Gbɛjianɔtoo Kɛha Asafoŋ Kpee Hee
1, 2. Kɛjɛ January afi 2009 kɛyaa lɛ, mɛɛ tsakemɔi abaafee yɛ asafoŋ kpeei lɛ amli?
1 Yɛ April 21 kɛyashi April 27, 2008 otsi lɛ mli lɛ, akɛ adafitswaa ko ni yɔɔ miishɛɛ ha nyɛmimɛi ni yɔɔ je lɛŋ fɛɛ lɛ. “Kɛjɛ January 1, afi 2009 kɛyaa lɛ, abaafee Asafo Woloŋ Nikasemɔ lɛ afata Teokrase Sɔɔmɔ Skul lɛ kɛ Sɔɔmɔ Kpee lɛ ahe yɛ be kome too mli. Abaatsake Asafo Woloŋ Nikasemɔ lɛ gbɛi ní afee lɛ Asafo Biblia Mli Nikasemɔ.”
2 Gbɛjianɔtoo Kɛha Kpee Nɛɛ ni Abaafee Daa Otsi Lɛ: Be ní abaaye kɛfee kpee nɛɛ, ní lala kɛ sɔlemɔ fata he lɛ baafee ŋmɛlɛtswaa kome kɛ minitii 45. Akɛ lala kɛ sɔlemɔ (Min. 5) baaje kpee lɛ shishi ni akɛ Asafo Biblia Mli Nikasemɔ lɛ baatsa nɔ (Min. 25). No sɛɛ nɔŋŋ lɛ, akɛ Teokrase Sɔɔmɔ Skul (Min. 30) lɛ baatsa nɔ. Yɛ enɛ sɛɛ lɛ, abaalá (Min. 5) kɛje Sɔɔmɔ Kpee (Min. 35) lɛ shishi. Akɛ lala kɛ sɔlemɔ (Min. 5) baamu kpee lɛ naa. Akɛ gbɛjianɔtoo kɛha Asafo Biblia Mli Nikasemɔ, Teokrase Sɔɔmɔ Skul kɛ Sɔɔmɔ Kpee lɛ baawo Wɔ Maŋtsɛyeli Sɔɔmɔ lɛ mli daa nyɔɔŋ, koni eye ebua nyɛ kɛsaa nyɛhe kɛha kpeei ni abaafee nɛɛ.
3. Te abaafee Asafo Biblia Mli Nikasemɔ lɛ aha tɛŋŋ?
3 Asafo Biblia Mli Nikasemɔ: Abaafee kpee nɛɛ tamɔ bɔ ni afeɔ Buu-Mɔɔ Nikasemɔ lɛ nɔŋŋ. Ehe ehiaaa ni atĩ nibii ni akase yɛ otsi ni ho lɛ mli lɛ amli kɛje nikasemɔ lɛ shishi. Yɛ no najiaŋ lɛ, esa ákɛ akɛ wiemɔ kuku akpa kpee lɛ hiɛ. Enɛ baaha aná be ni fá koni mɛi fɛɛ ni yɔɔ jɛmɛ lɛ kɛ saji ahetoo ni yɔɔ kuku aha. Onukpai asɛinɔtalɔ lɛ baakwɛ ní eto gbɛjianɔ koni daa otsi lɛ onukpa kroko akwɛ kpee lɛ nɔ.
4. Mɛɛ tsakemɔi abaafee yɛ Sɔɔmɔ Kpee lɛ mli?
4 Sɔɔmɔ Kpee: Atsakeŋ bɔ ni afeɔ Sɔɔmɔ Kpee lɛ mli, shi abaatse bei ni akɛfeɔ emli fãi srɔtoi lɛ anɔ. Nɔ ni abaafɔ feemɔ ji akɛ, akɛ minitii enumɔ baatsu adafitswai ahe nii. Esa ákɛ anyɛ akɛ be nɛɛ atsu adafitswai kɛ woji komɛi ní nine shɛɔ nɔ kɛjɛɔ nitsumɔ he nine lɛ dɛŋ lɛ ahe nii. Esaaa akɛ akaneɔ adafitswai tamɔ gbɛjianɔtoo kɛha shiɛmɔyaa, Maŋtsɛyeli Asa lɛ nɔ saamɔ, shika he akɔntaabuu, kɛ woji ni nitsumɔhe nine lɛ ŋmaa wɔ lɛ yɛ wiemɔ kpoku lɛ nɔ, shi moŋ akɛ saji nɛɛ baakpɛtɛ adafitswaa tao lɛ nɔ koni nyɛmimɛi akane. Esa akɛ mɛi ni baaná nifeemɔi srɔtoi lɛ amli gbɛfaŋnɔ lɛ asaa amɛhe jogbaŋŋ ní amɛkɛ be kɛ gbɛtsɔɔmɔi ni akɛha yɛ he lɛ atsu nii pɛpɛɛpɛ.
5. Yɛ otsi ní kpokpaa nɔkwɛlɔ lɛ baaba lɛ mli lɛ, te abaato asafoŋ kpee lɛ he gbɛjianɔ aha tɛŋŋ?
5 Kɛ́ Kpokpaa Nɔkwɛlɔ lɛ Ba: Afeŋ tsakemɔ yɛ gbɛjianɔtoo ni akɛtsuɔ nii kɛ́ kpokpaa nɔkwɛlɔ lɛ ba lɛ mli. Jufɔ kɛ́ agbe Teokrase Sɔɔmɔ Skul lɛ kɛ Sɔɔmɔ Kpee lɛ naa lɛ, abaalá. No sɛɛ lɛ, kpokpaa nɔkwɛlɔ lɛ kɛ minitii 30 baaha wiemɔ. Taakɛ afeɔ bianɛ yɛ otsi lɛ mli kɛ́ kpokpaa nɔkwɛlɔ lɛ ba lɛ, abaato Asafo Biblia Mli Nikasemɔ lɛ he gbɛjianɔ ni afee yɛ gbi gbɛkɛ kroko nɔ yɛ otsi lɛ mli, no sɛɛ lɛ akɛ lala kɛ kpokpaa nɔkwɛlɔ lɛ sɔɔmɔ wiemɔ lɛ baatsa nɔ. Akɛ sɔlemɔ kɛ lala baakpá kpee lɛ.
6. Mɛni ji kuu nɔkwɛlɔ lɛ nitsumɔ?
6 Kpeei Kɛha Shiɛmɔyaa: Onukpai akuu lɛ baatsɔɔ kuu nɔkwɛlɔi lɛ shiɛmɔyaa kui ní amɛbaakwɛ nɔ, ni kuu nɔkwɛlɔi lɛ baaye amɛbua nyɛmimɛi ni yɔɔ kui nɛɛ amli lɛ yɛ mumɔŋ. Kɛ́ ehe bahia ni asafoŋ sɔɔlɔ ko atsu enɛ he nii lɛ, no lɛ abaatsɛ lɛ akɛ “kuu sɔɔlɔ.”
7. Mɛni wɔbaanyɛ wɔkpá gbɛ akɛ wɔnine baashɛ nɔ kɛjɛ gbɛjianɔtoo kɛha wɔsafoŋ kpee hee lɛ mli?
7 Taakɛ atsɔɔ saji amli kɛtsɔ hiɛ lɛ, wɔbaaná nitsɔɔmɔi ni tswaa mɔ emaa shi mli ŋɔɔmɔ, ni enɛ baaha wekukpãa ni kã wɔ kɛ Yehowa teŋ lɛ mli awa. Enɛ baaye abua wɔ ni wɔfee shiɛlɔi kɛ tsɔɔlɔi ni he esa, ni atsɔse amɛ kɛha nitsumɔ ni woɔ yibii.—Efe. 4:13, 14; 2 Tim. 3:17.
8. Mɛɛ gbɛ nɔ wɔhe ní wɔɔsaa kɛtsɔ hiɛ lɛ baaye abua wɔ kɛ mɛi krokomɛi hu?
8 Kɛ́ wɔtsɔ hiɛ wɔkase nii kɛha kpeei nɛɛ, ebaaye ebua wɔ ni wɔkɛ wɔjwɛŋmɔ amamɔ otii ní abaawie he yɛ kpee lɛ eko fɛɛ eko shishi lɛ anɔ. Wɔ fɛɛ wɔbaaná hegbɛ akɛ wɔbaaha saji ahetoo koni wɔkɛ wowoo wɔhe hewalɛ. (Rom. 1:11, 12; Heb. 10:24) Oti ni esa akɛ wɔkɛ mamɔ wɔhiɛ ji ‘ni wɔha mɛi fɛɛ ana wɔshweremɔ lɛ faŋŋ’ kɛtsɔ ‘anɔkwale wiemɔ lɛ mli ni wɔɔja pɛpɛɛpɛ’ lɛ nɔ.—1 Tim. 4:15; 2 Tim. 2:15.
9. Mɛni ji wɔfaishitswaa, ni mɛni hewɔ?
9 Wɔyɛ tsakemɔ ni afee ni sa kadimɔ yɛ wɔsafoŋ kpeei lɛ amli lɛ he miishɛɛ waa. Eba akɛ wɔkɛ gbɛtsɔɔmɔi ni “tsulɔ anɔkwafo kɛ nilelɔ kuu lɛ” kɛhaa wɔ lɛ baatsu nii, ní wɔhi Tookwɛlɔ Kpeteŋkpele lɛ masɛi beni esaa wɔ kɛhaa “amanehulu” kpeteŋkpele ni ebɛŋkɛ kpaakpa lɛ.—Mat. 24:21, 45; Heb. 13:20, 21; Kpoj. 7:14.