ akɛtsu nii yɛ sɔɔmɔ nitsumɔ lɛ mli lɛ anɔ mi.—sg bf. 96-9.
6 Kɛ oji nyɛmiyoo ni akɛ Talk No. 3 loo Talk No. 4 ewo odɛŋ lɛ, bɔɔ mɔdɛŋ ni okɛ wiemɔ lɛ aha yɛ shihilɛ diɛŋtsɛ ni baa mli. Ekolɛ shiatsɛ lɛ kɛo aaakpa gbee loo ekɛo kpaŋ gbee yɛ nɔ fɛɛ nɔ ni ooowie lɛ he; bɔɔ mɔdɛŋ otsɔɔ gbɛ ni oootsɔ nɔ oye obua mɔ lɛ ni ejwɛŋ Biblia mli shishitoo mlai ni kɔɔ he lɛ ahe. (sg bf. 153-8) Enɛ yeɔ ebuaa toibolɔi lɛ ni amɛnaa bɔ ni amɛaafee ni amɛtsu shitee-kɛ-wooi ni tamɔ nɛkɛ ni amɛkɛkpeɔ yɛ shiɛmɔ mli lɛ ahe nii. Saamɔ ohe jogbaŋŋ kɛtsɔ hiɛ, ni ojɛ mra okɛ oshiatsɛ lɛ ati efeemɔ mli. Ebafeŋ nɔ ni he baahia akɛ nyɛfee nyɛkwɛ yɛ be mli ni kpee lɛ eje shishi lɛ.
7 Awoɔ nikaselɔi ni haa wiemɔ lɛ hewalɛ akɛ amɛtara shi kɛbɛŋkɛ asa lɛ hiɛgbɛ sɛii lɛ anɔ. Enɛ fiteee be ni ehaa skul nɔkwɛlɔ lɛ nyɛɔ ekɛ eŋaawoo lɛ haa amɛ tɛɛ. Mɔ fɛɛ mɔ baanyɛ ana ŋaawoi ni ekɛhaa yɛ mlihilɛ mli ni damɔ School Guidebook lɛ nɔ lɛ he sɛɛ. Ekolɛ ediŋ bɔ ni ato ŋaawoo wolo lɛ nɔ nibii anaa aha lɛ sɛɛ; ebaahala ŋaawoo ni damɔ nɔ ni he hiaa bo bianɛ lɛ nɔ koni onyɛ oya ohiɛ jogbaŋŋ.
8 Enɛɛmɛi fɛɛ ji yiŋtoo kpakpai ahewɔ ni esa akɛ wɔsaa wɔhe kɛha Teokrase Sɔɔmɔ Skul lɛ daa otsi ni wɔya hu lɛ. Tsɔsemɔ ni wɔnine shɛɔ nɔ lɛ baanyɛ aye abua wɔ ni wɔtsɔmɔ nilelɔi ni wɔhe asa yɛ wɔ sɔɔmɔ nitsumɔ lɛ mli.—Abɛi 1:5.